oct 30 2008 abante tonite issue

	Sawsaw-suka si Fiscal!
	Rey Marfil
Ang proposal ng Department of Transportation and Communication (DOTC) na patawan ng ‘one-year suspension’ sa pagmamaneho ang sinumang abusadong public utility driver na masasangkot sa napakalaking aksidente sa kalsada. Ang tanong ng mga kurimaw: bakit ngayon lang napag-isipan ni Sec. Leandro Mendoza ga­yong araw-araw front page ang salpukan ng jeep at bus, maliban kung minumulto ang gabinete ng mga nasawi sa lansangan lalo pa’t nalalapit ang Undas. Kaysa isentro sa public utility driver ang one-year suspension ng lisensiya, bakit hindi isama ni Mendoza ang mga private driver o nagmamay-ari ng pribadong sasakyan, aba’y mas mayayabang sa kalsada at nagkikipag­karerahan, maliban kung abalang pinapanood ang press conference ng kaibigang si MARINA chief Len Bautista lalo pa’t muling uminit ang isyu sa paglubog ng M/V Princess of the Stars sa Sibuyan Island? Hindi lang, bakit hindi sampolan ni Department of Justice (DOJ) Sec. Raul Gonzalez ang mga tauhang abusado sa kapangyarihan, katulad ng nangyari sa hipag at bilas ni Kuya Rocky Nazareno, aba’y biktima ng abusadong piskal gayong simpleng traffic accident ang naganap sa Maynila. Mantakin n’yo, wala namang kinalaman sa banggaan, umepal ang isang nagngangalang Fiscal Salcedo at pinagsalitaan ng masama ang kanyang misis nang sunduin ang tatlong pamangkin, maliban kung mahilig maglaro ng ‘sawsaw-suka’. *** Ang kuwento: nagkasagian lamang ang dalawang kotse, sa pagitan ng isang NBI agent at bilas ni Kuya Rocky na naganap sa Taft, Maynila noong Lunes ng gabi. Ang nakakagulat, rumesponde si Fiscal Salcedo ga­yong parehong naka-comprehensive ang insurance policy at gasgas lang ang nangyari. Ang labis na ikinapikon ni Kuya Rocky, nagawa pang pagsalitaan nang ‘hindi maganda’ ni Fiscal ang kanyang misis gayong pakay lamang nitong ayusin ang damage at kaagad makauwi ang tatlong pamangkin. Mantakin n’yo, alas-10:00 ng gabi nangyari ang minor traffic incident subalit alas-dos ng madaling-araw ng Martes nakauwi ng bahay ang hipag at bilas ni Kuya Rocky! Sa kaalaman ng publiko, puro menor-de-edad o nasa grade school ang mga pamangkin ni Kuya Rocky pagkatapos makakarinig ng masamang pananalita sa isang piskal. Anong klaseng ehemplo ipinapakita ni Fiscal sa mga bata, maliban kung walang ‘GMRC’, as in good manners and right conduct o absent nang ituro ng kanyang titser sa kinder ang kasabihang ‘kung anong ginagawa ng mga matatanda, ito’y nagiging tama sa mata ng mga bata’. Kahit sinong lumagay sa katayuan ni Kuya Rocky, isusumpa si Fiscal, as in hindi katanggap-tanggap sa isang katulad nitong veteran Inquirer repor­ter ang inaabuso ang mga kamag-anakan. Ang ipinagtataka ng mga kurimaw, paano maaagrab­yado ang kaibigan ni Fiscal sa traffic accident ga­yong isang NBI agent ito. Take note: doktora at accountant ang hipag at bilas ni Kuya Rocky at katarantaduhan kung madedehado ang isang NBI agent lalo pa’t hindi maru­nong magbitbit ng baril ang nakasagian ng kotse? Kung simpleng traffic accident, nakikialam ang mga tauhan ni Gonzalez, hindi rin nakakagulat kung bakit kaliwa’t kanan ang controversial contract dahil maraming pakialamero sa Arroyo government. Sabagay, mismong Office of the Ombudsman, hindi kayang sampolan si Jocjoc Bolante sa fertilizer scandal, maging si Million Dollar Man, as in ex-DOJ Sec. Nani Perez kahit kumpirmadong nangomisyon ng $2 milyon sa power contract, ‘di hamak nga namang may karapatan mag-angas ang mga simpleng piskal at tauhan ni Sir Raul. Ika nga ng mga kurimaw: ‘Follow the leader’. (www.mgakurimaw.blogspot.com)

oct 29 2008 abante tonite issue

	2 gabinete nagkainitan sa Palasyo
	(Rey Marfil)
Katulad ng kasabihang ‘good cop, bad cop’, hindi matanggap ng isang matandang gabinete ni Pangulong Gloria Macapagal-Arroyo ang pagkakaroon ng ‘arrive’ ng bagong saltang gabinete kaya’t matinding pagka-bad trip ang nararamdaman nito. Sa report nakalap ng Tonite Spy, ‘hindi feel’ ng matandang gabinete ni Mrs. Arroyo ang bagong saltang gabinete sa kabila ng mahabang pinagsamahan sa legislative body bago napunta sa Palasyo. Ang rason, mala-animalistic ang arrive ng bagong saltang gabinete, as in ‘may dating’ ang mga katagang lumabas sa bibig kumpara sa lahat ng mga presidential appointees na hindi makabasag pinggan kapag kaharap si Mrs. Arroyo. Bago pa man nakara­ting ng Malacañang, likas sa bagong saltang gabinete ang pagiging prangka sa kausap at mala-tambay sa kanto ang mga katagang lumalabas sa bunganga kaya’t madalas inaakusahang sanggano at bastos ito. Dahil may pagka-ba­rumbado magsalita sa press conference at madalas mambara ng reporter ang bagong saltang gabinete, ito’y ikinu­kumpara sa mga government officials na kanyang pinalitan sa trono kung saan napakalamya at expertise ang mambola ng sagot. Ang ipinagtataka lamang ng mga kurimaw sa presidential garden kung bakit ngayon lamang umangal ang matandang gabinete sa ‘mala-maginoo subalit bastos’ na diskarte ng bagong saltang gabinete gayong matagal na nakasama sa isang sangay ng gobyerno. Maliban dito, makailang-beses din nagkasama sa iba pang departamento ang dalawang (2) gabinete at palaging ‘nag-i-exchange notes’, as in hindi bago ang nangyaring ‘reunion’ sa presidential garden kung saan konektado ang kanilang trabaho. Sa kabilang banda, hindi rin masisi ang bagong saltang gabinete na mag-astang sanggano at bastos dahil saksakan ng bolero ang mga pinalitan sa puwesto, animo’y araw-araw nagtitinda ng ‘keso de bola’ para makumbinse ang mga mediamen kausap nito. Clue: Mula sa mala­yong lalawigan ang bagong saltang gabinete at nagpalipat-lipat ng ahensiya bago tuluyang nakarating sa presidential garden kung saan meron letrang ‘J’, as in Jihad habang meron letrang ‘T’ sa surname ang matandang gabinete, as in Tulo-laway sa isang may edad na bebot at nataranta dahil kamuntikan pang na-privilege speech sa Senate. (www.mgakurimaw.blogspot.com)

oct 28 2008 abante tonite issue

	‘Tubong-Lugaw’ si Mar!
	Rey Marfil
Sa pagbabalik ni Jocjoc Bolante, lahat nagpi-’feeling hero’ para ipaaresto ang ‘architect’ ni Mrs. Arroyo sa pagda-divert ng multi-bilyong fertilizer fund noong 2004 election, gamit ang naunang warrant of arrest na inilabas ng Upper House. At meron din ‘umeepal’ pabor sa palasyo, katulad ng ‘kaibigang matalik’ ni Loren Sinta -- si Edong Angara, ngayo’y chairman ng committee on agriculture at pumalit kay ex-Senator Jun Magsaysay. Mantakin n’yo, tinabla ang re-opening ng fertilizer probe gayong maraming katanungan ang tinakasan ni Jocjoc noong 13th Congress at isa sa nagrekomendang kasuhan ng plunder. Sabagay, ‘mala-rainbow’ ngayon ang kulay ni Edong sa dami ng ginawang ‘pagtalon’ at expected ang pakikipaglaro sa ‘playground’ ng esmi ni Jose Pidal! Sa kaalaman ng publiko, buong buwan ng Oktubre 2005 na nag-imbestiga si Magsaysay at buong buwan din na pinagtaguan ni Jocjoc ang Upper House hanggang makunan ng video sa Hotel Sofitel ng ABS-CBN team ni Lynda Jumilla. Sa public hearing noong Disyembre 5, 2005, lingid sa kaalaman ng lahat, meron dalawang tauhan ang US Embassy nagmo-monitor sa kabuuan ng imbestigasyon ni Magsaysay. Ibig sabihin bago pa man tumakas si Jocjoc noong Marso 2, 2006 at naaresto noong Hunyo 2006 sa Amerika, ito’y binabantayan ng US government at kinasangkapan lamang ang pasong US visa. Ang nakakatawa lang, lahat ‘nagbibida-bidahan’ kay Jocjoc subalit balikan ang nakaraan, tanging 17 senador mula sa 23 miyembro ng Upper House sa nakaraang 13th Congress ang pumirma sa Magsaysay report, minus si Vice President Noli de Castro. Sa 17 senador nakapirma sa Magsaysay report, 13 senador ang incumbent ngayong 14th Congress -- sina Manny Villar, Joker Arroyo, Pong Biazon, Pia Cayetano, Edong Angara, Jinggoy Estrada, Ping Lacson, Lito Lapid, Jamby Madrigal, Francis Pangilinan, Nene Pimentel , Juan Ponce Enrile, at Bong Revilla. *** Napag-usapan ang committee report, nakakatawang isipin na sobrang ingay ngayon ng boypren ni Ate Korina sa fertilizer scandal at meron pang proposal na pag-aralan kung meron pang ‘bertud’ ang naunang arrest order ng Senado. Ang malinaw lang ngayon, panalo si Roxas sa lahat ng ‘media action’, aba’y walang kalaban sa mga peryodiko dahil nakabakasyon ang lahat ng presidentiables. Teka lang, bakit hindi ipaaresto ni Villar si Jocjoc sa mga tauhan ni retired General Jose Balajadja at hayaang magreperi ang Supreme Court (SC) lalo pa’t walang inatupag si Mrs. Arroyo kundi magpasaklolo sa mga mahistrado. At least mada-divert ang isyu ng ‘singit at taga’, partikular ang ethics probe sa conflict of interest ng C-5 Road project? Balikan ang Magsaysay report, bakit hindi pumirma sina Roxas, Dick Gordon, Ralph Recto at Fred Lim. Nasaan sina Roxas at Gordon nang irekomendang kasuhan ng plunder at ilarawang ‘grand agricultural theft’ si Jocjoc. Sabagay, tumakbo sina Gordon at Roxas sa ticket ni Mrs. Arroyo noong 2004 at parehong nagsilbing gabinete ang dalawa -- si Roxas bilang DTI Secretary at DOT Secretary si Wow Dick. Ni sa panaginip, ayokong isiping hindi kayang suwayin ni Mr. Palengke, maging ni Gordon ang kanilang amo sa panahong iniimbestigahan si Jocjoc, maliban kung irarason ni Wow Dick ang ‘pagtatapon ng laway’ sa Geneva Switzerland bilang bagong Presidente ng Red Cross kaya’t absuwelto sa pirma ito? In fairness kay Lim, ito’y inoperahan ang mata kaya’t isang buwang nagpahinga at hindi rin kailangan pang itanong kung bakit tinabla ni Recto ang committee report, ikaw ba namang tumagilid sa No.12 slot noong 2001 election? Kung hindi nagkakamali ang Spy, ang pagpapaaresto kay Jocjoc, ito’y alinsunod sa rekomendasyon ni Enrile at walang ibang nag-second the motion kundi si Biazon sa hearing ng committee on agriculture. Sa ngayon, ‘tubong-lugaw’ si Mr. Palengke sa lahat ng media interview kay Jocjoc, maging sa ‘Euro Generals’ na nagbitbit ng P7.7 milyon sa Moscow. At least hindi nasayang ang perang ipinang-arkila kay ex-Press Usec. Bobby Capco na naunang inakusahang adik ni ex-PCSO media consultant Robert Rivero, aba’y balitang P150 libo ang buwanang sahod? Anyway, Aklanon si Jocjoc at Capizeno si Roxas, as in parehong nasa Iloilo region at ‘tawid-dagat’ lang ang mga ito! (www.mgakurimaw.blogspot.com)

oct 27 2008 abante tonite issue

	Lady solon pinaglaruan sa text
	(Rey Marfil)
Kung nakakapasa at nakakasugat lamang ang bawat katagang kumalat sa text joke laban sa isang arogateng lady solon sa malamang nagmukhang bida sa maagang Senakulo ang mambabatas kahit napakalayo ng Semana Santa matapos paglaruan ng mga kalaban at sariling kasamahan ang kahiba­ngan nito. Ang rason, lumalatay ang mga katagang nakapaloob sa text joke laban sa lady solon, katulad ang pagbabalik-tanaw sa kanyang kahibangan at makailang-beses na pagluwag ng turnilyo, as in ipinaalala ng mga kaaway ang kapraningan ng mambabatas sa nagdaang panahon. Sa kasagsagan ng imbestigasyon ng Kongreso sa isang napakalaking eskandalo, nasaksihan ng TONITE Spy kung paano pinaglaruan sa text ang pagkatao ng lady solon kung saan sentro ng katatawanan ang mga katagang binibitawan ng mambabatas at paulit-ulit nitong pagsisinungaling tuwing makukunan ng sound bite sa interbyu. Bagama’t hindi malinaw kung kampo ng kalaban sa pulitika ang mastermind sa pagpapakalat ng malisyosong text joke, maging ilang kagawad ng media hindi maiwasang magbigay ng komento sa ‘kapraningan’ ng lady solon at ipasa sa mga kapwa-mediaman ang mga nalalamang kahiba­ngan ng mambabatas. Kapag sineryoso ang mga katagang nakapaloob sa text messages, ito’y lumalatay sa pagkatao ng lady solon subalit nauuwi lamang sa katatawanan sa hanay ng mga mediaman na nakakatanggap ng malisyosong mensahe dahil lantad sa kaalaman ng mga itong ‘may tama’ ang nabanggit. Hindi naman magawang sisihin ng mga kurimaw ang mga nagpapakalat ng text joke laban sa lady solon dahil naging ‘trademark’ ng mambabatas ang magsinungaling sa publiko, katulad ang paulit-ulit nitong pagbawi sa mga deklarasyon. Clue: Paulit-ulit nagbanta ang lady solon sa kanyang buhay at kalaban sa pulitika subalit paulit-ulit din nagsinungaling. Ito’y merong letrang ‘S’ sa kabuuan ng surname, as in Sala sa init at Sala sa lamig sa bawat isyu. Kung senadora o congresswoman, abangan kung magre-reelection sa 2010. (www.mgakurimaw.blogspot.com)

oct 23 2008 abante tonite issue

	May dalawang ‘yaya’ sa Russia!
	Rey Marfil
Ngayong inaabangan ang pagbitbit kay Jocjoc Bolante ng US Marshalls, hindi maiwasang maungkat ang 2007 report ng Commission on Audit (COA) laban sa Department of Agriculture (DA) -- ang pagkukumpara ng programang Ginintuang Masaganang Ani (GMA) sa fertilizer scandal, sa pamamagitan ng municipal agriculture officers (MAOs). In fairness kay Agriculture Sec. Art Yap, ito’y kaagad lumikha ng fact-finding committee at naisumite ang resulta ng imbestigasyon kay Asec. Eduardo Nolasco nakaraang Setyembre at isa sa repormang ipinatupad ang monitoring sa farm productivity projects sa mga lalawigan. Sa bagong sistema at guidelines inilabas ni Yap, lumikha ng national at regional team ang departamento para bantayan ang daloy ng pondo sa pagitan ng program partners, katulad ng non-government organizations (NGOs) at people’s organizations (POs), ito ang magsisilbing internal audit system upang masukat ang progreso ng ‘GMA initiatives’ at masigurong nakakarating sa mga magsasaka at mangingisda ang ‘intervention measures’. At least napakasensitibo ni Art Yap sa mga banat, hindi katulad ng ilang kampon ni Mrs. Arroyo, aba’y mala-adobe ang balat at abot-tainga pa ang ngiti kapag naiinterbyu ng media! Sadyang mainit ang silya ni Art Yap dahil lahat ng naupo sa departmento, hindi lang sinalanta at binagyo ng eskandalo kundi ‘napeste’ ng mga intriga subalit ‘di hamak mas maayos ang pangangasiwa sa estudyante ng esmi ni Jose Pidal, aba’y nalagpasan ang pinakamalaking delubyo sa Pilipinas -- ang rice crsis, as in umakyat sa 4.7%, mas mataas sa 3.7% kahit tinamaan ng global food crisis ang buong mundo at tumaas ang farm production cost na nagpapahina sa ani. Ika nga ni Aling Matet habang nagtatakal ng bigas, kahit paano, napalago ni Art Yap ang sektor ng agrikultura at personal na kinakausap ang mga magsasaka, hindi puro raid at photo ops upang magpa-cute sa media. *** Sa mahabang listahang ipina-subpoena ni Miriam Santiago ngayong araw, nangunguna ang 20 police at immigration officers na umangkas sa 77th Interpol General Assembly sa Moscow, Russia. Tanging sina Generals Eliseo dela Plaz, plus asawa, Rolando Garcia, Emmanuel Carta plus asawa, Ismael Rafanan, Romeo Ricardo, Silverio Alarcio Jr., Silverio Doria, at Jaime Caringal plus asawa, Supt. Elmer Pellobelo at esmi ni PNP chief Jesus Verzosa -- si Cynthia ang nasentro sa ‘Russia scandal’ gayong mas maraming kampon si ‘Sir Raul’, as in DOJ Sec Raul Gonzalez ang sumawsaw sa biyahe, katulad nina BID chief Marcelino Libanan, NBI Director Nestor Mantaring, Atty. Reynaldo Esmiralda (NBI), Atty. Claro de Castro (NBI), Arnel Dalumpines (NBI), Atty. Norman Tansinco (BI), Atty. Floro Balato Jr., (BI), at Atty. Joysli Tabajonda (DOJ). Kahit itanong n’yo pa kay birthday boy at ex-PTA chief Nixon Kua! Isang mali ni Lola Miriam sa listahang ipina-subpoena, hindi taga-NBI kundi reporter ng Standard Today si Romy Evangelista, katulad ng inilabas sa media. Kung susuriing mabuti ang 120,000 euros nasita sa mag-asawang Dela Paz -- ito’y barya lamang kung ikukumpara sa kabuuang ginastos ng Philippine government sa ipinadalang delagasyon sa Moscow kapag pinagsama ang mga kampon ni Libanan at ‘Euro Generals’ lalo pa’t karamihan dito’y nagbitbit ng asawa at kapamilya. Kahit nagkalat ang ‘Russian beauties’ naglalabasan ang buhok sa kili-kili at bagsak-presyo sa kalye, kalokohan kung walang nagdala ng ‘yaya’, as in yayariin sa Russia, katulad ni Mr. M, animo’y nilasap ang mala-Russia na pagkakalaya sa diktaturyang asawa! Kundi nagkakamali ang Spy, wala sa kalahati ng listahan ang hawak ni Lola Miriam, as in humigit-kumulang 100 ang delegasyon dahil kung sinu-sinong kamag-anak ang binitbit ng mga opisyal at wala rin sa listahan ng lady solon kung sinong public official at numero unong delegado ang nagbitbit ng ‘yaya’. Sa halip, misis o kaya’y anak ang isama sa biyahe, kinasangkapan ni Mr. M ang Interpol General Assembly para makapaglaro ng apoy, animo’y gutom na gutom sa laman, aba’y dalawang ‘sandwich’ ang baon. Take note: pawang guest relation officers (GRO) mula sa kilalang nightclub ang pinaglaruan sa kuwarto. Ang sistema, hindi isinama sa delegation list ni Mr. M ang dalawang bebot -- ito’y kasabay lamang sa pag-check in sa hotel subalit ibang upuan sa eroplano at hiwalay ang entry sa Ninoy Aquino International Airport (NAIA) nang dumaan sa immigration officer para iwas-eskandalo. Kung sino ang walang natutunan sa Interpol Assembly, iyon si Mr. M, as in ‘Mambubutas’ dahil habulan at taguan sa kumot ang inatupag sa loob ng hotel.

oct 22 2008 abante tonite issue

	Ex-mayor ginawang ‘aso’ ni Mayor
	(Rey Marfil)
(Last Part) Hindi nagtatapos ang kuwento sa paglilimahid ng isang ex-mayor matapos madiskubreng pinagkakitaan ni incumbent mayor ang kaibigan sa panahong namamayagpag sa kapangyarihan subalit ngayo’y hindi magawang tulungan at itinuturing pang utusan. Sa report na nakalap ng TONITE Spy, ipinagkatiwala ni ex-Mayor kay incumbent Mayor ang lahat ng mga salaping kinita, maging ang mga ari-ariang naipundar sa pangongo­misyon sa iba’t ibang proyekto sa panahong nasa rurok ng kapangyarihan at tagumpay sa pulitika. Nang matalo si ex-Ma­yor, ito’y naghirap kaya’t naibenta ang karamihan sa mga lupain at ari-arian, kabilang ang nasa panga­ngalaga ni incumbent mayor na nauna nitong ipinagkatiwala kung saan nadiskubre pang kumpanya rin ng nabanggit ang bumili rito. Ang masakit sa lahat, naisahan din si ex-mayor dahil hindi lahat ng mga naipundar o ari-ariang ipinagkatiwala kay incumbent mayor, ito’y nakuha at li­ngid din sa kanyang kaalaman ay nai-divert sa mga kumpanyang pag-aari ng kaibigang opisyal. Hindi maiwasang kaawaan ng mga kurimaw ang dating tinitingalang hari ng City Hall sa Metro Manila lalo pa’t mistulang asong bumubuntot kay Incumbent Mayor gayong kaparte sa salaping ginagastos ng kinikilalang kaibigan ang mga ‘kinita’ sa panahong ito’y nasa kapangyarihan. Nang minsan kumakain si incumbent mayor sa kila­lang restaurant, kasama ang ilang kaibigan, isa rito’y nagtanong kung bakit hindi isinama sa kanilang lamesa si ex-mayor gayong abot-tanaw lamang sa labas ng pintuan at nagmumukhang tanga dahil walang kausap. Sa halip imbitahan ay inutusan ang waiter na tawagin si Ex-Mayor sa kanilang lamesa, isang maanghang na salita ang lumabas sa bunganga ni Incumbent Mayor, kabuntot ang litanyang ‘Binigyan ko na, ayaw pa umalis’ kung saan ikinagulat ng kausap lalo pa’t nalalaman nitong sanggang-dikit ang dalawa sa panahong namamayagpag sa kapangyarihan ang dating opisyal. Pintahan n’yo na: Ka­sing-labo ng mga lumang pelikula sa Sampaguita Compound kung makaka­balik sa City Hall si Ex-Mayor kung saan meron letrang ‘R’ as in nakalusot sa Recall habang mahilig pumapel si Incumbent Mayor kahit wala naman posisyon sa Arroyo government. Ito’y meron letrang ‘P’, as in kasing-tunog ng Pilantod ang surname. (www.mgakurimaw.blogspot.com)

oct 21 2008 abante tonite issue

	Kulang sa pansin si Sinta!
	Rey Marfil
Hindi lahat ng baho, naitatago at palaging may krimen sa pagyaman ng isang tao, katulad ng kinasasangkutan ni Pete Ilagan- ang Pangulo ng National Association of Electricity Consumers for Reforms, Inc. (Nasecore), hindi ba’t inireklamo ng Philippine Rural Electric Cooperatives Association, Inc. (Philreca) at National Association of General Managers of Electric Cooperatives (Nagmec) kay Energy Regulatory Commission (ERC) chairperson Zenaida Ducut tungkol sa monopolyo ng P11.6-milyong Consumer Education Fund (CEF) mula sa Philippine Electricity Market Corp. (PEMC)? Sa kaalaman ng sambayanang Pilipino, ang PEMC ang nagtitimon sa wholesale electricity spot market (WESM)- ito ang pinanggagalingan ng kuryenteng ginagamit ng Philreca. Ang reklamo ng dalawang malaking kooperatiba ng elektrisidad, ibinulsa ang P10.8 milyong pondo mula sa CEF at ginagamit ng Nasecore sa pagpatawag ng conference at meeting upang diumano’y turuan ang mga consumer sa wastong paggamit ng kuryente. Mantakin n’yo, pati gastusin sa pagkain ng mga taga-Nasecore, ito’y kargo ng PEMC, katulad ang meeting sa Metro Manila habang bokya ang Philreca at Nagmec gayong kinakatawan ang grupong nagbibigay ng malaking tubo sa PEMC? Kung susuriing mabuti, higit sa 90% ng pondo para sa CEF ang nawawala kaya’t hindi maiwasang balikan ang background ni Ilagan sa panahong tambay sa Tacloban. Ang tanong ng mga kurimaw sa Napocor compound, anong bertud meron si Ilagan upang makopo ang salaping dapat pinagpapartehan ng mga kooperatiba? Kung hindi nagkakamali ang Spy, unang sumali si Ilagan sa Leyte Electric Cooperative hanggang nagkagulo ang organisasyon at sumawsaw din sa Catholic charismatic group kaya’t nakakuha ng radio program at naihulma ang pagkatao bilang isang lay preacher sa kalauna’y sumabit ang kanyang grupo sa multi-milyon pisong donasyon at limos, maging sa isang malaking anomalya sa Philippine National Police (PNP) sa pagtatahi ng police uniform. Anyway, naging tambay sa Café de Malate si Ilagan at isa sa original PR ni Mrs. Arroyo na siyang humawak sa kontrata ng Quezon Power at ilan pang elementong may negosyo sa Napocor. Ganyan kalupit si Brad Pete! *** Napag-usapan si Mrs. Arroyo, napakaagang ‘gumimik’ ng ilang presidentiables na nag-aambisyon sa kanyang puwesto, pinaka-corny ang pagpapa-showbiz ng ex-wife ni ex-Batangas Governor at murder suspect Tony Leviste -- si Senadora Loren Legarda, aba’y feeling-talent ng Star Circle sa ABS-CBN nang ipangalandakang ‘crush’ si Christopher de Leon gayong ipinanganak itongblack and white ang telebisyon at taga-Sampaguita Picture ang napapanood sa malaking telon, maliban kung kulang sa pansin (KSP). Ika nga, walang pinag-iba ang buhay artista sa pulitika kaya’t maraming nagpu-promote ng pelikula bago mangampanya. Tila nagkamali ng propesyong pinasok si Loren Sinta, aba’y gusto palang makatambal si Boyet de Leon sa pelikula, bakit pumasok sa pulitika, maliban nagpapaintriga para mapag-usapan at makaagaw ng atensyon sa showbiz page dahil walang kuwentang press release ang inilalabas ng kanyang opisina? Asahang lilikha ng malaking intriga sa pagitan ni Sandy Andolong ang pagpapa-cute ni Loren Sinta kay Boyet de Leon lalo pa’t hiwalay sa kanyang mister ang lady solon. Ni sa panaginip, ayokong isiping nauumay si Loren Sinta sa hitsura ng mga kaibigang nakapalibot sa kanya, kaya’t nagpi-feeling artista? Ano kaya ang masasabi ni Senador Edong Angara? Hindi kailangan mag-ala Kim-Gerald o kaya’y mag-Dindong-Marian love team ni Loren Sinta kay Boyet De Leon para maungusan si Senador Chiz Escudero sa presidential survey dahil ‘wais’ ngayon ang mga botante. Ibig sabihin, hindi makukuha ang panalo ng isang kandidato sa pagka-crying sa stage. Higit sa lahat, hindi rin kailangang maghanap ng isang Boyet de Leon ni Loren Sinta para makaagaw ng atensyon sa peryodiko at palabasing naghahanap ng boypren ito, aba’y nagkalat ang mga ‘Boyet’ sa kahit saang kanto, kahit nga sa Media Center meron isang ‘Boyet’ ang tahimik gumagawa ng kuwento at nang-i-scoop-si Boyet Jadulco. Ang partner ko! (www.mgakurimaw.blogspot.com)

oct 20 2008 abante tonite issue

	Ex-mayor, ginawang ‘aso’ ni Mayor
	(Rey Marfil)
Kung anong pagbubuhay-hari sa panahong namamayagpag sa kapangyarihan, ngayo’y nagmistulang pakaining aso kung bumubuntot sa kaibigang incumbent mayor ang isang dating kinikilalang ama ng lungsod sa Metro Manila. Ang masakit lamang sa panig ni ex-mayor, halos wala itong pinag-iba sa mga naghihikahos na consti­tuents kung ituring ni incumbent mayor, katulad ng mga pumipila sa Office of the Mayor kada araw upang humingi ng medical at financial assistance. Sa report na nakalap ng TONITE Spy, madalas kaawaan ng mga kaibigan si ex-mayor dahil nanlilimahid at napakalayo sa dating pagbubuhay-mayaman, partikular sa panahong sikat at makapangyarihan matapos pagharian ang isa sa mayamang lungsod sa Metro Manila kung saan hindi mabilang ang magagarang sasakyan at kaliwa’t kanan ang pag-aaring bahay. Sa panahong nasa kapangyarihan si ex-mayor, lahat ng kalokohan sa buhay, kabilang ang pakikipagrelasyon sa iba’t ibang bebot, ito’y kinasangkutan, maging ang pagpapagamit sa Malacañang upang wasakin ang kalaban sa pulitika hanggang sa pakikipaghiwalay sa lehitimong asawa para patakbuhin sa pulitika ang bagong kinakasama. Ang matinding revelation sa lahat, dati-rati’y takbuhan ni incumbent mayor si ex-mayor lalo pa’t makapangyarihan sa nagdaang administrasyon at nabuo ang magandang pagkakaibigan ng dalawa kung saan ipinagkatiwala ng dating opisyal ang multi-milyon pisong kinita sa pango­ngomisyon ng mga proyekto at iba pang ari-ariang nagmula sa illegal operations nito. Katulad ng kasabihang ‘tuso man ang matsing, napag­lalangan din’, hindi naisip ni ex-mayor na lahat ng bagay may hangganan o katapusan kung kaya’t naiba ang takbo ng kanyang buhay matapos matalo sa eleksyon, maging ang karelasyon nito, as in naghirap ang dating opisyal. Dahil talunan si ex-mayor, karamihan sa mga ari-arian nito’y naibenta at naisangla para matustusan ang luho ng kanyang pamilya at ngayo’y isa sa mga bumubuntot kay incumbent mayor, kalakip ang hangaring mahagisan ng kahit konting biyaya lalo pa’t napakalapit sa Palasyo ng Malacañang nito. Clue: Napakakontrobersiyal ni incumbent mayor at madalas maeskandalo ang mga diskarte sa publiko, pabor kay Mrs. Arroyo. Abangan sa Miyerkules kung sino si ex-mayor at kung paano nagoyo ni incumbent mayor. (www.mga kurimaw.blogspot.com)

oct 16 2008 abante tonite issue

	Ang pagkakaiba nina Manny at Bebot!
	Rey Marfil
Ni sa panaginip, ayaw isipin ng mga kurimaw na naglalaway si Presidential Anti-Smuggling Group (PASG) chief Antonio ‘Bebot’ Villar sa nabakanteng puwesto ni Bureau of Internal Revenue (BIR) Commissioner Lilian Hefti, aba’y astang-tax collector nang ipasara ang oil depot ng UniOil sa Mariveles, Bataan gayong anti-smuggling ang job description, maliban kundi makapag-deliver sa kinakailangang ‘pampuno sa garapon’ ng palasyo o kaya’y sinususian ng ‘Big 3’ kaya’t nagpapaka-hero. Mantakin n’yo, kayang mag-roll back ng P3 ng UniOil suba­lit hindi magawa ng Shell, Caltex at Petron. Bakit hindi ikandado ni Mang Antonio ang ‘Big 3’ kung walang pinapaboran ito? Kahit sinong estudyante sa isang mababang paaralan, naiintindihan na BIR ang nakakasakop sa tax collection at Bureau of Custom (BOC) sa Custom duties, as in hindi collecting agency ang opisina ni Bebot Villar para kolektahin ang P2.7 bilyong pagkakautang ng UniOil. Ang tanong ng mga kurimaw sa Pandacan oil depot: Bakit hindi buksan ni Bebot Villar ang mga libro ng Shell, Caltex at Petron upang magkaalaman kung sino ang nagto-’tongpats’ sa presyo ng langis at nagpapasasa sa Oil Deregulation Law kung kaya naman pala nitong ipasara ang oil depot ng UniOil? Tutal, ‘nagmamatapang’ din lang naman si Bebot Villar kontra UniOil at natutong mangolekta ng buwis, bakit hindi i-padlock ang opisina ng mga isinasangkot sa tax evasion. Sa malamang, magka-ubusan ng kandado sa merkado sa dami ng mga abusadong negosyante. Kaya’t mag-ingat si Miss Judy Ann Santos, aba’y hindi mala­yong ikandado ni Bebot Villar ang kanilang mansion kahit simpleng pagkakamali sa tax declaration ang sinabitang kaso, maging ang uupong kapalit ni Hefti o kaya’y si BOC Commissioner Napoleon Morales, baka mani­ngil ng tatlong (3) suweldo si Bebot Villar lalo pa’t inaagawan ng trabaho ang mga ito! *** Ang kagalingan lang ni Bebot Villar, hangga’t may bendisyon ng Malacañang, ito’y walang kinakatakutan kahit harangan ng pana at sibat ng kritiko. Mantakin n’yo, nakikipag-upakan ang mga bodyguard at maraming nasampolan, isa si Simon Paz sa loob ng CR. Ang resbak pa ni Bebot Villar sa UniOil. “Hayaan mo na sila sa mga human rights violation na ‘yan. Mag-demanda sila” - Iyan ang hindi makita ng mga kurimaw kay Senate President Manuel Villar Jr., sa isyu ng ‘tongpats’. Sabagay, hindi pa nga nagsisimula ang bakbakan sa floor sa pagitan ni opposition senator Panfilo ‘Ping’ Lacson, kaagad sugatan sa kanang kilay at hindi man lang nalaman ang pangalan ng lalaking naka-head butt sa PICC compound, malinaw napalusutan ang security, katulad din sa double entry! Kung mala-Manny Pacquiao ang sabayang-atake ni Bebot Villar sa lahat ng mga smuggler, puro takbo ang estilo ni Manny Villar, aba’y wala nang hinarap sa ‘tongpats issue’ kundi ang dalawang (2) spokesman - sina Lolo Joker Arroyo at katukayo ni Joselito Cayetano, pinakahuli ang pag-iwas sa media interview kahit inireklamo sa committee on ethics ito. At minsan lang sumuntok sa press conference, nagkasabit-sabit pa si Manny Villar kaya’t lumawak ang sakop ng C-5 Road mess, pinakahuli ang P1.2 bilyong ipinambayad ng DPWH sa right of way (ROW) kay Bro. Mike Velarde subalit hindi napakinabangan dahil nagkaroon ng panibagong funding at na-divert ang highway sa lupain ni Lolo Manny! Sa mahigit isang buwan, puro pagmumukha ni Pedro ang napapanood sa telebisyon at naririnig sa radyo. At kahit mala-’Halimaw sa Banga’ ang pagkukwento at dispalinghado ang explanation sa C-5 Road, walang ibang choice ang publiko kundi pakinggan ang anak ni dating senador Renato ‘Companero’ Cayetano na naimbestigahan sa P80 milyong BW resources scandal ng committee on ethics upang balanse ang pagtitimbang sa eskandalo. Kaya’t panalangin ni Aling Matet habang namamasyal kasama ang alagang aso ‘sana’y mag-ala Bebot’ si Manny Villar at harapin ang imbestigasyon para ma­tuldukan! (www.mgakurimaw.blogspot.com)

oct 15 2008 abante tonite issue

	City mayor nangbalasubas ng mga kontratista
	(Rey Marfil)
Kung meron pinaka-balasubas sa lahat, wala nang tatalo sa isang city mayor ng Metro Manila, kasunod ang pagkakadiskubreng pinagkakitaan ang mga kontratista subalit hindi magawang bayaran ang pagkakautang nito. Sa reklamong natanggap ng TONITE Spy, pinagkakitaan ni City Ma­yor ang kontrata subalit nang magkasingilan, ito’y nagawang pagtaguan ng alkalde kung saan ilang taon nang tinatakbuhan ang atraso sa mga contractor. Isa sa misis ng mga kontratistang binalasubas ni City Mayor ang nagkumpirmang nagsasa-Palos ang opis­yal kapag oras ng singilan, patunay ang pag-iwas sa kanyang opisina sa tuwing bibisitahin sa City Hall, maging ng ilan pang pinagkakakautangan nito. Ang matinding reve­lation sa lahat, gustong maki­parte ni City Mayor sa kukubrahing balanse ng contractor kung saan handang bayaran ng City Hall ang kabuuang pagkakautang subalit kailangang hati sa makokolekta, as in 50% ng collectibles ang mapapasakamay ng kumag. Sa loob ng dala­wang taon, halos napudpod ang sapatos ng kontratista para maningil sa City Hall, as in pinabalik-balik ni City Mayor at pinapangakuang babayaran ang natitirang balanse sa ipinatayong gusali subalit nauwi sa laway ang lahat ng pag-uusap nito. Clue: Saksakan ng dupang si City Ma­yor, hindi lamang sa pera kundi sa bebot, patunay ang pagkikipagrelas­yon sa isang personalidad at naglipanang guest relation officer (GRO). Ito’y meron letrang ‘R’ sa kabuuan ng pangalan at apelyido, as in mala-Total Recall. (www.mgakurimaw.blogspot.com)

oct 14 2008 abante tonite issue

	Nagkasibakan!
	Rey Marfil
Pinag-resign o sinibak, nakakagulat ang nangyari kay BIR chief Lilian Hefti. Mantakin n’yo, buong-buhay sa loob ng 20-taon, ibinuhos ng opisyal ang kanyang oras sa ‘tax collection’, pagkatapos sisibakin lamang ni Mrs. Arroyo. Hindi bale si ‘Mr. Prito’, as in presidential legal counsel Sergio Apostol -- ito’y isang pulitiko at asahang ‘balik-Kongreso’ sa 2010 lalo pa’t misis ang nakaupo, katulad din ni Maguindanao Cong. Simeon Datumanong, animo’y ginawang ‘palipasan ng oras’ ang DOJ at DPWH? Ang masakit sa panig ni Hefti, ito’y iniintriga pang pinag-aral sa Amerika ng isa sa inaakusahang tax evader kaya’t sinibak ni Mrs. Arroyo. Ni sa panaginip, ayokong isiping hindi nakapag-deliver si Hefti at hindi nagawang ‘punuin ang garapon’ ng Malacañang kaya’t sinibak taliwas sa alegasyong hindi naabot ang puntiryang tax collection, katulad sa kuwento ng isang kababayan ni Hefti sa Bicol na nakatabi ng mga kurimaw sa sinehan habang hinihintay ang pagsisimula ng pelikulang ‘Body of Lies’, aba’y nag-aalimpuyos sa galit si Tatang pagkatapos kantahin ang Lupang Hinirang at dinugtungan ng pangalan ni Mrs. Arroyo ang huling talatang ‘Ang mamamatay ng dahil sa iyo’. Kung nakakapatay ang binitawang kataga ni Tatang, sa malamang si Vice President Noli de Castro ang bagong occupant ng Malacañang. Ibig sabihin, napakarami ang galit kay Gloria! *** Hindi natin babangitin ang pangalan pero isa sa miyembro ng Wednesday Group ang nagkumpirmang bitbit ni Senate President Manuel Villar Jr., sa kanilang ‘weekly forum’ ang eskandalo sa Upper House -- ito ang pinaka-’hottest issue’ tuwing Wednesday Night at napaka-emotional kapag pinag-uusapan ang katagang ‘Singit at Taga’ kaya’t mismong si De Castro ang nag-suggest sa tropa na ‘change to­pic’, aba’y masisira nga naman ang kasiyahan. Sa malamang, hanggang pagtulog, napapanaginipan ni Villar sina Lacson at Jamby Madrigal. Kahit itanong n’yo pa kay Mr. Straight to the Point, as in Ely Saludar na mapapanood sa IBC-13 tuwing Miyerkules, ganap na alas 7:00-8:00 ng gabi! Maliban kay Villar, bagsak din ang ‘tuka’ ng isa sa lider ng minority bloc sa Lower House, ito’y maagang tumaya sa mister ni Las Piñas Congw. Cynthia Villar at hindi malaman ngayon ni ‘Congressman R’ kung paano ililipat ang pusta. Kundi nagkakamali ang Spy, tumaya kay Lacson noong 2004 election si Congressman, kasama ang negosyanteng kapatid pero naunsyami ang pagsasanib-puwersa nina ‘Da Ping’ at ‘Da King’ kaya’t walang nahita si Congressman at naupo si Mrs. Arroyo via Hello Garci scandal. At nakaraang linggo, naispatang lulugu-lugo si Congressman habang kausap ang mga dating katropa. Abangan kung maghahanap ng ibang ‘pupustahang manok’ si Congressman ngayong sugatan sa sariling tari si Villar! *** Sadyang nauuso ang sibakan, aba’y usap-usapan ang pagsipa ng ex-wife ni ex-Batangas Gov. Antonio Leviste sa kanyang PR man, hindi lamang sa GSIS compound kundi sa iba’t ibang coffee shops. Ang isyu: hindi lang namangka sa dalawang ilog kundi tatlo hanggang limang bangka ang ‘sinasagwan’ ng kanyang PR man. Sandamakmak ang kliyenteng senador ni ‘Mr. W’ kaya’t nagkasabit-sabit sa paglabas ng press release. Sa dami ng raket, hindi malaman kung sino ang uunahin kaya’t aksidenteng napadalhan ng statement ni Manong Johnny Enrile ang inyong lingkod pero letterhead ni Loren Sinta ang ulo at iisa pa ang tipo, as in routine na ‘pagsabungin’ sa press releases ang mga kliyenteng senador at ginigisa sa sariling mantika para itulak ang pansariling interes nito! Anyway, itinanggi ng kaibigang matalik ni Senador Edong Angara -- si Loren Sinta ang pagsibak kay ‘Mr. W’ dahil nabisto nitong nagtatrabaho nang palihim sa kalabang presidentiable, katulad ang alegasyong inarkila ng kampo ni Villar sa isang ‘special operation’ upang patayin sa mga peryodiko, radyo at telebisyon ang lahat ng banat sa ‘tongpats issue’. Ang depensa ni Loren Sinta: ‘Kaibigan ko lang siya. Hindi ko siya staff. Wala siya sa akin at tumutulong lang’. At lingid sa kaalaman ng kurimaw, kinuha pa lang PR man ni Senador Dick Gordon si Mr. W. Ang depensa ni Loren Sinta: ‘Hindi ako. Kay Senador Dick Gordon iyon pero ang alam ko wala na sa kanya’. Kung nakuha ni Villar si Mr. W bilang bagong PR man, isa lang ang malinaw, natraydor si Loren Sinta at posibleng malanta ang Luntian! (www.mgakurimaw.blogspot.com)

oct 13 2008 abante tonite isssue

	Senador nilayasan ng anak
	(Rey Marfil)
Mistulang nagkaroon ng domino effect ang nauusong paglalayas ng mga misis, kasunod ang pagkakadiskubreng nag-alsa balutan ang isa sa anak ng isang miyembro ng Upper House dahil hindi matagalan ang masamang pag-uugali ng ama. Sa report na nakalap ng TONITE, nag-alsa balutan, as in naglayas ang anak ng misis ng senador upang ipakita ang matinding pagkadismaya sa masamang pag-uugali ng ama bilang suporta sa madalas na pagdaing ng kanyang ina. Dati-rati’y kinakampihan ng anak ang senador kapag nagsusumbatan sa pera o nag-aaway ang mag-asawa subalit iba ngayon ang sitwasyon kung saan nagawang sumali sa away ng una at umiral ang pagiging makaina. Ang masamang pag-uugali ang malululutong na kadahilanan kung bakit sukdulan hanggang Central Luzon ang pagkabad-trip sa senador ng mga ‘kapamilya at kapuso’ ng napangasawa nito. Mismong naglipanang kurimaw sa Upper House ay dismayado sa pagiging belekoy ng senador kaya’t naiintindihan ng mga ito kung bakit nag-aalimpuyos sa galit ang mga kapamilya ng misis. Ang kagandahan lamang sa paglalayas ng anak ng makunat na senador, ito’y hindi napariwara, katulad ng mga eksena sa pelikula kung saan nalululong sa masamang bisyo at gawain ang mga ‘stow-away’ dahil dumiretso sa bahay ng kanyang mga pinsan. Sa kabilang banda, ikinatuwa ng mga kamag-anakan ng misis ng senador ang pag-alsa balutan ng panganay nitong anak dahil magsisilbing leksyon ang paglalayas para tumino ang ama. Mayaman ang angkan ng napangasawa ng kunyong senador, partikular ang isang public official na tinakbuhan ngayon ng kanyang anak, as in kayang ampunin ang buong pamilya ng mambabatas kapag nagdesisyong hiwalayan ang kumag. Clue: Kasing-kunat ng singaw na kornik ang kunyong senador at kalaban sa pulitika sa panahong magkasama sa ‘local level’ ang public official na tinutuluyan ng anak nito. Abangan ang susunod na kabanata. (www.mgakurimaw.blogspot.com)

oct 9 2008 abante tonite issue

	Ang lupit ng STRADCOM!
	Rey Marfil
Kaysa balutin ng pagmumukha ng ‘bayaning isinusuka ng vendors’ ang buong Metro Manila na si Bayani Fernando, maging ang buong kapuluan kahit labas sa charter ng Metro Manila Development Authority (MMDA) ang pumasok ng probinsiya, mas makakabuting aksyunan ang reklamong natatanggap. Malay n’yo, isa ang email sender sa matanong ng Social Weather Station (SWS) at Pulse Asia. At least hindi ‘zero’ sa presidential race si Chairman! “Kami po na mga driver na bumibiyahe sa rutang Novaliches-SM/MRT ay nananawagan na sana ay tulungan ninyo kami dahil sobrang naaapektuhan na po ang a­ming pagha­hanapbuhay dahil sa ginagawa ng mga tiwaling MMDA officials. Ang MMDA po ang namamahala sa aming terminal sa MRT North Station pero sa halip na kaming mga mahihirap na mga driver ay tulungan, kami pa ang kinokotongan. Pinag-a-apply nila kami uli ng permit para makapasok at makapagsakay sa loob ng MRT Loading kasabay ang paghingi sa amin ng Traffic Assessment na sila raw ang gagawa at babayaran namin ng P10,000. Ang nangyayari po ay kung sino ang may pera, siya lang ang makakapila sa MRT. Pati po iyong namamahala sa Central Terminal ay nanghihingi rin ng P1,000 sa bawat asosasyon na nagti-terminal doon eh, kami po ay nagbabayad na ng terminal fee pero kino­kotongan pa rin kami. Sana po ay maiparating ninyo kay Chairman BF ang ginagawa ng kanyang mga tauhan sa amin na mga driver. Maaari po ninyo kaming makausap sa aming pilahan sa MRT Station o sa Central Terminal sa may EDSA malapit sa stasyon ng MRT at Quezon Avenue. Sender: villaliz@ymail.com *** Napag-usapan ang raket ng MMDA, saludo ang mga kurimaw sa pagpa-imbestiga ni Cong. Ompong Plaza sa multi-bilyon pisong kontrata ng Stradcom dahil barya lamang ang ZTE-NBN scandal na unang natunton sa opisina ni DOTC Sec. Larry Mendoza. Mantakin n’yo, simula nang mapasakamay ang database contract na nangangasiwa sa 4 milyong sasakyan at 12 milyong driver, animo’y Stradcom ang nagpapatakbo sa Land Transportation Office (LTO). At kahit sino pang Pontio Pilato at Hudas Escariote ang maupo sa LTO, ito’y sunod-sunuran sa mga taga-Stradcom, ewan lang kung merong ‘balls’ si LTO chief Tom Lantion? Ni sa panaginip, ayaw isipin ng mga kurimaw sa LTO headquarters na sangkot ang Stradcom sa smuggling at carnapping, aba’y paano nga naman maipapasok sa LTO data­base ang mga carnap at smuggled vehicles kung walang bendisyon nito? Sa kasulukuyang sistema ng bayaran sa LTO -- walang ibang kumakamal ng mahigit P2 bilyon kada taon kundi Stradcom gayong bulok at paputul-putol ang sistema. At pagkatapos, Stradcom din ang itinuturong nakiki­nabang sa P400 milyong interconnectivity projects gayong dapat ito’y diretso sa LTO. Take note: meron pang alegasyong nagbibigay lamang ng 3% hanggang 6% ang Stradcom sa LTO gayong pag-aari ng LTO ang database na pinagkukunan sa validation. Hindi kaya inaabuso ng Stradcom ang posisyon bilang nagmamay-ari ng computer at IT facilities upang kontrolin ang lahat ng puwedeng pagkakitaan sa LTO? Maging ang pla­nong takeover ng GSIS sa CTPL Insu­rance, walang ibang itinuturong promotor kundi Stradcom upang mamanipula ang buong operasyon ng LTO at maging inutil ang ahensiya lalo pa’t malapit nang mapaso ang kanilang kontrata sa 2010. Ibig sabihin, mapipilitan nga naman ang LTO na i-renew ang Stradcom nga­yon pang matunog sa mga coffee shops bilang ‘broker’ sa negosasyon at mangongolekta sa bilyong kikitain bilang preparasyon ng Malacañang sa 2010 election. (www.mgakurimaw.blogspot.com).

oct 8 2008 abante tonite issue

	Senador nilayasan ni misis
	(Rey Marfil)
Taliwas sa ipinapakitang ‘ka-sweetan’ sa harap ng camera, katulad ng mala-langgam na pagmamahalan kapag maraming mapanu­ring-mata, tuluyang nilayasan ng kanyang misis ang isang miyembro ng Mataas na Kapulungan ng Kongreso at nagkatotoo ang matagal nang hinala ng lahat. Maliban sa isyung may na-asembolang bebot ang kunyong senador, nadiskubre ng TONITE Spy na lumalim ang hidwaan ng mag-asawa sa lumala­king gastusin ng pamilya kung saan hindi magawang maglabas ng sariling pera ng mambabatas kaya’t nag-alsa-balutan ang misis nito. Noong nakaraang Oktubre 6, araw ng Lunes, halos maghuramentado at nagwawala sa galit ang misis ng kunyong senador kung kaya’t nagdesisyong hiwalayan ang mambabatas, kasabay din ang paglalayas sakay ng evening flight patungong Hong Kong. Naka-iskedyul sana ang misis ng kunyong senador na dumalo sa party ng mga miyembro ng Upper House kagabi (Martes) subalit sinabayan nito ng layas patungong Hong Kong, kasama ang alalay at anak nito. Isa ang misis ng kunyong senador sa nakalistang guest kagabi sa Senate party na ginanap sa Manila Hotel, ganap alas-7:00 ng gabi su­balit hindi dumalo ang babae maging ang senador. Ang nakakatawa sa lahat, meron pang titulong “One Family and Evening with Senators and Family’ ang pagtitipon ng Senate Spouses at mga senador sa Manila Hotel subalit kabaliktaran ang pangyayari sa sinapit ng kunyong senador dahil inabandona ito ni misis. Bagama’t maraming ari-arian ang misis ng kun­yong senador at barya-barya lamang ang kinikita ng mambabatas, mistulang pelikulang ‘Kapag Puno na ang Salop’ na pinagbidahan ng namayapang si Fernando Poe Jr., ang ginawa ng kanyang misis. Ang malaking sampal sa kunyong senador, to’y tuluyang nilayasan ng kanyang misis, bitbit ang kanilang anak dahil sa sobrang kunat, as in super belekoy kung saan hindi nito magawang magpakawala ng sariling pera dahil sinosolo ng mambabatas ang kinikita. Unang nagkahiwalay sa panahon ng kampanya ang mag-asawa noong 2007 election subalit gumitna ang mga kapatid ng kunyong senador kaya’t napigilan ang pagkasira ng kanilang pamilya. Matagal nang nabisto ni misis ang pagkakaroon ng karelasyon na naanakan pa ng kunyong senador subalit lumala ang hidwaan ng mag-asawa dahil sa pera. Clue: Saksakan ng kunat ang senador at ikinagulat ng publiko kung bakit nagustuhan ito ng kanyang misis. Kung reeleksyunista o nangangarap tumakbong Vice President sa 2010 ang senador, abangan kung kaninong paksyon sasama ito. (www.mgakurimaw.blogspot.com).

oct 7 2008 abante tonite issue

	Ma-artista o pulitiko, walang patawad!
	Rey Marfil
Kahit saang coffee shops, usap-usapan ang pagbubuntis ng ex-television lady reporter at walang ibang itinuturong ‘suspetsado’ kundi ang kilalang ex-Palace official. Ang pinaka-latest report, ito’y ipinagtatayo ng mansion ni ex-Palace offi­cial. Hindi lang malinaw kung saang lupalop ng Metro Manila. Ang masakit sa panig ng lehitimong pamilya, tuluyang ‘nag-evacuate’ ang kanilang ina at tumira sa bahay ng isang anak sa Corinthians. Sino ba naman ang hindi mag-aalsa balu­tan kung madiskubreng ‘naglaro ang mga daga habang wala ang pusa’ nang magbakasyon sa Europa ang legal wife? Teka lang, nang minsan ipatawag ni ex-Palace official ang isa sa kaibigang reporter sa kanyang bahay, kasunod nitong lumabas sa kuwarto at nagpapatuyo ng buhok ang bebot, animo’y katatapos lamang mag-love making. Kundi nagkakamali ang Spy, unang kinuhang secretary ni ex-Palace official ang ex-television lady reporter at binitbit sa Amerika pero ngayo’y astang-misis sa mismong bahay ng legal wife. Hindi nakakapagtakang natipuhan ni ex-Palace official ang bebot -- ito’y ‘kasing-height’ ng isa sa nakarelasyong singer at kahawig ng isa pang naasembolang starlet. Nang unang makita ng isang ex-general ang ex-television lady reporter, isa lang ang namutawi sa kanyang labi ‘mag-usap tayo pagkatapos ng tatlong buwan, hindi secretary ang magiging papel niyan’. Naganap ang prediksyon ni ex-general dahil ‘four months preggy’ ngayon ang bebot at puro statement ni ex-Palace official ang laman ng kanyang blog. Ganyan kalupit si ex-Palace official! *** Maliban kay ex-Palace official, isa pang ‘House leader’ ang mala-Rea Rubbing Alcohol ang ‘motto’, aba’y sinamantala ang pakikipag-break ng isang ‘teenage actress’ mula sa Kapuso network sa kanyang politician boyfriend. Nang mabalitaang ‘cool off’ ang mag-dyowa, kaagad inimbitahan ng dinner date ni Congressman B ang young actress via text sa pag-aakalang pumapatol sa kahit sinong pulitiko at makukuha sa ‘pera-pera’ ang bebot. Ang nakakasuka at nakakadiri sa lahat, halos ‘apo sa tuhod’ ni Congressman B ang young actress pero gustong tikman. Lingid sa kaalaman ni Congressman B, nakarating sa kaala­man ng ex-boyfriend ng young actress ang ‘dinner date’ na ino-offer. Hindi pa nakuntento si Congressman B, aba’y personal pang tinawagan sa cellular phone ang young actress at tinanong kung interesado sa dinner date subalit barado ang mga hirit. Ang nakakatawa lamang, nai-forward ng young actress sa ex-boyfriend politician ang text messages kaya’t pinagtatawanan ngayon ang ‘House leader’, hindi lamang ng mga taga-showbiz industry kundi mismong ‘politician friends’ lalo pa’t madalas mainterbyu sa television si Congressman B. Anyway, wala ring patawad sa ‘tsiks’ si Congressman B at ‘weakness’ ang magagandang lady reporter kaya’t nagkasabit-sabit! *** Ang pinakamalupit nadiskubre ng Spy, hindi lang mga pulitiko at businessmen ang tambay sa kilalang massage parlor sa Binondo Maynila. Mantakin n’yo, pati taga-showbiz, katulad ng mga kilalang matinee idol at tinaguriang ‘hunk’, animo’y naubusan ng ‘pagpapalipasan ng init’ dahil numero unong parokyano at walang paltos kada linggo kung duma­law sa ‘katayan’. Huwag nating banggitin kung anong massage parlor ang nag-o-offer ng ‘extra services’ sa Binondo subalit kinagulat ng mga kurimaw ang pangalan ng isang talunang senatoriable ng Team Unity (TU) -- si ‘Veggie’, aba’y bukambibig at kilalang-kilala ng mga masahista ang kanyang surname at given name. Mabuti na lang, ‘masama ang pagkakadilig’ kaya’t hindi yumabong noong 2007! Maliban kay ‘Veggie’, parokyano at tambay din ng massage parlor ang guwapito at kilalang Vice Mayor ng Metro Manila, maging ang ‘mortal enemy’ nitong ex-councilor na natalo sa pagka-congressman, ‘center player’ ng PBA Team na tinaguriang ‘Fil-Sham’ at komedyante na ‘mainstay’ sa kilalang noontime show. Ang isa pang ikinagulat ng mga kurimaw, ang isang multi-talented young actor ng Kapa­milya network, aba’y ‘kasing-blockbuster’ ng huling pinagbidahang pelikula kung ‘pumasyal’ sa sauna. Sabagay, may katandaan ang syota ng young actor at hindi nakakapagtakang maghanap ng batang masahista. Ang pinaka-latest na naispatan ng nakaraang linggo, walang iba kundi ang isang hunk at bida sa mga soap opera mula sa Kapuso network -- si Actor W! (www.mgakurimaw.blogspot.com)

oct 4 2008 abante tonite issue

	Gabinete, may private army!
	(Rey Marfil)
Sandamakmak ang nagsisilbing bodyguard ng isang aroganteng kampon ni Pangulong Gloria Macapagal- Arroyo, animo’y meron itong sariling private army at laging nasa giyera kapag pumapasok ng opisina. Sa report na nakalap ng TONITE Spy, walang binatbat si Executive Secre­tary Eduardo Ermita, maging ang ilan pang gabinete ni Mrs. Arroyo na nakalinya sa defense department at national security agencies sa asta ng aroganteng gabinete. Ang rason, kasing-dami ng mga langgam sa presidential garden ang nagsisilbing bodyguard at security ng aroganteng gabinete ni Mrs. Arroyo, hindi pa kabilang ang sangkaterbang back-up vehicles, na animo’y susugod sa giyera ang opisyal. Ang nakakasukang nadiskubre ng mga nag­lipanang kurimaw sa pre­sidential palace, na-triple ang gastusin ng opisina ng aroganteng gabinete ni Mrs. Arroyo simula nang maupo ito sa departamento kumpara sa mga pinalitang opisyal dahil animo’y ‘tubig’ kung magpakarga ng gasolina at ‘sinasagad’ ang gas allo­wance na ibinibigay ng pamahalaan. Bagama’t walang kinalaman sa national security ang papel sa Malacañang, dalawang tauhan ng Philip­pine National Police-Traffic Management Group (PNP-TMG) ang nagsisilbing hagad, sakay ng tig-isang motorsiklo, ng aroganteng gabinete. Maliban sa dalawang uniform PNP-TMG personnel, dalawa pang tauhang nakasakay ng motorsiklong naka-Enduro ang nagsisilbing ‘sweeper’, as in civi­lian clothed subalit parehong armado ng de-kalibreng baril. Ang malupit sa lahat, lima hanggang anim pang back-up vehicles o convoy ang nakabuntot sa service vehicle ng aroganteng gabinete ni Mrs. Arroyo, kinabi­bilangan ng mga de-otsong makina na sasakyan. Dahil ipinagbawal ang pagkakaroon ng maraming convoy at security, itinatago ng aroganteng gabinete ni Mrs. Arroyo ang mga nagsisilbing private armies, as in isang hagad at back-up vehicle lamang ang pinapapasok sa parking lot kapag pumapasok ng Malacañang. Clue: Astang-hari sa kalsada ang aroganteng gabinete at madaling maglaho kahit takip-silim. Ito’y ex-member ng Lower House kung kaya’t nangangarap makarating ng Upper House at mahilig sa katagang ‘nationwide’ sa press conference. (www.mgakurimaw.blogspot.com)

oct 3 2008 abante issue

Ex-Palace official ‘kinotongan’ ng BMW

Kabaliktaran sa imaheng ‘maka-bayan at maka-mahirap’ kapag nagsasalita sa mga maralitang taga-lungsod, siyang dupang sa pera ng isang adviser ni ex-Pa­lace official, patunay ang lantarang ‘pambubukol’ kaya’t nakabili ng bagong modelo ng sasakyang BMW. Hindi maitago ni Mang Teban ang matinding pagkadismaya matapos madiskubreng nakabili ng bagong modelo ng sasakyang BMW ang isang nagpapakila­lang lider ng militanteng grupo, sa pamamagitan ng ‘pa­ngongotong’ at ‘pambubukol’ sa pondo ng tanggapan ng kaniyang amo. Ang matinding revelation sa lahat, hindi man lamang nakitaan ng konting kahihiyan o delicadeza sa katawan ang dating lider ng militanteng grupo dahil harap-harapan pang ipinaparada ang bagong modelo ng BMW sa kanyang amo. Nang minsang ipinatawag ang dating lider ng militanteng grupo sa bahay ni ex-Palace official, hindi nakapagpigil ang kanyang amo at diretsahang ibinulong sa ibang bisita na siya mismo ang bumili ng service vehicle ng una. Sa pag-aakalang iniregalo ang bagong sasakyan sa kanyang adviser, ang kulay itim na X-5 BMW nakaparada sa kanilang harapan, napa-Wow ang kausap at pinuri ang pagiging galante ni ex-Palace official. Subalit nang malaman nito ang katotohanan, kaagad kumambiyo si ex-Palace official at laking gulat ng ma­laman nitong nakabili ng bagong X-5 BMW ang da­ting lider ng militanteng grupo na tumatayong adviser ng una dahil sa ‘pambubukol’, as in ‘tinitira’ ang salaping ibinibigay ng kanyang amo o campaign donation para sa mga local officials. Pintahan n’yo na: Nagbabalak pang makabalik sa poder si ex-Palace official kahit limitado ang termino habang ang dating lider ng militanteng grupo na tumatayong adviser nito’y meron letrang ‘C.R’, as in Corrupt at Raket ang bumili ng mga ralliyista.

oct 2 2008 abante tonite issue

	Onli in da Pilipins, Mr. President!
	Rey Marfil
Kapag nagkataon, si Manny Villar ang ‘1st Senate President’ na nakasuhan sa committee on ethics, simula nang makamtan ng Pilipinas ang kasarinlan sa kamay ng mga Amerikano - ito’y malaking dagok sa imahe ng mister ni Maam Cynthia na nangangarap sa trono ng mister ni Jose Pidal. Nagkataon o sinadya, halos magkapareho ang eskandalong kinasasangkutan ni ex-President Manuel Quezon bilang Senate President noong 1933- ito’y may kinalaman sa real state. Kaya’t ipanalangin ng mga supporters ni Lolo Manny, ito’y ma-absuwelto sa committee on ethics kundi maagang mana-knock out (KO) sa presidential derby ngayong pang meron sumusungkit sa Senate Presidency. Umiikot lamang ang nangyayari sa pulitika at ‘sila-sila rin ang nagkikita sa finals’. Hindi ba’t si senador Joker Arroyo ang ‘No. 1 contender’ bilang Speaker of the House subalit ibinigay ni ex-President Joseph ‘Erap’ Estrada kay Villar ang ‘go signal’? Si Lolo Joker din ang ‘No.1 mortal enemy’ ni Villar sa Lower House at nag-akusa ng corruption at conflict of interest sa mga ‘propriedad’ pero ngayo’y ‘No.1 Defender’ sa Upper House at magka-tropa sa Wednesday Club, as in nakalimutan humigit-kumulang 20-pages privilege speech noong August 17, 1998 sa Lower House? Si Lolo Joker din ang ‘No.1 mortal enemy’ ni Erap sa impeachment trial at nagpasakit ng ulo bilang prosecutor kaya’t meron Clarissa Ocampo at walk out na naganap pero ngayon katabi ng upuan at ka-jamming sa meeting ng majority bloc si senate pro-tempore Jinggoy Estrada na anak ni Erap, plus Villar na nag-akyat ng impeachment complaint sa Upper House at si senador Prancaceus Pangilinan, alyas Mr. Noted nagbulag-bulagan sa reklamong dayaan ng kampo ni Da King, as in Fernando Poe Jr., sa presidential canvassing sa Batasan? *** Napag-usapan ang ethics committee, animo’y nagkataon din ex-wife ni Atty. Ariben Sebastian - si Juliana Pilar ‘Pia’ Cayetano ang nakaupong chairperson ng komite - ito’y Ate ng katukayo ni Joselito Cayetano-si Alan Peter na ‘No.1 chatterbox’ ni Villar sa isyu ng double insertion o tongpats ng P200 milyong C-5 Road project gayong ‘No.1 best friend’ ni opposition senator Panfilo ‘Ping’ Lacson noong May 2007 election at ‘buddy-buddy’ sa anti-corruption kontra Jose Pidal at kampon ni Mrs. Arroyo. Pero ngayon, ‘mala-Halimaw sa Banga’, ika ni Aling Matet ang katagang lumalabas sa bunganga ni Boy Watusi laban kay Lacson. Dito masusubukan si Ate! Ama nina Pia at Alan Peter ang huling nasampahan ng complaint sa ethics committee - ang namayapang si senador Renato ‘Compañero’ Cayetano na isinangkot sa P80 milyon sa BW Resources scandal gayong laway lang ang kapital sa kumpanya ni Dante Tan. Take note: Isa si Compañero, kasama ang namayapang si senador Robert Barbers sa ‘No.1 mortal enemy’ ni Lacson noong 12th Congress nang akusahang kidnapper, money launderer, drug trafficker at kung anu-ano pang kasong nilikha ng Palasyo, gamit si Ador Mawanay at Rosebud, a.k.a Mary Ong subalit ito’y kinalimutan ni Lacson at tinulungan si Boy Watusi sa kanyang laban kontra sa kanyang Tito Mike. Anyway, iisa ang track record ng mag-amang Cayetano, parehong na-ethics dahil sa pera at kasinungalingan at ngayo’y kapamilya ang timon sa imbestigasyon ng tongpats. Ang mister ni megastar Sharon Cuneta - si Mr. Noted ang chairman ng ethics committee at ‘No. 1 nagkula’ sa BW resources scandal ni Compañero na ngayo’y ka-tropa sa Wednesday Club ni Villar at ka-berks sa majority bloc nina Pia at Alan. Take note: Si Mr. Noted ang abogado nina SPO2 Ed Delos Reyes at SPO2 Dela Cruz - ang whistleblower sa Kuratong Baleleng na nagsabing shootout. At si Mr. Noted din ang nanawagang ‘ceasefire’ sa Lacson-Villar war, as in kalimutan ang double entry. Ang tanong lang, meron bang ipinanalong kaso si Pangilinan? Ang dating spokesman ni Erap - si Boying Remulla, ngayo’y Congressman ng Cavite ang ‘author’ ng reklamo laban kay Compañero at nagpatalsik kay Pangilinan sa fraternity pero ngayo’y ‘happy together’ at nagtatawagan pang ‘brod’ nina Lolo Joker at Dick Gordon. Hindi lang iyan, kapartido rin ngayon nina Villar at Boy Watusi si Cong. Boying habang ang nakakabatang kapatid-si ex-Cong. Gilbert Remulla ang spokesman ng Nacionalista Party (NP) na dating kasama ni Lacson noong 2004. Maging si Iloilo Vice Governor Rolex Suplico na taga-hawak sa mapa ng C-5 Road nang magpagtawag ng press conference, ito’y nagsilbing campaign manager ni Lacson sa Visayas at Mindanao region pero ngayo’y NP member. Talagang ‘Onli in da Pilipins! (www.mgakurimaw.blogspot.com)

oct 1 2008 abante tonite issue

	Gabinete ni GMA kinumander ang media vehicles
	(Rey Marfil)
Kundi lang anak ng gabinete ni Pangulong Gloria Macapagal-Arroyo, mapagkakamalang ‘carnapper’ ang pamilya ng opisyal matapos ‘ikumander’ ang sasakyan ng mga mamamahayag na nagko-cover sa kanyang departamento. Sa impormasyong nakalap ng TONITE Spy, sobrang dupang sa kapangyarihan at uhaw sa libreng serbisyo ang bagong saltang gabinete ni Mrs. Arroyo, patunay ang pagkumander sa mga service vehicles ng mga mediamen. Bago napasok sa Malacañang ang aroganteng gabinete ni Mrs. Arroyo limang service vehicles ang naka-assigned sa mga mediamen upang magamit sa coverage subalit nagbago ang lahat makaraang makatuntong ng presidential garden ang kumag. Ang rason, pina-recall ng aroganteng gabinete ni Mrs. Arroyo ang lahat ng service vehicles sa motorpool partikular ang mga naka-assigned sa mga reporter dahil walang magamit ang anak nito. Mula sa limang service vehicles nagsisilbing ‘press bus’ ng mga mamamahayag sa coverage, naging apat ang sasakyan ng mga mediamen at pinakabagong modelo ang pina-recall ng aroganteng gabinete ni Mrs. Arroyo hanggang nauwi sa dalawang unit. Makaraang ipagamit ang bagong Toyota Revo sa kanyang anak, ipina-recall din ng aroganteng gabinete ni Mrs. Arroyo ang bagong Mitsubishi Adventure bilang service vehicle ng kanyang chief of staff na nagkataong pamangkin nito at isa pang Toyota Revo na ipinapagamit naman sa mga staff. Ang nakakalungkot, dalawang kakarag-karag ang sasakyang natira sa motorpool bilang service vehicles ng mga mediamen kung kaya’t siksikan ang mga reporter sa press bus lalo pa’t humigit-kumulang dalawampu ang regular passenger dito. Habang siksikan at pinagpapawisan ang mga mediamen sa coverage, sakay ng press bus, pakuya-kuyakoy sa malamig na bagong modelo ng sasakyan ang anak, pamangkin at iba pang staff na binitbit ng aroganteng gabinete. Ang masakit sa panig ng mga mediamen, ginagamit lamang sa paglalakwatsa ng anak ng aroganteng gabinete ang bagong modelo ng sasakyan na naunang naka-assigned sa media coverage habang naka-standby lamang sa parking lot ang dalawa pang kinumander ng mga pamangkin at staff nito. Clue: Pangprobinsya lamang ang diskarte ng gabinete ni Mrs. Arroyo at nagkaroon ng ‘war shock’ matapos dalhin sa Metro kung saan napakabanal ng surname subalit arogante sa press conference. Ito’y kapangalan ng makatang tauhan ng First Family at meron letrang ‘S’, as in Santo Santito sa palasyo. (www.mgakurimaw.blogspot.com)