march 12 2009 abante tonite

	Walang awa na, nagtipid pa!
	Rey Marfil
Sa record ng Upper House, as of March 4, 2009, pinakamaraming naisumiteng proposed bill at resolution si Aling Miriam (933). Ang dalawang kulelat -- sina Joker Arroyo (11) at katukayo ni Joselito Cayetano (24). Kaya’t huwag ismolin si Senador Lito Lapid kahit inaalikabok ang Tagalog-version ng Senate rules, aba’y 196 ang naihaing bills at resolution ni Leon Guerrero. Partida pa iyan, ito’y bihirang makita sa session hall subalit 86 ang nakalistang principal sponsor. Hindi lang iyan, mas masipag mag-file si Senador A­ntonio Trillanes kumpara sa utol at ilang katropa sa mino­rity bloc ng katukayo ni Joselito. Naghihimas pa ng rehas sa PNP Custodial Center si Sonny subalit nakapagtala ng 261 bills. ‘Di hamak kasing-layo ng Camp Crame ang kalama­ngan kumpara sa 87 bills ni Mr. Noted, as in Francis Pangilinan at 114 bills ni Pia Cayetano gayong araw-araw pumapasok. Paano pa kaya kung nakakalaya si Sonny, sigu­radong kakain ng alikabok sa padamihan ng bills. Kaya’t napapanahon ang tele­conferencing upang mapakinabangan ang talent ni Sonny sa lawmaking! Ni sa panagip, ayokong isiping magaling lamang sa pagdaldal ang katukayo ni Joselito at gumawa ng gimik para kaawaan ng publiko sa pang-aapi ng kanyang Tito Mike kaya’t nanalo noong 2007 mid-term election. ‘Ika nga ni Aling Matet habang namamasyal sa Cartimar at hila-hila ang alagang askal, ‘hindi nagsisinungaling ang ebidensya’. Kahit i-check n’yo pa ang record ng Indexing and Monitoring Section, Legislative Bills and Index Service sa Upper House! *** Kahit pakyawin ni Celso delos Angeles ang malala­king PR group, hindi mababago ang katotohanang gi­namit sa pansariling interes ang pondo ng Legacy Conso­lidated Group at pinagkakitaan ang pre-need plan­holders, sampu ng bank depositors. Ang lingid sa kaalaman ng publiko, maraming isyung hindi nabuksan sa Legacy probe ng Upper House, katulad ang pagtanggap ng P300 libong allowance ng isang talunang pulitiko noong 2007 elections. Siguro naman sakto ang orasan ni Mr. Palengke para matumbok ang talunang poli­tician, ma­liban kung press release lang ang “Oras Na campaign slogan”, as in dispalinghado ang baterya o kaya’y bu­ma­liko ang long hand kapag pumatak sa pangalan ng talunang opisyal! Maliban sa talunang pulitikong tumatanggap diumano ng buwanang P300 libong bayad mula Legacy Group, pati pangsustento sa kanyang mistress, as in espot o kabit, ikinarga ng isang incumbent government official sa kumpanya ni Mang Celso. Mantakin n’yo, hindi man lamang kinilabutan o nakonsensiya si incumbent official lalo pa’t dugo’t pawis ang ipinuhunan ng mga mahihirap sa Legacy Group. Isi­pin n’yo, nagpapakasarap si incumbent official subalit buong planholders at bank depositors ang nagpatak-patak sa monthly allowance ng kanyang bebot. At lumalabas pang tinipid ang kanyang mistress gayong multi-milyon ang naisusu­bing komisyon sa mga proyekto ng kumag. Maliban sa ‘daang libong’ sustento kada buwan mula sa Legacy Group, ipinagpatayo pa ng nightclub ang karelas­yong bebot. Kundi nagkakamali ang Spy, naa­sembolan ni incumbent official ang karelasyong bebot na nagtatamasa sa ‘daang libong’ sustento mula sa Legacy Group at 2 years old ang bata ngayon. Ang naka­kasukang katotohanan, pre-need planholders at bank depositors ng kumpanya ni Mang Celso ang nagpapakain sa ‘espot’ ni incumbent official. Ngayong nalalapit ang Semana Santa, hindi sapat ang pagpa-pako sa krus ni incumbent official kundi gayahin ang ginawa ni Hudas! (www.mgakurimaw.blogspot.com)