Wednesday, December 30, 2015

‘Wag maging pasaway REY MARFIL


‘Wag maging pasaway
REY MARFIL




Taun-taon na lang, hindi lang gastos at biyaya ang binibilang ng mga tao kapag nagpapalit ang taon; kasama rin kasi sa binibilang ang mga nadidisgrasya sa paputok, mga tinamaan ng ligaw na bala at mga nagkaproblema sa kalusugan.

Mula Disyembre 16 hanggang nitong Disyembre 27, aba’y mayroon nang naitala ang kapulisan ng 61 na insidente na may kaugnayan sa mga paputok at pagpapaputok ng baril. Sa naturang bilang, anim ang biktima ng ligaw bala na kagagawan ng mga iresponsableng tao at makati ang daliri.

Tutal mayroon namang camera ang lahat ng cellphone ngayon, dapat na kunan ng video ang sinumang makikita nating nagpapaputok ng baril at i-upload natin sa social media gaya ng Facebook (FB) para mapasikat natin sila.

Ang mahirap kasi sa kaso ng stray bullet, mahirap na matukoy kung saang lugar nanggaling ang bala kaya hindi napaparusahan ang taong nakatama sa biktima. Kadalasan pa naman na mga walang muwang na bata na naglalaro lang sa tapat ng bahay o natutulog ang nababagsakan ng mga bala.

Kung talagang pasaway at hindi mapigil ang kati ng daliri sa pagkalabit sa gatilyo, puwede namang magpaputok pa rin ng baril pero please... itutok mo papunta sa bahay mo ang baril para walang ibang mapipinsala kung hindi ang sarili mong pamilya.

Bukod sa pagpapaputok ng baril, problema rin ang mga matitigas ang ulo na nagbebenta ng mga bawal na paputok gaya ng piccolo; at mga pasaway na patuloy na nagsisindi ng mga malalakas na paputok.

*** 

Sa bilang ng mga nadisgrasya na sa paputok, pinakamarami ang nabiktima ng piccolo at marami sa kanila ay mga bata. Dapat sampolan ng mga awtoridad ng nakakaiyak at masakit sa bulsa na malaking multa ang mga mahuhuling nagbebenta ng piccolo. Katwiran kasi ng mga nagtitinda ng mga bawal na paputok, nais lang nilang kumita kaya nila ito ginagawa. 

Pero tiyak na magbabago ang isip nila na magbenta ng mga bawal na paputok kapag naging seryoso ang mga awtoridad na pasakitin ang ulo ng mga pasaway na vendor sa pagsalubong ng Bagong Taon dahil sa malaking multa at pagkumpiska sa kanilang mga paninda. Ang mahirap lang kasi, baka naman ang makumpiska ng mga tiwaling opisyal e ibenta rin lang sa iba at pagkakitaan.

Kung tutuusin, mas mataas ng bahagya ang bilang ng mga naputukan sa tala ng Department of Health (DOH). Pero mas kaunti pa naman ang bilang ng mga napuputukan sa panahong ito kung ikukumpara sa katulad na panahon noong 2014.

Sa pagsalubong noon sa pagpasok ng 2015, may naitalang 593 na firecracker related injuries hanggang Enero 2 (2015), na mas mababa rin naman sa 804 na kaso na naitala sa pagsalubong sa 2014.

Ngunit maliban sa mga biktima ng paputok, marami rin ang dinadala sa ospital dahil sumama ang pakiramdam bunga ng nasobrahan sa pagkain ng bawal. Aba’y kung may alta-presyon o diabetic, huwag nang pasaway at huwag kainin ang mga bawal at baka hindi ka na abutin ng 2016.

Makinig tayo sa paalala ng pamahalaang Aquino na gumamit ng ibang paraan ng pampaingay gaya ng pagkalampag ng kaldero, malakas na tugtog sa stereo at iba pang ‘di ka mapuputulan ng daliri o makakatama ng bala.

Kaya sa pagsalubong natin sa 2016, gamitin ang utak at huwag maging pasaway para maging ligtas at hindi makaperhuwisyo sa ibang tao, na gaya ng lahat ay nais ding lang na maging masaya sa pagpasok ng taon.
Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

Monday, December 28, 2015

Sana may forever din sa tigil-putukan REY MARFIL



Sana may forever din sa tigil-putukan
REY MARFIL



Nagdeklara ng 12-days ceasefire o tigil-putukan ang pamahalaan at New People’s Army (NPA) simula sa Disyembre 23, 2015 hanggang Enero 2, 2016. Magandang kasunduan na sana ay masunod para matuwa sa kanila si Santa Claus.
Taun-taon, parang Christmas party na tradisyon na ng gobyerno at NPA ang pagdedeklara ng ceasefire sa Holiday season para mapahinga naman ang garilyo ng kanilang mga armas. Kahit mga mandirigma ang mga sundalo at rebelde, tao pa rin sila at may mga mahal sa buhay na umaasang mabubuo ang kanilang pamilya sa ganitong panahon.
Iyon nga lang, kahit may ganitong deklarasyon ang magkabilang panig, taun-taon din ay nagkakaroon ng sumbungan dahil sa ilang insidente na nagkakaroon pa rin ng bakbakan. At kapag tinanong kung sino ang may kasalanan, para silang mga bata na nagtuturuan. At ‘yan ay hindi gusto ni Santa Claus.
Kung ceasefire, dapat ceasefire. Kung hindi maiiwasan na magkasalubong ang dalawang grupo sa isang masukal na daanan sa kabundukan o baryo, natural lang na magkagulatan at magkatutukan ng mga armas. Ngunit sa sandaling magkaalaman na mula sila sa magkabilang puwer­sa, aba’y dapat isigaw na na mayroong ceasefire at kailangang umatras na ang isa para maiwasan ang putukan.
Dapat may isa sa kanila ang maunang bumati ng Merry Christmas para maiwasan at tension. Pero siguro dapat ingatan ang sagot na pagbati ng Happy New Year dahil baka mapalakas ang sigaw at may magpaputok ng baril. Puwede rin siguro na lagyan ng maliit na parol o anomang simpleng Christmas décor ang mga baril ng mga sundalo at NPA para mapaalala sa kanila na Pasko ngayon at may umiiral na ceasefire?
Kung tutuusin, maganda ang timing nang pirma­han ni Pangulong Noynoy ‘PNoy’ Aquino III ang unilate­ral declaration of suspension of military operations (SOMO) laban sa NPA noong nakaraang linggo. Ang SOMO ang nagbibigay ng direktiba sa militar ng tigil-putukan dahil nataon ito sa panahon na katatapos lang manalasa ng bagyong “Nona”.
***
Dahil malaki ang naging pinsala ni “Nona” sa ilang lalawigan sa Visayas, Bicol at Luzon, nagdeklara rin si PNoy ng state of calamity upang mapabilis ang pagbibigay ng ayuda sa mga sinalanta. Mas mapapadali ang pagkakaloob ng suporta sa mga biktima ng kalamidad kung walang inaalalang mga rebelde na gagambala sa relief ope­ration ng gobyerno kaya magandang pagkakataon ang ceasefire agreement.
Iyon nga lang, ilang araw bago magkabisa ang deklarasyon ng ceasefire agreement, aba’y napabalita na mayroong military convoy sa Samar na nagsasagawa ng relief mission sa mga biktima ni “Nona” ang tinambangan ng mga hinihinalang NPA. Mabuti na lang at walang nasawi sa tropa ng gobyerno na may kasama pa namang mga sibilyan mula sa DSWD dahil nga sa isinasagawang humanitarian mission. Iyon nga lang, dalawang sundalo ang nasaktan na tinamaan ng bala mula sa mga nanambang.
Kung totoo na mga rebelde ang nasa likod ng natu­rang pananambang, sana ay nagkamali lang sila at hindi talaga nila sinadyang saktan ang mga trapo ng gobyerno na naghahatid ng tulong sa mga biktima ng bagyo. Malay nila, baka may mga kaanak sila na biktima rin ni “Nona” na kasamang matutulungan ng humanitarian mission na iyon.
Sa pagpapatupad ngayong taon ng tigil-putukan, wala sanang mangyaring paglabag at makita ng magkabilang panig ang kabutihan ng pananahimik ng baril. Nang sa gayun ay bumalik sa lamesa ang kanilang mga negosya­dor, nagtagayan ng serbesa habang pinag-uusapan ang pang-forever na ceasefire. Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

Monday, December 21, 2015

Malinaw na resulta! REY MARFIL


Malinaw na resulta!
REY MARFIL



Nakita ng mayorya ng mga Pilipino ang magandang ibinubunga ng matuwid na daang kampanya ni Pangulong Noynoy “PNoy” Aquino kaya naman inaasahan nilang magiging matagumpay itong presidente base sa resulta ng bagong Social Weather Stations (SWS) survey.
Ipinapakita ng SWS survey ang patuloy na pagbibigay ni Pangulong Aquino ng inspirasyon dahil sa ginhawang naibibigay ng pamahalaan upang umasenso ang kanilang buhay.
Sa survey na isinagawa nitong Setyembre 2 hanggang 5, lumitaw na 35 porsiyento ng respondents ang nagsasabing magiging matagumpay si PNoy habang 26 porsiyento lamang ang kontra at 39 porsiyento naman ang naniniwalang maaga pa upang magbigay ng pahayag.
Malaki ang iniangat ng mga datos kumpara sa na­ging resulta noong Hunyo 2014 survey kung saan 29 porsiyento ang naniniwalang magiging matagumpay si PNoy habang 21 naman ang nagsabi ng kabaligtaran at 50 porsiyento ang nagsabing maaga pa para magsalita.
Malinis at mabuting pamamahala ang patuloy na ipinapakita ni PNoy na walang anomang bahid ng katiwalian.
Kaya naman kinakasiyahan siya ng maraming mga Pilipino dahil sa taglay na katapatan na paglingkuran ang mga Pilipino.
Sumama tayo kay PNoy upang lalong sumulong ang bansa na pakikinabangan ng napakaraming mga tao.
Asahan nating magpapatuloy ang magandang sini­mulan ni PNoy hanggang sa huling araw ng kanyang termino.
***
Makatuwirang natin si PNoy sa mga hakbang na tiyaking magiging maayos, mapayapa at kapani-paniwala ang magiging resulta ng halalan.
Isinasagawa ng administrasyong Aquino ang lahat upang matiyak ang seguridad, kaayusan at katahimikan sa pagdaraos ng eleksyon sa darating na taon, kabilang ang kaligtasan ng lahat sa panahon ng kampanya.
Sa ngayon, masusi ang koordinasyon ng Armed Forces of the Philippines (AFP) at Philippine National Police (PNP) sa Commission on Elections (Comelec).
Batid natin na ang AFP at PNP ay deputized ng Comelec bilang mga pangunahing puwersa sa pagtitiyak ng seguridad, katahimikan at kaayusan sa pagdaraos ng pambansang halalan sa Mayo 2016.
Kabilang sa masusing pinagpupulungan ng AFP at PNP sa kanilang pakikipagkita sa Comelec ang mahigpit na implementasyon ng gun ban.
Napatunayan na kasi na ang pagkontrol sa baril at ang pagsabat sa paggamit ng iligal na mga sandata ay isa sa mahahalagang susi sa pagkakaroon ng maayos na halalan.
Kaya isa sa prayoridad na programa na isasagawa ng AFP at PNP bilang deputized agents ng Comelec ang pagkontrol sa paggamit ng lisensiyadong baril.
Magtatayo rin ng checkpoints sa estratehikong mga lokasyon ang kinauukulan para matiyak na walang naglipanang masasamang mga elemento.
Kung babalikan ang mapayapang 2013 na halalan, naging susi sa tagumpay ang pagkontrol at pagpigil sa paggamit at sa operasyon ng private armed groups.
Sa kautusan ni PNoy, sisikapin muli nito sa tulong ng pinagsamang puwersa ng Comelec, AFP at PNP na maulit ang maayos at mapayapang halalan sa Mayo 9, 2015. Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

Friday, December 18, 2015

Kamay na bakal sa lansangan REY MARFIL


Kamay na bakal sa lansangan
REY MARFIL



Bukod sa dagdag na mga kalsada at iba pang uri ng daanan ng mga sasakyan, may isa pang kailangan gawin ang pamahalaang lokal at nasyunal para maisaayos ang daloy ng trapiko sa Metro Manila. Ito ay ang kamay na bakal sa pagdisiplina sa lansangan.
Sa totoo lang, kawawa naman si Pangulong Noynoy “PNoy” Aquino na laging sinisisi ng mga kababayan na­ting naiipit sa trapiko -- hindi lang sa EDSA kung hindi maging sa iba pang pangunahing lansangan. Aba’y kahit saan naman yata ngayon ay problema na ang trapik. Pero hindi lang ito dahil sa dami ng sasakyan kung hindi dahil sa kawalan ng disiplina ng mga drayber at kung minsan ay maging ng mga pasahero.
Kahit si Philippine National Police-Highway Patrol Group (PNP-HPG) Director Chief Supt. Arnold Gunnacao, na inatasan ni PNoy na tumulong na sa pagmando ng trapiko sa EDSA at sa ilang kritikal na lugar na konektado rito, ay naniniwalang isa ang kawalan ng disiplina ng mga motorista ang dahilan ng pagbigat ng daloy ng trapiko.
Kung hindi ba naman ubod ng pasaway ang mara­ming motorista, mantakin mong kailangan pa ngayon na mag­lagay tayo ng sangkaterbang plastic barrier para maihiwalay lang ang mga sasakyan na dapat maghiwalay; at hindi lumusot ang mga mokong na drayber sa linya na hindi naman nila dapat lusutan.
Bato-bato sa langit, ang tamaan sapul; gaya na lang ng mga drayber ng mga pampasaherong sasakyan -- mapa-jeep, bus, taxi, UV Express at kung anu-ano pa, ugali ng mga ito na magmenor kapag naka-green ang traffic light para titiyempuhan nila na mag-red upang makapagsakay sila ng pasahero sa mismong kanto. Wala silang pakia­lam sa ibang sasakyan na nasa likod nila na maabala nila sa ginawa nilang pagbagal ng takbo. 
Ang mga wala namang disiplinang mga pasahero, bababa sa kung saan nila gustong bumaba at sasakay sa lugar na alam nilang bawal. Aba’y dapat yatang lagyan ng lazer beam ang mga karatula ng Metropolitan Manila Development Authority (MMDA) atlocal government units (LGUs) na “no loading and unloading anytime” para iyong mga pasaway na pasahero at tsuper ay bigla na lang tatamaan ng lazer at malilipat sila sa loob ng SBMA na sobrang higpit ang disiplina sa kalye.
***
Bukod diyan, kasama sa masamang ugali ng mga drayber -- mas marami sa mga pampublikong sasakyan at mga trak, na sa mga “crossing” na kalsada, kahit nakikita na nila na barado na ang kabilang dulo ng kalye ay isasaksak nila ang kanilang sasakyan. Gagawin nila iyan kahit na barahan nila ang kabilang linya at hindi makadaan ang ibang sasakyan kahit maluwag sa kanila nilang dulo dahil nakabara ang sasakyan ng mga buraot na drayber.
Sa isang panayam kay Gunnacao, tama siya na dapat magsimula sa mga motorista ang disiplina sa kalye para maisaayos ang problema sa trapiko. Walang saysay ang mga isinasagawang proyekto at programa ngayon ni PNoy na pakikinabangan ng susunod na administrasyon para maibsan ang bigat sa trapiko kung magpapatuloy naman ang busangot na ugali ng mga motorista lalo na ang drayber ng mga pampublikong sasakyan. Pero dahil na­ging bahagi na yata ng kultura ng mga motorista ang pagiging pasaway sa kalye, kamay na bakal ang kailangan para maipatupad ang desiplina. Hindi na dapat hayaan ang pakamot-kamot ng ulo nila at pakiusap kapag sinisita.
Bakit ang SBMA kinatatakutan ng mga motorista? Kasi mahigpit nilang ipinatutupad ang disiplina at tiyak na “tiket” ang aabutin nila kahit simpleng pagkakamali. Ito ang dapat ipatupad sa lahat ng pangunahing kalye sa Metro Manila -- hindi lang sa EDSA at hindi lang ng pamahalaang nasyunal kung hindi maging ng lokal na pamahalaan, hanggang ng barangay. 
Dapat “tikitan”, “pagmultahin” at kung kailangan ay “alisan ng lisensya” ang lahat ng mga pasaway na drayber para matuto uli sila ng salitang “disiplina sa kalsa­ngan”.  Laging tandaan: “Bata mo ‘ko at Ako ang Spy n’yo.” (Twitter: follow@dspyrey)


Wednesday, December 16, 2015

Last two minutes REY MARFIL




Last two minutes
REY MARFIL


Ilang linggo na lang ay matatapos na ang 2015. At pagkaraan nito ay anim na buwan na lang ang bibilangin sa pananatili ni Pangulong Noynoy ‘PNoy’ Aquino bilang ‘team leader’ ng ‘daang matuwid’ na lumalaban para kaunlaran ng bayan.

Sa isang survey ng Social Weather Station (SWS) noong nakaraang Setyembre 2-5, na mayroong 1,200 adult respondents, higit na marami ang nagsabi (39%) na maaga pa raw para sabihin kung naging matagumpay na lider ng bansa o hindi si PNoy.

Sa nasabi pa ring survey, 35% ng respondents ang nagpahayag ng paniniwala na magiging matagumpay na lider si PNoy; habang 26% naman ang nagsabi na sa tingin nila ay hindi siya magiging matagumpay na lider.

Dahil dito, nagkamit si PNoy ng net rating na positive 9, na bahagyang mataas sa positive 8 na nakuha niya noong Hunyo 2014.

Tandaan na Setyembre ginawa ang survey at pagkaraan ng tatlong buwan, malamang na nagbago na ito. Maaaring nadagdagan ang nagsasabing magiging magumpay na pangulo si PNoy at maaari rin naman na ang madagdagan ang mga magsasabing hindi.

Ngunit kung pagbabatayan ang patuloy na pagiging matatag ng ekonomiya ng bansa sa taong ito, masasabing patungo na sa panalo ang laban ng team ‘daang matuwid’ ni PNoy. Maipapasa niya sa susunod na ‘team leader’ pagkatapos ng 2016 presidential elections na nasa maayos na kalagayan ang koponang ‘daang matuwid’.

Taliwas sa nangyari noong 2010, kung saan malaki ang problemang inabutan ni PNoy sa gobyerno nang maupo siya sa Malacañang, ngayon ay masasabing mapalad ang susunod sa kanyang team leader. Kung noon ay puro ‘negative’ ang credit rating na inabutan ni PNoy mula sa mga international financial institution, aba’y ngayon ay puro ‘positive’ na ang aabutin ng susunod na Pangulo dahil naibalik na ni Aquino ang kompiyansa ng mga dayuhang namumuhunan.

Inabutan din ni PNoy ang malaking problema sa transportasyon dahil sa mga napabayaang mass transport system at kawalan ng proyekto para malunasan ang mabigat na daloy ng trapiko. Aba’y ngayon ay halos sabay-sabay na ginawa na ang mga proyekto na matatapos sa ilalim ng susunod na administrasyon. Kabilang sa mga proyektong ito ang pag-uugnay ng North at South Expressway, pagbili ng mga bagong bagon sa MRT at mga karagdagang linya ng LRT.

***

Kung si PNoy ang nasisi sa problema ng pagbaha sa Metro Manila dahil din sa inabutan niyang problema mula sa nakaraang liderato, ngayon ay ginagawa na rin ang ekstensibong anti-flood project na matatapos din sa susunod na taon.

Dahil maganda ang ekonomiya, maganda rin ang datos sa bilang ng mga may trabaho. Batay sa ulat ng Labor Force Survey (LFS) ng Philippine Statistics Authority (PSA) sa Oktubre, bumababa sa 5.6% ang unemployment rate, na pinakamababa mula noong Abril 2005.

Ayon kay National Economic Development Authority (NEDA) Sec. Arsenio Balisacan, maganda ang taong 2015 sa usapin ng trabaho dahil nahigitan ang inaasahan na bilang ng unemployment rate na hanggang 6.8% na nakasaad sa Philippine Development Plan target. Bunga raw ito ng mabilis na paglago sa services and industry sectors. 

Ilan lang ito sa mga positibong nangyari sa bansa mula nang maging team leader ng ‘daang matuwid’ si PNoy at napanatili niya ang mga reporma at pagbabago hanggang sa pagtatapos ng taong 2015 -- patungo sa pagpasa niya ng koponan sa 2016.

Marahil ay naniniguro lang ang 39% ng mga respondent sa September survey ng SWS kaya hindi pa sila makapagdesisyon at hindi pa nila masabi noon na magiging matagumpay na lider ng bansa si PNoy.

Pero ngayon na ilang linggo na lang ay tapos na 2015, at konting kembot na lang ay 2016 na at may bago na tayong lider, puwede nang sabihin na tagumpay si PNoy batay na rin sa malaking pagbabago na nagawa niya at ginagawa pa para sa kaunlaran ng bansa...
Laging tandaan: “Bata mo ‘ko at Ako ang Spy n’yo.” (Twitter: follow@dspyrey


Monday, December 14, 2015

May Pamasko! REY MARFIL





May Pamasko!
REY MARFIL


Nagsimula nang magbigay noong nakaraang Disyembre 10 ng Christmas cash gifts ang Government Service Insurance System (GSIS) para sa 235,180 pensiyonado na nagkakahalaga ng P2.6 bilyon.
Magandang balita ito na bahagi ng prayoridad ni Pangulong Noynoy “PNoy” Aquino sa kanyang matuwid na daan kung saan mas malaki nang walong porsiyento ang nasabing alokasyon para sa disability at old-age pensioners kumpara sa P2.4 bilyon noong nakaraang taon na inilaan ni GSIS president and general manager Robert G. Vergara.
Mula sa cash gifts na P10,000 na nakuha ng mga pensiyonado noong nakalipas na taon, makakakuha sila ng isang buwang pensiyon na hindi hihigit sa P12,600.
Sa mga nakakuha naman ng cash gift benefits na P10,000 o mas mababa noong 2014, makakakuha ang mga ito ng isang buwang pensiyon na hindi hihigit sa P10,000 ngayong taon.
Makakatanggap naman ng pinakamataas na P10,000 ang bawat retirado na kumuha ng limang taong lump-sum benefit at naging pensiyonado matapos ang Disyembre 31, 2014.
Hindi rin pinabayaan ni PNoy maging ang mga pensiyonado na naninirahan sa ibang bansa at nasa Autonomous Region in Muslim Mindanao (ARMM) na nasa suspended status hanggang Disyembre 31, 2015.
Makakatanggap rin sila ng benepisyo kung magsisimula silang mag-activate ng status na hindi lalampas sa Abril 30, 2016 at makukuha ang cash gift bago sumapit ang Mayo 31, 2016.
Batid ni PNoy ang kahalagahan na magkaroon ng sapat na suporta ang mga retirado lalong-lalo ngayong nalalapit na ang Pasko.
***
Kapuri-puri ang positibong tugon ng mga mambabatas sa panukala ni PNoy na itaas ang suweldo ng 1.5 milyong kawani sa pamahalaan.
Sa botong 170 kontra lima at isang abstention, inapru­bahan na ng Kamara de Representantes sa ikatlo at huling pagbasa ang panukalang apat na taong “Salary Standardization Law of 2015” o SSL 2015 na popondohan ng P226 bilyon.
Sa ilalim ng House Bill (HB) No. 6268 o SSL 2015, itataas ang suweldo ng mga kawani ng pamahalaan alinsunod sa klase ng kanilang posisyon.
Bukod dito, magandang balita rin na kasama sa benepisyo ng panukala ang 14th month pay sa porma ng mid year bonus. Hindi rin bubuwisan ang 14th month pay na benepisyo at maging ang performance-based bonus para sa Salary Grades 1 to 11 na kumakatawan sa 606,000 na mga kawani o 52 porsiyento ng 1.5 milyong empleyado ng pamahalaan.
Pinupuri natin ang mga mambabatas lalong-lalo na ang nga awtor ngumento sa suweldo sa ilalim ng HB No. 6268 na sina Speaker Feliciano ‘Sonny’ Belmonte, House Majority Leader at Mandaluyong City Rep. Neptali ‘Boyet’ Gonzales II, Davao City Rep. Isidro Ungab, chairman ng House committee on appropriations, House Minority Leader at San Juan City Rep. Ronaldo Zamora at Romblon Rep. Eleandro Jesus ‘Budoy’ Madrona, chairman ng House committee on accounts.
Nakapaloob ang P57.9 bilyong pondo na kakaila­nganin sa umento sa suweldo sa ilalim ng 2016 P3.002-trilyong General Appropriations Bill (GAB).
Batid ni Pangulong Aquino ang malaking benepisyo na maibibigay sa pamilya ng bawat kawani ng pamahalaan kaya naman naging prayoridad nito ang umento sa kanilang suweldo.Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

Friday, December 11, 2015

Huling hirit! REY MARFIL



Huling hirit!
REY MARFIL



Sa huling pagkakataon, inilapit ni Pangulong Noynoy “PNoy” Aquino sa mga mambabatas ang kahalagahan na maipasa ng Kongreso ang Bangsa­moro Basic Law (BBL) para sa kapayapaan at kaunlaran ng Mindanao. Ngayon, nasa kamay na ng mga mambabatas ang buhay ng nabanggit na mahalagang panukalang batas na may epekto rin sa buong bansang Pilipinas.
Habang papalapit ang pagtatapos ng 2015, lalo ring umiiksi ang tiyansa na maipasa pa at maging batas ang BBL na bahagi ng usapang pangkapayapaan ng pamahalaan at Moro Islamic Liberation Front (MILF). Hanggang Disyembre 16 na lang kasi ang sesyon ng Kongreso para sa isang buwan nilang Holi­day break.
Pagbalik naman ng sesyon sa Enero 2016, magsisimula na rin ang kampanya ng mga tatakbo sa halalan para sa Mayo kaya wala na ring magagawa ang mga mambabatas. Dahil dito, sa huling pagkakataon ay nakipagpulong si PNoy sa mga mambabatas kamakailan sa Palasyo upang ipaliwanag sa kanila ang pangangailangan na maipasa ang BBL.
Hindi naman lingid na bahagi ang BBL sa isinusulong na usapang pangkapayapaan ng pamahalaan sa dating rebeldeng grupo ng mga Muslim na MILF. Dahil ito sa pagtitiwala nila sa sensiridad ng administrasyong Aquino na hanapan ng lunas ang problema ng kahirapan at kaguluhan sa Mindanao.
Kung tutuusin, mula nang magkasundo ang MILF at Philippine peace panel, nabawasan ang mga engkuwentro sa Mindanao. Dahil sa katahimikan, malaki ang naging pag-unlad sa Autonomous Region for Muslim Mindanao (ARMM) sa ilalim ng liderato ni Gov. Mujiv Hataman at dumami na ang mga dayuhan na namumuhunan.
Pero ano ang mangyayari sa usapang pangkapa­yapaan sa MILF at sa katahimikan sa Mindanao kapag natapos ang termino ni Aquino sa Hunyo 2016, na walang naipatupad na BBL? Maging si Hataman ay batid ang kahalagahan ng BBL. Kahit maapektuhan siya nito bunga ng bagong political entity na bubuuin na ipapalit sa ARMM ay suportado niya ang panukalang batas.
Dahil na rin ng banta ng terorismo na kayang idu­lot ng Islamic State of Iraq and Syria o ISIS, hindi maaalis na baka may mga magsamantala sa hindi pagkakapasa ng BBL upang manghikayat ng mga taga-Minda­nao at mangalap ng suporta para sa ISIS.
Ayon nga kay Presidential Communications Ope­rations Office (PCOO) Sec. Herminio Coloma, Jr., kabilang sa mga nabanggit ni PNoy sa pakikipagpulong nito sa mga mambabatas ang tumataas na banta ng “global terrorism and radicalization”. Kaya naman daw hinikayat ng punong ehekutibo ang mga mambabatas na huwag palampasin ang makasaysayang pagkakataon na ipasa ang BBL.
May ibang nagsasabi na gahol na ang panahon para maipasa ang BBL at makabubuting ipaubaya na ito sa susunod na administrasyon. Pero sino ang makatitiyak na pagkakatiwalaan din ng MILF ang susunod na liderato? Papaano kung hindi nila makasundo ang susunod na pangulo? May kasabihan na kung ano ang maaaring gawin ngayon, huwag nang ipagpabukas. 
Kung ang BBL ang makatutulong para mabawasan kung hindi man tuluyang matigil ang kaguluhan at kahirapan sa Mindanao, bakit hindi pa ito ipasa ngayon habang may panahon pa? Ano pa ang kailangang hinta­yin gayung lumabas naman sa mga pag-aaral na may ligal na basehan at naaayon sa Saligang Batas ang BBL.
Dahil sa nakita ng European Union na sinsero ang PNoy government at liderato ng MILF na makamit ang kapayapaan ay Mindanao, itutuloy pa rin nila ang pagkakaloob ng P275 milyong ayuda para sa peace and deve­lopment sa rehiyon, matuloy man o hindi ang BBL. Sana makita rin ng mga mambabatas ang malaking potensiyal na naghihintay para sa kapayapaan at pag-unlad ng Mindanao kung mayroong BBL. Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

Wednesday, December 9, 2015

APECtibong usapan REY MARFIL



APECtibong usapan
REY MARFIL




Hindi lang pagpapalakas ng ugnayang panlabas ng Pili­pinas sa 21 lider ng iba’t ibang bansa ang naging bunga ng nakaraang Asia-Pacific Economic Cooperation o APEC Meeting na ginanap kamakailan dito sa atin sa Maynila.
Bagaman ang pagpapalakas ng ekonomiya sa lahat ng bansang miyembro ng APEC ang pakay ng pagpupulong, naging pagkakataon din ito ng Pilipinas na mapatatag ang diplomatiko nitong relasyon sa ibang economi­c leaders at magkaroon ng bilateral agreement o kasunduan ng bansa sa bansa lamang.
Gaya ng pakiusap at naging paliwanag noon ng pamahalaang Aquino, makatutulong sa Pilipinas sa pangmatagalan ang magiging resulta ng APEC meeting sa harap ng mga kritisismo sa ilang araw na trapik at gastos na umabot sa P10 bilyon.
Pero dati na ring ipinaliwanag ng mga namahala sa APEC na ang pondong ginugol sa APEC ay hindi ginamit ng isang bagsakan lang.
Sa halip, ginamit ito sa halos isang buong taon ng preparasyon kasama na ang mga paghahanda, empraestruktura at mga naunang mga pulong na ginawa upang mabuo ang pangkalahatang pakay ng pag-uusapan at aaprubahan ng mga economic leader.
Bukod diyan, ang ginastos sa paghahanda at pagdaraos ng APEC ay dito sa loob ng bansa napunta.
Kaya kung tutuusin nga naman ay umikot lang sa sirkulasyon ng merkado ang pondo at nakatulong pa sa panloob na ekonomiya ng Pilipinas. 
At batay sa impormasyon na ipinalabas ng Department of Foreign Affairs (DFA) at Department of Labor and Employment (DOLE), maliban sa resulta ng pangunahing agenda ng APEC na para sa lahat ng miyembrong bansa, nakapagsara rin ng mga “bilateral agreement” ang Pilipinas sa ilang bansa na dumalo na maaaring magdulot ng bagong negosyo sa Pilipinat at mga bagong trabaho.
Ang mga bansa na nagkaroon ng bilateral meetings ang Pilipinas at nakapagtukoy ng mga posibleng pagmulan ng mga bagong pamumuhunan ay ang Australia, Japan, Korea, Mexico, New Zealand, Peru, Papua New Guinea, Russia at Amerika. 
***
Para sa kaalaman ng mga kababayan natin, ilan sa mga bansang ito ay nakakapagpadala na tayo ng produkto tulad ng mga agrikultura, semi-conductor at iba pa.
Mayroon din tayong mga kababayan na nagtatrabaho sa kanila. At dahil sa pinasiglang relasyon natin sa kanila, asahan na mananatili ang pagpapadala natin ng mga produkto sa kanila at posibleng madagdagan pa.
Kaya naman kung tuluyang tataasan pa ang ini-export natin sa kanila, ang ibig sabihin nito ay dadami ang produkto na kailangan gawin, na ang resulta ay dagdag na tao na gagawa, na magbubunga naman ng dagdag na trabaho.
Ang ibang bansa gaya ng Australia, posibleng pumasok daw sa atin ng mga food and agri-business, business processing at information technology, enginee­ring services, manufacturing, auto parts export at iba pa.
Ang Amerika na pangunahing trade partners natin, posibleng dagdagan pa ang kanilang pinupuhunan sa IT-BPM sector, food manufacture, electronics manufactu­ring, mga paggawa ng energy products, pharmaceuticals at maging sa aerospace products, at iba pa.
Dahil din sa bumubuting ugnayan natin sa Japan, mapapadali na ang pagproseso ng mga rekisitos upang makapamasyal sa Japan. Bukod pa sa posibilidad na kumuha pa sila ng dagdag na Pinoy na papayagan na makapagtrabaho sa kanila.
Maging ang Korea at New Zealand ay nagpahayag ng intens­yon na palakasin ang kanilang kalakalan at pagsuporta sa Pilipinas.
Maliban sa biyayang makukuha ng Pilipinas sa resulta ng naisarang kasunduan sa pangunahing pagpupulong ng APEC at mga napagkasunduan sa bilateral talks, inaasahan din na nakatulong ang APEC meeting para mai-promote ang Pilipinas. 
Kapag nangyari ang lahat ng ito, sadyang APECtibo ang pag-host ng atin ng APEC at masuwerte ang susunod na administrasyon. Laging tandaan: “Bata mo ‘ko at Ako ang Spy n’yo.”
(Twitter: follow@dspyrey)

Monday, December 7, 2015

Huwag maging pasaway REY MARFIL


Huwag maging pasaway
REY MARFIL



Sa pag-ibig, may kasabihang age doesn’t matter; pero sa mga pasaway at walang ingat sa kamunduhan, aba’y HIV-AIDS does matter kaya malalagot ka.
Kaugnay ng paggunita ng World AIDS Day ngayong Disyembre, lumilitaw na hindi maganda ang datos ng Pilipinas para mabawasan ang tumataas na kaso ng HIV-AIDS (human immunodeficiency virus-acquired immune deficiency syndrome) sa mga Pinoy.
Batay sa impormasyon mula kay Health Secretary Janette Garin, sinabi nito na ngayong 2015 ay tinatayang isang Pinoy ang nakakakuha ng nakamamatay na virus sa bawat isa’t kalahating oras. Hindi lang ‘yan, bumabata rin ang mga nahahawahan ng virus.
Aminado ang kalihim na nakakaalarma na ang sitwasyon dahil noong pumasok ang taong 2000, nasa isang kaso ang naitatala sa bawat tatlong araw, malayong-malayo na pinakabagong datos ngayong 2015.
Mula Enero hanggang Oktubre ngayong 2015, nasa 6,552 Pinoy ang nagpositibo sa HIV. Lubhang malaki na ito sa 174 na naitalang kaso sa kabuuang taon ng 2001. At kung hindi mapipigilan ang pagiging pasaway ng mga kababayan natin, pinapangambahan ng mga eksperto na aabot sa 133,000 ang kaso ng HIV sa susunod na anim na taon.
Marahil ang nasa isip ng iba, hindi naman maitutu­ring epidemic sa kabuuan ng populasyon ang HIV-AIDS dahil may partikular na sektor lang ang apektado nito -- ang mga lalaking nakikipagtalik sa kapwa lalaki, ang mga nagdodroga na gumagamit ng injection at mga taong hindi makontento sa isang partner.
***
Pero saan ba nagsisimula ang malaking problema? Hindi ba sa maliit? Bagaman may partikular na sektor ang apektado ng patuloy na pagdami ng nagtataglay ng nakamamatay na virus, dumarami rin ang lugar sa Pilipinas na mayroong naitatalang kaso nito.
Batay sa pag-aaral ng mga dalubhasa, nasa 14,000 katao ang tukoy na may HIV sa Pilipinas at pinaniniwalaan na mas mataas pa ang naturang bilang dahil marami ang hindi nagpapa-HIV-AIDS test. Hindi sila nagpapasuri dahil sa maaaring hindi nila alam na nahawahan na sila ng virus, o natatakot silang malaman ang katotohanan na mayroon na silang virus.
Ang problema sa problemang ito, kahit hindi nagpasuri ang taong may virus, tiyak na patuloy siyang makikipagtalik at maipapasa sa iba ang virus. At sa panahon ngayon na dumarami ang lalaki na nakikipagtalik sa kapwa lalaki at maging sa babae, hindi malayong mangyari ang pangamba ni Sec. Garin.
Bagaman may partikular na sektor ng lipunan na tinatamaan ng HIV-AIDS, hindi dapat balewalain ang problema dahil nga sa kumakalat ito sa buong bansa. Ayon pa rin sa mga dalubhasa, 70 lungsod at bayan ang dapat tutukan ng atensyon para mapababa ang insidente ng HIV-AIDS kabilang na ang Metro Manila, Cebu, Davao, Angeles.
Sa tagal na rin ng ginagawang pagpapakalat ng impormasyon ng pamahalaan tungkol sa virus na ito, siguro naman ay sapat na ang kaalaman ng marami na nakukuha ang HIV-AIDS sa pakikipagtalik, paggamit ng kontaminadong karayom sa bakuna at pagsasalin ng dugo na kontaminado rin ng virus.
Kung sadyang pasaway, maging maingat na lang at gumamit ng proteksyon; kung talagang walang ingat, magpasuri na lang sa mga government hospital dahil libre ito at isisikreto ang resulta ng pagsusuri.
Baka kailangan na ring mag-isip ng bagong taktika ang pamahalaan at mga organisasyon upang labanan ang virus. At marahil ang isang paraan nito ay kumbinsihin ang pinakalantad na sektor sa HIV-AIDS na tanggapin nila ang kinakaharap na panganib upang sila mismo ang maghahatid ng mensahe at impormasyon sa kanilang mga kasama sa “federacion”. .Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

Friday, December 4, 2015

Ang ‘V20’ at ang climate change REY MARFIL




Ang ‘V20’ at ang climate change
REY MARFIL


Isang mahalagang pagpupulong ang dinaluhan ni Pangulong Noynoy ‘PNoy’ Aquino sa Paris tungkol sa usapin ng climate change na nagbabanta ngayon sa kaligtasan ng mga mamamayan sa 20 bansa na kung tawagin ngayon ay Vulnerable 20 (V20) -- kabilang ang Pilipinas.

Sa 21st Conference of the Parties (COP21) sa Paris na dinaluhan din ng mga lider mula sa may 150 bansa, binigyan-diin ni Aquino ang kahalagahan na maisulong ang mga hakbang para mabawasan ang carbon emission na nagpapainit sa mundo, lalo na ng mga industriyalisadong bansa na katulad ng Amerika at China.

Kung tutuusin, hindi patas ang laban pagdating sa climate change. Kung sino kasi ang mga bansang pangunahing pinagmumulan ng carbon emission, sila itong yumayaman at hindi kaagad nanganganib sa epekto ng climate change. Samantalang ang maliliit na mga bansang katulad ng Pilipinas, maliit lang ang kontribusyon sa pagpapainit ng mundo pero matinding naapektuhan ng mga kalamidad dulot ng pagbabago ng panahon.

Kasama ng Pilipinas sa V20 group ang Afghanistan, Bang­ladesh, Barbados, Bhutan, Costa Rica, Ethiopia, Ghana, Kenya, Kiribati, Madagascar, Maldives, Nepal, Rwanda, Saint Lucia, Tanzania, Timor-Leste, Tuvalu, Vanuatu at Vietnam.

Sa talumpati ni PNoy sa pulong, inihayag niya sa ibang mga lider ang kahalagahan ng pagkakaisa at pagkilos upang mabawasan ang pagbuga ng carbon upang mabawasan din ang pag-init ng mundo.
Habang umiinit ang mundo, tumitindi ang mga kalamidad tulad na lang ng bagyong Yolanda na tumama sa atin sa Pilipinas.

***

At kahit na maliit tayong bansa, maliit ang pondo at maliit ang kontribusyon sa pagpapainit ng mundo, ipinaliwanag ni PNoy ang ginagawang hakbang ng pamahalaan para tugunan ang problema ng global warming. Kabilang dito ang ibayong re-greening program na sinimulan ng pamahalaan noong 2011. Target ng programa na makapagtanim ng 1.5 bilyong puno pagsapit ng 2016. 

Kapag nagawa ito, hanggang 30 milyong tonelada ng carbon ang kayang tanggapin ng mga puno bawat taon. Sa ngayon, idineklara ng Food and Agriculture Organization ng United Nations na kabilang ang Pilipinas sa limang pangunahing bansa sa mundo na may mahusay na pagpapalago ng gubat batay sa kanilang Global Forest Resources Assessment for 2015.

Kasama rin sa programa ng pamahalaan sa paglaban sa global warming ang kampanya laban sa illegal logging, pagsusulong ng renewable energy mix, pagbawas sa carbon emission at pagpapatupad ng mga patakaran at mga batas para harapin ng problemang pangkalikasan at iba pa.

Kung seryoso rin kasing tutugon ang iba pang bansa -- lalo na ang mga mauunlad na bansa na pinakamalaking mag-ambag sa pag-init ng mundo -- maaari rin nilang gawin ang mga ginagawa natin sa Pilipinas. Dapat lang nilang isipin na tao rin na kailangang mabuhay at sagi­pin ang mga mamamayan sa V20.

Maliban sa mga hakbangin na dapat gawin upang mabawasan ang carbon emission, kasama rin sa isinusulong ng V20 ang pagkakaroon ng pondo para sa mga programa para labanan ang global warming at pang-ayuda sa mga bansang masasalanta ng kalamidad na may kaugnayan sa climate change.

Tulad ng naranasan ng Pilipinas sa matinding pinsala na iniwan ni Yolanda, malaking pondo ang kakailanganin upang makabangon muli ang mga mamamayan ng isang maliit na bansa babayuhin ng malakas na bagyo; ‘yan ay kung hindi pa huli ang lahat at hindi pa lubos na nilalamon ng dagat ang isang lugar bunga ng pagtaas ng dagat dahil din sa global warming.

Gaya ng pag-amin ng ibang lider na dumalo sa COP21, narito na sa harap ng mundo ang banta ng kalamidad bu­nga ng climate change. Kaya dapat magkaisa ang lahat at isipin ang kapakanan ng mga maliliit na bansa na lantad sa peligro ng pag-init ng ulo ng Inang Kalikasan.
Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

Wednesday, December 2, 2015

May pinapatunguhan! REY MARFIL




May pinapatunguhan!
REY MARFIL


Magandang balita na naman ang pagdating sa bansa ng dalawang FA-50 ‘Golden Eagle’ jet fighters mula sa South Korea na bababa sa Clark airbase.

Kumuha ang administrasyong Aquino ng 12 two-seater aircraft mula sa Korean Aerospace Inc. na nagkakahalaga ng P18.9 bilyon na bahagi ng programang modernisasyon ng militar.

Inaasahang darating sa bansa ang kabuuang 12 mga eroplano sa 2017 na kabilang sa malasakit ni Pangulong Benigno Noynoy ‘PNoy’ Aquino III na palakasin ang lakas ng militar ng Pilipinas.

Sumakay si Philippine Air Force (PAF) commander Lieutenant General Jeffrey Delgado sa isa sa mga eroplano nang isagawa ang test flight nito sa South Korea.

Ikinokonsiderang upgraded version ng KAI’s supersonic T-50 advance trainer jet ang FA-50 na inaasahang magpapalakas sa kakayahan ng Philippine Air Force (PAF) na bantayan ang himpapawid ng bansa.

Patunay ito ng malaking suporta ni Pangulong Aquino sa sektor ng militar na napabayaan ng nakalipas na mga administrasyon.

***

Magbubunga ng karagdagang trabaho ang desisyon ni PNoy na taasan ang pondo ng pampublikong imprastraktura sa Mindanao sa susunod na taon.

Inihayag ni Department of Public Works and Highways (DPWH) Sec. Rogelio Singson na kabilang sa prayoridad ni Pangulong Aquino ang paglalaan ng malaking pondo sa Mindanao.

Sa badyet ng DPWH sa susunod na taon, magpapatuloy ang malaking biyaya na bahagi rin ng naging prayoridad ng pamahalaan sa nakalipas na tatlong taon.

Sa katunayan, umabot sa P97.3 bilyon o 33 porsiyento ng kabuuang badyet ng DPWH para sa 2015 ang mapupunta sa Mindanao upang ipatupad ang mahahalagang mga proyektong imprastraktura roon.

Sa nasabing pondo, aabot sa P12 bilyong infrastructure budget ang direktang mapupunta sa Autonomous Region in Muslim Mindanao (ARMM).

Umabot naman sa P30 bilyon ang pondo sa Region X habang halos tig-P19 bilyon naman ang nakalaan sa Regions IX at XI. Siguradong karagdagang trabaho para sa mga taga-Mindanao ang malilikha ng mga proyektaong ipatutupad sa Mindanao.

Batid ni Pangulong Aquino sa tulong ng kanyang matuwid na daan na malaking ginahawa ang maibibigay ng malaking pondo para sa kabuha­yan ng maraming Pilipino.
Laging tandaan: “Bata mo ‘ko at Ako ang Spy n’yo.” (Twitter: follow@dspyrey)


Monday, November 30, 2015

Ipagpasalamat! REY MARFIL




Ipagpasalamat!
REY MARFIL



Hindi ba’t kapuri-puri ang patuloy na malaking suporta na ibinibigay ni Pangulong Noynoy ‘PNoy’ Aquino sa pagsulong ng sektor ng business process outsourcing (BPO).
Kaya naman nakatutok ang mga programa ni PNoy sa paglinang ng kakayahan at kasanayan ng mga Pilipino na nasa sektor ng BPO.
Inihayag ni Pangulong Aquino ang kanyang pangako sa naging talumpati nito sa inagurasyon ng Pointwest Digital Center sa Pasig City.
Ibinahagi ni Pangulong Aquino ang pagtalakay ng 21-ekonomiyang kasapi ng Asia Pacific Econo­mic Cooperation (APEC) sa epekto ng teknolohiya sa mga manggagawa sa nakalipas na Leader’s Meeting na isinagawa sa bansa.
Kailangan kasing makasabay ang kakayahan at kaalaman ng mga Pilipino sa teknolohiya.
Sa katunayan, nawalan ng hanapbuhay ang mga manggagawa sa Estados Unidos dahil sa pagpalit ng mga makina at robot sa kanilang trabaho.
Sa tulong ng Training for Work Scholarship Program ng Technical Education and Skills Development Authority (TESDA) na matagumpay na pinamunuan ni dating Secretary General Joel Villanueva, nagkaroon ng kasanayan ang mga Pilipino na makasabay sa hamon ng teknolohiya.
Naglaan si Pangulong Aquino ng mahigit P1.6 bil­yon para sa mga programa ng tinatawag na IT-BPM sector kung saan sinanay ang mahigit sa 200,000 Pi­lipino.
Asahan nating magpapatuloy ang mga programang magpapataas pa sa antas ng kaalaman ng mga Pilipino upang makasabay sa pangangailangan ng teknolohiya lalo’t kabilang ang BPO sa mga tinututukang sektor ni PNoy.
***
Malaki ang pakinabang ng bansa sa matagumpay na pagdaraos ng APEC Leaders’ Meeting kamakailan. Isang pamana ng kahusayan ng pamumuno ni PNoy ang maayos at payapang APEC.
Makikinabang nang husto ang sektor ng turismo lalung-lalo na at naipakita ng APEC 2015 National Organizing Council ang pangunahing mga destinasyon sa Pilipinas kung saan isinagawa ang mga pagpupulong.
Nagsimula noong Disyembre ng nakaraang taon ang pag-iikot ng mga delegado sa iba’t ibang magagandang mga tanawin sa Pilipinas.
Ipinasyal sila sa Iloilo, Cebu, Tagaytay, Bataan, Boracay at Bacolod City kung saan ipinakita sa mga ito ang kagandahan ng Pilipinas.
Sa katunayan, nalampasan ng Department of Tourism (DOT) ang tinakda nitong 10,000 banyaga na bumisita sa bansa matapos umabot ang bilang sa 11,000 para sa buwan ng Nobyembre 2015.
Sa 11,000 turista, hindi kasama dito ang mga de­legado ng APEC na nagsimulang dumating sa Pilipinas noon pang nakalipas na taon. Take note: Hindi pa kabilang ang humigit-kumulang na apat na libong journalist at tinatayang tatlong libo ang foreign media na naglabas-pasok sa Pilipinas.
Sa hanay ng APEC CEO Summit, tinaya lamang ng organizers sa 800 ang mga delagado na umabot sa 1,300. Kabilang sa mga kasapi ng delegasyon ang mga negosyante, CEOs, high-level business mana­gers mula sa 21 APEC economies.
Pinatunayan ni PNoy na laging magbubunga ng maganda ang malinis at matapat na pamumuno sa bansa. Laging tandaan: “Bata mo ‘ko at Ako ang Spy n’yo.” (Twitter: follow@dspyrey)


Friday, November 27, 2015

Dapat tumigil ang China REY MARFIL




Dapat tumigil ang China
REY MARFIL



Parang nag-aalburutong bulkan ngayon ang mundo na anumang oras ay puwedeng sumabog at humantong sa world war 3 dahil sa mga nangyayari sa iba’t ibang bansa. Katulad na lang ng terorismong ginagawa ng Isla­mic State o ISIS, na pinalala pa ngayon ng pagpapa­bagsak ng Turkey sa fighter jet ng Russia.
Ang panggugulo ng ISIS sa Middle East ay umabot na sa Europe at maging sa Great Britain at ngayon ay nagba­banta na rin sila ng pag-atake sa Amerika. Ngunit na­dagdagan ang tensyon ngayon nang pabagsakin ng Turkey ang fighter jet ng Russia dahil sa paglipad daw ng eroplano ng Russia sa airspace ng Turkey.
Sumusolo ang Russia sa pag-atake sa mga sinasabing ISIS at mga rebelde sa kaalyado nilang liderato ng S­yria. Pero dahil boundary lang ang naghihiwalay sa Turkey at Syria, iginigiit ng Russia na nasa teritoryo ng Syria ang kanilang jet; bagay na hindi tinanggap ng Turkey. At matapos umano ng ilang ulit na paalala ng Turkey sa piloto ng Russia na nasa airspace sila ng Turkey kaya dapat silang umalis, hindi raw sumunod ang mga piloto ng Ruso at naganap na ang hindi dapat maganap.
Bunga ng insidente, kung dati ay ISIS at mga rebeldeng kontra sa gobyerno ng Syria ang puntirya ng Russia, nga­yon ay hindi maaalis na gumanti ang mga Ruso sa Turkey lalo pa’t hindi pa malinaw ang kinasapitan ng kanilang mga piloto. Isipin na lang natin ang mga hindi magandang magaganap kapag nagbakbakan ang Rusia at Turkey, at mapilitan ang mga kaalyado nilang mga bansa ng suporta.
Habang umiinit ang tensyon sa Middle East at nababalot ng pangamba sa pag-atake ng terorismo ang Europa, Britanya at Amerika, dito naman sa atin sa Asya ay naka­amba rin ang kaguluhan dahil sa patuloy na pagma­matigas ng China na itigil ang land reclamation at gina­gawang mi­litarisasyon sa West Philippine o South China Sea.
***
Sa nakaraang pagpupulong ng ASEAN, maganda ang ginawang panawagan ni Pangulong Noynoy ‘PNoy’ Aquino sa China na itigil ang mga pagkilos nito sa mga pinag-aagawang teritoryo para maibsan ang tensyon sa rehiyon. Dahil sa ginawang pag-angkin ng China sa halos kabuuan ng WPS, nanganganib ang malayang paglalakbay ng mga barkong pangkalakalan sa karagatan na makakaapekto sa maraming bansa -- kabilang ang Amerika.
Ang senaryong ito ng pagkontrol ng China sa paglalayag ng mga barkong pangkalakalan ang ikinaka­bahala ng Amerika dahil makakaapekto ito sa kanilang ekonomiya. Kaya ang ginagawang paglalayag ng mga barkong pan­digma ng US sa mga ginawang isla ng China at tila paghamon ng mga Amerikano sa mga Tsino ay hindi direktang pagkampi sa ating mga Pilipino. Bagkus ay pinoprotektahan din ng US ang kanilang pansariling interes sa komersyo at pagpapatupad ng pandaigdigang batas para sa malayang paglalakbay sa naturang bahagi ng karagatan.
Gayunpaman, tulad ng insidenteng nangyari sa Russia at Turkey, anumang sandali ay maaaring magkasagupa ang US at China sakaling muling paglakbayin ng Amerika ang kanilang mga warship malapit sa mga islang ginawa ng China.
Dahil naniniwala ang US na maaari silang mag­lakbay sa naturang bahagi ng pinag-aagawang teritoryo, tiyak na hindi sila susunod kapag nakatanggap ng tawag at babala sa China na umalis. Kapag ginawa ito ng China, baka maghalo na ang burger sa mami.
Sana lang ay mapag-isipan ng mga lider ng China ang sinabi ni PNoy sa ASEAN meeting; na gaya ng sinabi ng China na sila ang pinakamatandang sibilisasyon sa Asya, dapat silang magsilbing nakatatanda sa rehiyon at ma­ging huwaran sa pagpapatupad ng kapayapaan at kaunlaran sa Asya, sa halip na maging promotor ng kaguluhan.
Kung hindi ito gagawin ng China, magmumukha silang matanda na walang pinagkatandaan. Laging tandaan: “Bata mo ‘ko at Ako ang Spy n’yo.” (Twitter:follow@dspyrey)

Monday, November 23, 2015

Tagumpay ng sambayanang Pilipino REY MARFIL



Tagumpay ng sambayanang Pilipino
REY MARFIL


Salamat at naging matiwasay at walang aberya sa pagdating at pag-alis sa Pilipinas ng may 22 matataas na lider ng mga bansang kasapi ng Asia-Pacific Economic Cooperation, na kinabibilangan ng dalawa sa mga pinakamakapangyarihan sa mundo ngayon -- si US President Barack Obama at Chinese President Xi Jinping.
Sa kabila ng ilang negatibong balita bago at habang idinadaos sa Maynila ang APEC Summit tulad ng alegasyon ng “laglag-bala” modus sa paliparan at reklamo sa mabigat na daloy ng trapiko, sa kabuuan ay naging positibo ang pananaw at komento ng mga dayuhang dignitaryo sa ating mga Filipino.
Maliban sa mahusay na presentasyon na ginawa ng organizing committee ng Pilipinas na namahala sa preparasyon sa pagpupulong, hinangaan din ng mga economic leaders at kasapi ng kanilang delegasyon ang mainit na pagtanggap o hospitality nating mga Filipino.
Katunayan, aminado ang lider ng bansang Vietnam na magho-host ng susunod na APEC meeting na mahirap mahigitan ang ginawa nating mga Filipino. Para sa kanila mataas ang pamantayan na ginawa ng Pilipinas na sana’y mapantayan man lamang nila sa susunod na taon.
Pero hindi lang ang mga dignitaryo ang nasiyahan sa pananatili nila sa bansa ng halos limang araw, ma­ging ang mga dayuhang mamamahayag na nagkober sa pulong ay puro papuri at pasasalamat ang binabanggit. Bagaman batid at nauunawaan nila ang sentimiyento ng ilang motorista at pasahero na naabala sa trapik dahil sa mga isinarang kalsada, at sa pangkalahatan ay nakikita nila ang mga Filipino na magigiliw at mababait.
Sabi nga ng isang dayuhang mamamahayag mula rin sa bansang third world country na katulad natin, halos magkapareho rin ang sitwasyon ng trapiko sa kanila at sa Pilipinas. Subalit sa kabila nito ay ang kabaitan at pagi­ging palangiti ng mga Pinoy ang higit niyang napansin.
***
Kung tutuusin, hindi lang naman tayo ang nagpapa­tupad ng “lockdown sa kalsada” o pagsasara ng ilang kalye kapag may ganitong napakalaki at sensitibong pagtitipon. Dahil mga lider ng iba’t ibang bansa ang kailangang protektahan, nararapat lang na gawin ng mga kinauukulan ang nararapat. At bilang isang Filipino, ang pag-unawa sa sitwasyon ang tangi nating maibibigay.
Sa dami ng mga pag-atake na nagaganap ngayon sa mundo na maging ang mga mas mauunlad na bansa ay nasisingitan ng mga terorista, dapat nating maunawaan na bahagi ng seguridad sa mga lider na dumalo sa APEC kung anumang aberya na ating naranasan.
Aba’y kung may pag-atakeng naganap habang idina­daos ang APEC at may mga dignitaryong napahamak, tiyak na sikat ang Pilipinas sa negatibong paraan. Bukod sa lalong matatakot ang mga dayuhang turista na magpunta sa atin para mamasyal, malamang na iwasan at matagalan bago pagkatiwalaan muli ang bansa na pagdausan ng isang malaking pagtitipon ng mga world leaders.
May mga nagsasabi na dapat ginawa na lang sa ibang lugar ang pulong tulad sa Subic na pinagdausan ng APEC noong 1996, aba’y iba na ang sitwasyon ngayon pagkaraan ng 20 taon. Sabi nga ng organizing committee ng APEC ngayon, sa Maynila lamang mayroong sapat na pasilidad para tanggapin ang may 9,000 bisita mula sa 22 bansa, maliban pa sa 2,700 mamamahayag mula rin sa iba’t ibang bansa.
Marahil ay malaki nga ang sinasabing P10 bilyong pondo na ginamit sa APEC Summit na ito, pero dapat ding malaman ng publiko na ang paghahanda sa pulong na ito ay nagsimula noon pang isang taon. Hindi rin ito isang pagpupulong lang kung hindi mahigit 200 pagpupulong ng 21 bansang kasapi ng APEC na idinaos sa iba’t ibang lugar sa Pilipinas.
Pero higit sa usapin ng gastos, ang mahalaga ay ligtas na dumating at nakaalis ang mga dayuhang dignitaryo at mga mamamahayag, naging matagumpay ang pagpupulong na ang layunin ay mapalakas pa ang ekonomiya at umunlad ang pamumuhay ng mga bansang kasapi, at napanatili natin ang dignidad ng Pilipinas na kilala sa pagiging magiliw sa mga panauhin dahil sa ipinagmamalaki natin -- Filipino hospitality.
Dahil diyan, hindi nakapagtataka kung dumami ang mga dayuhan na bumisita sa Pilipinas na magpapalakas sa ating turismo. Kaya isipin na rin natin na bahagi ng ginastos ng pamahalaan sa APEC ay para mai-promote ang Pilipinas sa mundo. Laging tandaan: “Bata mo ‘ko at Ako ang Spy n’yo.” (Twitter: follow@dspyrey)