Pagpapalakas sa AFP!

Pagpapalakas sa AFP!

REY MARFIL

Magandang balita ang napipintong pagbili ng Armed Forces of the Philippines (AFP) ng mahigit sa P23 bil­yong halaga ng bagong boats, helicopters, rifles, combat at communication equipment na magagamit sa pagpapalakas ng panloob at panlabas na seguridad ng bansa.

Nabatid natin ito sa talumpati kamakailan ni Defense Sec. Voltaire Gazmin kaugnay sa ika-75th founding anniversary ng Department of National Defense (DND) sa Camp Aguinaldo sa Quezon City.

Dahil sa matuwid na daang kampanya ni Pangulong Noynoy “PNoy” Aquino, patuloy na lumalaki ang halaga ng pondong nailalaan sa modernisasyon ng AFP.

Aabot sa 36 na mga proyekto ang mga transaksyon para sa P23.39 bilyon na pawang naghihintay na lamang ng delivery.

Kabilang sa mga bibilhin ang dalawang strategic sea-lift vessels, dalawang naval helicopters, walong attack helicopters, tatlong medium-lift aircrafts, dalawang light-lift aircrafts, ilang assault rifles, ilang force protection and communication equipment.

Bahagi ang proyekto ng AFP Modernization Program sa ilalim ng Republic Act (RA) No. 7898 na inamyendahan ng RA No. 10349.

Bukod sa 36 na mga proyekto, alinsunod sa implementasyon ng RA No. 10349 o ang Revised AFP Mo­dernization Program, nakalinya rin ang karagdagang 33 na mga proyekto na ipinapatupad sa loob ng limang taon o mula 2013 hanggang 2017 na umaabot sa P90.86 bilyon.

Inaprubahan ni PNoy ang dalawang proyekto sa ilalim ng Revised AFP Modernization Program na kinabibila­ngan ng pagbili ng 12 surface attack lead-in fighter aircrafts at walong combat-utility helicopters na may kabuuang kontrata na P23.6 bilyon.

Kabilang rin sa bibilhing mga gamit sa ilalim ng Revised AFP Modernization Program ang air defense surveillance radar system, long-range patrol aircraft, close-air support aircraft, C-130 Tango aircraft, anti-submarine warfare helicopters, frigates, amphibious assault vehicles, at iba’t ibang communication equipment at night-fighting systems.

Ipinagmalaki rin ni Gazmin ang Philippine Defense Transformation (PDT) Roadmap na nagawa ng DND kamakailan upang magsilbing gabay sa iba’t ibang ahensya ng pamahalaan sa pagtugon sa mga sakuna at iba’t iba pang emergency situations.

Kitang-kita naman ang pagsusumikap at pagmamalasakit ni PNoy para protektahan ang bansa at mga Pilipino sa pamamagitan ng pagpapalakas sa AFP.

Ngunit kung naging tiwali ang administrasyong Aquino, matutulad lamang sa nakalipas na mga pamahalaan ang modernisasyon ng AFP kung saan hindi umasenso at walang nangyaring pagbabago.

***

Naiuwi ng administrasyong Aquino pabalik ng bansa ang 4,333 overseas Filipino workers (OFWs) mula sa magulong bansa ng Libya at nakapagpalabas ng P42.78 milyong pinansyal na ayuda sa mga ito.

Nalaman natin ang magandang balita sa Department of Labor and Employment (DOLE) kung saan umabot na sa nasabing bilang ang OFWS na nakabalik sa Pilipinas sapul noong Oktubre 31 kung saan sumailalim ang karamihan sa tinatawag na mandatory repatriation ng pamahalaan.

Ibinalita ni National Reintegration Center for ­OFWs Director Chona Mantilla na aktibong mga miyembro ng Overseas Workers’ Welfare Administration (OWWA) ang 2,977 o 65 porsiyento ng mga nakauwi habang 1,197 o 28 porsiyento ang hindi mga kasapi.

Nalaman naman kay DOLE Sec. Rosalinda Baldoz na apat na porsiyento o 159 ng 4,333 ng mga nakauwi ang walang records. Pinakamagandang balita rin na nakatanggap ang mga ito ng tulong sa pamahalaan sa pamamagitan ng Assist WELL program.

Kabilang sa mga ahensyang tumulong ang Philippine Overseas Employment Administration (POEA), Technical Education and Skills Development Authority (TESDA), Bureau of Local Employment (BLE), at DOLE regional offices.

Narito ang uri ng mga tulong at bilang ng mga nakinabang: Assistance for overseas employment (2,529), transportation assistance to their home provinces (2,435), livelihood assistance (1,973), training and/or scholarship (1,973), at assistance for local employment (1,429).

Kitang-kita naman ang pagmamalasakit ni PNoy sa pamamagitan ng agarang pagtugon sa pangangailangan ng OFWs na naiipit sa ibang bansa.

Laging tandaan: “Bata mo ‘ko at Ako ang Spy n’yo.” (Twitter: follow@dspyrey)
http://www.abante-tonite.com/issue/nov2814/edit_spy.htm#.VHedkWdavFw

Magkaibang rekord!

                                                               Magkaibang rekord!  
                                                                  REY MARFIL


Sa mga laban ng Pinoy boxing pride na si Manny Pacquiao sa nakalipas na limang taon, isang boksingero na hindi naman niya kalaban sa ring ang laging ekstra bago at pagkatapos ng kanyang pakikipagbakbakan -- ang Amerikanong boxer na si Floyd ‘Money’ Mayweather Jr.

Sabagay, hindi lang naman si Pacquiao ang may ganitong sitwasyon. Kung si Mayweather naman kasi ang may laban, ekstra rin lagi ang pangalan ng “Pambasang Kamao”, bago at matapos ang laban ng binansagang “Money Man”.

May limang taon na ang lumipas mula nang magsi­mulang umingay ang kagustuhan ng boxing fans na magbasagan ng mukha sina Pacquiao at Mayweather sa iba­baw ng ring at nang makita kung sino sa kanilang dalawa ang pinakamagaling na boksingero.

Nang panahong iyon, 30-anyos pa lang si Pacquiao at 32-anyos naman si Mayweather. Pero dahil malabo nang mangyari ngayong taon ang bakbakan ng dalawa, posibleng sa susunod na taon o baka naman sa 2016 pa magkaroon ng katuparan ang hiling ng boxing fans kung magaganap ang dapat maganap. May bangis pa kaya ang kamao nila kapag 37 na si Pacman at 40 si Money Man?

Hindi naman natin masisisi si Mayweather kung atubili siyang labanan si Pacquiao. Mas malaki kasi ang mawawala sa kanya kapag natalo kumpara sa ating Pinoy boxing icon. Si Pacquiao ay may fight record na 57-5-2, 38 KOs, habang si Mayweather, malinis ang fight record na 47-0-26KOs.

Kung lalaban pa si Mayweather sa susunod na dalawang taon bago magretiro sa edad na 40, maaaring apat na laban na lang ang kanyang gawin na tig-2 laban bawat taon sa 2015 at 2016.

Si Pacquiao naman, kung tatakbong senador sa May 2016 at manalo, posibleng apat na laban na rin lang ang gawin na tig-2 laban din bago magretiro sa edad na 37.

Subalit hindi gaya ni Pacquiao na walang rekord sa laban na inaasinta, si Mayweather, puwedeng gumawa ng kasaysayan sa larangan ng boxing kung mapapanatiling malinis ang kanyang rekord na walang talo sa susunod na dalawang laban.

***

Sa ngayon kasi, hawak ng Amerikanong boxer na si Rocco Francis Marchegiano o Rocky Marciano, ang malinaw na fight record na 49-wins. Kung maipapanalo ni Mayweather ang dalawang laban nito sa 2015, mapapantayan na niya ang record ni Marciano, at posibleng mahigitan pa niya kung maipanalo niya ang ika-50 laban.

Ngunit namimiligrong hindi ito magawa ni Mayweather ang nagawa ni Marciano kung haharapin na niya agad si Pacquiao, na katulad niya ay itinuturing na pinakamagaling na boksingero ngayon.

Pero kung patuloy naman niyang iiwasan si Pacman, maaaring mahigitan nga ni Mayweather ang record ni Mariano subalit maitatala rin sa boxing history ang ginawa niyang pag-atras sa hamon ng ating kababayan at ginawa niyang pagbigo sa boxing fans na nagpayaman sa kanya.

Maaari pa rin naman siguro natin mapanood ang mega-fight bago matapos ang termino ni Pangulong Noynoy ‘PNoy’ Aquino sa June 2016 kung matatalo si Mayweathe­r sa susunod niyang laban dahil masisira na ang kamada niyang gumawa ng bagong boxing record sa panalo.

Pero kung pursigido si Mayweather na makapagtala ng 49 o 50 wins at no loss record, baka ang piliin niyang kalaban ay pipitsugin para matiyak ang kanyang panalo. Ano naman ang dapat gawin ng boxing fans kapag ginawa niya ito, i-boykot at ‘wag pakitain ang laban ni Mayweather para mapilitan siyang pagbigyan ang gusto ng boxing fans sa isang mega-fight vs Pacquiao?
Laging tandaan: “Bata mo ko at Ako ang Spy n’yo”. (Twitter: follow@dspyrey)
http://www.abante-tonite.com/issue/nov2614/edit_spy.htm#.VHT_tmdavFw

Iba si Mujiv!

                                                                    Iba si Mujiv!                                                                  
                                                                  REY MARFIL


Binabati natin ang masipag at maaasahang si Autonomous Region in Muslim Mindanao (ARMM) Gov. Mujiv Hataman dahil sa pangunguna nito na ­ayusin ang matagal nang problema kaugnay sa ­hindi nababayarang premiums at arrears sa Government Service and Insurance System (GSIS) ng 26,000 mga kawani ng Department of Education (DepEd) na halos umabot sa isang bilyong piso.

Sa tulong ng Department of Budget and Management (DBM), nabayaran na ng Office of the Regional Governor sa GSIS sa pamamagitan ng Memorandum of Agreement (MoA) ang inisyal na P890 milyon ng kabuuang P990 milyong pagkakautang simula noong 1997.

Seryoso si Hataman na ayusin ang problema kaya mababayaran ang natitira pang P100 milyon bago matapos ang taon.

Alinsunod sa kautusan ni Pangulong Noynoy “PNoy” Aquino, tinutukan ni Hataman ang problema upang makinabang naman ang mga guro at kawani ng DepEd sa mga benepisyo, kabilang ang paghiram ng salapi.

Ikinatuwa naman ni GSIS president and general manager Robert Vergara ang ginagawang reporma ni Hataman sa ARMM dahil bahagi rin ito ng mga pagbabago na kanyang gustong ipatupad sa ahensya.

Sa pagsunod ni Vergara sa tuwid na daang kampanya ni Pangulong Aquino, pinapalawak nito ang oportunidad para makinabang ang mga pam­publikong kawani sa GSIS.

Kasama nga ni Vergara ang matataas na ­opisyal ng GSIS sa pag-iikot sa mga lalawigan sa bansa para personal na mabisita ang 48 na mga sangay at makadaupang-palad ang mga miyembro upang makuha ang kanilang opinyon at suhestyon kung paaano pa mapapabuti ang pagkakaloob ng pautang at pensiyon.

Sa pagbibigay ng regular na pensiyon at iba pang mga benepisyo sa mga miyembro, nagdesisyon ang GSIS na gawing kasangkapan ang Land Bank of the Philippines sa mga lugar na wala itong sangay.

Tinutukan ng GSIS sa kanilang pag-iikot ang kalagayan ng mga miyembrong binaha sa Mindanao kung saan inalok ang mga ito ng “calamity loans” hanggang P40,000 na may mababang interes na anim na por­siyento bawat taon na babayaran sa loob ng 36 na buwan.

Tinatayang aabot sa 4,162 kuwalipikadong mga kasapi ng GSIS sa Mindanao ang maaaring makinabang sa emergency loan program.

Inihayag rin ng GSIS ang magandang balita kaugnay sa pagkakaloob ng P144.2-milyong halaga ng tseke sa Civil Aviation Authority of the Philippines (CAAP) na magagamit sa rehabilitasyon ng Tacloban City airport na sinira ng Super Typhoon “Yolanda” (Haiyan) noong 2013.

Sa tulong ng matuwid na pamamahala ni Pangulong Aquino, asahan na nating lalong matutuwa at makikinabang ang patuloy pang dumaraming bilang ng mga nagtitiwalang mga tao sa maayos na pamamalakad ng pamahalaan.

***

Inaasahan na nating mas maraming mga ­Filipino ang nasisiyahan at kuntento sa matuwid na pama­malakad ni Pangulong Benigno “Noynoy” Aquino III sa kanyang pamahalaan base sa pinakabagong ­resulta ng Social Weather Stations (SWS) survey.

Kitang-kita naman kasi sa tuwid na daan ng Pangulo na pagbibigay ng serbisyo sa publiko ang pangunahing ginagawa ng pamahalaan.

Lumabas sa SWS survey na mahigit sa kalahati o 59 porsiyento ng 1,200 respondents ang kuntento at nasisiyahan sa pamamalakad ng administrasyong Aquino habang maliit na 24 porsiyento ang hindi.

Kaya, asahan pa nating lalong bubuti ang mga pigura kaugnay sa patuloy na lumalaking bilang ng mga Filipinong bumibilib at kuntento sa maayos na pamamahala ni Pangulong Aquino sa bansa.

Laging tandaan: “Bata mo ‘ko at Ako ang Spy n’yo.” ­(Twitter: follow@dspyrey)
http://www.abante-tonite.com/issue/nov2414/edit_spy.htm#.VHJaqGdavFw

Magkaisa kay Papa!

                                                                 Magkaisa kay Papa!

                                                                       Rey Marfil

Marahil ay magiging maganda ang 2015 sa ating mga Pinoy dahil magmimistulang pagbasbas sa Pilipinas ang gagawing pagbisita ni Pope Francis sa bansa sa unang buwan ng darating na taon.

Gaya ng inanunsyo ng mga namamahala sa pagbisita ng Santo Papa, darating siya sa bansa sa Enero 15 mula sa Sri Lanka, at aalis naman pabalik sa Vatican sa Roma sa Enero 19.

Sa halos limang araw niyang pananatili sa bansa, 11 event ang kanyang dadaluhan. Gayunman, dalawa lang sa mga ito ang magiging bukas sa publiko, at ang ibang pagtitipon ay mayroong mga imbitasyon gaya ng pakikisalamuha niya sa ilang piling pamilya sa Leyte at maging sa Mall of Asia sa Pasay.

Ayon kay Manila Archbishop Luis Antonio Cardinal Tagle, ang mga pagtitipon na bukas sa publiko ay ang mga misa na gagawin ni Pope Francis sa Tacloban City airport sa Leyte sa umaga ng Enero 17 at sa Luneta Park sa Maynila sa ganap na 3:30 pm sa Enero 18.

Inaasahan na milyun-milyong deboto (huwag naman sanang makisabay ang mga lasing na pasaway na debote) ang pupunta sa Luneta sa misa ng Santo Papa sa Luneta gaya ng nangyari noong magmisa ang namayapang Santo Papa at ngayo’y St. Pope John Paul II noong 1995 sa World Youth Day.

Tiyak na dadagsain din ng mga tao ang mga lugar na pupuntahan ni Pope Francis, kabilang na ang kanyang mga motorcade. At para matiyak ang kaligtasan ng Santo Papa at maging ng publiko laban sa mga nais maghasik ng kaguluhan, natural lang at dapat na unawain ng publiko kung maging mahigpit man ang pamahalaang Aquino sa mga ilalatag na seguridad.

Kabilang na siguro sa mga dapat unawain ay kung magdeklara ng holiday o walang pasok sa mga lugar na pupuntahan ng Santo Papa upang maiwasan ang pagbigat ng daloy ng trapiko, at mabigyan din ng pagkakataon ang mga deboto na nais magtungo sa mga aktibidad ng Papa na bukas sa publiko.

***

Nauna nang inihayag ng Palasyo na pinag-aaralan nila ang bagay na ito lalo pa’t papatak ang pagdating ng Santo Papa sa bansa sa araw na may pasok -- Huwebes (Nov. 15), at ang misa niya sa Luneta ay Sabado (Nov. 18).

Ngunit maliban sa pagtiyak sa seguridad ng Santo Papa habang nasa bansa, dapat mag-ingat din ang publiko sa mga magsasamantala at makakaisip na gumawa ng pera. Nagbabala na ang Simbahang Katolika laban sa grupong nagbebenta ng tiket para makadalo sa mga aktibidad ni Pope Francis sa bansa.
Bagaman may mga pagtitipon na pinadalhan ng imbitasyon ang mga taong dadalo, huwag na sanang magpilit ang iba na makasama. Kung nais kasi ni Lord na makasama kayo, aba’y tiyak na gagawa siya ng paraan kahit hindi ka na gumastos at magpauto sa mga manloloko.

Kung may malalaman naman na mga taong gumagawa ng ganitong kabulastugan, lalo na kung nagpaplano ng masama sa Santo Papa at kaligtasan ng mga tao, dapat lang na ipagbigay-alam kaagad sa kinauukulan.

Pero paalala rin ng pulisya, dapat maghinay-hinay ang publiko at huwag basta maniniwala sa mga mababalitaang banta sa seguridad sa pagbisita ni Pope Francis dahil baka ang pakay ng nagpakalat ng maling impormasyon ay manabotahe lamang.

Minsan lang dumating ang ganitong pagkakataon na bumibisita ang lider ng Simbahang Katolika sa Pilipinas.

At bilang tanging bansa sa Asya na Kristiyano, dapat magkaisa ang mga Pinoy, at makiisa kay PNoy para maging matagumpay at masaya ang pagdalaw sa bansa ni Pope Francis, at hindi mauwi sa isang trahedya.

Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

http://www.abante-tonite.com/issue/nov2114/edit_spy.htm#.VG5liGdavFw

Pabilisin ang usad

                                                                Pabilisin ang usad  
                                                                   REY MARFIL


Gugunitain sa ika-23 ng Nobyembre ang ika-limang anibersaryo ng Maguindanao massacre na kumitil sa buhay ng 57-katao -- kabilang ang 35 mamamahayag. Limang taon mula nang maganap ang karumal-dumal na krimen, mukhang malabo pa ring makamit ng mga biktima ang katarungan dahil sa mabagal na pag-usad ng paglilitis sa korte.

Ngunit tama bang isama si Pangulong Noynoy ‘PNoy’ Aquino sa sisi kung nagiging mabagal ang usad ng paglilitis sa Maguindanao massacre case? Ang kaso kasi ay nasa korte na -- na sangay na ng Hudikatura na pinamumunuan ngayon ni Chief Justice Maria Lourdes Sereno. At dahil sa prinsipyong “separation of power”, hindi naman maaaring manghimasok ang Ehekutibo na kinabibilangan ni PNoy para diktahan ang trabaho ng korte na bilisan ang pagdinig sa kaso.

Ang maaari lang sigurong gawin ni PNoy ay maki­usap at umapela sa Hudikatura na bilisan ang proseso ng paglilitis, o kaya naman ay atasan ng pangulo ang grupo ng prosekusyon na saklaw ng Department of Justice (na sakop ng Ehekutibo), na gawin ang lahat para matiyak na mapaparusahan ang mga sangkot sa masaker.

Sa pinakabagong survey kasi ng Social Weather Station (SWS) sa satisfaction rating ng administrasyong Aquino, umangat ang marka nito sa “good” +35 nitong September mula sa “moderate” +29 noong June. Pero kapuna-puna lang na “poor” -36 ang marka ng administrasyon sa isyu ng pagpapataw ng hustiya sa Maguindanao massacre case.

Kung tutuusin, maraming dahilan kaya tumatagal ang pag-usad ng kaso, isa na rito ang dami ng mga taong sinasabing sangkot sa masaker na umaabot sa 196-katao. Pangunahing akusado sa krimen ang mga kilalang politiko sa Maguindanao na kinabilalangan ng dating gobernador na si Andal Ampatuan Sr., at kanyang mga anak na sina Andal Jr, Rizaldy, at Sajid.

Isipin na lang natin kung ilang taon ang inaabot bago makapagdesisyon ang korte sa isang kaso ng pagpatay na may isang biktima at dalawa o tatlo ang akusado, papaano pa kaya ang Maguindanao massacre na may 57 biktima at 196 ang akusado?

Mantakin pa ang inaasahang 147 testigo na ipipresinta o ipatatawag ng panig ng prosekusyon sa korte, habang ang panig ng depensa ay sinasabing maghaharap ng kanilang may 300 testigo. Aba’y 365-araw lang mayroon sa isang taon para kukulangin ang isang buong taon para maisalang sa korte at madinig ang testimonya ng may 447 testigo. 

***

Bukod pa riyan, hindi naman araw-araw ang paglilitis ng korte. At kung sakaling matindi o importante ang testimonya ng saksi, baka ilang beses pa siyang ipatawag para sa cross examination. Hindi pa kasama riyan ang presentasyon ng mga ebidensiya at kung anu-ano pang anik-anik sa mga paglilitis na kung anu-anong mosyon para maging “slow motion” ang pag-usad ng kaso.

Tandaan din na ang pamilyang Ampatuan ay isang maimpluwensiya at mayamang pamilya na kayang umupa ng de-kalibreng abogado na alam ang mga “pasikut-sikot” ng batas. Hindi rin naman siguro puwedeng balewalain ng hukom ang mga mosyon ng depensa lalo na kung may basehan naman dahil baka paghinalaan siyang may pinapanigan.

Noon ngang Oktubre, nagpahayag ng pangamba ng panig ng prosekusyon na baka patuloy pang maantala ang paglilitis sa kaso dahil may akusadong nagpalit ng abogado. At maging ang hanay ng prosekusyon ay mayroon ding nangyayaring mga intriga na sana lang ay hindi makaapek­to sa kanilang trabaho bilang kasangga ng mga biktima.

Sa huli, kahit batid natin na ang kasabihang “justice delayed is justice denied”, sadyang pambihira ang kasong ito dahil sa sobrang dami ng biktima, mga akusado, at ipatatawag na testigo. Pero ang higit na mahalaga ay matiyak na magkakaroon ng wakas ang paglilitis at mabibigyan ng katarungan ang mga biktima -- na sana lang ay hindi abutin ng panibagong lima pang taon na anibersaryo ng masaker.

Kumilos sana ang sangay ng pamahalaan na dapat kumilos para kahit papaano ay bumilis kahit bahagya ang usad ng pagdinig sa kaso.
Laging tandaan: “Bata mo ‘ko at Ako ang Spy n’yo”. (Twitter: follow@dspyrey)
http://www.abante-tonite.com/issue/nov1914/edit_spy.htm#.VGvFLmdavFw

Nakatutok!

                                                                          Nakatutok! 
                                                                       REY MARFIL

Magandang balita ang kautusan ni Pangulong Noynoy ‘PNoy’ Aquino sa Department of Budget and Management (DBM) na ipalabas ang karagdagang P8 bilyon sa National Housing Authority (NHA) para sa konstruksiyon ng permanenteng pabahay sa mga biktima ng bagyong Yolanda.

Ginawa ang kautusan matapos ipalabas ng DBM ang P11 bilyon noong Oktubre 20 para sa katulad na layunin na inihayag ni Presidential Assistant for Rehabilitation and Recovery Sec. Panfilo ‘Ping’ Lacson kamakailan.

Kukunin ang P8 bilyon sa 2014 Rehabilitation and Reconstruction Program (RRP) kaya aabot na sa P19 bil­yon ang kabuuang halaga na naipalabas para sa pabahay ng mga nabiktima ng Yolanda.

Sa direktiba ni PNoy, pangunahing layunin ng pamahalaan na maibalik sa normal ang mga komunidad at lumakas ang katatagan ng mga tao sa pagharap sa mga sakuna.

Hindi lamang pabahay ang maidudulot ng pondo, matitiyak din ang pagkakaroon ng mga biktima ng matibay at permanenteng tirahan para makaligtas sa mga posibleng sakuna sa hinaharap.

Gagamitin ang P19 bilyon sa mga sumusunod na rehiyon para sa konstruksiyon ng 64,982 na mga bahay; Region IV-B (Palawan) 708 bahay, P207 milyon; Region V (Masbate) 102 bahay, P29.9 milyon; Region VI (Capiz, Antique, Iloilo, Aklan, at Negros Occidental), 24,481 bahay, P7.14 bilyon; Region VII (Cebu) 6,292 bahay, P1.84 bilyon; Region VIII (Eastern Samar, Biliran, at Leyte), 33,399 bahay, P9.78 bilyon.

Bukod sa pagbuo ng matibay at permanenteng taha­nan, higit ding importante ang isinusulong ng administrasyong Aquino na “Build Back Better” na istratehya para buuin ang mga komunidad sa isang ligtas na lugar at hindi sa tinatawag na danger zones.

Layunin din ng pamahalaan sa Build Back Better na magkaroon ng matibay na imprastraktura at mas mabu­ting oportunidad para sa mga tao sa itatayong komunidad.

Kasama riyan ang pagkumpuni sa nasirang mga kalsada para magkaroon ng mabilis na biyahe ang mga produkto at maitayo rin ang mga silid-aralan.

Asahan natin ang mas positibo pang mga pagbabago sa ilalim ng matuwid na daan at malinis na pamamahala ni Pangulong Aquino.

***

Ginawa ni PNoy ang lahat ng makakaya nito para tulungan ang mga naapektuhan ng nakaambang pagputok ng Bulkang Mayon at ipagpasalamat sa Lumikha na hindi natuloy ang pagputok.

Hindi man sumabog ang bulkan, iniutos ng Pangulo sa Department of Budget and Management (DBM) ang pagpapalabas ng P61.5 milyon para sa pangangailagan ng Albay provincial government sa pagtugon sa kalagayan ng evacuees.

Kumpiyansa rin ang Pangulo sa grupo ni Albay Gov. Joey Salceda na magagawa nito ang lahat ng kaparaanan sa tulong ng suporta ng pambansang pamahalaan upang protektahan ang evacuees.

Dahil patuloy ang pag-aalburuto ng Bulkang Mayo­n nakaraang ilang linggo kaya inilikas sa ligtas na mga lugar ang mga residente sa gilid nito.

Bagama’t humupa, posible pa ring sumabog ito dahil sa presensiya ng magma sa crater at ilang naitalang pagyanig sa nakalipas na mga linggo na iniulat ng Philippine Volcanology and Seismology (Phivolcs).

Tinitiyak ng pamahalaan sa publiko na kayang suportahan ng pambansang badyet ang katulad na problema sa Bulkang Mayon.

Mayroong sapat na pondo ang pamahalaan sa NDRMM at Quick Response Funds para matiyak ang kahandaan sa mabilis na pagtugon sa mga sakuna.

Sa parehong update ng NDRMMC, umabot sa kabuuang P165 milyon ang halaga ng ayuda na naipagkaloob sa iba’t ibang mga ahensiya ng pamahalaan katulad ng Departments of Social Welfare and Development (DSWD) at Health (DOH), kasama maging ang Philippine Red Cross, isang non-governmental organizations, at mga pribadong sektor.

Sa ilalim ng matuwid na daan at malinis na pamamahala ni PNoy asahan nating mabibigyan ng suporta at matutugunan ang pangangailagan ng evacuees.
Laging tandaan: “Bata mo ko at Ako ang Spy n’yo”. (Twitter: follow@dspyrey)
http://www.abante-tonite.com/issue/nov1714/edit_spy.htm#.VGka52davFw

Walang ‘sagradong baka’

Walang ‘sagradong baka’

REY MARFIL

Minsan pa, pinatunayan ni Pangulong Noynoy “PNoy” Aquino na walang “sagradong baka” sa kanyang administrasyon. Kung may isyu na dapat linawin sa mga ahensya na kanilang pinamamahalaan, dapat nila itong ipaliwanag kahit sila pa mismo ang maisalang sa imbestigasyon.

Gaya na lang ng nangyari ngayon kay Health Secretary Enrique Ona na kinailangang magbakasyon at maging pakay ng imbestigasyon ng National Bureau of Investigation (NBI) dahil sa ginawang pagbili ng ahensya noong 2012 ng mga anti-pneumonia vaccine na Pneumococcal Conjugate Vaccine 10 (PCV 10).

Hindi biro ang laki ng pondo ng bayan na ginastos sa PCV 10 dahil nagkakahalaga ito ng P833 milyon.
Bukod sa malaking halaga ng pondo, sensitibo rin ang programang pinaggamitan ng mga bakuna dahil sa mga bata ito itinurok upang ma­bigyan sila ng proteksyon laban sa pulmonya at iba pang sakit.

Kaya naman makatwiran ang paliwanag ni PNoy sa mga dahilan niya upang atasan si Ona na ipaliwanag kung bakit ang PCV 10 ang binili ng DOH, sa halip na PCV 13 na sinasabing higit na inirekomenda ng mga dalubhasa. Bukod daw kasi sa mas mura ang PCV 13, mas mabisa rin daw ito kaysa sa PCV 10 na kinuha ng DOH.

Ipinaliwanag kasi ni PNoy sa panayam sa kanya ng media na isa sa mga basehan niya para paim­bestigahan ang isang opisyal ng gobyerno -- lalo na kung miyembro ng Gabinete -- ay kung gaano kaseryoso ang isyu. Sa usapin ng PCV 10 vaccines, kalusugan ng mga bata ang nakataya at seryoso itong itinuturing ng Pangulo.

Binanggit din ni PNoy na kasama rin sa kanyang sukatan sa pagpapaimbestiga ay kung gaano katindi ang epekto sa publiko ng kinasasangkutang isyu ng opisyal, at kung may sapat na basehan ang mga ibinibintang sa opisyal. Pero siyempre, ibang usapan ang mga batikos at banat sa mga opisyal na makikitaan ng bahid ng pulitika o vested interest ng mga nag-aakusa.

***

Sa sitwasyon ni Sec. Ona, ipinakita ni PNoy ang pagiging transparent dahil siya mismo ang nagpaliwanag sa publiko na nagbakasyon ang kalihim para matutukan nito ang paghahanap ng sagot sa mga itinatanong niya tungkol sa mga biniling bakuna. 

Matatandaan kasi na kalusugan ang idinahilan ni Ona kung bakit siya nagbakasyon ng isang buwan at walang nabanggit ang kanyang tanggapan tungkol sa kontrobersyal na PCV 10. Pero wala pa naman daw pasya si PNoy kung tuluyan nang mauuwi sa pagbibitiw ang bakasyon ni Ona. Marahil, ang magiging kapalaran ng kalihim ay nakasalalay sa mga sagot na maibibigay niya sa Pangulo tungkol sa mga bakuna.

Malamang din na marami ang naghihintay na malaman ang kasagutan sa mga tanong na: Nasulit ba ang pera ng bayan sa mga biniling bakuna? Mas mabisa ba talaga at mas mura ang PCV 13 kaysa PCV 10?
Nasunod ba ang tamang proseso sa pagbili ng mga bakuna? At kung may kumita ba sa transaksyon na ito?

Sa kabilang banda kung susuriin, masuwerte si Sec. Ona dahil mabibigyan siya ng pagkakataon na maipaliwanag ang naging aksyon ng kanyang ahensya sa pagbili ng PCV 10. Kasi kung naniniwala na si PNoy na may kalokohang nangyari sa pagbili ng mga bakuna, baka hindi na hihintayin ng Pangulo ang paliwanag ng kalihim. Baka sa halip na “leave” e resignation ni Sec. Ona ang naging laman ng balita.

Hintayin na lang natin ang susunod na kabanata.

Laging tandaan: “Bata mo ‘ko at Ako ang Spy n’yo.” (Twitter: follow@dspyrey)
http://www.abante-tonite.com/issue/nov1414/edit_spy.htm#.VGUoUWdavFw

Hindi nakatatawang biro

                                                              Hindi nakatatawang biro  
                                                                     REY MARFIL



Puspusan ang ginagawang pag-iingat ng pamahalaang Aquino para mapangalagaan ang kanyang mga “boss” na mamamayang Pinoy laban sa kinatatakutang Ebola virus na patuloy na kumikitil ng buhay sa ilang bahagi ng bansa, partikular sa West Africa.

Pero sa kabila ng pagseseryoso ng gobyerno laban sa virus, may mga kolokoy na ginagawang biro o kung hindi man ay nagagawa pang manloko ukol sa pandaigdigang problemang ito.

Milyun-milyon ang inilaan na pondo ng pamahalaan para sa paghahanda sakaling makapasok sa bansa ang Ebola. Mala-Jaworski ang pagbabantay ng iba’t ibang ahensiya ng pamahalaan para masuring mabuti ang mga dumarating sa mga airport na galing sa mga bansa na may kaso ng Ebola.

Para mapahusay ang monitoring, kailangan ang mga gamit tulad ng thermal scanner upang makita kung may lagnat ang mga dumarating na pasahero na isa sa mga sintomas ng virus. Kailangan din ng mga dagdag na protective gear ng ating mga health worker para masiguro rin ang kanilang kaligtasan at hindi sila mahawa ng virus.

May mga inihanda na ring mga ospital at mga lugar na pagdadalhan ng mga taong paghihinalaan na taglay ang virus. Kailangan kasing mailayo sa tao ang paghihinalaan na may Ebola para mapigilan ang pagkalat nito. Kailangan din na mabilis na makilala at makuha ang mga taong nakasalamuha ng mga taong paghihinalaan na may virus upang maisama sila sa quarantine o 21 oras na obserbasyon bago malaman kung taglay nila ang virus.

Isang halimbawa kung gaano sineseryoso ng pamahalaang Aquino ang usapin ng Ebola ay ang gagawing pag-quarantine ng 21-araw sa 108 Pinoy UN peacekeepers natin na magagaling sa Liberia, isa sa mga bansa na may mga kaso ng virus.

Pagdating ng mga Pinoy UN peacekeepers, hindi muna nila makakapiling ang kanilang pamilya at sa halip ay mananatili muna sila ng 21-araw sa Caballo Island (malapit sa Corregidor) upang matiyak na libre talaga sila sa virus. Gagawin ito kahit pa nagnegatibo na sila sa isinagawang Ebola test ng UN at itinuturing “no risk” category ang lugar na pinostehan nila sa Liberia.

Ang lahat ng iyan ay bahagi ng tinatawag na “precautionary” measures ng pamahalaan upang manatiling Ebola-free ang Pilipinas. At dahil papalapit ang Kapaskuhan, umaasa ang pamahalaan na magsasagawa rin ng kanilang sariling pag-iingat at self-quarantine ang mga OFW o balikbayan na uuwi sa Pinas na galing sa mga bansa na may kaso ng Ebola.

***

Hindi biro ang Ebola pagdating sa pagiging deadly nito at bilis ng panghahawa. May mga insidente na ang mga health worker, doktor at nurse, na kahit balot na balot ng kanilang protective gear ay nagawa pa ring mahawa ng virus. Sa bilang ng World Health Organization, aabot na sa 9,000 katao ang naapektuhan ng virus at ma­laking bahagi nito ay nasa West Africa.

Ang matindi pa, nasa mahigit 4,000 katao na ang namatay dahil sa virus. Kaya naman hindi nakakatawa kung may mga taong walang magawa at magkakalat ng maling impormasyon sa pamamagitan ng Internet o kahit sa text message tungkol sa virus na umano’y nakarating na sa Pilipinas at may mga naka-quarantine.

Ang National Bureau of Investigation, inaalam na kung sino ang pinagmulan ng “hoax” o mapanlokong impormasyon na kumalat sa Internet na nagsabing mayroon ng 18 kaso Ebola virus sa Quezon City.
Ang natu­rang impormasyon ay itinanggi ng Department of Health.

Gaya ng sinabi ni Justice Secretary Leila de Lima, dapat lang talagang maparusahan ang mga taong inaakalang nakakatawa ang ginagawa nila, pero sa totoo lang ay naghahasik ng takot at magdudulot ng panic sa iba.

Malalaman lang kasi ng mga kolokoy na ito na hindi nakakatawa ang kanilang ginawa kapag sila ay nahuli at humihimas na ng malamig na rehas kasama ang mga lalaking burdado ang katawan na malagkit ang tingin sa kanilang likuran.
 Laging tandaan: “Bata mo ko at Ako ang Spy n’yo”. (Twitter:follow@dspyrey)

 http://www.abante-tonite.com/issue/nov1214/edit_spy.htm#.VGKBYmdavFx

Ibinuhos ng Pagcor!

                                                                 Ibinuhos ng Pagcor!  
                                                                     REY MARFIL



Magandang balita ang pagpapalabas ng Philippine Amusement and Gaming Corporation (Pagcor) ng karagdagang P2 bilyon para sa “Matuwid na Daan Silid-Aralan” na proyekto ni Pangulong Noynoy “PNoy” Aquino.

Aabot na ngayon ang kontribusyon ng Pagcor sa P7 bilyon para sa proyektong silid-aralan ng pamahalaan. Dahil sa ipinalabas na pondo, sinabi ni Pagcor chairman at chief executive officer Cristino Naguiat, Jr. na mas malayo ang mararating ng proyekto na pakikinabangan maging sa mga liblib na lugar sa bansa.

Sa kautusan ng Pangulo, masusi ang isinasagawang koordinasyon ng Pagcor sa sektor ng edukasyon para makitang mabuti ang estado at iba’t ibang problema ng mga pampublikong eskwelahan sa malalayong mga lugar sa bansa.

Malaki naman talaga ang inasenso ng kondisyong matuto ng mga mag-aaral dahil sa ibinigay na mga silid-aralan ng Pagcor. Nakakatiyak rin tayo na magpapatuloy ang administrasyong Aquino sa konstruksiyon ng mas marami pang mga silid-aralan para habulin ang kakapusan nito.

Malaking puhunan ang P7 bilyon na pondo sa sektor ng edukasyon na pakikinabangan nang husto ng mga kabataan sa malapit na hinaharap. Nalaman kay Education Sec. Bro. Armin Luistro, na nahabol na ang 66,800 kakapusan sa silid-aralan na naitala nong 2010.

Gayunpaman, sinabi ni Luistro na tinututukan ngayon ng ahensya ang taunang pagkumpuni at pagpapalit sa mga silid-aralan na naitayo 30 hanggang 50 taon na ang nakakalipas. Ayon sa DepEd, tinatayang 500,000 na lumang silid-aralan ang kailangang kumpunihin o palitan dahil sa kalumaan.

Mula sa inisyal na P2 bilyon na pondo na nailabas ng Pagcor noong Abril 2013, iniulat ng Department of Public Works and Highways (DPWH) na natapos na ang halos 75 porsiyento ng kabuuang bilang ng mga silid-aralan na ginawa.

Sa 2015, target ni DPWH Sec. Rogelio Singson na kumpletuhin ang 1,070 silid-aralan. Layunin ng DPWH na tapusin sa 2016 ang lahat ng mga silid-aralan na gagawin gamit ang karagdagang P2 bilyong alokasyon na natanggap mula sa Pagcor.

Isinapormal ng Pagcor ang pagkakaloob ng karagdagang P2 bilyong pondo sa pamamagitan ng paglagda nina Naguiat, Luistro at Singson sa isang Memorandum of Agreement (MOA).

Sa ilalim ng MOA, titiyakin ng Pagcor ang progreso ng konstruksiyon ng mga silid-aralan habang magkakaloob ang DepEd ng mga guro at teknikal na suporta para sa operasyon, mga gamit katulad ng upuan at lamesa, at pagmintina at pagkumpuni ng mga gusali.

Sa kabilang banda, gagawin naman ng DPWH ang mga silid-aralan at iba pang mga pangangailangan sa konstruksiyon. Sapul nang ilunsad ang proyekto noong 2011 para sa bagong mga silid-aralan, nakagawa na ang Pagcor, DepEd, at DPWH ng 906 na mga silid-aralan sa 201 na mga lugar sa bansa habang 630 silid-aralan ang kasalukuyang ginagawa sa 123 na mga lugar gamit ang inisyal na P5 bilyong pondo.

Kasama rin sa gagawin ang 91 silid-aralan sa Bohol na nasira ng lindol noong nakalipas na Oktubre 2013. Kabilang ang sumusunod na mga lalawigan at lugar na natapos na ang mga silid-aralan: Baguio, Benguet, Ilocos, Pangasinan, Isabela, Cagayan, Nueva Vizcaya, Nueva Ecija, Pampanga, Tarlac, Cavite, Laguna, Quezon, Antipolo, Rizal, Oriental Mindoro, Romblon, Albay, Camarines Norte, Camarines Sur, Masbate, Catanduanes, Sorsogon, Bacolod, Iloilo, Negros Occidental, Cebu, Negros Occidental, Negros Oriental, Samar, Zamboanga, Cagayan de Oro, Misamis Oriental, Misamis Occidental, Bukidnon, Davao City, Davao del Sur, Davao del Norte, at Sultan Kudarat.

Ipinapakita lamang nito kung gaano katindi ang pagmamalasakit ni PNoy sa pagtiyak na magkakaroon ng magandang kalidad ng edukasyon ang mga kabataang Pilipino.

Laging tandaan: “Bata mo ‘ko at Ako ang Spy n’yo”. (Twitter: follow@dspyrey)
 http://www.abante-tonite.com/issue/nov1014/edit_spy.htm#.VF_gGGdavFw

Ang katuparan ng rehabilitasyon

                                                           Ang katuparan ng rehabilitasyon
                                                                         Rey Marfil


May kawikaan na walang sugat na hindi naghihilom.

At kahit anong pait ng nakaraan na iniwan ng bagyong “Yolanda” sa ating mga kababayan noong nakaraang taon, babangon at babangon tayo para magpatuloy ang buhay. Sa pagbangon na ‘yan, mahala­gang malaman na karamay nila ang pamahalaan.

Matapos na aprubahan ni Pangulong Noynoy “PNoy” Aquino ang inilatag na P167.9-bilyong Comprehensive Rehabilitation and Reconstruction Plan (CRRP) sa mga lugar na sinalanta ni Yolanda, pinulong naman niya ang Gabinete para matiyak na mabilis itong maipatutupad.

At taliwas sa mga banat ng mga kritiko na mabagal ang pagkilos ng gobyerno, mismong ang Asian Deve­lopment Bank o ADB na ang nagsabi na mabilis ang nagaganap na rehabilitasyon sa mga lugar na sinalanta ni Yolanda kung ikukumpara sa ibang bansa na hinagupit din ng matinding kalamidad tulad ng Aceh, Indonesia na tinamaan noon ng lindol at tsunami.

Sa pagtaya ng ADB, inaasahan nila na aabutin ng apat hanggang limang taon bago ganap na maka­babawi ang rekonstruksiyon sa mga lugar na lubhang napinsala ng super typhoon noong Nobyembre 2013.

Gayunman, tila hindi nais ni PNoy na paghinta­yin ng limang taon ang mga taong nais na makabangon agad sa naturang kalamidad. Sa nakaraang pagpupulong ng Gabinete, inatasan niya ang mga kinauukulang ahensya na madaliin at paigsiin ang mga pagpro­seso ng mga kailangang bagay para maisakatuparan ang mga kailangang programa at proyekto.

Katunayan, bago matapos ang 2014, nais ng pamahalaan na maipatupad na ang tatlumpung porsiyento ng 25,000 rehabilitation and recovery plans and programs na nakapaloob sa inaprubahang master plan.

At kung apat hanggang limang taon ang karaniwang tagal bago lubos na makabangon ang mga lugar na matinding tinatamaan ng kalamidad, si PNoy, nais na makumpleto ang nakasaad sa master plan sa 2016.

***

Alinsunod sa master plan, malaking bahagi ng pondo na aabot sa P75.68 bilyon ang ilalaan sa resettlement o pabahay sa mga nawalan ng tirahan. Aabot naman sa P35.15 bilyon ang gugugulin para sa mga impraestruktura, P26.41 bilyon sa social services at P30.63 bilyon para sa kabuhayan ng mga sinalanta.

Ang pagbuhos ng malaking pondo para sa pagpapagawa ng mga bahay at impraestruktura para sa rehabilitasyon ng mga sinalantang lugar ni Yolanda ay magbibigay ng trabaho at kabuhayan sa marami na­ting kababayan. Mahalaga ito lalo pa’t lumilitaw na tumaas ang antas ng kahirapan at kawalan ng trabaho sa Eastern Visayas mula nang mangyari ang hagupit ni Yolanda.

Naniniwala ang ADB na bubuhos at magtutuluy-tuloy ang mga gawain sa rehabilitasyon sa susunod na taon. Katunayan, target ng pamahalaan na mai­patupad at matapos ang 50 porsiyento ng master plan sa susunod na taon, at ang nalalabing 20 porsiyento ay inaasahang magagawa sa 2016.

Batid ng lahat na hindi biro ang pinsalang iniwan ni Yolanda. Mahigit 6,000 buhay ang nawala sa bagyo at umabot sa 171 na lungsod at mga munisipalidad mula sa 14 na lalawigan ang naapektuhan.

Kaya naman ang panawagan ng marami sa ating mga opisyal at mga politiko, kung hindi sila makakaisip ng paraan para makatulong upang mapabilis pa ang rehabilitasyon, sana ay hindi na sila mag-isip pa ng paraan para maging sagabal.

Laging tandaan: “Bata mo ‘ko at Ako ang Spy n’yo”. (Twitter: follow@dspyrey)
http://www.abante-tonite.com/issue/nov0714/edit_spy.htm#.VFvvYmdavFw

Salamat at paalam, Mamang Maliit!

                                                         Salamat at paalam, Mamang Maliit!  
                                                                      REY MARFIL


Kung sikat ngayon ang child star na si Ryzza Mae Dizon sa tawag na “Aling Maliit”, noon naman ay mayroong sikat na “Mamang Maliit” dahil sa husay niyang magsilbi sa publiko -- ang namayapang dating senador at dating Health Secretary na si Juan Flavier.

Kahit 4’11 lang ang height ni Flavier, mataas naman ang pagtingin sa kanya ng mga nakakakilala sa kanya, at mga tao na kanyang natulungan at napagsilbihan. 

Ang sanggol na isinilang sa Tondo noong June 23, 1935 at lumaki sa Balatoc, Benguet, ay naging doktor ng mga mahihirap sa baryo, at nanguna sa iba’t ibang sibikong gawain na nagpapaunlad sa kanayunan tulad ng Philippine Rural Reconstruction Movement.

Si Flavier ay isang maliit na tao na may malaking pagmamalasakit sa kapwa-tao. Ayon kay dating Pangulong Fidel Ramos, isa sa mga dahilan kung bakit hinirang niyang kalihim ng kalusugan si Flavier noong 1992 ay bu­nga ng malawak nitong karanasan bilang doktor sa kanayunan, na siyang kailangan noon sa kanyang administrasyon.

Hindi naman nagkamali ng pagpili si Ramos. Sa ilalim ng pamamahala ni Flavier bilang pinuno ng DOH mula 1993 hanggang 1995, inilunsad nito ang napaka­raming epektibong kampanya para sa kalusugan ng lahat, hindi lang ng mga nasa lalawigan.

Tumatak ang campaign slogan niyang “Let’s DOH It”, na naging epektibo para sa immunization program, ang anti-cigarette campaign na Yosi Kadiri, nandiyan din ang Oplan Alis Disease, Sangkap Pinoy, Sariling Salat sa Suso, Patak Health Centers, Sagip Mata, at marami pang iba.

Itinaguyod din niya ang iba pang programa gaya ng pagpapalaganap ng herbal medicine na Sampung Halamang Gamot, Baby and Mother Friendly Hospitals, at ang Doctors to the Barrios, na talaga namang hinangaan pati ng mga propesyunal.

Sa programang DTTB, ipinakita ni Flavier na may malasakit ang gobyerno at ang mga doktor sa mga kababayan nating nasa malalayong lugar at hindi nahahatiran ng serbisyong medikal.

Dahil sa pagiging epektibong kalihim, malakas ang karisma sa publiko at madaling lapitan, hindi naging mahirap kay Flavier na manalo nang kunin siyang kandidatong senador noong 1995, at muling nanalo sa kanyang re-elections noong 2001 kahit pa naging mahigpit ang kampanya laban sa kanya ng Simbahang Katolika dahil sa pagsusulong ni Flavier sa reproductive health bill.

Ilan sa mga batas na katuwang siya sa pagbalangkas o kasama siya bilang may-akda ay ang E-Commerce Law, Indigenous People’s Rights Act, ang Newborn Screening Law, Traditional and Alternative Medicine Act, Philippine National HIV-AIDS Law at marami pang iba.

***

Tulad ng hangarin ni Pangulong Noynoy ‘PNoy’ Aquino na pagtahak sa “daang matuwid”, mabibilang sa daliri ang mga opisyal at mambabatas na nagsilbi sa bayan na hindi nasangkot sa katiwalian, at isa na riyan si Flavier. 

Hindi naman kataka-taka ito dahil sa kanyang pagi­ging simpleng tao at payak na paraan ng pamumuhay. Dahil laki sa hirap at matagal nagsilbi sa kanayunan, hindi raw ninais ni Flavier na bigyan siya ng magarbong pagsalubong sa mga dinadaluhang pagtitipon.

Minsan ding lumutang ang pangalan ni Flavier na maging kandidato sa pangulo ng bansa pero sadyang hindi yata iyon laan sa kanya. Matapos ang kanyang termino bilang senador noong 2007, hindi na pumasok sa pulitika si Mamang Maliit at tahimik na lamang na nagpatuloy sa pagsisilbi sa publiko sa paraan ng sibikong gawain.

Kahanga-hanga ang mga taong katulad ni Flavier na tapat na ginugol ang buhay sa pagsisilbi sa kanyang kapwa. Maliit man siyang tao, napakalaki naman ng kanyang puso. May kasabihan na hindi mahalaga kung gaano ka katagal nabuhay sa mundo, kung hindi kung papaano ka namuhay sa mundo.
Laging tandaan: “Bata mo ko at Ako ang Spy n’yo”. (Twitter: follow@dspyrey)

http://www.abante-tonite.com/issue/nov0514/edit_spy.htm#.VFlP_2davFw

Ginagawa ang lahat!

                                                                 Ginagawa ang lahat!  
                                                                   REY MARFIL

Magandang balita ang pahayag ni Pangulong Noynoy “PNoy” Aquino kaugnay sa napipintong pagkakaloob ng pamahalaan ng 1,100 na permanenteng housing units sa susunod na buwan para sa naapektuhan ng Super Typhoon Yolanda.

Binanggit ng Pangulo ang magandang balita sa panayam ng media sa kanya sa nakalipas na paggunita ng 70th Leyte Landing sa bayan ng Palo.

Siyempre, produkto ito ng matuwid na daan at malasakit ng Pangulo sa ating mga kababayang na­ngangailangan ng ayuda.

Hindi ba’t nakakatuwa na marinig kay PNoy ang kabuuang 120,000 housing units na tina-target ng pamahalaan na matapos ngayong taon para sa mga biktima ng bagyong Yolanda?

Sa nasabing bilang, ipapamahagi ang 120,000 mga yunit ng bahay sa mga rehiyong 4B, 5, 6, 7, 8, at CARAGA.

Sa ngayon, umaabot sa kabuuang 56,140 mga yunit o 47 porsiyento ng kabuuang alokasyon sa pabahay ang ipagkakaloob sa anim na mga lalawigan sa ­Rehiyon 8.

Ibinalita rin ni PNoy base sa impormasyon ni ­Social Welfare Sec. Corazon “Dinky” Soliman na marami sa mga nakaligtas sa bagyo ang nakalipat na sa pansamantalang pabahay.

Nitong Setyembre, sinabi ng Pangulo na naka­pagpalabas na ang Department of Budget and Ma­nagement (DBM) ng mahigit sa P40 bilyon para sa iba’t ibang mga ahensya ng pambansang pamahalaan, go­vernment-owned and controlled corporations (GOCCs), at local government units (LGUs) para sa implementasyon ng relief at rehabilitation projects sa mga naapektuhan ng Yolanda.

***

Isa pang good news na ginagawa ng Department of Health (DOH) ang lahat ng makakaya nito ­para palakasin ang pagpuksa sa nakamamatay na Ebola Virus Disease.

Mismong si PNoy ang nagbigay ng direktiba sa DOH na gawin ang lahat ng makakaya nito para tiyakin ang kaligtasan ng mga Pilipino.

Sa katunayan, sasailalim ang mga kinatawan ng DOH sa specialized training programs ng World Health Organization (WHO) para lalong mapalakas ang isinasagawang paghahanda ng pamahalaan sa Ebola.

Kabilang sa pagsasanay ang pagtuklas ng mga kaso ng Ebola at pag-uulat nito sa kinauukulan, pagtugon at paghawak sa posibleng outbreak, pagbabantay sa lahat ng posibleng daanan ng nagtataglay ng sakit, pangangasiwa sa mga kaso, koordinasyon ng mga kinauukulang mga ahensya, mga plano at mapagkukunan ng pondo.

Bahagi naman ng tinatawag na komprehensibong estratehiya ng WHO na ilalatag ang pagpigil sa impeksiyon, contact tracing, case management, surveillance, laboratory capacity, ligtas na paglilibing sa mga biktima, kaalaman ng publiko at pagtulong ng komunidad at pambansang lehislasyon at regulasyon para suportahan ang paghahanda ng bansa sa Ebola.

Sa ilalim ng panunungkulan ni PNoy, nakakasi­guro tayong gagawin nito ang lahat ng makakaya ­para matiyak ang kaligtasan ng mga Pilipino sa iba’t ibang nakamamatay na sakit.

Laging tandaan: “Bata mo ‘ko at Ako ang Spy n’yo.” (Twitter: follow@dspyrey)
http://www.abante-tonite.com/issue/nov0314/edit_spy.htm#.VFadoWdavFw