Natuon sa mahihirap

                                               Natuon sa mahihirap

                                                         REY MARFIL/Spy on the Job

                                                                     Feb. 2, 2015

Bagama’t isa sa pangunahing programa ng pamahalaan ang conditional cash transfer (CCT) para sa mga mahihirap, tinututukan rin ni Pangulong Noynoy “PNoy” Aquino ang iba pang mga programa para sa kaginhawaan ng publiko at malampasan ang kahirapan.

Hindi naman nakakapagtaka na lumaki ang pondo ng CCT program dahil dumami ang bilang ng mga mahihirap na pamilya na nakikinabang ngayon dito.

Mula sa mahigit 100,000 benepisyunaryo, umabot na ngayon sa ilang milyon ang nakikinabang sa CCT program. Isa ito sa landmark o flagship program ng pamahalaan.

Sa kabila ng pagiging popular ng CCT, hindi nangangahulugang pinababayaan ng pamahalaan ang pagtutok sa implementasyon ng iba pang mahahala­gang mga proyekto na makakatulong sa mga tao.

Kabilang dito ang programa ng Technical Education Skills Development Authority (TESDA) sa paglinang ng kakayahan sa trabaho at ekstensiyon ng programang pang-kabuhayan sa pamamagitan ng Department of Labor and Employment (DOLE) at Department of Social Welfare and Development (DSWD).

Mayroon ring mga pasilidad para matulungan sa kabuhayan ang mga nagbabalik na overseas Filipino workers (OFWs) sa pamamagitan ng Overseas Workers Welfare Administration (OWWA) at DOLE.

Itinaas rin ng administrasyon ang taunang badyet sa edukasyon para maihanda ang kabataan sa pagpasok sa hanapbuhay.

Sa ilalim ng 2015 General Appropriations Act, napunta ang malaking halaga sa larangan ng pagkakaloob ng serbisyo sa DSWD, Department of Health (DOH), at Department of Education (DepEd).

Kitang-kita naman na maingat na inilalaan ng pamahalaan ang pampublikong salapi sa magaganda at mahahalagang mga programa na makakatulong sa mga mahihirap.

***

Hindi ba’t kapuri-puri rin ang pamamahagi sa 20 magsasaka kamakailan ng Department of Agrarian Reform (DAR) ng 49 ektaryang lupang agrikultural sa Amlan, Negros Oriental alinsunod sa kautusan ni PNoy?

Siguradong bubuti ang kabuhayan ng 20 mga benepisyunaryo na mangangalaga at magpapayaman sa pagbubungkal ng lupa na dating pag-aari ng pamilya-Fleischer.

Nabatid kay Provincial Agrarian Reform Program Officer (PARPO) Louie Naranjo na nakuha ang lupa na matatagpuan sa Barangay Bio-os kay Antonette Fleischer sa pamamagitan ng voluntary offer to sell (VOS) sa ilalim ng Comprehensive Agrarian Reform Program (CARP).

Obligasyon naman ng mga magsasaka na bayaran ang taunang amortisasyon ng lupa at real estate tax.

Mahalagang alagaan ng mga magsasaka ang lupa para sa kanilang kabuhayan at kaunlaran ng lugar.

Ipagkakaloob naman ng pamahalaan ang kailangang suporta at serbisyo para malinang ang lupa.

Agaran ring binigyan ng kinauukulan ng kaalaman ang mga magsasaka matapos ang distribusyon ng titulo sa lupa kaugnay sa Bana Grass Production Technology.

Kung hindi dahil sa makatotohanang programang agraryo ni PNoy, hindi magkakaroon ng katuparan ang pamamahagi ng lupain.

Laging tandaan: “Bata mo ‘ko at Ako ang Spy n’yo”. (Twitter: follow@dspyrey)

http://www.abante-tonite.com/issue/feb0215/edit_spy.htm#.VM9uWC6Fk7k