Pamasko ngayong Valentine’s

                                      Pamasko ngayong Valentine’s

                                                                  REY MARFIL

Noong nakaraang Huwebes, Pebrero 12 ay isinilang na ang batas na magbibigay ng tsansa sa mga empleyado ng pamahalaan at maging ng pribadong sektor na higit pang mapakinabangan ang mga bonus na tinatanggap ng mga ito buhat sa mga ahensya at kumpanyang pinaglilingkuran.

Mula sa dating P30 libo na ceiling, ngayon ay P82 libo na ang hangganan ng Christmas bonus at iba pang mga benepisyo ang hindi papatawan ng income tax kaya mas malaki na ang mga magiging pakinabang ng mga empleyado na tumatanggap ng mga naturang benepisyo.

Kung tutuusin, ginawa lamang ito ng ating pamahalaan para habulin ang mga una nang tinatamasa ng mga minimum wage earner dahil ang mga bonus nila ay dati nang hindi pinapatawan ng buwis.

Matagal-tagal ding niluto ng mga mambabatas ng Kamara at Senado ang panukalang ito dahil magkaiba ang kanilang bersiyon sa magiging ceiling ng mga benepisyong hindi na papatawan ng buwis upang higit na masulit ng mga benepisyaryo.

Kaya sa darating na Hunyo, kung saan kadalasang ibinibigay ng gobyerno at ng mga employer ang kalahati ng thirteen month pay, siguradong mas kakapal na ang pitaka ng mga makakatanggap at higit na matamis ang ngiti ng mga misis na mag-aantay sa “areglo” ni mister.

***

Mas matindi ang mangyayari sa Disyembre dahil kadalasan na bukod sa natitirang kalahati ng 13th month pay, natatanggap din ng mga emple­yado ang mga karagdagan pang benepisyo buhat sa savings ng ahensya o kaya sa kita ng kumpanya at lahat ito ay wala na ring kaltas na buwis.

Kung ipapasok pa dito ang sitwasyong mababa ang presyo ng produktong petrolyo sa kasalukuyan, aba’y talagang malayo ang mararating ng karagdagang benepisyo na matatanggap ng ating mga mahal na kawani.

Ang mga halagang maiimpok ng mga benepisyaryo buhat sa programang ito mula sa pamahalaan ay siguradong mararamdaman kung tayo mismo, sa ating sarili at maging sa loob ng ating tahanan, ay marunong magpatupad ng disiplina sa prayoridad ng paglalaanan ng kinikita.

Ito ay nagpapatunay lamang po na sa kabila ng mga problemang nagsusulputan, pursigido pa rin ang administrasyong Aquino na tahakin ang matuwid na landas upang hindi maikompromiso ang kapakanan ng higit na nakakarami.

Kaya ang masasabi na lamang ng inyong lingkod ay Merry Christmas sa ating lahat ngayong Pebrero, ‘ika nga sa isang bahagi ng awiting pamasko, “at magbuhat ngayon, kahit hindi Pasko ay magbigayan.”

Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

http://www.abante-tonite.com/issue/feb1615/edit_spy.htm#.VOHwei6Fk7k