Thursday, June 4, 2009

june 4 2009 abante tonite

Si Bong na walang malay!
Rey Marfil


Hindi nakakagulat ang posisyon ng Philippine Me­dical Association (PMA) sa sex video scandal, malinaw ang pagiging ‘social club’ at tanging Professional Regulatory Commission (PRC) ang may kapangyarihang ‘pumutol sa kaligayahan’ ni Hayden Kho na mag-practice bilang doktor. Ang nakakadismaya lamang, animo’y ‘na-bakla’ sa sex video ni Hayden ang liderato ng PMA, aba’y hindi magawang sipain ito sa organisasyon gayung malinaw ang kawalan ng good manners and right conduct (GMRC), maliban kung nag-enjoy sa panonood ang mga ka-tropang doktor sa kababuyan ni Kho? At ngayon, ginagawa pang ‘hero’ ng grupo ni Reli German si Hayden!


Hindi kailangang UST graduate para maintindihan ang sex video scandal ni Hayden, ito’y ‘nang-abuso at binaboy’ ang mga babaeng karelasyon. Ika nga ni Senador Bong Revilla, walang gulo kung hindi kinunan ni Hayden ang ‘pagkikipag-do’ at wala ring kakalat sa merkado. Ang lesson: Humingi ng permiso sa pag-video para walang kaso at hindi umabot ng Senado.

Ibig sabihin, malinaw ang motibo ng boypren ni Vicki Belo, ito’y sabit sa wiretapping dahil sikretong kinunan ang pakiki­pag-sex. Ni sa paniginip, ayo­kong isiping obsession ni Hayden ang magbida sa mga ‘double picture’ na ipinapalabas sa kanto ng Recto at Quiapo, aba’y astang-George Estregan Sr., sa porno video!

Ang malaking katanu­ngan ng mga kurimaw, bakit ipinagpipilitan sa Senate probe ni Jamby ang drug issue gayong wala pang kasagutan kung sino sa tropa ni Hayden ang nagpakalat ng sex video. Mantakin niyo, pagkatapos ng public hearing, kaliwa’t kanan ang interbyu ni Jamby at ipina­ngalandakan pang ipapatawag si Vicki Belo, Eric Johnston Chua at Herbert ‘Bistek’ Rosario subalit hanggang nga­yon, walang iskedyul.

Take note: Si Chua ang may-ari ng Gigahertz Compu­ter Systems, kaya’t malinaw ang expertise sa pag-download ng sex video subalit wala pa rin aksyon si Donya Consuelo!
***
Napag-uusapan ang Senate probe, nagkasanga-sanga ang namuong tensyon sa sex video scandal, pinaka-latest ang bangayan nina Senador Bong Revilla at Manila Cong. Bienvenido Abante Jr., sa porn bill. Ang akusasyon ni Mang Bienvenido, ‘inuupuan’ ni Revilla ang House-approve Bill No. 3305 kaya’t lusot si Hayden sa cyber pornography. Ang resbak ni Revilla: “Mag-research muna bago pumuna. You’re barking on the wrong tree”.

At pinasisibak ni Revilla kay Mang Bienvenido ang staff na naglagay sa kahihiyan, ewan lang kung sinunod ng kongresista?
Anyway, may karapatang magalit si Revilla, aba’y wala sa hulog ang paninisi ni Mang Bienvenido sa cybersex video at lumalabas pang ignorante ang kongresista. Kundi nagkakamali ang Spy, Hulyo 2007, unang inihain ni Revilla ang Anti-Pornography Bill.


Kung meron dapat ba­teryahin at pag-initan si Mang Bienvenido, hindi si Revilla kundi ang mister ni Megastar Sharon Cuneta, as in Francis Pangilinan ang dating chairman ng Senate committee on justice and human rights. Sa kaalaman ng publiko, nai-transmit ang House Bill 3305 at sumailalim sa first reading noong Pebrero 12, 2008 subalit nai-refer o nai­lipat sa Committee on Justice and Human Rights -- ito’y ‘NASUSULAT at MABABASA’ sa Senate record!(mgakurimaw.blogspot.com)