Monday, June 30, 2014

-Matuto sa leksyon ng digmaan


                                      -Matuto sa leksyon ng digmaan
                                       REY MARFIL/Spy on the Job


Napapanahon at naging mabunga ang pagpunta ni Pangulong Noynoy “PNoy” Aquino sa Japan kung saan nakipagpulong siya kay Japanese Prime Minister Shinzo Abe.

Bukod kasi sa usapin ng agawan sa teritoryo sa West Philippine o South China Sea, tinalakay din ng dala­wang lider ang mga aspetong makatutulong sa kalakalan at komersiyo ng ating bansa.

Maganda ang ibinalita ni Pangulong Aquino tungkol sa plano ng mga Japanese car companies na maglagay pa ng mga planta sa Pilipinas dahil magdudulot ito ng mga tra­baho sa ating mga kababayan.

Malaking tulong din ang gagawing pag-aaral ng Japan International Cooperation Agency (JICA) sa posibilidad na maglagay ng subway system sa Metro Manila na tiyak na makakabawas sa problema natin sa mabigat na trapiko.

Kasabay nito, nagpahayag din ng suportado si PNoy sa hangarin ni Abe na amyendahan ang Saligang Batas ng Japan para mapalawak ang partisipasyon ng kanilang bansa para mapanatili ang kapayapaan sa rehiyon ng Asya.

Sa ilalim ng kasalukuyang konstitusyon ng Japan, hindi sila maaaring basta sumaklolo sa isang bansa na inaagrabyado ng isa pang bansa. Hindi naman lingid sa kaalaman na kabilang ang Japan sa iilang bansa sa Asya na may malakas na sandatahang lakas, kasama ang China.

Sinabi ni PNoy sa isang pahayag na, “We believe that nations of goodwill can benefit only if the Japanese government is empowered to assist others and is allowed to come to the aid of those in need, especially in the area of collective self-defense.”

At sa harap ng pagpapalakas ng China at pagiging agresibo nito na angkinin ang mga pinag-aagawang teritoryo sa West Philippine o South China Sea, hindi natin alam kung saan ito hahantong. Pero nananatili ang posisyon ng Pilipinas na lutasin sa mapayapang paraan ang usapin sa West Philippine Sea.

Kaya lang, habang hinihintay natin ang magiging resulta ng kasong inihain natin sa United Nations (UN), ang China naman, walang tigil sa kanilang propaganda at pagtatayo ng instruktura sa mga pinag-aagawang teritoryo. Aba’y naglabas pa ng panibago nilang mapa na pinalilitaw na kanila na halos ang kabuuan ng pinagtatalunang karagatan.

Maging ang Japan ay may problema rin sa China dahil sa agawan nila sa isang isla sa bahagi naman ng East China Sea. Kaya naman sa tanong na sino ba ang puwedeng bumangga sa malaki? Hindi ba mas maganda kung malaki rin?

***

Ang nakakatawa nito, ang China pa ang may ganang mag-akusa sa Pilipinas na gumagawa ng hakbang na ­nakalilikha raw ng tensyon sa rehiyon. Ganito rin ang ginagawa ng China sa Vietnam na kabanggaan din nila sa teritoryo sa karagatan.

Ilang beses na inakusahan ng China ang Vietnam na nagsisimula ng tensyon sa itinatayo nilang oil rig sa teritoryong inaangkin ng Vietnam. Pero lumabas sa video footage na ang mga barko ng China ang nambabangga sa mas maliit na barko ng Vietnam.

Sa pagbisita ni PNoy sa Japan, ginunita nito ang nangya­ring pagbagsak ng Amerika ng bomba nuklear sa Nagasaki at Hiroshima noong panahon ng digmaan na ikinamatay ng napakaraming Japanese. Ang naturang kabanata sa Japan ay nag-iwan ng marka sa mundo tungkol sa kalupitan ng digmaan.

Kung noon ay naging agresibo ang Japan, marahil ay natuto na sila sa nangyaring karanasan sa digmaan. Maging ang Pilipinas ay naranasan din ang matinding kalupitan ng digmaan dahil halos mabura ang Maynila sa tindi ng mga bombahan.

Sa nangyaring karahasan at dami ng buhay na nasayang noong World War II, tiyak na walang lider ng anumang bansa ang magnanais na maulit ang digmaan. At sana lang, kasama rito ang China.

Laging tandaan: “Bata mo ‘ko at Ako ang Spy n’yo.” (mgakurimaw.blogspot.com)


Friday, June 27, 2014

Kontrolado!



                                                                      Kontrolado!  
                                                                     REY MARFIL


Magandang balita para sa mga batang mag-aaral ang ipapatupad na P1 bilyong “feeding program” ng administrasyong Aquino upang sugpuin ang malnutrisyon sa bansa.
Pangungunahan ang implementasyon ng programa ng National Nutrition Council na nasa ilalim ng Department of Health (DOH).

Makakatuwang sa pagpapatupad ng programa ang Department of Agriculture (DA), Department of Science and Technology (DOST), Department of Trade and Industry (DTI), Department of Interior and Local Government (DILG) at Commission on Higher Education (CHED).

Pangunahing pagkain sa programa ang tinatawag na malunggay recipe na ibibigay nang libre sa mga mag-aaral.

Kasama rin sa programa ang pagkakaloob ng alituntunin sa mga kantina sa eskwelahan kaugnay sa mga pagkaing mayaman sa nutrisyon na dapat na ibenta.

Bawal na bawal na ngayon ang pagbebenta ng junk foods at tanging ang mga mayayaman sa nutrisyon ka­tulad ng prutas at gulay na mga pagkain ang papayagang ihain sa mga mag-aaral.

Hindi pa kasama sa programang ito ang “supplementary feeding program” ng DSWD at hiwalay pang katulad na programa ng lokal na pamahalaan katuwang ang mga pribadong grupo at korporasyon.

Batid ni Pangulong Noynoy “PNoy” Aquino ang kahalagahan na manatiling busog ang mga bata upang lalong mas maging aktibo at makapag-isip sa kanilang mga aralin.

***
Isa pang magan
dang balita sa mga magsasaka ng niyog ang kautusan ni PNoy na nagdeklara ng emergency para kontrolin ang pesteng sumisira sa mga niyog sa Cavite, Laguna, Batangas, Rizal, at Quezon (Calabarzon).

Siguradong malaki ang maitutulong ng kautusan ng Pangulo upang tugunan ang problemang kinakaharap ng ating mga kababayang nagtatanim ng niyog na nalalagay sa alanganin ang kanilang kabuhayan.

Inilabas ng Pangulo ang Executive Order (EO) No. 169 para maglatag ng emergency na mga hakbang upang kontrolin at puksain ang pesteng Aspidiotus Rigidus na sumisira sa mga niyog.

Pangunahing ahensya ang Philippine Coconut Authority (PCA) sa pagkakaloob ng tulong sa apektadong mga magsasaka.

Sa ilalim ng EO, nasa mandato ng PCA ang pagtukoy sa mga lugar na sinalanta ng peste at makapagbigay ng solusyon sa problema.

Kabilang sa mga ayuda ang pagkakaloob ng mechanical, chemical at biological na suporta para magamot ang nasisirang mga niyog at maiwasan pa ang kontaminasyon.

Awtorisado ang PCA na magkaloob ng permiso sa pagbiyahe ng coconut planting materials mula sa isang lokasyon patungo sa ibang mga lugar. Kukumpiskahin naman ng kinauukulan ang mga materyales na ilegal na ibiniyahe at papatawan ng multang P5,000 ang sinomang lalabag.

Magiging katuwang naman ang mga lokal na pamahalaan lalung-lalo na ang mga boluntaryo sa mga barangay para sa mabilis na pagsugpo sa peste katulad ng pagpapakalat ng impormasyon sa tamang pagharap sa krisis.

Manggagaling naman ang pondo sa PCA para ipatupad ang mga programang makakagaan sa pinapasang suliranin ng mga nagtatanim ng niyog.

Isang insekto ang Aspidiotus Rigidus na sumisira sa dahon ng niyog na nakakaapekto sa magiging bunga.

Kitang-kita kung papaano pinapahalagahan ng Pa­ngulo ang interes ng niyugan sa bansa at ayaw na niyang kumalat pa ang problema sa ibang mga lugar lalo’t kilala ang Pilipinas bilang nangungunang supplier ng mga produkto ng niyog sa buong mundo.

Nakakasiguro tayong ginagawa ni Pangulong Aquino ang lahat ng makakaya nito para protektahan ang kagalingan at interes ng mga magniniyog.

Laging tandaan: “Bata mo ‘ko at Ako ang Spy n’yo.” (mgakurimaw.blogspot.com)

Wednesday, June 25, 2014

-Mga ‘bayani’ ng kanilang sining









                                        -Mga ‘bayani’ ng kanilang sining
                                          REY MARFIL/Spy on the Job



May mga nadisyama sa hindi pagkakasama ng Superstar na si Nora Aunor sa mga hinirang na National Artists ng bansa ngayong taon ni Pangulong Noynoy ‘PNoy’ Aquino. Pero anuman ang dahilan kung bakit hindi nakasama si Aunor o Ate Guy sa listahan ng mga pambansang alagad ng sining ngayong 2014, tiyak na may balidong dahilan ang ating Pangulo.

Dahil sa pagkakalaglag ng pangalan ni Aunor sa listahan ng mga hinirang na national artists na inirekomenda ng National Commission on Culture and the Arts at ng Cultural Center of the Philippines, may ilang kritiko ang nagsasabing parang naulit daw ang nangyari noong 2009 na umabot sa Korte Suprema ang listahan ng mga idineklarang national artists ni dating Pangulong Gloria Macapagal-Arroyo.

Ngunit sa totoo lang, malayung-malayo ang sitwasyon ngayon sa hinirang ni Aquino kumpara sa ginawa noon ni Mrs. Arroyo.

Sa panahon ni Aquino, inayunan niya at hinirang na national artists ang mga kapwa nominado ni Aunor na sina Alice Reyes (dance); Francisco Coching (visual arts); Cirilo Bautista (literature); Francisco Feliciano (music); Ramon Santos (music) at Jose Maria Zaragoza (architecture, design and allied arts).

Habang sa panahon ni Mrs. Arroyo, hindi lang niya binalewala ang listahan na inirekomenda ng NCCA at CCP, nagsingit pa siya ng sarili niyang mga rekomendado na kanyang hinirang na national artists, na kalaunan ay ibinasura ng Korte Suprema.

***

Sa hindi pagkakasama ng pangalan ni Aunor sa bagong listahan ng prestihiyosong national artists, may naglabasang mga espekulasyon tungkol sa posibleng dahilan kung bakit hindi inaprubahan ni PNoy ang pangalan ng batikang aktres.

Kabilang sa mga isyung lumabas, ayon sa mga kuwento ng tsismosong si Mang Kanor -- ang kinakaharap na kasong paggamit ng iligal na droga noon ni Aunor.

Ang hirit naman ni Mang Gusting: Bagaman “pinawalang-sala” ng korte sa US si Aunor, nangyari ito dahil sa pagsunod niyang sumailalim sa ilang buwang rehabilitasyon. Kaya hindi tamang sabihin na “na­absuwelto” naman si Ate Guy sa isyu ng droga sa Amerika kaya hindi iyon dapat gamiting katwiran para hindi siya ideklarang national artist.

Ngunit sa totoo lang, walang dahilan na sinabi ang Palasyo kung bakit hindi nakasama si Aunor ng anim na bagong hinirang na national artists. Basta ang paliwanag ng Malacañang, ginamit ni PNoy ang nakasaad sa batas na may kapangyarihan ang Pangulo na tanggihan ang ini­rekomenda ng NCCA at CCP -- at hindi siya obligadong magbigay ng paliwanag.

Bagaman may ilang tagasuporta ng aktres at maging mga miron siguro ang naiintrigang malaman ang dahilan ni PNoy para hindi ibigay kay Aunor ang pagkilala bilang pambansang alagad ng sining -- ang malaking katanungan, handa ba sila o tayo na malaman kung anuman ito? Makatutulong ba o makasasama lang para sa aktres kung anuman ang posibleng dahilan na iyon?

Bilang national artist, hindi lang ang mga nagawa nila at naiambag nila sa kanilang larangan ng sining ang dapat na tingnan, kundi pati ang magiging kontribusyon nila para magsilbing mabuting ehemplo sa mga tao. Aba’y hindi basta-basta ang pagkilala at biyayang makukuha ng isang national artist dahil sila ang magsisilbing “bayani” ng sining na kanilang kinabibilangan.

Bata pa naman at malakas pa si Ate Guy, marahil kung hindi man ito ang panahon, darating din ang takdang araw na makakahilera na niya ang mga kapwa artistang naging national artists gaya nina Dolphy at ‘Da King’ Fernando Poe Jr.
Laging tandaan: “Bata mo ko at Ako ang Spy n’yo.” (mgakurimaw.blogspot.com)

Monday, June 23, 2014

Baluktot na ipinaglalaban










                                            Baluktot na ipinaglalaban
                                         REY MARFIL/Spy on the Job


Ilang mga kababayan natin ang naabala nitong Huwebes nang mahirapan sila sa pagsakay sa mga pampublikong sasakyan. Dahil ito sa ginawang welga ng ilang transport group na tutol sa bagong patakaran na ipatutupad ng isang ahensya ng pamahalaan, na kung tutuusin ay sila rin naman ang makikinabang.

Nagsagawa ng tigil-pasada ang ilang transport group bilang pagtutol daw nila sa bagong patakaran ng Land Transportation, Franchising and Regulatory Board (LTFRB) na nagtataas ng multa sa mga mahuhuling kolorum o iligal na mga sasakyang pumapasada at mga hindi rehistrado.

Sa totoo lang, hindi talaga biro ang bagong multa na iminungkahi ng LTFRB sa mga pasaway na motorista lalo na sa bus dahil tumataginting na P1 milyon ang babayaran ng operator na hindi susunod dito. Samantala, P50,000 naman ang multa sa mga kolorum na jeepney at P200,000 sa mga van na kadalasan na gamit sa shuttle service.

Ang tanong, sino ba ang makikinabang kapag nawala ang mga kolorum at hindi rehistradong mga sasak­yan sa kalye? Hindi ba ang mga motoristang sumusunod sa batas at mga pampasaherong sasakyan na sumusunod din sa batas?

Kaya naman sa halip na makakuha ng simpatiya sa publiko ang mga nagwelgang transport operator, pinagdudahan pa ang tunay na pakay nila sa pagwewelga. Bakit nga naman hindi sila pagdududahan, parang lumalabas kasi na sadyang sila ang pasaway na hindi susunod sa bagong patakaran kaya ayaw nila ang mataas na multa.

Pero ang mga legal na bumibiyahe at may tamang prangkisa, nagrereklamo na nababawasan ang kanilang kita dahil sa naglipanang mga kolurum na pampasaherong sasakyan na umaagaw sa kanilang mga pasahero.

***

Bukod sa napagkakaitan ng kita ang mga legal na ope­rator, dagdag na pasikip sa kalye ang mga kolorum na sasakyan. Hindi pa sila nagpaparehistro ng kanilang sasakyan kaya pinagkakaitan din nila ng kita ang gobyerno.

Liban diyan, nagdudulot din sila ng panganib sa mga pasahero dahil kung hindi sila rehistrado, madali silang makakagawa ng kalokohan at magiging mahirap sa mga awtoridad na matukoy sila dahil nga wala silang rekord.

Papaano mo matutukoy ang isang taxi o shuttle service kapag ginamit ang sasakyan sa krimen na peke ang prangkisa o tampered ang plaka? Iyan ay kabilang sa mga nais maiwasan ng LTFRB sa ipatutupad na bagong singil sa multa.

Maliit lang kasi ang multang umiiral ngayon kaya tila mani lang sa mga operator kapag nahuli sila. Pero kung itataas nga naman ang multa, tiyak na magdadalawang-isip na silang sumugal at bumiyahe.

Kaya mahirap ding tanggapin ang katwiran ng ilang nagprotesta na mas lantad sila sa mga mangongotong kapag itinaas ang multa. Simple lang naman ang sagot diyan, kung kolorum ka at hindi nakarehistro ang iyong sasakyan, huwag kang bumiyahe para hindi ka mahuli o makotongan.

Sa katwiran nila na mahirap daw na makakuha ng prangkisa ng sasakyan, dapat nilang isipin na sadyang may limitasyon ang ipinamimigay na prangkisa ng LTFRB lalo na sa mga lugar na sobrang dami na ng bumibiyahe at nagpapasikip na sa kalye. Kaya hindi dapat gawing katwiran na walang available na prangkisa kaya mabuting maging kolorum na lamang.

Pero dahil sa ginawang welga ng ilang transport group, mukhang magkakaroon ng mga bakanteng prangkisa. Dapat suriin ng LTFRB ang prangkisa ng mga nagwelga dahil paglabag iyon sa kanilang obligasyon na magsilbi sa mga mamamayan.

Kung kakikitaan ng basehan sa paglabag ang mga nagwelga, dapat lang na alisan sila ng prangkisa at ibigay ito sa mga karapat-dapat na transport group na handang magsilbi sa kanilang mga kababayan, at handang sumunod sa batas.

Laging tandaan: “Bata mo ‘ko at Ako ang Spy n’yo.” (mgakurimaw.blogspot.com)

Friday, June 20, 2014

Ginagawa ang lahat



                                                               Ginagawa ang lahat  
                                                                    Rey Marfil

Magandang balita ang kautusan ni Pangulong Noynoy “PNoy” Aquino na aprubahan ang pagpapalabas ng P1.9 bilyong pondo para suportahan ang mga programa sa rehabilitasyon ng Department of Social Welfare and Development (DSWD) at Department of Education (DepEd) para sa mga biktima ng super typhoon Yolanda at lindol sa Bohol.

Sa pamamagitan ni Executive Secretary Paquito Ochoa Jr., iniutos ni PNoy sa Department of Budget and Management (DBM) ang pagpapalabas ng pondo - P1 bilyon sa DepEd at P912 milyon sa DSWD.
Batid kasi ni PNoy ang kahalagahan na magtuluy-tuloy ang tulong at ayuda sa mga nabiktima ng kalamidad hanggang makabangon ang mga ito.

Gagamitin ng DepEd ang P1 bilyon sa pagkumpuni at rehabilitasyon ng 2,800 silid-aralan sa 771 pampublikong mga eskwelahan na sinira ng Yolanda sa mga munisipalidad ng Eastern at Western Visayas.

Ilalaan naman ng DSWD ang P912 milyon para sa ayuda sa pabahay ng 42,771 pamilya mula sa 17 munisipalidad sa Bohol matapos masira ang kanilang mga ta­hanan dahil sa malakas na lindol.

Kukunin ang P1.9 bilyon sa Rehabilitation and Reconstruction Program Fund sa ilalim ng 2014 General Appropriations Act. Matatandaang binayo ng Yolanda ang Eastern Visayas at mga parte ng Western at Central Visayas noong Nobyembre 8, 2013. At napaka-agresibo ni Sec. Ping Lacson na maisakatuparan ang rehabilitasyon bago magtapos ang taong 2016.

Ayon sa datos ng US Agency for International Deve­lopment fact sheet, umabot sa 6,300-katao sa bansa ang namatay sa pananalasa ng bagyong Yolanda na naglagay sa alanganin sa buhay ng 4.1 milyong katao, at sumira sa 1.1 milyong mga bahay. Lubhang napakalaki nga ng bilang ng mga nabiktima ng bagyo kung saan 16 milyong Filipino ang naapektuhan.

Sa pangkalahatan, tinatayang 3.2 milyong Filipino ang naapektuhan. Sa tulong ng matuwid na daang kampanya ni PNoy, asahan na nating mas magiging mabilis ang pagtugon ng kinauukulang mga ahensya ng pamahalaan para sa pangangailangan ng mga nasalanta.

Kitang-kita naman na hindi nagpapabaya ang pamahalaang Aquino sa pagtugon sa pangangailangan ng ating mga kababayang naapektuhan ng serye ng mga trahedya sa bansa.

***

Napag-usapan ang good news, maganda ang panukala ni Quezon City Rep. Winston “Winnie” Castelo sa Kongreso na pagyamanin ang posibilidad na lumago pa ang ekonomiya ng Pilipinas sa trilyon-dolyar sa susunod na isa at kalahating dekada.

Pinapatutukan ni Castelo, kasapi ng Liberal Party (LP), sa pamamagitan ng kanyang House Resolution (HR) No. 112 ang magandang arangkada ng ekonomiya na siguradong pakikinabangan ng maraming mga Filipino dahil sa patuloy na pag-igting ng daang matuwid ni PNoy.

Hinihiling ng resolusyon ni Castelo sa House committee on economic affairs na masusing pag-aralan ang pagtayang ginawa ng Institute for Humanist Studies (IHS), isang United States-based think tank, na nakita ang ekonomiya ng Pilipinas na lalago sa trilyon-dolyar kung maipagpapa­tuloy ang mga repormang naisagawa ni PNoy.

Kaya importanteng hindi tiwali ang papalit na lider ng bansa upang hindi mawalan ng saysay ang magandang nasimulan ni Pangulong Aquino.

Hindi na rin nakakapagtaka na makamit ng bansa ang nakitang positibong bagay ng IHS sa ekonomiya ng Pilipinas lalo’t umaarangkada ang mga programa sa reporma ni PNoy. Nakita ng IHS na magiging triple ang ekonomiya ng bansa sa 2030 lalo’t kinilala itong isa sa pinakamahusay noong nakalipas na taon.

Naniniwala rin tayo sa IHS na aabot ang gross domestic product (GDP) ng bansa mula sa kasalukuyang $280 bilyon patungong $680 bilyon sa 2024. Laging tandaan: “Bata mo ‘ko at Ako ang Spy n’yo.” (mgakurimaw.blogspot.com)

Wednesday, June 18, 2014

Sugpuin ang mga peste



                                                                 Sugpuin ang mga peste  
                                                                   REY MARFIL

Anak ng buko! May peligrong nagbabanta sa industriya ng niyugan sa bansa dahil sa pagsalakay ng mga peste na “coconut scale insects” na mas kilala sa tawag na cocolisap.

Dahil sa peste, nagpalabas na si Pangulong Noynoy ‘PNoy’ Aquino ng isang executive order (EO) na nagde­deklara ng state of emergency sa mga lugar na matinding tinamaan ng napakaliit na peste. Ito ay ang mga lugar sa Cavite, Laguna, Batangas, Rizal, Quezon at Basilan.

Hindi biro ang bantang dala ng cocolisap dahil nakali­lipat sila sa ibang lugar kapag natangay ng ha­ngin. Sa ngayon, tinatayang umaabot na sa isa hanggang dalawang milyong puno ng niyog ang pinapak ng mga peste.

Kahit napakaliliit ng mga pesteng ito, lintek naman ang pinsalang ibinibigay nila sa puno ng niyog o buko.

Mula sa dahon, katawan, hanggang sa bunga ng puno, inaatake ng mga ito. Kaya naman malaking perwisyo ito sa ating mga magsasaka ng niyog at iba pang mamamayan na nakikinabang sa biyayang hatid ng puno.

Ang bunga kasi ng niyog na “buko”, sikat na pamatid uhaw na ngayon na “buko juice”. Ang laman ng buko ay ginagawang virgin oil at kopya, at puwedeng gawing panggatong ang bao nito. Ang mga dahon naman ng niyog ay nagagawang bag o bayong at ang tangkay nito ay ginagawang walis tingting. Idagdag pa ang “coco lumber” na gamit sa pagtatayo ng bahay na mula siyempre sa katawan mismo ng puno.

Biruin niyo ang masasayang na biyaya sa puno ng niyog sa mga tao kung hindi magagapi ang pamemerwisyong ginagawa ng cocolisap.

***

Magiging malaking hamon kay Presidential Assistant for Food Security and Agricultural Modernization Sec. Kiko Pangilinan ang pagsugpo sa problemang dulot ng cocolisap. Pero para magtagumpay siya, tiyak na kakailanganin niya ang tulong ng lokal na pamahalaan, mga magsasaka, mga may-ari ng lupa at lahat ng stakeholders ika nga sa industriya.

Aba’y milyun-milyong ektaryang lupain ng niyugan ang kailangang puntahan at bombahin ng kung ano mang kemikal na magagamit para mapuksa ang mga peste. Pero dapat tiyakin na walang masamang epekto sa lupa, puno at maging sa tao kung ano man ang kemikal na gagamitin na panlaban sa cocolisap.

Marahil ay maganda rin sigurong tumulong ang Department of Science and Technology at maging ang ating mga matatalinong kababayan na imbentor na makakatuklas ng eco-friendly na kemikal na garantisadong tepok ang cocolisap.

Hindi naman siguro magiging problema ang pondo na gagamitin na pandigma sa peste dahil naglaan na ang Department of Budget ng P400 milyon para sugpuin ang cocolisap. Ang kailangan na lamang siguro ay epektibong estratehiya at tamang sandata at pagkakaisa ng lahat para matapos na ang problemang dulot ng mga peste.

Hindi biro ang dahilan para protektahan natin ang ating industriya ng niyugan dahil noong 2011 ay umabot sa halos $2 bilyon ang perang ipinasok nito sa ating bansa.
Laging tandaan: “Bata mo ko at Ako ang Spy n’yo.” (mgakurimaw.blogspot.com)


HOME TOP
Copyright © 2011 MONICA PUBLISHING CORPORATION
ALL RIGHTS RESERVED

designed & developed by: MIS SECTION

AddThis What's Next

Monday, June 16, 2014

Mga tagapagmana ng kalayaan



                                                          Mga tagapagmana ng kalayaan  
                                                                         REY MARFIL

May nabubuhay pa kayang Pinoy na ang edad ay higit sa 116? Kung wala na, tayo na talaga ang henerasyon ng mga Pilipino na tagapagmana ng kalayaan na ipinaglaban at ipinagbuwis ng buhay ng ating mga dakilang bayani, mga kawal at mga makabayang kababayan.

Sa internet, lumilitaw na 111-anyos ang edad ng nabuhay na pinakamatandang beterano ng ikalawang pandaigdigang digmaan. Ang iba naman ay may edad na 106 at 104 na kapwa rin WWII veterans, panahon ng pakikidigma ng Pilipinas sa Japan.

Pero wala na yatang nabubuhay na beterano na nakidigma sa mga Kastila o Amerikano, o kahit man lang isinilang nang mga panahon na iyon para maikuwento ang mga naalaala niya sa kabanata ng ating bayan na hindi pa malaya sa kamay ng dayuhan. Panahon na de-numero ang galaw ng mga Pilipino at walang pagkakakilanlan bilang isang nasyon.

Ngunit ang lahat ng iyon ay 116-taon na ang nakararaan. Salamat sa ating mga ninuno na hindi nawalan ng pag-asa at patuloy na ipinaglaban ang kalayaan ng Pilipinas -- sa marahas man o mapayapang paraan. Ngayon, tayo’y bansang malaya na, at kilala sa buong mundo bilang mga Pilipino.

Kung wala na ang mga ninuno natin na nakipaglaban noon sa mga Kastila at Amerikano, nandiyan pa ang mga beterano nating nakatatanda at mga sibilyan na nakipaglaban sa mga Hapon noong WWII.
Pero tiyak na iilan na lamang sila. At habang sila’y nabubuhay pa, dapat ipakita natin ang pasasalamat sa kanilang kabayanihan.

Mahalaga rin na maitala ang kanilang mga kuwento sa mga pangyayari upang mabigyan tayong mga tagapagmana ng kalayaan ng sapat na kaalaman sa kanilang kasaysa­yan; tungkol sa mga hirap na kanilang pinagdaanan sa panahon ng digmaan, mga karahasan na nasaksihan, at pati ­siyempre ang kanilang tagumpay.

Paglingon ito sa nakaraan at magagamit ng ating mga lider ang mga kuwento nila bilang gabay ng kanilang mga desisyon sa hinaharap.

***

Tayong mga nabubuhay ngayon at masasabing tagapagmana ng kalayaan, obligasyon naman natin na hindi lang pangalagaan ang ating kasarinlan, kundi pagyabungin din ito. Ito’y sa paraan ng pagiging mabuting mamamayan, at tagapagbantay laban sa mga opisyal na gumagawa ng katiwalian at nagsasamantala sa tinatamasa nating kalayaan.

Hindi naman porke’t malaya na tayo ay malaya na ring makakapagbulsa ng pondo ng bayan ang ilang tiwaling namumuno sa ating bayan. Sabi nga ni Pangulong Noynoy “PNoy” Aquino sa kanyang talumpati sa Independence Day celebration sa Naga City, “Mulat po ang lahat: Hindi nangyari sa isang tulugan lang ang katuparan ng mithiin ng ating mga bayani.

“Bunga ito ng pagbangon mula sa kabiguan at pagsubok, at ng sakripisyo at pag-aambagan ng napakaraming tao, na pinagbuklod ng nag-iisang layunin: Ang mabuhay nang marangal at malaya sa pang-aapi.”

Kaya naman ang pagbabantay sa ating kalayaan ay hindi lang dapat tingnan sa aspeto ng mga dayuhang nahahalina sa ating bayan; dapat ding maging mapagmatyag sa mga kapwa nating Pilipino na magiging banta sa ating demokrasya. Kung walang demokrasya, walang kalayaan.

Sa panahong ito ng kalayaan, ang tinig natin at kapangyarihang maghalal ng mga lider ang sandata natin laban sa mga magiging banta sa demokrasya at kaunlaran ng ating bayan. Tungkulin at obligasyon natin iyan sa ating mga ninuno bilang mga tagapagmana ng ipinaglaban nilang kalayaan.

Laging tandaan: “Bata mo ‘ko at Ako ang Spy n’yo.” (mgakurimaw.blogspot.com)

Friday, June 13, 2014

Makabuluhang paggamit


                                                               Makabuluhang paggamit  
                                                                        Rey Marfil


Isang lalaki ang nadakip kamakailan ng mga awtoridad sa Maynila dahil sa reklamong pamboboso sa mga babae. Ang taktika ng lalaki, kukunan ng larawan o video ang kanyang biktima sa ilalim ng palda gamit ang cellphone camera at ia-upload pa niya sa internet. Isa itong klasikong halimbawa ng walang kwentang paggamit ng modernong teknolohiya.

Nakakalungkot na ang teknolohiyang magagamit sa mabuting paraan ay kinasangkapan sa kasamaan ng ilang indibidwal na baliko ang pag-iisip. Batay sa lumabas na mga ulat tungkol sa lalaki, nakursunadahan lang daw niya ang paninilip gamit ang cellphone dala na rin ng pagiging mahilig niya sa pornograpiya.

Aba’y mabuti na lamang at nasakote kaagad ang lalaking ito at baka mas malala pa ang gawin sa susunod lalo pa’t nasa edad 20’s pa lamang siya. Kaya naman dapat lang na nagkaroon na tayo ng batas na Anti-Voyeurism Law kung saan puwedeng mapanagot sa batas ang mga katulad ng lalaking ito na ginagamit ang modernong teknolohiya sa kabalbalan.

Pero kung may mga taong nakakaisip ng kalokohan gamit ang modernong teknolohiya, marami rin naman ang matitinong tao na nagpapagod at nagsusunog ng kilay at pilik-mata para makalikha ng kapaki-pakinabang na bagay gamit ang mga modernong teknolohiya.

Gaya na lang ng Project: Moses o Monitoring and Operating System for Emergency Services ng Department of Science and Technology (DOST), na nagla­layong magamit ng lokal na pamahalaan ang computer tablet, software at internet bilang panlaban sa banta ng kalamidad tulad ng panahon ng tag-ulan.

Bilang pagtugon na rin sa direktiba ni Pangulong Noynoy ‘PNoy’ Aquino na lumikha ng mga programa at proyekto na makapagliligtas sa buhay at ari-arian ng mga mamamayan, nag-isip at lumikha ang masisipag at matatalinong tauhan ng DOST ng software application na makatutulong sa mga lokal na opisyal na mabigyan sila ng babala at paunang kaalaman sa posibleng nakaambang kalamidad katulad ng maaaring idulot ng malakas na ulan.

Batid ng administrasyon Aquino na lantad ang Pilipinas sa mga kalamidad tulad ng lindol at pagbaha kaya naman iniutos niya ang paggawa ng mga programa at proyekto na makatutulong na magsasalba ng buhay.

***

At bago ang paglabas ng MOSES, nauna nang na­gawa ng DOST ang Project: NOAH o Nationwide Ope­rational Assessment of Hazards, na may kaugnayan naman sa paggamit din ng modernong teknolohiya upang matukoy ang mga lugar na peligroso sa mga kalamidad tulad ng pagguho ng lupa o flashflood.

Sa pamamagitan ng NOAH, natutukoy na ang mga lugar na hindi dapat tayuan ng mga bahay o istruktura, o mga lugar na mayroon nang nakatira at kailangang ilikas para mailayo sa kapahamakan. Kung dati ay puro lamang plano ang kanilang proyekto, ngayon ay nagkaroon na ito ng katuparan sa ilalim ng pamahalaang Aquino.

At kamakailan nga lang ay napili ng DOST ang lungsod ng Marikina na maging pilot testing area ng MOSES. Maganda ang pagkakapili sa Marikina dahil isa ito sa mga lugar sa Metro Manila na madalas malubog sa baha kapag may malakas na ulan.

Ipinamahagi ng DOST ang tinatawag na mga MOSES tablet sa ilang lider ng barangay para masuri ang bisa ng proyekto ngayong papalapit na ang panahon ng tag-ulan.

Hangad natin ang tagumpay ng ganitong mga hakba­ngin gamit ang modernong teknolohiya para maka­sagip ng mga buhay, at hindi iyong mga taong walang ma­gawa sa buhay at mamiminsala ng buhay ng iba. La­ging tanda­an: “Bata mo ko at Ako ang Spy n’yo.” (mga­kurimaw.blogspot.com)