Peace tayo!

                                                                   

                                                                     Peace tayo!
                                                                     Rey Marfil


Isang napakagandang balita ang hindi lubos na nabigyan ng atensiyon ng publiko dahil sa kontrobersyang nangyari kay Vhong Navarro -- ang pagkakasara ng ika-apat at pinaka-kritikal na annex sa hinihimay na Framework Agreement on the Bangsamoro (FAB),  na tinatawag na “Normalization”.

Nilagdaan ng mga kinatawan ng peace panel ng pamahalaan ng Pilipinas at Moro Islamic Liberation Front ang nabanggit na annex noong Sabado sa Malaysia,  na nasabay naman sa pagputok ng police report o blotter tungkol sa alegasyon ng tangkang panghahalay ng aktor na si Vhong Navarro kay Deniece Cornejo.

Habang inaalam ng mga awtoridad ang buong katotoha­nan sa usapin ni Vhong, talakayin natin ang peace agreement kung saan nakasalalay ang kinabukasan at maraming buhay ng ating mga kababayan sa Mindanao.

Pero bakit ba mahalaga ang nilagdaang annex na tinatawag na “Normalization”? Nakapaloob kasi dito ang kasunduan tungkol sa gagawing pagbababa ng armas ng MILF at pagbuwag sa kanilang armadong hanay bilang bahagi ng pakikiisa nila sa ha­ngarin ng pamahalaan na matigil na ang labanan  sa Mindanao.

Ang napagkasunduan ng dalawang lupon ay ipapaloob sa panukalang batas na kailangang aprubahan ng Kongreso  na tatawaging Bangsamoro Basic Law, na magbibigay-daan naman para sa pagtatatag ng Bangsamoro region na papalit sa kasalukuyang Autonomous Region in Muslim Mindanao (ARMM).

Ang kasalukuyang gobernador ng ARMM na inihalal ng mga tao nitong nagdaang 2013 elections na si Governor Mujiv Hataman, nagpahayag ng lubos na suporta sa usapang pangkapayapaan at binati ang mga bumubuo sa peace panel dahil sa nagawang paghimay ng kasunduan.

Handa rin daw ang gobernador na makipagtulungan para sa mapayapang pagsasalin ng kapangyarihan ng ARMM sa bagong liderato ng Bangsamoro na mamahala sa ganap na kapayapaan at kaunlaran sa rehiyon.

***

Kung ang lahat sana ng grupo na nagsasabing hanap nila ay ganap na kapayapaan ay katulad ni Hataman, tiyak na magiging madali ang katahimikan sa Mindanao. Hindi gaya ng mga pagbabanta na ginagawa sa ibang sektor o grupo na magiging daan ng bagong kaguluhan ang pakikipagkasundo sa MILF.

Gaya na lamang ng grupong  Bangsamoro Islamic Freedom Fighters na ang mga namumuno ay dating kasapi ng MILF, na patuloy ang ginagawang panggugulo sa ilang lugar sa Min­danao na ang mga pangunahing naapektuhan ay mga sibilyan.

Mayroon ding ilan na mula sa hanay ng Moro Natio­nal Liberation  Front ay naglalabas ng kanilang sentimyento sa ginagawang peace negotiation ng pamahalaan sa MILF. 

Dahil ang grupo nila ang naunang nakapasok sa peace agreement sa pamahalaan na naging daan sa pagkakabuo ng ARMM,  hindi maaalis na mangamba ang ilan sa kanila na tuluyang makalimutan ang mga bagay na pinasok na kasunduan sa kanila ng gobyerno.

Ngunit kung susuriin na mabuti ang ideolohiya at komposisyon ng armadong grupo sa Mindanao, hindi ba’t  iisa lang naman ang kanilang hangarin -- kasarinlan ng Bangsa­moro at kapayapaan tungo sa kaunlaran ng mga tao na sinasabi nilang ipinaglalaban.

Ilang dekada na ang labanan sa Mindanao, maraming buhay na ang ibinuwis at dugong dumanak sa lupang pangako, hindi na mabilang ang mga naulila at naglahong pangarap, siguro naman ay panahon na para bigyan ng pagkakataon na umusad at suportahan ang isinusulong na usapang pangkapayapaan nang walang sinuman na nagbabanta at naglulunsad ng kaguluhan.

Kung ang lahat ng mga lider sa Mindanao ay katahimikan ang hanap, dapat na magkaisa sila na supilin ang naghahasik ng karahasan. Laging tandaan: “Bata mo ko at Ako ang Spy n’yo.” (mgakurimaw.blogspot.com)

Hamon!

                                                                          Hamon!  
                                                                        Rey Marfil


Pinatunayan ng tumataas na “competitiveness ranking” ng bansa na lumilikha ng maraming oportunidad ang isinusulong na malinis na pamamahala ng administrasyong Aquino.

Sa ulat ng National Competitiveness Council, sumulong pa rin ang bansa sa kabila ng maraming mga hamong dumaan.

Sa hanay ng walong pangunahing competitiveness reports na nailabas noong nakalipas na taon, naitala ng Pilipinas ang pag-angat (No. 4) sa pito habang nanatili naman sa nalalabing isa.

Kabilang dito ang pag-angat ng bansa sa ikaanim na posisyon sa World Economic Forum’s Global Competitiveness Index mula 65th tungong 59th.

Umangat rin tayo ng 30 puwesto mula 138th tungong 108th sa International Finance Corporation’s Ease of Doing Business Index na ikinukonsiderang pinakamalaking pag-angat.

Tumaas rin tayo ng 11 posisyon sa Transparency International’s Corruption Perceptions Index mula 105th tungong 94th. Siyempre, resulta ang mga umentong ito ng bagong programa at inisyatiba ng pamahalaan sa nakalipas na 12 hanggang 18 buwan ng masusing pagtatrabaho.

Nilikha ni Pangulong Noynoy ‘PNoy’ Aquino ang Task Force on Ease of Doing Business na naglalayong bawasan o putulin ang red tape sa operasyon ng negosyo. Mahalaga ang nasabing panukala ng Pangulo upang mapabuti at mapabilis ang pagbubukas ng negosyo sa Pilipinas.

***

Maganda na hindi isinasara ng pamahalaan ang pintuan nito sa posibleng muling pagbubukas ng dayalogo sa makakaliwang rebeldeng grupo na kahit mahirap makamit, posible pa rin namang mangyari.

Nabatid kay Communications Secretary Sonny Coloma na naglabas ng pahayag ang peace adviser ng Pangulo na patuloy na isusulong ng pamahalaan ang pag-abot ng kapayapaan sa komunistang grupo.

Hindi pa rin nagkakasundo ang pamahalaan at Communist Party of the Philippines-New People’s Army-National Democratic Front (CPP-NPA-NDF) sa maraming bagay upang sumulong ang usapang pangkapayapaan.

Isang malaking hamon ang isinusulong na kasunduan at isa sa maraming isyu ang pagpapalabas ng mga tagapayo ng mga komunista sa bilangguan bilang kondisyon bago simulan ang mapayapang pag-uusap.
Bagama’t mahirap, magandang panimula ngayong taon at asahan natin na isusulong ito para makamit ang kaunlaran.

Hindi lang ‘yan, masasabi nating hamon din at oportunidad ang pag-abot sa 100 milyon ng populasyon ng bansa. Ika nga ni Sec. Coloma, nais ng Philippine Development Plan na tiyaking makikinabang ang lahat ng mga Pilipino sa pagsulong ng ekonomiya ng bansa.

Masasabing hamon at oportunidad dahil pinakamahalagang kayamanan ang mga tao. Maganda rin na malaking bahagi ng pambansang badyet ngayong 2014 ang nakalaan para sa sosyal na proteksyon, kagalingan at kaunlaran ng mga Pilipino.

Asahan na nating hindi mapag-iiwanan ang mayorya ng mga Pilipino sa tatamasahing ginhawa.
At dapat ding kilalanin natin ang patuloy na paniniyak ng Malacañang sa mga kamag-anak ng mga biktima ng Atimonan massacre noong nakaraang taon na patuloy na magtatrabaho ang pamahalaan upang makamit ng mga ito ang hustisya.

Sa ngayon, ipinapatupad ang tinatawag na administrative at prosecution actions. At alinsunod sa direktiba ni PNoy, kumikilos ang lahat ng kinauukulang mga ahensya ng pamahalaan para sa implementasyon ng administrative at prosecution actions sa hangaring matiyak ang hustisya sa mga biktima.

Noong huling bahagi ng nakalipas na taon, kinasuhan na ng Department of Justice (DOJ) ang 13 awtoridad ng multiple murder dahil sa naganap na pamamaslang.

Laging tandaan: “Bata mo ko at Ako ang Spy niyo.” (mgakurimaw.blogspot.com)

Dagdag kumpiyansa!

                                                                 Dagdag kumpiyansa!  
                                                                   REY MARFIL


Magandang panimula sa pamahalaan ni Pangulong Noynoy “PNoy” Aquino ang mga lumalabas na resulta ng iba’t ibang survey na nagpapakita na nananatiling nasa likod niya ang kanyang mga “boss”. Makabubuti ito para madagdagan din ang sipag ng gobyerno na lutasin ang mga problema ng bayan tulad ng kahirapan.

Bagaman nasabi na ni PNoy noon sa mga panayam na hindi nakasandal sa survey ang pagkilos ng kanyang pamahalaan, maaari pa rin namang gamiting panukat o indicator ‘ika nga ang mga numerong naglilitawan upang mapahusay pa ang mga ginagawa ng gobyerno.

Sa pagsisimula ng taon, lumilitaw na nananatiling nasa likod ng Pangulo ang tiwala at suporta ng higit na nakararaming Pinoy kung paniniwalaan ang resulta ng survey ng Social Wea­ther Station (SWS) at Pulse Asia na ginawa noong Disyembre.

Isa na rito ang survey na ginawa ng SWS sa mga biktima ng bagyong Yolanda kung saan lumabas na higit na nakararami sa kanila ang nasiyahan sa ginawang pagtugon ng gobyerno sa kalamidad.

Sa kaparehas na survey, lumitaw daw na positibo rin ang pananaw ng mga Pinoy na hindi biktima ni ‘Yolanda’ sa pagkilos ng gobyerno sa pinakamalakas na bagyong tumama sa bansa.

Ang resulta ng survey ay taliwas sa mga naglabasan sa media at hinala ng mga kritiko ng gobyerno na babagsak ang ratings ni PNoy dahil sa alegasyon na naging mabagal ang aksyon ng pamahalaan sa naganap na kalamidad. Pero sino ba ang dapat nating paniwalaan? Ang mga kritiko ng gobyerno, o ang mga taong direktang naapektuhan ng bagyo?

***

Napag-usapan ang survey ng SWS at Pulse Asia, maganda rin ang resulta ng survey ng US-based auditing firm na Grant Thornton LLP, na nagpapakita ng mataas na kumpiyansa ng mga negosyanteng Pinoy sa magiging takbo ng ekonomiya ng Pilipinas ngayong taon.

Sa katunayan, sinabi sa survey na sa lahat ng mga negosyante sa mundo, lumitaw na “most optimistic” ang mga negosyanteng Pinoy at mga negosyante ng United Arab Emirates (UAE). Partida pa iyan -- kung tutuusin dahil may kalamidad na nangyari sa ating bansa na kailangang asikasuhin ng husto ng pamahalaang Aquino.

Isipin na lang nating kung hindi tayo kinabayo ng mga kalamidad; sunud-sunod na malalakas na pag-ulan; mga bagyo; lindol; bakbakan -- na sumira ng mga pananim at imprastraktura, aba’y hindi ba mas malaking pondo sana ang magagamit ng pamahalaang Aquino sa mga kailangan nating proyekto.

Pero dahil marami tayong kababayan na nawalan ng bahay sa Zamboanga City dahil sa bakbakan sa ilang miyembro ng MNLF, mga nawalan ng tirahan dahil kay ‘Yolanda’, ma­laking pondo ang kailangang gamitin ng pamahalaan para sila matulungan at mabigyan ng mas ligtas na matitirhan.

Kaya naman magandang hakbang sa parte ng pamahalaan ang pagkakahirang kay dating Senador Panfilo Lacson bilang mamamahala sa rehabilitation program sa mga biktima ni ‘Yolanda’ para matiyak na hindi mapupunta sa bulsa ng ilang tiwaling opisyal ang pondong ilalaan sa ating mga kababayan.

Mahalagang matiyak na ligtas sa mga korap ang pondo para mga biktima ni ‘Yolanda’, dahil na rin sa resulta ng survey sa mga negosyante na naniniwala na lumalala ang katiwalian sa gobyerno noong 2013.

Ngayong 2014, may pagkakataon ang pamahalaan na ipakita sa mga negosyante na mali ang kanilang hinala sa usapin ng katiwalian sa pamahalaan.

Kung magpapatuloy ang kampanya ng pamahalaan laban sa katiwalian alinsunod sa plataporma ng daang matuwid; at sasabayan ng pagpapalakas ng negosyo sa bansa ng mga namumuhunan na makalikha ng maraming trabaho, tiyak na mababawasan din ang isa pang resulta ng survey na nagpapakita na marami pa ang naghihirap at nagugutom na kababayan.

‘Ika nga sa mga kasabihan, bagong simula, bagong pag-asa. Pero higit na mataas ang pag-asa kapag nabigyan ng magandang panimula.
Laging tandaan: “Bata mo ko at Ako ang Spy n’yo.” (mgakurimaw.blogspot.com)

Halimaw sa internet!

                                                           Halimaw sa internet!  
                                                                 Rey Marfil

Kung may halimaw na kinatakutan noon sa banga ang da­ting batang aktres na si Matet sa pelikula, ngayon naman, may tunay na halimaw na dapat katakutan ang mga kabataan na nag­lipana sa internet na hayok sa “laman” ang mga pedophile.

Kamakailan lang, naibalita ang joint Operation Endeavor na isinagawa sa 12 bansa na kinabibilangan ng mga awtoridad ng Pilipinas, Britanya at Australia, at nakasakote ng mga Pinoy at mga dayuhan na sangkot sa child pornography sa internet.

Sa magkakahiwalay na operasyon ng mga awtoridad sa mga bansang nabanggit, 29 katao ang nadakip na kinabibilangan ng 11 Pinoy.
Nailigtas din ang ilang kabataan na edad anim hanggang 15 na ginagamit ng sindikato bilang “model” sa kanilang operasyon sa internet kung saan ang kanilang mga parokyano at mga halimaw na nakatatanda na hayok sa laman ng bata.

Kung tutuusin, hindi na bago na pinagpipiyestahan ng mga dayuhang dayukdok ang ating mga kawawang kabataan.
Noong 1980’s nabisto ang operasyon ng isang dayuhang pedopilya sa Laguna kung saan mistulang naging travel agent ito ng mga katulad niyang nais magpasasa sa katawan ng mga batang Pinoy.

Nang mahuli ang pedopilya, nabisto ang ilang taon na niyang operasyon sa Pilipinas at ang listahan ng mga kabataan at mga hubad na larawan ng mga ito na ginamit na mistulang “menu” na ipinakikita sa kanyang dayuhan ding kliyente para hikayating pumunta sa Laguna at “tikman” ang murang “laman”.

At kasabay ng pag-unlad ng teknolohiya, naging hi-tech na rin ang kabulastugan ng mga halimaw na pedopilya. Kung dati ay mga larawan lang ang kanilang nakikita, ngayon ay maaari na silang makapanood nang “live” sa internet ng mga kabataan na nagtatalik.

Ang kaibahan nga lang ngayon, hindi na nila kailangang pumunta sa Pilipinas para matikman nang “personal” ang inilalakong mga kabataan.
Nagkakasya na lang sila sa panonood via live stream. Maliban na lang siguro kung sobrang hayok ang dayuhan at bumiyahe pa rin sa Pilipinas upang maranasan niya nang “live” ang napanood niya sa internet.

Ang masaklap nito, mula noon sa low-tech na paraan ng pambubugaw sa ating mga kabataan, hanggang ngayon na hi-tech na, nandoon pa rin ang pagkunsinti at pagtutulak ng mga magulang sa kanilang mga anak na pasukin ang malaswang industriya ng child pornography.

***

Gaya noong 1980’s, kahirapan sa buhay ang katwiran ng mga magulang kaya nila ibinubugaw ang kanilang mga sariling anak.
Isama pa ang baluktot nilang paliwanag na hindi gaya noon na personal na nahahawakan ng mga dayuhan ang mga bata, ngayon ay hindi naman at ipinapagawa lang ang kalaswaan sa internet na ire-request ng kanilang kliyente, at malinaw na kita na.

Kung ganito ang katwiran nila, bakit hindi na lang kaya ang mga magulang na ito ang magbuyangyang ng kanilang kaluluwa sa internet?

Bukod sa kawawa naman ang mga biktimang kabataan dahil napagsasamantalahan ang kanilang kamusmusan, nagkakaroon din ito ng masamang imahe sa Pilipinas na sinasabing kasama na ngayon sa top 10 na bansa na matindi ang child pornography.

Baka akalain ng mga hayok na pedopilya na kasama sa isinusulong na kampanya ng Department of Tourism na “It’s More Fun In Philippines” ang mga kabataan natin para pagnasaan nila.

Kaya nararapat ang ibinigay na direktiba ni Pangulong Noynoy “PNoy” Aquino sa mga kinauukulang ahensya na paigtingin pa ang kampanya laban sa problemang ito at kasamang usigin ang sinumang sangkot, kabilang na ang mga protektor at magulang ng mga batang biktima.

Pero dapat bilisan din ng Korte Suprema ang pagresolba sa petisyon kontra sa legalidad ng ipinasang Cyber Crime Law upang maipatupad na ito ng mga awtoridad at mabigyan sila ng karagdagang ngipin na pangkagat sa mga halimaw.
Laging tandaan: “Bata mo ko at Ako ang Spy n’yo.” (mgakurimaw.blogspot.com)

‘Kanser’ ng lipunan

‘Kanser’ ng lipunan

Rey Marfil

“Kanser.” Ganyan kung tawagin ng ilang political observer ang problema ng bansa sa katiwalian.

Dahil matagal nang napabayaan sa sistema ng pamamahala sa mga nagdaang administrasyon, kakailanganin ang matagal na gamutan para ito mapagaling at tuluyang mawala ang “sakit”.

Kamakailan lang ay muling napag-usapan ang problema sa katiwalian dahil sa isang survey na ang mga tinanong o respondents ay mga negosyante. Lumitaw sa survey na batay sa “perception” o “pananaw” ng mga tinanong na business people, lumala daw ang korupsyon sa gobyerno noong nakaraang 2013.

Nakakalungkot ang resulta ng survey kung tutuusin dahil indikasyon ito na dumami na naman ang mga negosyanteng naniniwala na talamak ang katiwalian sa gobyerno kumpara noong 2012. Sa kabila ito ng mga ginagawang pagsisikap ng administrasyong Aquino na mabura ang katiwalian sa bansa at maipamana niya sa sinumang papalit sa kanya sa 2016.

Mula nang maihalal ng kanyang mga “boss” noong May 2010, ilang reporma na ang ipinatupad ng gobyerno ni Pangulong Noynoy ‘PNoy’ Aquino para mailatag ang daang matuwid tungo sa malinis na pamamahala.

Gayunman, sadyang may mga taong nasanay sa bali-balikong daan para makapanggulang sa kapwa at mabusog ang bundat na sikmura kahit sa masamang paraan.

Ngunit alalahanin din na ang resulta ng survey ay batay sa pananaw o persepsyon ng mga tinanong. Maaaring ang tugon nila sa mga itinanong sa survey ay naapektuhan ng anumang pangyayari ng mga sandaling gawing ang survey.

Kumpara noong 2012, mas dumami ang mga negosyante na naniniwala na “mas talamak” ang katiwalian noong 2013. Tandaan natin na ang usapin tungkol sa maanomalyang paggamit umano ng mga mambabatas sa kanilang pork barrel fund o PDAF ay lumabas noong 2013. 

Ang pondo na pinag-uusapan sa naturang kontrobersya ay sumasakop sa mga taong 2007 at 2009, panahon na hindi pa pangulo si PNoy.

***

Bagaman noong 2013 din napag-usapan ang tungkol sa pondo ng pamahalaang Aquino na DAP, nananatili pa rin naman sa Korte Suprema ang usapin tungkol sa legalidad nito.

Bukod diyan, nilinaw na ni DBM Secretary Butch Abad na ang pondo ay ginamit sa mga programa at proyektong makakapagpasigla sa ekonomiya ng bansa.

At sa nagdaang dalawang taon, kinilala ng iba’t ibang international financial institution ang Pilipinas na isa, kung hindi man nangunguna sa Asia na may pinakamasigla at malagong ekonomiya.

Pero gaya ng nakamamatay na sakit na kanser, nakamamatay rin ang kanser ng lipunan na katiwalian. Napupunta sa bulsa ng mga kolokoy na tao sa gobyerno ang pera na dapat sanang magamit sa mga programa at proyekto na mapapakinabangan ng mga tao. At iyan ang nais gamutin ng kasalukuyang administrasyon ni Aquino.

Bilang simula at bahagi ng mahabang gamutan sa kanser na ito ng lipunan, itinalaga ni PNoy ang mga pinaniniwalaan niyang opisyal na makatutulong sa pagsugpo sa katiwalian at hahabol sa mga tiwali sa iba’t ibang ahensya ng gobyerno.

Ipinatupad na ang ilang reporma sa transaksyon ng gobyerno at ginawang mas transparent ang mga datos ng iba’t ibang ahensya sa pamamagitan ng paglalagay ng mga impormasyon sa internet.

Ang mga hakbang na ito ng pamahalaan ni PNoy ay kinikilala naman ng mga negosyante. Kaya nga batay din sa survey, tumaas ang tiwala nila at nagpahayag sila ng kasiyahan sa pamamahala ng kasalukuyang administrasyon.

Ang mahalaga dito, tinatanggap ng Palasyo ang pananaw ng mga negosyante tungkol sa talamak na katiwalian at hindi binabalewala. Ang pagtanggap ay isang hakbang upang lalo pang pag-ibayuhin ng pamahalaan ang gamutan sa kanser ng lipunan. 

Marahil kailangan pang tapangan ang gamot na ginagamit para masugpo ang virus na patuloy na nakapipinsala sa katawan ng lipunan.

Sa harap ng laban ito, hindi dapat mawalan ng pag-asa ang mga Pinoy na gagaling ang lipunan sa malalang kanser na ito. Ang importante, patuloy na nilalabanan ang gobyernong Aquino ang katiwalian at wala sa bokabolaryo nito ang kasabihang, “If you can’t defeat them, join them.”

Laging tandaan: “Bata mo ko at Ako ang Spy n’yo.” (mgakurimaw.blogspot.com)

Tuloy ang paglilinis!

Tuloy ang paglilinis!

Rey Marfil

Kailangang suportahan natin ang panawagan ni Pangulong Noynoy “PNoy” Aquino na manatili ang mga Filipino sa kanyang matuwid na daan at tulungang makamit ang iba pang mga reporma sa nalalabing panahon ng kanyang administrasyon.

Tama ang Pangulo sa pagsasabing malapit nang mawala ang nalalabing katiwalian sa pamahalaan sa ilalim ng kanyang malinis na pamumuno.

Katulad sa basketball, nasa krusyal na huling dalawang minuto ang kampanya ni PNoy sa malinis na pamamahala at hindi na kailangang mag-aksaya pa ng panahon upang makamit ang tagumpay ng maraming mga Pilipino.

Dahil sa tulong ng malinis na pamamahala, susulong ang bansa na papakinabangan ng nakakarami.

Talaga naman kasing importante ang suporta ng sambayanang Pilipino sa mga programa ni Pangulong Aquino.

Kung mananatili ang maraming mga tao sa kampanya ni Pangulong Aquino, siguradong magandang pamana sa susunod na henerasyon ang kanilang maiiwan.

Ngayong taon, nagawa ng maraming Pilipino na malampasan ang maraming pagsubok, kabilang ang serye ng mga kalamidad.

At maganda ring marinig sa Pangulo na malapit nang mailatag ang hustisya kaugnay sa kontrobersyal na paglustay ng Priority Development Assistance Fund (PDAF) o pork barrel.

Isa pang magandang balita ang bunga ng mga foreign trip ni PNoy, malinaw ang P334.16 bilyong pamumuhunan at mahigit sa 43,000 trabaho sapul noong 2010.

Maganda rin ang pahayag ni Presidential Communications Operations Office (PCOO) Secretary Herminio ‘Sonny’ Coloma Jr. na hindi kasama rito ang pakinabang sa lumakas na samahan ng Pilipinas at ibang mga bansa.

Nakatulong rin ang pagbisita upang matugunan ng Pilipinas ang mga obligasyon nito sa internasyunal na komunidad.

Bahagi ang Pilipinas ng internasyunal na grupo na Asia-Pacific Economic Cooperation (APEC), Association of Southeast Asian Nations (ASEAN), at United Nations (UN).

Umaabot sa 66 project commitments mayroon ang Pilipinas sa 55 banyagang mga kompanya na kinatatampukan ng P611 bilyong pamumuhunan at mga pangako mula sa China, Japan, United States at United Kingdom na maaaring magresulta sa 100,000 trabaho.

Sa 66 na project commitments, 16 dito ang nakumpleto na habang 16 iba pa ang ipinapatupad.

***

Napag-usapan ang good news, umabot na sa kabuuang 537 Filipinos na nasa Shumaisi Facility ang napauwi na sa Pilipinas, isang patotoo na ginagawa lahat ng pamahalaan ang lahat ng makakaya nito upang matulungan ang laban ng problemadong overseas Filipino workers (OFWs).

Bahagi ang 537 ng 644 Filipinos na nanatili sa pasilidad matapos maproseso bago matapos ang Nobyembre 3 na palugit para sa “correction period” na iniutos ni Custodian of the Two Holy Mosques King Abdullah bin Abdul Aziz.

Dapat nating papurihan ang mga opisyal at staff ng Philippine Consulate General sa Jeddah, kabilang ang ating Labor and Social Service Attaches sa pagtulong sa ating mga konsulado sa pagkakaloob ng tulong sa ating naipit na mga kababayan sa Jeddah at maging sa iba pang rehiyon ng Kingdom.

Noong Disyembre 16, may kabuuang 257 ang bumalik ng Pilipinas, sakay ng Special Saudi Airlines Flight SV3874, kabilang ang 195 kababaihan, 59 bata at tatlong kalalakihan.

Nakaraang Disyembre 17 ng gabi, 186 namang kababaihan at 94 na mga bata o kabuuang 280 ang sumunod naman sakay ng special Saudi Airlines SV 3876.

Sa ngayon, ito ang pinakamalaking bilang ng undocumented Filipinos na napauwi sa loob lamang ng isang araw nitong 2013.

Laging tandaan: “Bata mo ko at Ako ang Spy n’yo.” (mgakurimaw.blogspot.com)

Masigasig!

Masigasig!

Rey Marfil

Tiniyak ng Malacañang na nakahanda na ang pondo at mga plano sa pagharap sa posibleng mga kalamidad na ­tatama sa bansa sa 2014, as in nag-plano na ang iba’t ibang ahensya ng pamahalaan, partikular ang Department of Budget and Management (DBM) para matiyak ang magandang responde ng pamahalaan sa posibleng mga delubyong darating sa bansa.

Nangangahulugan na ginagawa talaga ni Pangulong Noynoy ‘PNoy’ Aquino ang lahat para matiyak na nakahanda ang bansa sa lahat ng posibneg dumating na mga kalamidad.

Kitang-kita naman ang pagiging abala ni PNoy at kanyang gabinete sa nakalipas na mga linggo para sa rehabilitasyon ng mga lugar na sinalanta ng bagyong Yolanda.

Matatandaang iniwan ni Yolanda ang mahigit sa 6,100-kataong patay nang bayuhin nito ang Visayas at Southern Luzon noong nakalipas na Nobyembre. At masigasig na ipinapatupad ng pamahalaan ang programa sa rehabilitasyon para sa naapektuhang mga lugar.

At pinatunayan ng mataas na “performance rating” ni PNoy base sa resulta ng Fourth Quarter 2013 Social Wea­ther Station (SWS) survey ang patuloy nitong malinis na pamamahala at matinding determinasyon na harapin ang serye ng mga kalamidad sa bansa.

Isinagawa ang 4th quarter survey mula Disyembre 11 hanggang 16 sa pamamagitan ng face-to-face interviews sa 1,550 adults.

Ayon sa resulta ng SWS survey, nailagay ang net satisfaction score ni PNoy sa “good” na +49 kung saan 69% ang nagsabing nasisiyahan sila sa performance ng Punong Ehekutibo habang 21% naman ang nagsabing hindi.

Halos walang pinagbago ang mga resulta sa parehong survey noong nakalipas na tatlong buwan. Dahil sa magandang resulta, naitala ni PNoy ang score nito sa kanyang performance sa buong taon sa “very good” na +55.

Mas mataas ito kumpara sa 2011 at 2012 na average na halos katulad rin naman na “very good” +53. Naitala ng Pa­ngulo ang “very good” na +62 sa unang taon nito sa kapangyarihan noong 2010.

Dahil dito, asahan na natin na lalong magpupursige si PNoy at kanyang mga gabinete na isulong pa ang mga programa na kabilang sa prayoridad ng kanyang pamahalaan sa ilalim ng Philippine Development Plan anuman ang maging resulta ng susunod na surveys.

Maganda ring marinig ang pagbibigay diin ni PNoy na gagawin ng kanyang pamahalaan ang lahat alang-alang sa mga tao at sa bansa para makamit ang kanilang mga p­angarap para sa mas magandang kinabukasan.

***

Napag-uusapan ang good news, magandang marinig ang pagkakaroon ng 1.3 milyong bakanteng trabaho sa online jobs and skills matching portal ng pamahalaan upang magsilbing gabay upang makakuha ng hanapbuhay ang maraming Filipino.

Iniulat ni Labor Sec. Rosalinda Baldoz na umabot sa 1,384,728 ang bakanteng trabaho mula Enero hanggang Nobyembre 2013 dahil sa paglahok ng maraming pribadong kumpanya sa Phil-JobNet system o ang opisyal na online job at skill matching portal ng pamahalaan.

Tumaas ng 21.8 porsiyento ang bakante sa trabaho na nailabas noong 2013 kumpara sa 1,137,551 na bukas na trabaho na nailata sa parehong panahon noong 2012.

Ngunit, sinabi ng Bureau of Labor and Employment (BLE) ng Department of Labor and Employment (DOLE) sa tulong ng Phil-JobNet na maliit na 203,639 lamang katao ang sumubok.

Makakabuti rin para sa mga aplikante na hasain pa ang kanilang kasanayan at kaalaman sa trabaho dahil sa ma­raming oportunidad na lumalabas.

Karaniwan sa mga trabaho ang nasa serbisyo, konstruksyon, turismo at maging ang Information Technology and Communications (ICT), partikular sa Business Process Outsourcing (BPO).

Laging tandaan: “Bata mo ko at Ako ang Spy n’yo.” (mgakurimaw.blogspot.com)

Kulang sa “D”!

Kulang sa “D”!

REY MARFIL

Sa dinaluhang inagurasyon ng bagong traffic management system ng Metropolitan Manila Development Authority, may mahalagang mensahe si Pangulong Noynoy ‘PNoy’ Aquino sa publiko paglabas nila ng tahanan -- sundin ang patakaran at panuntunan sa kalye, maging motorista ka man o tumatawid sa kalsada.

Sa unang araw pa lang ng panunungkulan ni PNoy matapos siyang ihalal ng kanyang mga boss na mamamayang Pilipino, nagpakita na ng magandang halimbawa ang Pa­ngulo sa kalsada -- “walang wang-wang”.

Marami ang nanibago at humanga sa ipinakitang halimbawa ni PNoy. Saan ka nga naman makakakita ng convoy ng pinakamakapangyarihang tao sa Pilipinas na tumiti­gil sa “red” light at hindi gumagamit ng “sirena”? Kaya naman may pagkakataon na naiipit siya sa trapiko gaya ng kanyang mga “boss”.

Sa tingin ng marami, “OK” ang ipinakitang halimbawa ni PNoy laban sa mga “utak wang-wang”. Kung tutuusin, para saan pa ang “wang-wang” sa tinatahak nating tuwid na daan? Sa iba naman, parang “OA” ang hindi paggamit ng sirena at paghinto sa red light ng convoy ng Pangulo. Maaari kasing malagay sa peligro ang kanyang buhay sa bawat hindi niya paggamit ng sirena o wang-wang sa kalsada.

Pero desidido si PNoy na ituloy ang anti-wang-wang mentality para mahiya naman ang mga kababayan natin na abusado sa kalye at walang pakialam sa iba -- mga moto­ristang sumi­sirena na parang nabili nila ang kalsada, mga tsuper na naka­balagbag sa kalye para magsakay at magbaba ng pasahero, at mga pedestrian o tumatawid sa ‘di tamang tawiran at para pang namamasyal sa Luneta.

Ang lahat ng ito ay nakasentro sa isang salita na nagsi­simula sa letrang “D”, as in disiplina.

***

Kung paiiralin lang natin ang disiplina sa bawat isa sa lahat ng oras, sa lahat ng lugar, sa lahat ng pagkakataon, aba’y baka hindi na natin kailangan ang pulis at MMDA. Ano pa gagawin ng pulis kung wala naman silang huhulihin dahil sumusunod sa batas ang mga tao?

Ano pa ang gagawin ng mga tauhan ng MMDA kung nagbi­bigayan naman ang mga motorista kahit pa mabigat ang daloy ng trapiko? Hindi gaya ngayon, may traffic light pero hindi sinusunod. May traffic signs pero hindi pinapansin.

Mahalaga ang disiplina sa lahat ng bagay para umasenso ang bansa. Kailangan ang disiplina sa sarili para maiwasan ang mga bisyo at tukso na maaaring maging daan para gumawa tayo ng masama tulad ng pagnanakaw at pananakit sa kapwa.

Magiging maayos ang transaksyon sa gobyerno at pribadong sektor kung may disiplina sa trabaho ang mga kawani at pati na ang mga nangangailangan ng serbisyo.

Hindi ba napakagandang tingnan kung maayos na nakapila ang mga sumasakay sa mga public transport sa halip na nag-uunahan at nagbabalyahan dahil gusto lang makauna?

At nakakainit ng ulo, kung ikaw ang may disiplinang nakahilera sa mahabang linya ng mga sasakyan dahil trapik at bigla ka na lang makakakita ng motoristang humaharurot at nauna sa‘yo dahil hindi sumunod sa tamang linya ng trapiko.

Ano pa kaya ang maitatawag mo sa motorista na nasa likod ng sasakyan mo at binubusinahan ka para umandar gayung nakikita naman niya na nakapula ang traffic light? Aba’y gusto ka pang itulad sa katulad niyang balasubas sa daan at siya pa ang may ganang magalit kapag hindi mo pinagbigyan.

Walang puwang sa bansang tumatahak sa tuwid na daan ang mga utak wang-wang. Tandaan na ang taong may disiplina, may kaakibat na isa pang mahalagang “D,” dangal.

Laging tandaan: “Bata mo ko at Ako ang Spy n’yo.” (mgakurimaw.blogspot.com)

Expected ‘yun!

Expected ‘yun!

REY MARFIL

Mahigit dalawang taon pa bago ang May 2016 presidential election; at habang abala ang pamahalaang Aquino sa paghahanap ng paraan para maibalik sa normal ang pamumuhay ng sinalanta ni ‘Yolanda’, may ilan naman na tila gigil nang mapag-usapan o kaya naman ay kulang sa pansin at nais na mapag-usapan.

Nitong mga nagdaang linggo o bago sumapit ang Pasko, may mga humihirit na alang-alang sa diwa ng Pasko ay dapat dalawin daw ni Pangulong Noynoy “PNoy” Aquino sa kanyang “detensyon” si dating Pangulong Gloria Macapagal-Arroyo.

Ngunit bago ang mga pang-uurot na “dalaw”, may mga humihirit pa na dapat daw payagan ni PNoy si Mrs. Arroyo na makalabas ng “hospital arrest” nito sa Veterans Memorial Medical Center (VMMC), dahil pa rin daw sa diwa ng Pasko.

Pero kung tutuusin, wala naman sa kapangyarihan ni PNoy na palabasin ng VMMC si Mrs. Arroyo at sa halip ay nasa desisyon na iyon ng Sandiganbayan na dumidinig sa kanyang mga kaso kabilang na ang pandarambong sa pera ng bayan.

At sa pagsapit nga ng Pasko, ilang kilalang personalidad ang bumisita kay Mrs. Arroyo sa VMMC katulad nina da­ting Pangulong Fidel Ramos at Joseph Estrada, dating presidential candidate Eddie Villanueva, at retired Archbishop Oscar Cruz. Pero hindi si PNoy.

Bakit hindi dapat bisitahin ni PNoy si Mrs. Arroyo sa Veterans hospital gayung dati naman itong lider ng bansa? Bakit sina FVR at Erap eh bumisita kay Mrs. Arroyo, bakit si PNoy hindi?

Maliban sa simpleng paliwanag ng Malacañang na hindi prayoridad ngayon ni PNoy ang bisitahin si Mrs. Arroyo dahil marami ang higit na dapat bigyan ng prayoridad gaya ng pagbangon ng mga kababayan nating sinalanta ng bagyong ‘Yolanda’, dapat ding alalahanin na may nakabinbin kasong isinampa ang pamahalaan laban sa dating pangulo.

***

Hindi biro ang mga kasong isinampa ng gobyernong Aquino laban kay Mrs. Arroyo dahil mga kasong katiwalian ito tulad ng umano’y paggamit ng pondo ng Philippine Cha­rity Sweepstakes Office at Malampaya funds, at iba pa.

Kung bibisita si PNoy kay Mrs. Arroyo, tiyak na mahahaluan ito ng pulitika at gagana ang imahinasyon ni “Kulas” para gumawa ng kung anu-anong “espekulasyon”.

Gaya na lang ng pagbisita nina FVR at Erap na kaagad binigyan ng espekulasyon tungkol sa umano’y “alyansa” kasama si Mrs. Arroyo para sa 2016 upang sumuporta sa kanilang mamanukin. Tinawag pang “Triple Ex” ang posibleng alyansa, na bagaman magandang pakinggan pero may pagkamahalay din sa kabilang banda… parang “XXX” rated.

Idagdag pa ang pagpunta ni Arch. Cruz na dating kritiko ni Mrs. Arroyo pero ngayon ay tila “friends” na sila. Kasi naman, ang “un-friend” ngayon ng dating arsobispo ay si PNoy. Kaya’t ang tanong ng mga kurimaw: Bakit ba mainit ang ulo niya sa mga nakaupong presidente?

Pero sabi daw ni Arch. Cruz sa lumabas na mga ulat sa media, ang mga banat daw niya noon kay Mrs. Arroyo ay hindi naman daw “personal”. Aba’y “propesyunal” pa lang kritiko ang dating arsobispo, maliban kung nagiging makakalimutin dahil epekto ng pagkaka-edad nito?

Buweno, isipin na lang natin kung bibisitahin ni PNoy si Mrs. Arroyo at nagkaroon ng desisyon ang korte na payagan siyang mai-house arrest, ‘di lilitaw pa ang “ekspek ni Kulas ‘yon” na may kinalaman ang Palasyo sa desisyon.

Hindi lang ‘yan, papaano kung sakali na maglabas ng desisyon ang korte at napawalang-sala si Mrs. Arroyo, eh ‘di iisipin din na baka bahagi iyon ng napag-usapan sa pagbisita sa kanya ni PNoy.

Seryoso ang mga kasong nakasampa laban kay Mrs. Arroyo na nakabinbin na sa Sandiganbayan. Kung hindi ba naman seryoso, ‘di sana’y pinayagan na siyang makapagpiyansa ng korte para sa pansamantala niyang kalayaan.

Madaling mag-isip at maghinala na ginagawang “scapegoat” ni PNoy si Mrs. Arroyo. Pero hindi maaalis ang katotohanan na may kasong nakabinbin sa korte laban kay Arroyo, at tanging korte lamang ang may hurisdiksyon sa kaso at hindi na ang Palasyo.

Iba na ang sistema sa “daang matuwid”, kung saan malaya at independiyente na sa paggawa ng desisyon ang mga institusyon tulad ng hudikatura. Hindi gaya noon sa “baluktot na daan” na nababoy ang lahat ng institusyon at pinakikialaman ng nasa kapangyarihan kaya malayang magagawa ang mga kalokohan.

Laging tandaan: “Bata mo ko at Ako ang Spy n’yo.” (mgakurimaw.blogspot.com)

Kumilos ang LGUs

Kumilos ang LGUs

REY MARFIL

Hindi sa lahat ng pagkakataon ay kailangang mag­pasa ng batas ang Kongreso at pambansang pamahalaan para matugunan ang ilang problema sa bansa. May mga usapin na maaaring tugunan ng lokal na pamahalaan tulad ng disgrasya sa mga paputok.

Nakalulungkot na sa kabila ng mahigpit na kampanya ng gobyerno sa pangunguna ng Philippine National Police (PNP) at Department of Health (DOH) laban sa paggamit ng paputok at baril, marami pa rin ang nabiktima ng paputok at ligaw na bala.

Ang masaklap, pahirapan ang paghahanap ng hustisya sa mga naging biktima na hangad lang na maging masaya sa pagsalubong sa Bagong Taon. Sino ba ang papapanagutin sa mga nasabugan at naputulan ng mga daliri at kamay? Papaano maibabalik ang buhay ng mga batang tinamaan ng ligaw na bala?

Sa listahan ng DOH at PNP, mahigit 900-katao ang biktima ng paputok at 30 naman sa ligaw na bala sa pagsalubong sa 2014. Mas marami ito kumpara sa pagsalubong sa 2013.

Dahil dito, muling nabuhay ang panawagan na lumikha ng batas ang Kongreso para ipagbawal na ang paggawa at pagbebenta ng paputok sa bansa. Bagay na hindi naman sinasang-ayunan ng ilang mambabatas dahil mahirap daw ipatigil ang matagal ng tradisyon.

Sa halip na ipagbawal, dapat daw na higpitan pa ang re­gulasyon sa paggawa, pagbebenta at paggamit ng paputok. Sa usapin ng pagpapaputok ng baril, may ipatutupad nang bagong sistema ang PNP sa pagmamay-ari ng baril.

***

Kung tutuusin, sapat na ang kasalukuyang batas tungkol sa regulasyon ng paputok, ang kailangan lang ay lubos na implementasyon ng mga kinauukulang ahensya, lokal na pamahalaan at mga barangay.

Anong silbi ng batas kung hindi naipapatupad?

Gaya ng paputok na piccolo na ipinagbabawal pero pa­tuloy na naibebenta. Hindi dapat gamiting katwiran na may bumi­bili kaya may nagbebenta. Ang dapat na mentalidad, walang mabibili dahil wala nang nagbebenta dahil takot silang mahuli.

Tandaan natin na noon ay may paputok na pambata na kung tawagin ay watusi. Pero dahil dumami ang mga batang nalalason dito, ipinagbawal ito hanggang sa tuluyang ma­wala. Bakit hindi ito magawa sa piccolo na isa sa mga pangunahing paputok na nakadisgrasya ngayon sa mga bata?

Bukod diyan, ang Davao City ay ilang taon nang may pinatutupad na firecracker ban kaya naman mabibilang lang sa daliri ang nadidisgrasya sa kanila sa paputok kung mayroon man. Ang maganda pa rito, mayroon ding nahuhuli at napaparusahan na ilang pasaway at hindi sumusunod sa kanilang alkalde.

Marahil, kung sadyang may malasakit ang lokal na mga opisyal at barangay, kusa na silang kikilos para magdeklara ng sarili nilang ban sa paputok, o kung hindi man, magpatupad ng mahigpit na kampanya laban sa mga iligal na paputok.

Hindi tamang mag-isip na “malaki na kayo kaya bahala na kayo sa buhay niyo” kung gusto niyong magpaputok ng mga iligal na paputok. Bukod kasi sa pinsala sa katawan, maaari ring makapinsala sa ari-arian ang mga paputok kapag pinagmulan ng sunog.

Malaki rin ang maitutulong ng lokal na pamahalaan sa pulisya sa kampanya laban sa pagpapaputok ng baril. Batid ng mga barangay kung sino sa kanilang lugar ang mga siga na may baril at mahilig mag-display ng armas o magpaputok.

Hindi pa naman huli ang lahat. Marami pang taon ang sasalubungin ng mga Pinoy at marami pang Pinoy na maililigtas kung kikilos ang mga dapat kumilos, at sumunod ang dapat sumunod. Marami ng buhay ang nasayang, huwag na sanang madagdagan. 

Laging tandaan: “Bata mo ko at Ako ang Spy n’yo.” (mgakurimaw.blogspot.com)

Buhay na buhay ang pag-asa sa 2014

Buhay na buhay ang pag-asa sa 2014

REY MARFIL Kahit pinutakte tayo ng mga kamalasan ngayong 2013, hindi pa rin nawawala ang tibay ng mga Pilipino at punung-puno tayo ng pag-asang haharapin ang bagong sikat ng liwanag sa 2014. Hindi biro ang mga kalamidad na tumama sa atin nga­yong taon na nakaapekto sa milyun-milyon nating mga kababayan. Pero sa kabila nito, naniniwala pa rin ang marami sa atin na mas magiging mabuti ang 2014 sa ating bansa. Batay na rin kasi sa pinakahuling survey ng Social Weather Station na ginawa nitong December 11 hanggang 16, nasa 94% ng mga tinanong ang nagpahayag na buo ang kanilang pag-asa sa susunod na taon. Mataas pa ito sa 92% na naitala noong 2012 nang tanungin ang mga respondents sa kanilang tingin sa 2013. Kung hindi nga lang marahil sa mga naganap na kalamidad sa ating bansa, talaga naman sanang maganda ang 2013. Bukod kasi sa patuloy ang paglago ng ating ekonomiya, patuloy ding binabantayan ng administrasyong Aquino ang pondo ng bayan. Bagaman umalingasaw ang eskandalo sa pagwawaldas sa pondo ng PDAF, nakita naman na karamihan dito ay nangyari noong nagdaang liderato at ngayon na nabibisto. Bunga nito, tuluyang naglaho sa taunang pondo ang kontrobersyal na pork barrel ng mga mambabatas na matagal nang pinaghihinalaan na ugat ng katiwalian. Kaisa ng mga mamamayan na tumitingin sa mas magandang 2014 si Pangulong Noynoy ‘PNoy’ Aquino. Puno man kasi tayo ng mga pagsubok ngayong 2013, naipakita naman natin ang pagiging matibay at pagmamalasakit natin sa ating mga kababayan. *** Hindi lang iyon, nakita natin kung papano tayo pagmalasakitan ng buong mundo. Umapaw ang tulong mula sa iba’t ibang bansa para sa mga naging biktima ng bagyong Yolanda. At kung pagbabatayan ang pagtanaw ng iba’t ibang pandaigdigang sangay tungkol sa pananalapi gaya ng Asian Development Bank, may katwiran para maging buhay ang pag-asa nating mga Pinoy sa susunod na taon. Bakit hindi, kahit kinabayo tayo ng kalamidad at mga eskandalo ng katiwalian, nananatiling mataas ang kanilang ekspektasyon sa paglago ng ating ekonomiya. Kinikilala pa rin nila ang Pilipinas na kabilang sa mga bansa sa Asya na magpapatuloy ang sigla ng ekonomiya. Ang patuloy din na tiwala ng mga Pilipino sa liderato ni PNoy ay tiyak na makakatulong para patuloy niyang maigiya ang bansa sa tuwid na daan -- isang legacy na iiwanan ni PNoy sa pagtatapos ng termino nito sa 2016 at nawa’y sundan ng magiging kapalit nito. Sa kabila kasi ng mga mahahalagang desisyon na ginawa niya ngayong taon at mga ibinatong puna mula sa kanyang mga kritiko, lumitaw pa rin sa survey ng SWS na higit na marami pa rin ang nasisiyahan sa kanyang mga ginagawa. Malamang sira ang taon ng mga kritiko ni PNoy sa pagta­tapos ng 2013 at marahil panay ang buntong-hininga habang sinasalubong ang Bagong Taon, aba’y hindi nangyari ang inaasahan nila na marami ang hindi matutuwa sa trabaho ng gobyerno bunga ng isyu ng pork barrel at pagkilos sa mga kalamidad. Pero dahil mulat na ang publiko at mayroon ng internet para makita at malaman talaga ang totoo, nananatiling nasa likod ng Pangulo ang suporta ng kanyang mga “boss”. Sa pag-iwan natin sa 2013, kasama na sana nating iwan ang inggit at galit lalo pa’t hindi naman kandidato si PNoy sa 2016, as in walang rason ang mga nagkukunyaring taga-oposisyon para pag-initan at pagdudahan ang bawat aksyon lalo pa’t kapakanan ng nakakarami ang pangunahing interes nito, maliban kung sadyang “utak-talangka” ang mga kritiko? Laging tandaan: “Bata mo ko at Ako ang Spy n’yo.” (mgakurimaw.blogspot.com

Buhay ang pag-asa!

Buhay ang pag-asa!

REY MARFIL Sa marami nating kababayan lalo na doon sa mga nakaranas ng matinding pagsubok sa buhay bunga ng mga trahedya gaya ng lindol, baha at karahasan, malamang na iniisip nila na sadyang malas yata talaga ang numero “13”. At sa pagtatapos ng 2013, bagong pag-asa ang sasalubungin nating lahat sa taong 2014. Sa taong ito ng 2013, minsan pang nasubok ang katatagan ng mga Pilipino, at ng administrasyon ni Pangulong Noynoy “PNoy” Aquino. Sa kabilang banda ng mga problema, muli namang nangibabaw ang pagmamalasakit natin sa isa’t isa. Nalaman din natin na hindi lang sa ating mga kababayan tayo puwedeng sumandal, kundi maging sa ating mga ka-planeta sa mundo. Bumuhos ang tulong at pakikiramay mula sa iba’t ibang bansa para sa mga sinalanta ng bagyong “Yolanda”. Mantakin n’yo, pati ang mga sikat na personalidad sa mundo ay gumawa ng kani-kanilang paraan para makatulong. Ang mga ordinaryong mamamayan sa iba’t ibang panig ng mundo, naghandog ng munti nilang makakaya para sa mga taong hindi naman nila kalahi. Ang katatagan ng ating mga kababayan na harapin ang pinakamabigat na krisis sa kanilang buhay, hinangaan ng marami, maging ng mga lider ng iba’t ibang bansa at mga kilalang tao. Ang ipinakitang pagmamalasakit ng mundo sa mga Pilipino ay mistulang kamay na bumubuhat at umaalalay sa atin para bumangon sa pagkakabagsak. Dahil “hilo” pa tayo sa mga binitiwang banat ni “Yolanda”, malaking bagay na may aalalay sa atin para makaupo man lang para mahimasmasan. Kapag kaya na natin, e ‘di tuluy-tuloy na tayo sa pagtayong muli at handa na namang sumabak sa laban sa kalamidad. Pero kung iisipin, ano na lang kaya ang mangyayari sa bansa natin kung kinakabayo tayo ng kalamidad at pagkatapos ay bagsak pa ang ekonomiya? Mabuti na lang at nagawa ni PNoy na mapatatag ang ekonomiya ng bansa sa tatlong taon ng kanyang panunungkulan. *** At dahil nasa maayos ang estado ng pananalapi ng bansa at matatag din ang larangan ng ating pulitika at pamamahala, kahit papaano ay naging mabilis ang pagkilos ng mga kinauukulang ahensya para maisaayos ng paunti-unti ang pamumuhay ng mga taong naapektuhan ng mga kalamidad. Marahil ang matatag na kalagayan ng ekonomiya at maayos na gobyerno ang ilan sa mga dahilan kaya nananatiling puno ng pag-asa ang marami sa ating kababayan sa 2014. Marami ang naniniwala na mas magiging maganda ang ating ekonomiya sa susunod na taon. Katunayan, sa kabila ng mga trahedya, ipinapalagay ng mga ekonomista na mananatili pa rin sa 7% ang econo­mic growth ng ating bansa sa pagtatapos ng taon. At maganda pa rin ang nakikita nilang takbo ng ekonomiya ng bansa ma­ging sa susunod na taon. Bakit nga naman hindi, sa laki ng pondong gugugulin para sa rehabilitasyon ng mga sinalantang lugar ng lindol, bagyo, at kaguluhan, asahan na lilikha ito ng napakaraming trabaho dahil sa itatayong mga bahay, gusali, kalsada at iba pang mga istruktura. Bukod pa diyan, matitiyak din natin na ang lahat ng pondong laan sa rehabilitasyon ay magagamit ng wasto kaya itinalaga ni PNoy bilang rehabilitation czar ang hindi makukurap na si dating Sen. Ping Lacson na kailanma’y hindi nasilaw sa pork barrel.  Sa gagawing pagbangon ng mga kababayan nating sinalanta ng kalamidad, mapapatunayan din natin ang kasabihan na may bagong bukas sa kabila ng kalamidad lalo pa’t parehong walang hilig sa pera sina PNoy at Ping, nangangahulugang bawat sentimong donasyon o bahagi ng rehabilitasyon, ito’y mabibilang. Laging tandaan: “Bata mo ko at Ako ang Spy n’yo.” (mgakurimaw.blogspot.com)