World Bank nagsabi niyan!

REY MARFIL AUGUST 22, 2011

Nakamit ng administrasyong Aquino ang malaking positibong pagbabago sa pagpapaunlad ng edukasyon, maging sa kabuhayan ng mga mahihirap matapos ang halos 14-buwan sa kapangyarihan, sa pamamagitan ng conditional cash transfer (CCT) program at seryosong programa ng Department of ­Education (DepEd).

Malapit nang makamit ng DepEd ang 1:1 textbook-to-student ratio sa lahat ng antas ngayong ­Disyembre -- kinabibilangan ng mga paksang English, Science, Math, Social Studies at Filipino.

Sa usapin ng suweldo, umaabot sa P17,099.00 ang basic ­salary ng Teacher 1 nitong Hulyo kung saan merong 2,807 kinder­garten teachers na nasa regular na posisyon ang tumatanggap ng P17,099.00 kada buwan at P25,868.00 kada buwan ang ­volunteer teachers na kumikita ng P3,000.00 (per month) sa isang sesyon hanggang P6,000.00 kung dalawang sesyon.

Iniulat rin ng DepEd ang 22,015 bagong silid-aralan sa unang taon ng administrasyong Aquino kung saan 4,155 ang naipagawa, simula Hulyo 2010 hanggang Mayo 2011 at 11,169 classrooms ang malapit nang matapos habang 6,691 ang suma­sailalim sa rehabilitasyon.

Sa ilalim ng administrasyon ni Pangulong Noynoy ‘PNoy’ Aquino, naitala ang 1:39 sa elementarya ang classrooms-to-students ratio at 1:53 sa high school habang umabot naman sa 691,494 ang benepisyunaryo sa Government Assistance to Students and Teachers in Private Education (GASTPE) na nakatanggap ng P10,000.00 bawat isa sa National Capital Region at P5,000.00 sa labas ng Metro Manila, simula 2010 hanggang 2011.

Hindi lang ‘yan, tumaas pa ito sa 757 libong benepisyunaryo sa ilalim ng GASTPE education service contracting scheme para sa SY 2011-2012 kung saan nakakuha ng karagdagang P500.00 ang bawat benepisyunaryo sa labas ng Metro Manila.

Sa usapin ng food for school program, sumandal ang DepEd sa CCT program ng gobyerno. Take note: Malinaw sa joint report ng World Bank (WB) at Australian Agency for Development (AusAID) ang malaking tulong ng CCT program sa indigent families -- ito’y magpapaangat ng 12.6% sa annual incomes, as in 6.2% ang ibababa ng poverty, maliban kung sadyang “mutain at lugain” ang mga kritiko ni PNoy?

***

Anyway, nakakatuwang marinig na mismong si PNoy ang naguna nitong nakalipas na Biyernes sa pagsindi ng mga ilaw sa Burnham Park sa Baguio City para lamang palaguin ang turismo at itaas ang pampublikong kamalayan kaugnay sa paggamit ng tinatawag ng energy saving lights.

Sa kabila ng napakaabalang iskedyul sa pagtugon sa sandamukal na mga problema ng mga Pilipino, ipinapakita ni PNoy na isa siyang “working President” na tinitiyak ang mga programa ng gobyerno at kitang-kita sa video kung paano pinu-promote ng Pangulo ang turismo sa Baguio -- ito ang isa sa katangiang dapat makita sa magiging kapalit ni Department of Tourism (DOT) Secretary Albert Lim, pagsapit ng Setyembre 1.

Sa programang inilunsad ng mga local officials ng Baguio City, pinalitan ang lahat ng mercury lights sa parke ng energy efficient light na kinabibilangan ng high pressure sodium vapor lamps at fluorescent lamps. Ibig sabihin, makakatipid ang lungsod ng P1.5 milyon na konsumo sa kuryente.

Hindi maitago ng mga residente ang mapabilib at mamangha, aba’y nagbabad si PNoy at ilang minutong naglibot sa Burnham Park kahit nabasa ng ulan. Higit sa lahat, nag-speech pa ang Pa­ngulo kahit wala sa scenario ang magsalita kaya’t masaya ang Baguio media dahil busog sa balita.

Laging tandaan: “Bata niyo ako at Ako ang Spy niyo.” (mgakurimaw.blogspot.com)