-Sa terorista ang all-out war

                                            -Sa terorista ang all-out war

                                                            REY MARFIL/Spy on the Job

                                                                          Feb. 4, 2015

Nagluluksa pa rin ang sambayanan sa pagkamatay ng 44 na kasapi ng Special Action Force (SAF) sa Mamasapano, Maguindanao. At sa harap ng mataas na emosyong nararamdaman ng mga kababayan natin sa pangyayari, may ilan na nananawagan na itigil na ng gobyerno ang usapang pangkapayapaan sa Moro Islamic Liberation Front (MILF) at muling magdeklara ng giyera.

Marami ang nagalit sa MILF dahil kabilang ang mga tropa nito sa Mamasapano sa mga nakasagupa ng mga bayaning SAF, bukod pa sa mga armadong grupo sa lugar gaya ng Bangsamoro Islamic Freedom Fighter (BIFF), breakaway group mula sa MILF.

Ang BIFF ay itinuturing lawless element o kalaban ng gobyerno. Kumalas sila sa MILF dahil ayaw nilang makipagnegosasyon ang MILF sa pamahalaan, gayung ang hangarin ng usapang pangkapayapaan ay matigil na ang mga kaguluhan at mapaunlad ang Mindanao.

Hindi naman natin puwedeng basta sisihin ang mga taong nasa likod ng nasabing operasyon dahil may sa­rili silang paliwanag at dahilan kung bakit lubhang naging sikreto o last minute man kung masasabi ang isinagawa nilang koordinasyon sa iba’t ibang grupo ng kinauukulan. Ang kasagutan at paliwanag nila ay malalaman natin sa magiging resulta ng imbestigasyon ng Board of Inquiry (BOI).

Ngunit isa lang ang malinaw na lumabas sa mga na­balitaan natin... hindi ang MILF ang pakay ng pagsalakay ng mga magigiting nating SAF kung hindi ang mga te­rorista at bomb maker expert na sina Abdulbasit Usman at Jemaah Islamiyah leader Zulkifli bin Hir, alias Marwan.

***

Hindi pipitsugin na terorista ang dalawang ito lalo na si Marwan na most wanted din ng US at may patong na $5 milyon para sa kanyang ikadarakip. Nasa $1 milyon naman ang patong ng US sa ulo ni Usman.

Malawak ang koneksyon ng dalawa kaya nakapagtago ng mahaba-mahabang panahon. Wanted din si Marwan sa 2002 Bali bombing sa Indonesia na ikinamatay ng 200 katao, na iba’t iba ang nasyunalidad ng mga biktima. Hanggang sa matukoy na nagtatago ito sa Mamasapano na kilalang teritoryo ng BIFF.

Kaya naman hindi rin masisisi ang nagplano ng pag-atake ng SAF sa Mamasapano kung naging lubha silang maingat sa pakikipagkoordinasyon at pagpapakalat ng impormasyon dahil ayaw nilang matimbrihan ang dalawang terorista at baka makatunog at mawala na naman. Marahil para sa kanila, it’s now or never.

Iyon nga lang, hindi natin alam kung napaghandaan din ng mga opisyal na nagplano ng pag-atake ang tinatawag na worst case scenario.

Gayunman, sinasabing napatay ng mga bayaning SAF (pero hindi pa lubos na kumpirmado hangga’t wala pa ang resulta ng DNA test mula sa US) si Marwan sa operasyon. Nakatakas naman si Usman na ipinangako ni Pangulong Noynoy “PNoy” Aquino na tutugisin at mahuhuli. Ang dalawang teroristang ito na matagal nang naghahasik ng gulo sa Mindanao at maging sa ibang bansa sa Asya ang target ng mga SAF na pinagbuwisan ng kanilang buhay.

Kung kailangan natin marahil na magdeklara ng all-out war, ito ay para sa mga katulad nina Marwan, Usman, mga grupong BIFF at Abu Sayyaf na ayaw ng katahimikan sa Mindanao at patuloy na naghahasik ng te­rorismo sa bansa.

Katulad ng lahat, hangad natin na mabigyan ng katarungan ang mga nasawi sa Mamasapano at mapanagot ang mga opisyal kung mayroon mang nagkulang. Pero kung ititigil natin ang peace negotiation at magdedeklara ng all-out war sa MILF, na kaisa ng gobyerno sa paghahanap din ng pangmatagalang kapayapaan, parang nagdagdag tayo ng kaaway at nagbawas ng kakampi.

Laging tandaan: “Bata mo ko at Ako ang Spy n’yo.” (Twitter: follow@dspyrey)

http://www.abante-tonite.com/issue/feb0415/edit_spy.htm#.VNFFKSxc5dk