Template!

                                                        -Template!

                                                          REY MARFIL/Spy on the Job

                                                                       Feb. 9, 2015

Sa huling survey ng Social Weather Stations (SWS), nakakuha ng pangkalahatang +34 porsiyentong satisfaction rating ang administrasyong Aquino.

Ibig sabihin, kitang-kita ng publiko ang kabutihan at pagsusumikap na ginagawa ng administrasyong Aquino para lalong maisulong ang transparency at malinis na pamamahala.

Isinagawa ang pananaliksik mula Nobyembre 27 hanggang Disyembre 1, 2014, sa pamamagitan ng face-to-face interviews ng 1,800-katao sa buong bansa kung saan tinanong sila kaugnay sa performance ng pamahalaan.

Base pa sa mga resulta ng survey, 58 porsiyento ang nasisiyahan sa pamahalaan habang 24 porsiyento naman ang hindi para sa +34 porsiyentong ratings habang 17 porsiyento ang hindi makapagdesisyon.

Kabilang rin sa mga isyu na nakakuha ng magandang “good ratings” ang mga sumusunod: Pagtulong sa mga biktima ng kalamidad (+42); pagdepensa sa teritoryo ng bansa (+40); pagkakaloob ng sapat na suplay ng kuryente (+38); promosyon ng kagalingan ng overseas Filipino workers (OFWs) (+38); relasyon sa mga banyaga (+33); pagtulong sa mga mahihirap (+33); at paghahanda sa nagbabagong klima (+31).

Makakasiguro tayo na lalong magpapatuloy ang pamahalaan sa pagpursige ng maayos na serbisyo sa publiko sa pamamagitan ng tuwid na daan.

Sa nalalabing mga buwan ng pamahalaan, asahan na natin na ipatutupad ni PNoy ang mahahalagang mga programa sa lalong ikaka-unlad ng ekonomiya ng bansa, lalung-lalo na sa larangan ng kapayapaan at kaayusan, seguridad sa trabaho at kabuhayan, pagpapalakas ng purchasing power ng mga konsiyumer at pagkakaloob ng hustisya sa mga biktima ng krimen, kabilang na ang Maguindanao massacre.

***

Aasahan na natin ang Philippine National ­Police (PNP) na gagawing “template” o modelo ang matagumpay na pagkakaloob ng seguridad sa nakalipas na pagbisita ng Santo Papa sa bansa kamakailan para sa nalalapit na Asia Pacific Economic Cooperation (APEC) Summit.

Walang duda na lubhang napakatagumpay ng pagkakaloob ng administrasyong Aquino ng seguridad kay Pope Francis sa kanyang limang araw na pastoral visit mula Enero 15 hanggang 19.

Dahil dito, mas maganda at mabuti pang seguridad ang mailalatag ng administrasyong Aquino sa pamamagitan ng Philippine National Police(PNP) para sa nalalapit na APEC meetings sa bansa.

Mapapabuti pa ang seguridad sa APEC dahil tiyak na gagamitin ng kinauukulan ang tinatawag na “findings” mula sa isinagawang “post-analysis” sa sistema ng seguridad para kay Pope Francis.

Isang standard operating procedure (SOP) ang post-analysis para malaman ang ilang pagkukulang at mapabuti ito sa hinaharap.

Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

http://www.abante-tonite.com/issue/feb0915/edit_spy.htm#.VNjAeC6Fk7k