-Papaano na ang kapayapaan?

                                        -Papaano na ang kapayapaan?

                                                                   REY MARFIL

                                                                     Feb. 11, 2015

Dahil sa madugong engkuwentro sa Mamasapano, Maguindanao kung saan 44 na Special Action Force (SAF) ang namatay, nabalaho ang pag-usad sa Kongreso ng usapang pangkapayapaan.

Pero papaano kaya kung nabaliktad ang pangyayari at kaunti lang ang namatay sa hanay ng mga pulis, ganito pa rin kaya ang sapitin ng Bangsa­moro Basic Law (BBL) na tinatalakay sa Kongreso?

Nagpasya na ang mga kinauukulang komite sa Senado at Kamara na pansamantalang suspendihin ang deliberasyon sa BBL, na bahagi ng binalangkas sa usapang pangkapayapaan ng pamahalaan at Moro Islamic Liberation Front (MILF). 

Nais ng mga mambabatas na magkaroon na muna ng kalinawan sa tunay na nangyari sa pagkakasawi ng 44 na SAF commandos na nakasagupa ang ilang tauhan ng MILF, breakaway group nito na Bangsamoro Islamic Freedom Fighters at pati na raw ang mga private armed group sa lugar.

May mga nagalit kung bakit nakipagbakbakan ang MILF sa SAF gayung may umiiral na ceasefire agreement sa mag­kabilang panig. Giit naman ng MILF, misencounter ang nangyari dahil walang koordinasyon sa kanilang tropa ang pagsalakay ng SAF.

Depensa naman ng mga lider ng SAF, hindi nila mahuhuli ang target ng operasyon na teroristang si Marwan kapag inabisuhan nila ang MILF. Iyon nga, dahil sa sobrang sikreto ng operasyon, 44 na SAF commandos ang nasawi at nalamatan ang usapang pangkapayapaan.

***

Kung hindi naganap ang Mamasapano encounter, may sinusunod na takdang panahon ang mga mambabatas kung kailan nila aaprubahan ang BBL para maging ganap na batas sa ilalim ng termino ni Pangulong Noynoy ‘PNoy’ Aquino. Ang BBL ang magiging legal na basehan sa pagbuo ng bagong political entity sa Mindanao na papalit sa kasalukuyang Autonomous Region in Muslim Mindanao.

Ayon sa isang lider ng Kamara na namamahala sa pagtalakay sa BBL, kung nasunod ang orihinal na plano nila sa pagtalakay sa nabanggit na panukalang batas, magagawa sana ng komite ang draft bill sa ikalawang linggo ng Pebrero at inaasahan nilang lulusot ang panukala sa plenaryo ng kapulungan pagsapit ng Marso.

Pero dahil sa pagkansela sa pagtalakay sa BBL habang hinihintay nila ang pinal na ulat mula sa binuong Board of Inquiry na nagsiyasat sa Mamasapano encounter, inaasahang hindi na makakamit ang target na maaprubahan ang panukalang batas na pangkapayapaan sa Marso.

Bukod sa imbestigasyon mula sa Board of Inquiry, may resulta na rin ng kani-kanilang hiwalay na imbestigasyon na ipinadala sa kapulungan ang ARMM, Armed Forces of the Philippines at Office of the Presidential Adviser on the Peace Process. Ang tanong nga lang, papaano kung magkakaiba ang resulta ng imbestigasyon? Kaninong report ang susundin ng kapulungan upang gamitin nilang basehan kung itutuloy o hindi na ang pagtalakay sa BBL?

Bahagi ng plano sa usapang pangkapayapaan sa Mindanao ang paghahalal sana ng mga bagong lider ng papalit na political entity sa ARMM. Sila ang magsisilbing panibagong pag-asa sa matagal nang minimithing kaayusan at kapayapaan sa Mindanao.

Si ARMM Gov. Mujiv Hataman, kahit apektado siya sa isinusulong na BBL dahil malulusaw ang kasalukuyang autonomous region na kanyang pinamumunuan, suportado ang administrasyong Aquino na ipagpatuloy ng Kongreso ang pagtalakay sa BBL at usapang pangkapayapaan sa MILF.

Tulad kasi ng maraming lider sa Mindanao, hangad din ni Hataman ang pangmatagalang kapayapaan sa rehiyon. Tutol ang gobernador na magkaroon ng panibagong mga labanan na magreresulta sa pagkasawi ng marami pang buhay ng mga kapwa Pilipino.

Hindi mabibigyan ng katarungan ang mga nasawi sa Mamasapano encounter sa pamamagitan lamang ng pagkansela sa deliberasyon ng BBL at pakikipag-usap sa MILF. Dapat, kung sino ang mga nagkulang at lumabis sa naturang trahedya, sila ang papanagutin sa batas.

Laging tandaan: “Bata mo ko at Ako ang Spy n’yo.” (Twitter: follow@dspyrey)

http://www.abante-tonite.com/issue/feb1115/edit_spy.htm#.VNtozS6Fk7k