aug 26 2009 abante tonite

	Senador, ‘tinutulugan’ sa presscon
	(Rey Marfil)
Taliwas sa kasabihang ‘pagkahaba-haba man ng prusisyon, sa simbahan din ang tuloy’, iba ang nangyari sa mahabang press confe rence ng isang miyembro ng Mataas na Kapulungan ng Kongreso matapos makatulog ang mga reporters na nagko-cover dito. Hindi maiwasang matawa ng mga kurimaw, sa pangunguna ng TONITE Spy matapos makatulog sa press conference ng nakakalbong senador ang mga reporters sa Upper House dahil sobrang haba at paulit-ulit ang kuwento ng solon. Kapag nagretiro sa pulitika, hindi mawawalan ng trabaho ang nakakalbong senador dahil napaka-‘gifted child’, as in puwedeng arkilahin ng mga tinaguriang working mothers bilang ‘tagapag-hele’ para makatulog ng maaga ang kanilang anak, patunay ang kahusayan ng mambabatas na magpahilik ng Senate media. Sa mahabang panahon, nakaugalian ng nakakalbong senador ang mag-imbita ng Senate media sa kanyang opisina sa 5th floor, kalakip ang hangaring makisakay sa isyu, tuwing makakakita ng malalaking balita. Sa halip bumaba ng 2nd floor ang nakakalbong senador, partikular sa Media Center, ‘pa-importante effect’ ang mambabatas at nire-request ng kanyang media relation officer (MRO) na paakyatin ang mga mediamen. Ang nakakatawa lamang, sobrang haba magpatawag ng press conference ang nakakalbong senador, animo’y sirang plaka, hindi single kundi long playing ang mga kuwento ng kumag kaya’t nagsasayang lamang ng video tape ang Senate media. Pasok sa Guinness Book of Records ang nakakalbong senador pagdating sa pahabaan ng presscon dahil walang kapa guran sa pagpa-flashback sa mga nakaraan. Maging taga-print at broadcast media, nauubusan ng tape sa kanilang recorder kapag nagpapatawag ng press conference ang nakakalbong senador, as in halos baliktaran ang 90-minute tape kung pahabaan sa kuwento ang pag-uusapan. Maging TV cameramen, napapagalitan na ng kanilang reporter dahil nakakatulog sa kinauupuan at hindi magawang i-cut o putulin ang mga walang kuwentang pinagsasabi ng nakakalbong senador, lalo pa’t nakasanayang naka-focus sa mukha ng mambabatas ang mga lente. Clue: Hindi matatawaran ang tapang ng nakakalbong senador subalit numero uno ding matatakutin sa kanyang ‘commander-in-chief’. Ito’y mas kilalang ‘Boy Flashback’ ng Philippine Senate dahil paboritong litanya ang katagang ‘If you might remember’. (mgakurimaw.blogspot.com)