Kiyaw-kiyaw!

REY MARFIL

Ginagawang malaking isyu ng iba ang pangako ng Bangko Sentral ng Pilipinas (BSP) na magpahiram sa International Monetary Fund (IMF) ng $1 bilyon na ipagagamit sa mga bansa sa Europa na hilahod ngayon ang ekonomiya.

Tingin ng iba, partikular ang mga hindi makapag-move on sa resulta noong 2010 presidential election at nag-aambisyong matawag na “Your Honor” sa Kongreso, nagpapasikat ang Pilipinas sa gagawin nitong pagpapautang ng $1 bilyon (tinatayang P45 bilyon) na kukunin sa dollar reserve ng bansa.

Meron pang mga litanyang -- bakit ipapautang sa ibang bansa ang pera at hindi na lang gamitin sa pagresolba ng mga problema natin gaya ng kakulangan sa classrooms. Kung hindi natin alam ang laman ng istoryang ito, madali tayong mapapasang-­ayon sa mga kritisismo bilang isang mamamayan na nagmamalasakit sa ating sariling bansa.

Subalit sa totoo lang, meron mas malalim na dahilan o rason ang BSP kaya dapat gawin ang pagpapautang.

Paliwanag ni BSP Gov. Diwa Gunigundo, noon pang 2006 nakawala ang Pilipinas sa pag-utang sa IMF.

Tama po, kung dati’y nangungutang ang Pilipinas, nabayaran na natin ang mga atraso at tayo’y puwede nang magpautang -- isang bagay na positibong indikasyon na bumubuti na ang takbo ng ekonomiya ng bansa.

Ang $1 bilyon na ipapahiram ng Pilipinas sa misyon sa ins­titusyon ng IMF pupunta at hindi sa isang partikular na bansa sa Europa. Ibig sabihin, ang IMF din ang magbabayad sa Pilipinas ng ipapautang natin.

Bukod dito, hindi lang tayo ang pagkukunan ng IMF na ipauutang sa Europa, mayroon pang ibang bansa na mag-aambag ng pondo at ‘di hamak mas malaki pa ang ipinahiram.

***

Napag-usapan ang pagpapaluwal ng pera ni Pangulong Noynoy “PNoy” Aquino -- kung tutuusin, napakaliit ng $1 bilyon na ipauutang natin kumpara sa iba pa nating kapitbahay sa Asya na nagbibigay din ng pautang sa IMF gaya ng China, Japan at Singapore.

Bukod dito, ang dolyares na ipapautang natin sa IMF -- ito’y “reserba” nating dolyar at hindi nakahalo sa karaniwang pondo ng gobyerno na ginagamit sa mga proyekto, programa at panggastos ng gobyerno taun-taon, as in hindi rin pwedeng gastusin dahil tinatawag ngayong “reserba”, kabaliktaran sa media spin ng mga matatakaw sa camera.

Ibig sabihin, ang dolyares na reserba ay matutulog lang sa vault kapag hindi ginamit; kaya mas mabuting ipahiram upang tumubo at lumago -- at maging kita. Ni sa panaginip, ayaw isipin ng mga kurimaw na sadyang marami lamang ang umaastang henyo gayong “bopols” sa arithmetic o numero?

Huwag sana nating kalimutan na minsa’y nangutang din tayo sa IMF dahil hilahod ang ating ekonomiya. At saan naman manggagaling ang ipinautang sa atin ng IMF kundi doon sa mga bansa na maganda ang ekonomiya.

Hindi natin alam, pero malay natin na baka kasama roon ang mga bansa sa Europa na nagpapautang din sa IMF, na siya namang ipinahiram sa atin. Kaya’t hindi natin dapat hayaan na tuluyang bumagsak ang ekonomiya ng Europa dahil malaki ang magiging epekto nito sa Pilipinas.

Tulad sa United States, marami tayong kababayang Pinoy na nagtatrabaho sa Europa, as in maraming kalakalan sa import at export na ginagawa ang ating bansa sa mga bansa na nasa Europa. Isipin na lang natin ang magiging epekto kung tuluyang maging bangkarote ang mga bansa rito.

Tiyak na dadami ang mga Pinoy na mawawalan ng trabaho at mapipilitang umuwi sa Pilipinas. Hindi lang ‘yan, meron negosyong nasa Pilipinas na matitigil at magiging dahilan din ng pagsasara.

Sa maikling explanation, ang pagtulong sa Europa ay pagtulong din sa ating mga kababayan doon at mga panga­ngalaga sa kalakalan at diplomatikong ugnayan.

Madaling maghusga kung hindi natin alam ang puno’t dulo ng kuwento. Madaling maghanap ng paraan para bumatikos, pero tila nahihiya namang pumuri kung may posibong nagagawa.

Kaya’t bu­mabalik sa alaala ang kuwento ni PNoy tungkol sa “Pilipinong alima­ngo” -- ito’y hindi makakatakas sa timba dahil maghihilahan pababa!

Hindi pagpapasikat ang tawag sa pagtulong sa bansang nanga­ngailangan, ang tawag doon, pagmamalasakit.

At tayong mga Pilipino, kahit anong hirap ang ating pinagdadaanan ay kilalang matulungin sa ating kapwa, maliban kung “utak-talangka”?

Laging tandaan: “Bata n’yo ko at Ako ang Spy n’yo.” (mgakurimaw.blogspot.com)

Maraming nabago!

REY MARFIL Positibong bagay sa inilulunsad na reporma sa sistema ng edukasyon ang pagkakasama ng limang (5) unibersidad sa hanay ng 300 nangungunang unibersidad sa buong Asya base sa pananaliksik ng international research organization na Quacquarelli Symonds Intelligence Unit (QSIU). Nangunguna pa ring pinakamahusay na unibersidad sa Pilipinas ang University of the Philippines (UP) sa Diliman, Quezon City na nasa ika-68th spot na sinundan ng ika-86th spot ng Ateneo de Manila University (ADMU) habang 142nd naman ang De La Salle University (DLSU) at 148th ang University of Santo Tomas (UST). At sa kauna-unahang pagkakataon, pumasok ang University of Southeastern Philippines (USEP) sa Davao City bagama’t hindi ito nabigyan ng partikular na ranggo, isang patunay kung gaano kahusay ang mga unibersidad sa Pilipinas. Sa pahayag ng QSIU, ibinase ang ranggo ng mga uni­bersidad sa mga sumusunod: 30% para sa academic re­putation, 30% sa mga papeles ng bawat faculty at citations per paper, 20% ng faculty-student ratio, 10% ng employer reputation, at 10% halaga ng international faculty, estud­yante at inbound at outbound exchange students. Magandang sorpresa ang pagkakasama sa listahan ng USEP at patunay na talagang umaangat ang kalidad ng edukasyon sa bansa lalo na sa hanay ng mahigit sa 110 state universities and colleges (SUCs). Bagama’t hindi ikinokonsidera ng Commission on Higher Education (CHED) na panukat ang resulta ng pana­naliksik ng QSIU sa pagdetermina ng kalidad ng edukas­yon sa bansa, nangangahulugan pa rin ito ng magandang balita sa repormang isinusulong ng administrasyong Aquino. *** Napag-usapan ang good news, produkto ng magandang repormang ipinapatupad ni Pangulong Noynoy “PNoy” Aquino ang pagkilala sa Pilipinas bilang isa sa limang (5) bansa sa mundo na nagkaroon ng magandang pagbabago para sa taunang ulat ng 2012 Global Peace Index (GPI) kaugnay sa pagsusulong ng kapayapaan. Inilalagay sa ranggo ng Institute for Economics and Peace (IEP), nangangasiwa ng GPI, ang 158-nasyon sa usapin ng pagkakaroon ng mabuting pagbabago sa paglaban sa panloob at panlabas na problema, pagtiyak ng kaligtasan at pagresolba sa internasyunal na iringan at militarisasyon. Sa ika-anim na taon, sinukat ng GPI ang antas ng kaligtasan at seguridad sa lipunan at lawak ng magagandang mga nagawa sa pagharap sa panloob at panlabas na mga suliranin -- ito’y sinukat base sa antas ng ginagastos ng bansa para sa militar at antas ng paggalang sa karapatang-pantao. Sinukat din ang kakayahan ng bansa sa pagdetermina ng kapayapaan, kabilang ang antas ng demokrasya at transparency, edukasyon at iba pang mabubuting kata­ngian ng isang nasyon. Dahil sa magandang mga nangyayari sa Pilipinas, uma­ngat ang bansa sa ika-133 rank ngayong taon mula sa ika-135th  noong 2011 base sa pagtataya ng IEP sa GPI 2012. Tinukoy ng IEP ang tagumpay ng bansa sa apat na mga bagay na kinabibilangan ng pagbaba sa homicide rate, bilang ng kamatayan dahil sa panloob na iringan, marahas na demonstrasyon at insidente ng terorismo. Naunang iniulat ng Philippine National Police (PNP) na 24% ang ibinaba sa antas ng krimen noong 2011 kumpara noong 2010. Nakita rin ng PNP ang pagbaba ng kabuuang antas ng krimen sa 16.77% sa unang tatlong (3) buwan ng 2012 kumpara sa parehong panahon noong nakalipas na taon. Makatwirang papurihan ang masigasig na trabahong ginagawa ng administrasyong Aquino sa pagsusulong ng mga reporma sa ilalim ng matuwid na daan na kampanya. Laging tandaan: “Bata n’yo ko at Ako ang Spy n’yo.” (mgakurimaw.blogspot.com)

Una ang mahirap!

REY MARFIL Napakagandang balita ang ulat ng Department of Labor and Employment (DOLE) kaugnay sa pagbaba ng bilang ng mga taong walang trabaho sa buong bansa. Ipinapakita lamang ng resulta ng April 2012 Labor Force Survey (LFS) na bumaba sa 2.8 milyon ang mga walang trabaho mula sa 2.87 milyon sa parehong panahon ng nakaraang taon. Inaasahan natin ang pagbaba ng mga taong walang trabaho dahil sa paglakas ng ekonomiya at inaasa­han natin na nangangahulugan ito ng mas maraming trabaho. Dapat ding isipin na mas mataas ang bilang ng walang mga trabaho sa panahon ng Abril lalo’t maraming mga nagsisipagtapos sa mga eskuwelahan ang nasasama sa hanay ng mga naghahanap ng trabaho. Nakatulong din ang pinalaking halaga ng paggugol ng pampublikong pondo ng pamahalaan at emergency employment program para bawasan ang bilang ng walang mga trabaho. Malinaw ang ebidensya sa patuloy na pagsulong ng ekonomiya ng ating bansa -- isang patotoo ang paglago ng 6.4% sa unang tatlong buwan ng taon, maliban kung mutain ang mga kritiko ni Pangulong Noynoy “PNoy” Aquino kaya’t hindi makita ang numerong ito. *** Napag-usapan ang good news, walang kaduda-duda ang paninindigan ni PNoy sa kanyang pangako na isulong ang pamamahagi ng lupa sa mga benepisyaryo sa buong bansa. Sa katunayan, inaprubahan ng Pangulo matapos ang pulong sa mga magsasaka ang pagbuo sa multi-sectoral organization na pangunahing trabaho ang bantayan ang pamamahagi ng lupa hanggang Hunyo 2014 at matiyak ang tagumpay nito. Sa pagtatatag ng “multi-stakeholders mechanism”, layunin nitong ipatupad nang buo ang Comprehensive Agrarian Reform Program Extension with Reforms (CARPer) bago ito mapaso sa darating na 2014 -- ito’y mabungang pagpupulong na magkaroon ng lupa ang mga magsasaka. Bubuuin ang lupon ng mga kinatawan mula sa Department of Agrarian Reform (DAR) at maging ang mga alagad ng simbahan at iba’t ibang organisasyon ng mga tao. Magandang balita rin na marinig na masusing babantayan ni PNoy ang pagkakaloob ng “support servi­ces” sa mga benepisyunaryo at pagbibigay ng pondo para maging matagumpay ang pagpapayaman sa mga ipapamahaging mga lupain. Laging tandaan: “Bata n’yo ko at Ako ang Spy n’yo.” (mgakurimaw.blogspot.com)

2 vs 1 sa CCT!

REY MARFIL Mahigit dalawang (2) milyong mahihirap na pamilya na may mga batang nag-aaral sa elementarya ang nakikinabang nga­yon sa conditional cash transfer (CCT) program ng pamahalaan. Dalawang (2) ibon sa isang putok kung titingnan ang layunin ng programa. Una, ang mabigyan ng pinansiyal na ayuda ang mga mahihirap para makatawid ng kanilang pagkain; at ikalawa, ang mapanatili sa loob ng paaralan ang mga bata. Isa sa rekisitos ng programa -- ang obligahin ang magulang na panatilihin na nag-aaral ang kanilang mga anak para makinabang sila sa programang ito na nilaanan ngayon ng halos P40 bilyon sa 2012 budget. Hindi katulad ng nagdaang administrasyon nang ipinatupad ang ganitong programa, sa ilalim ng administrasyong Aquino -- lubos na transparent ang implimentasyon at nasalang mabuti ang mga benepisyaryo para matiyak na talagang mahihirap ang mga nakikinabang. Nakakalungkot lamang na ang isang matinong programa’y sasakyan ng ibang pulitikong kritikal sa administrasyong ­Aquino dahil kaalyado sila ng nakaraang rehimen na inaakusahang nagwaldas ng pondo ng bayan. Take note: hindi ba’t nagsawa sa kaiimbestiga ang Upper House sa dami ng eskandalo? Gaya na lamang ng ilang kritiko na naghahangad na mapunta sa mas mataas na posisyon sa susunod na eleksyon, ipinatiti­gil ang implementasyon ng CCT program dahil sa hindi naman daw nabawasan ang mga mahihirap at nagugutom. Ang tanong ng mga kurimaw: meron bang maialok na alternatibong solus­yon ang mga nagmamagaling na ito, hindi ba’t wala? Ang spin ng mga kritiko ni Pangulong Noynoy “PNoy” Aquino -- may mga mahihirap na tamad daw ang nakikinabang sa programa dahil tumatanggap ang mga ito ng pera mula sa gobyerno nang walang hirap. Bakit hindi raw ilaan ang pondo sa scholarship program? Kung tutuusin, masakit na paratang sa mga mahihirap na akusahang “tamad” dahil “walang tamad na Pinoy”! Nagkakataon lamang na walang oportunidad sa kanilang lugar para makapagtrabaho ang mga ito. Kaya naman gumagawa ng hakbang ang gobyerno na kahit papaano’y maibsan ang kanilang hirap at maipagpatuloy ng mga bata ang kanilang pag-aaral. *** Napag-usapan ang CCT, sabihin man natin na marami pa rin ang naghihirap at nagugutom kahit pa ipinatutupad ang CCT program, isipin na lang natin kung wala ang programang ito. Hindi ba’t mas marami pa ang magugutom at maghihirap? Hindi lang iyon, matitigil din sa pag-aaral ang mga bata -- ito ba’y kayang pag-aralin ng mga umaastang “henyo” para uma­ngat ang popularidad. Hindi rin marahil batid ng ilang senatoriables na mayroong hiwalay na programa ang pamahalaan para sa scholarship ng mga mahihirap na mag-aaral sa kolehiyo sa ilalim din ng Pantawid Pamilyang Pilipino Program, na nakalinya rin sa CCT. Ang mga naglalabasang survey tungkol sa self-rated ­poverty at hunger ang ginagamit na basehan ng mga katulad ng ilang kritiko ng gobyerno para atakihin ang mga programa ng pamahalaan. Subalit kung sisilipin, mapupuna na nagkakaroon ng pagtaas sa bilang ng mga naghihirap at nagugutom sa mga lugar na kaunti lang ang benepisyaryo ng CCT program. Kung kahirapan at gutom ang pag-uusapan, hindi lang naman kawalan ng trabaho ang posibleng dahilan nito, nandiyan ang kalamidad na maaaring puminsala sa kanilang kabuhayan. Kaya naman dapat gawin ng pamahalaan na lawakan o dagdagan pa ng gobyerno ang makikinabang sa CCT program kung kailangan. At kung kailangang dagdagan ang pondo ay dapat lang naman na gawin. Pero higit sa lahat, ang mas dapat bigyan ng pansin dito’y ang kakayahan na ngayon ng pamahalaan na magkaloob ng pinansiyal na tulong sa mga mahihirap nating kababayan dahil na rin sa magandang pamamahala ng kasalukuyang gobyerno. At ang pagtitiwala ng mga tao na ang pondong gugugulin sa makabuluhang programa -- ito’y hindi mapupunta sa bulsa ng iilan, katulad ng nangyari sa nakaraang administrasyon na kaal­yado ng mga nag-iingay kontra CCT. Laging tandaan: “Bata n’yo ko at Ako ang Spy n’yo.” (mgakurimaw.blogspot.com)

Hinangaan!

REY MARFIL Sa naging pagbisita ni Pangulong Noynoy “PNoy” Aquino sa United Kingdom of Great Britain at Northern Ireland at United States (US) -- ito’y nakakuha ng $2.5 bilyon o P100 bilyong pamumuhunan na lalo pang magpapaangat sa ating ekonomiya, isang paunang good news ang 6.4% paglago sa first quarter ng taong kasalukuyan. Nakakuha si PNoy ng isang bilyong dolyar ($1 B) na pamumuhunan sa Rolls Royce kasama ang Cebu Pacific, Asea Gaz Asia LTD/Aboitiz Equity Ventures Gas at Pa­sar/Glencore.  Plano ng Pasar/Glencore na maglagak ng 500 hanggang 600 milyong dolyar sa pagpapalawak ng “smelting capacity” at pagbuo ng power plant para suportahan ang kanilang operasyon na makakalikha ng 700 bagong trabaho. Sa nilagdaang isang memorandum of understanding ng Rolls Royce at Cebu Pacific, magkakaroon ng $280-mil­yong pamumuhunan ang Cebu Pacific sa Rolls Royce para sa bagong Trent 700 engines sa nirentahang walong Airbus aircraft na gagamitin sa paglulunsad ng “long haul ope­rations” sa huling anim na buwan ng 2013. Lumagda rin ang Aboitiz Equity Ventures at Gaz Asia Ltd. sa kasunduan para sa $150 milyong pamumuhunan sa paglikha ng Asea Gaz Corporation ng mga planta upang ga­wing liquid bio methane ang organic waste materials upang magamit na gasolina sa sasakyan. Nakipagkita rin si PNoy sa matataas na mga opisyal ng Shell at Nestle para sa potensyal na karagdagang pamumuhunan sa bansa.  Sa US, ipinaalam ng mga opisyal ng GN Power Mari­veles Coal Plant (GMCP) kay Pangulong Benigno Aquino III ang kanilang intensyon na palawakin ang kanilang operasyon sa Pilipinas sa pamamagitan ng pamumuhunan na nagkakahalaga ng halos $1 bilyon. Sa kanyang pagdalaw sa Washington, nakipagkita si PNoy kay Dan Chalmers, chief executive officer ng GN Power; Jason Oliver, senior vice president for development ng Sithe Global Power; at Robert Warburton ng Denham Capital. Sa kanilang pulong, ipinaalam ng mga ito sa Pa­ngulo ang pagpapalawak ng coal plant sa Bataan na makakapagbigay ng mga trabaho sa mga Filipino. Ipinahayag din ni Chalmers ang suporta nito sa malinis at matinong pamamahala ng Pangulo na nagresulta sa mga tagumpay ng bansa tungo sa tamang direksyon. Tunay na mabunga at mapagpala ang naging trabaho ni PNoy sa pagpunta sa ibang mga bansa upang manatili at mapalakas pa ang 6.4% paglago ng gross domestic product (GDP) ng bansa sa unang tatlong buwan ng taon. *** Napag-usapan ang good news, kapuri-puri ang maigting na kampanya ni PNoy sa paglaban at pagsugpo ng katiwalian sa pamahalaan gamit ang “daang matuwid” na naging pangako nito sa nakalipas na presidential campaign matapos bumilib maging ang mga opisyal ng United Kingdom at United States. Mismong sina UK Prime Minister David Cameron, Duke of York Prince Andrew at US President Barack Obama ang nagpahayag ng kahanga-hangang pagpuri kung papaano nagkaroon ng makatotohanang mga reporma sa Pilipinas sa pagpasok ng bagong pamahalaan. Pinuri rin ng UK ang Pilipinas sa hakbang nitong isulong ang usapang-pangkapayapaan sa mga rebeldeng grupo at pagkakaroon ng mataas na paglago sa ekonomiya ng bansa. Sinabi rin ng Pangulo na nagpahayag ng suporta ang da­lawang bansa sa pagpapaigting pa nito ng kampanya laban sa katiwalian. Kung hindi dahil sa malinis na pamamahala ni Pangulong Aquino, hindi tayo makikinabang sa benepisyong hatid ng magandang ekonomiya at pagkakapantay-pantay ng hustisya sa bansa. Laging tandaan: “Bata n’yo ko at Ako ang Spy n’yo.” (mgakurimaw.blogspot.com)

Epekto ng biyahe!

REY MARFIL Malaking tagumpay sa ngalan ng seguridad ng bansa ang pagbisita ni Pangulong Noynoy “PNoy” Aquino sa United Kingdom of Great Britain at Northern Ireland at United States. Kahit hindi humingi ng suporta upang hindi naman mairita ang China kung hihingi tayo ng saklolo, mismong si British Prime Minister David Cameron ang nagpaha­yag ng simpatya sa bansa kaugnay sa tensyong dulot ng bangayan sa teritoryo sa Panatag (Scarborough) Shoal sa isinagawang bilateral meeting nito kay PNoy. Nagmula kay Cameron ang inisyatibo na talakayin ang isyu sa pakikipag-usap nito kay PNoy na umayong tama ang inisyal na kasunduan ng Pilipinas at China na alisin ang kani-kanilang mga sasakyang-pandagat sa tensyonadong teritoryo base sa kanilang pinagsamang pahayag na inilabas sa media. Kailangang mapanatili ang malaya at ligtas na pagdaan ng mga barko sa West Philippine Sea na isang malaking konsiderasyon na dapat itinataguyod ng lahat ng bansa sa mundo dahil kritikal ang ruta sa larangan ng negosyo at pamumuhunan. Nagkasundo rin ang dalawang lider na resolbahin at labanan ang nagbabagong klima, transnational crime at terorismo, human trafficking at child exploitation, armas nukleyar, at pagmintina sa pandaigdigang kapayapaan at kaligtasan. *** Napag-usapan ang working visit -- sa US, tiniyak naman ni Pangulong Barack Obama kay PNoy ang suporta ng kanyang pamahalaan sa layunin ng bansa na mabuo ang malakas na pagdepensa nito sa teritoryo, isang patotoo na makabuluhan ang bawat pakikipagtalamitan ni PNoy sa mga dayuhang lider. Sa pinagsamang pahayag sa pagtatapos ng tatlong araw na pagbisita sa Washington, kapwa sinabi ng da­lawang lider ang kanilang paninindigan sa pagsusulong ng katatagan at kapayapaan sa rehiyong Asya-Pasipiko at Philippine-US Mutual Defense Treaty (MDT). Hindi lamang usaping militar at ekonomikal ang tinalakay sa kanilang pulong kundi maging ang mga isyung pang-rehiyon katulad ng pagtiyak ng malakas na internasyunal na pamantayan sa usapin ng agawan sa teritoryo at pagpapanatili ng malakas na kooperasyon ng US sa Pilipinas at China. Sa joint statement nina PNoy at Barack, iginiit ng dalawang (2) lider ang kahalagahan ng prinsipyo ng malayang paglalayag, respeto sa internasyunal na mga batas, at hindi mapipigilan, ngunit umaayon sa batas na komersyo. Nagkasundo rin ang US at Pilipinas na palawakin ang kanilang bigayan ng mahahalagang impormasyon at koo­perasyon sa pagtiyak ng seguridad sa katubigan. Bagama’t hindi binanggit ng US ang eksaktong ayudang ipagkakaloob nito sa bansa sa usaping militar para mapalakas ang depensa nito, malinaw na suportado ang Pilipinas ng US. Hindi lang ‘yan, naging mabunga rin ang pagbisita ni PNoy sa United Kingdom of Great Britain at Northern Ireland at United States (US) matapos makakuha ng $2.5 bilyon o P100 bilyong pamumuhunan na makakatulong upang lalong sumulong ang ekonomiya ng bansa na nakapagtala ng 6.4% paglago sa unang tatlong (3) buwan ng 2012. Laging tandaan: “Bata n’yo ko at Ako ang Spy n’yo.” (mgakurimaw.blogspot.com)

Binalanse ni PNoy!

REY MARFIL Masamang balita ang sumalubong sa mga Pinoy ng nakaraang Lunes nang matalo sa kontrobersyal na laban ang ating Pambansang Kamao na si Manny Pacquiao laban kay Timothy Bradley via split decision subalit hindi maitatangging si Pangulong Noynoy “PNoy” Aquino ang bumalanse at nagbitbit ng “good news” mula Amerika at Englatera. Sa sobrang sama ng loob ng marami, marahil ay hindi nila napansin ang baon na magandang balita ni PNoy mula sa kanyang official trip sa United Kingdom at Amerika na higit kapaki-pakinabang sa nakakaraming Filipino kaysa sa panalo ng isang nilalang na tanging siya lamang ang makikinabang. Madaling-araw nitong Linggo nang dumating ang Pangulo mula sa huling leg ng kanyang biyahe sa Amerika. Kaya naman na-timing ang kanyang pag-uwi sa inaabangang laban nina Manny at Bradley nito ring umaga ng Linggo (oras sa Pilipinas). Sa kasamaang-palad, nabigo si Manny at napunta ang kanyang titulo sa wala pang talo at mas batang si Bradley. Paniwala ng marami, dapat si Manny ang nanalo dahil mas matitindi ang suntok na pinakawalan niya kay Bradley. Katunayan, may mga round na muntikan na yatang bibigay ang dayuhang mandirigma. Pero ang masaklap na katotohanan, nanatiling nakatayo si Bradley at higit na naging agresibo laban kay Pacman sa huling tatlong round. At resulta, uuwing walang bitbit na korona si Pacquiao. Masama talagang balita ang nangyari sa ating pambatong boksingero, gayunman, may good news pa rin naman tayong dapat ngitian sa pag-uwi ni PNoy na bitbit ang mga pamumuhunan mula sa UK at US na tinatayang aabot sa US$2.5-bilyon. Ang dagdag na puhuna’y nangangahulugan ng dagdag na negosyo at dagdag na trabaho sa ating mga kababayan. Hindi rin biro ang suportang ibinigay ni PNoy sa Department of Tourism sa ginawa nitong kampanya sa UK upang i-promote ang turismo ng Pilipinas. Sa mismong pagdalo ng Pangulo sa naturang kampanya, asahan na madagdagan ang mga Briton na bibisita sa ating bansa, mas maraming turista, mas buhay ang turismo, mas maraming trabaho sa ating mga kababayan. *** Napag-usapan ang foreign trip,  ilan sa mga kumpanyang nangakong maglalagak ng negosyo sa Pilipinas ang mga dambuhalang Rolls Royce, Asea Gaz Asia Ltd. at ang Glencore, ang may-ari ng Philippine Associated Smelting and Refining Corp. (Pasar) -- ito’y dambuhalang kumpanya sa UK. Habang sa US, bukod sa pagpapanatili at pagpapalakas ng diplomatikong ugnayan ng dalawang bansa, nangakong maglalagak naman ng negosyo sa Pilipinas ang GN Po­wer Limited, na magtatayo ng dalawang 300-megawatt coal plants sa Bataan. Isama pa ang Underwriters Laboratories Inc., Citigroup at USAid. Pero siyempre, ibang usapan din ang paghaharap at pagpupulong mismo nina PNoy at US President Barack Obama. Sa panahon ngayon na may naninindak na malaking “mama” sa Pilipinas, mahalagang may “malaki” rin tayong kakampi na nasa likod natin sa sandaling may gawing hindi kaiga-igaya ang ibang nasyon. Gaya ng pangako noon ni Aquino, limitado at pili lamang ang kanyang mga biyahe. Nais niyang tiyakin na may mahihitang kapalit na maganda ang gagastusin ng bayan sa kanyang mga biyahe -- mga biyaheng may katuturan at hindi katulad ng mga nagdaang pangulo na biyaheng pamamasyal lamang. Sa kanyang biyahe sa UK at US, asahan na may dara­ting na mga bagong negosyo sa Pilipinas na lilikha ng dagdag na mga trabaho na solusyon sa isa sa mga problema ng bansa sa kahirapan at kawalan ng trabaho. Ang mahalaga, hindi nagbabago ang dedikasyon ng Pa­ngulo na hanapan ng lunas ang mga problema ng bansa at mag-uwi ng mga magandang balita kahit hindi ito lubos na napapansin ng marami sa atin. Laging tandaan: “Bata n’yo ko at Ako ang Spy n’yo.” (mgakurimaw.blogspot.com)

Ang buko!

REY MARFIL Panibagong magandang balita na naman ang “blockbuster” na pagluluwas sa ibayong-dagat ng coconut water o buko juice na sumikad nang husto matapos bumisita si Pangulong Noynoy “PNoy” Aquino sa Estados Unidos ng nakaraang taon para sa promosyon nito bilang mabilis na nangungunang healthy at energy juice. Sa US, nakipagkita si PNoy sa mga negosyante doon na naglagay pa ng “coconut water processing” sa Camarines Sur bilang isa sa mga pangunahing hakbang para maisulong ang interes at kagalingan ng mga magsasaka ng niyog. Sa pahayag ng Philippine Coconut Authority (PCA), nakakatuwang marinig na umangat ng 260.55% ang pagluluwas ng sabaw ng buko o $1.32 milyon sa unang tatlong buwan ng 2012. Sinabi ni PCA Administrator Euclides Forbes na nakapagbenta ang Pilipinas ng 4.49 milyong litro ng buko juice sa unang tatlong buwan o 300% ang pagtaas mula sa 1.12-milyong litro na naibenta sa parehong panahon noong nakalipas na taon. Ayon kay Forbes, mahihigitan ng pigura sa dami ng maibebentang buko juice ngayong taon ang kabuuang 16.68-milyong litro na nailuwas noong 2011. Nanganga­hulugan ito ng $15.11 milyong benta. *** Napag-usapan ang buko, katulad ng nakaraang taon, pangunahing merkado ng buko juice ang US. Tumaas ng 426.75%, as in $3.94 milyon ang benta ng buko juice sa US sa unang tatlong (3) buwan ng taon. Ibig sabihin, bumili ang mga Amerikano ng 3.72 mil­yong litro ng buko juice sa bansa sa first quarter ng 2012 na malayo kung ikukumpara sa 796,887 litro noong 2011 -- ito’y napakalaking pag-angat sa importasyon ng buko. Hindi lang ‘yan, maganda rin ang pagbebenta ng buko juice ng bansa sa Netherlands na bumili ng 189,800 litro sa unang tatlong buwan ng 2012 kumpara sa 32,000 noong nakalipas na taon, at Australia na nakapagrehistro ng 362.55% ang pagtaas matapos maitala ang 652,919 litrong konsumo. Dahil sa determinasyon ni PNoy na mapalago ang ekonomiya ng bansa lalung-lalo na sa pagtulong sa mga magsasaka ng niyog, naging popular na energy drink sa ibang bansa ang buko juice dahil na rin sa natural na kalidad nito at kakulangan ng chemical preservatives na pawang mabuti sa kalusugan. Mayaman ang buko juice sa potassium at magnesium, at nagtataglay ng maraming vitamin B na nakaka­tulong sa pagpapalakas ng muscles, pampatagal na ta­maan ng pagod at pagmintina ng normal na tibok ng puso. Kinikilala rin ang buko juice na mainam na pinagmumulan ng electrolytes at glucose na mayroong tinatawag na intravenous rehydration. Talagang mabuti ito sa kalusugan at epektibong panlaban para gamutin ang mga bato sa kidney. Kailangan lamang natin ngayon na magtanim pa nang magtanim ng mga puno ng niyog para kayanin ng bansa na maibigay ang lumalaking pangangailangan sa mga produkto ng niyog. Sa ganitong bagay, agresibo ang administrasyong Aquino sa pamamagitan ng PCA sa pagpapatupad ng mga progra­ma para palitan ang matatandang mga puno at maging mas “fertile” ang taniman ng niyog. Laging tandaan: “Bata n’yo ko at Ako ang Spy n’yo.” (mgakurimaw.blogspot.com)

Inaani ngayon!

REY MARFIL Muli nating inaani ang matuwid na daan ni Pangulong Noynoy “PNoy” Aquino matapos lumago nang husto ang ekonomiya ng bansa na sinusukat base sa gross domestic product (GDP). Umasenso ng 6.4% ang ekonomiya ng bansa sa unang tatlong buwan ng taon na ikinukonsiderang pinakamataas sa Timog Silangang Asya at pangalawa sa buong Asya kasunod ng 8.1% ng China. Ang tanong ng mga kurimaw, ito ba’y matatanggap ng mga kritiko ni PNoy? Sa paglago ng ekonomiya, nakapagtala lamang ang Singapore ng 1.6%; Thailand, 0.3%; Malaysia, 4.7%; Vietnam, 4%; Indonesia, 6.3%; South Korea, 2.8%; at Japan, 2.8% -- isang patunay na hindi nagkamali ang mayorya sa botong ipinagkatiwala kay PNoy. Base sa pahayag ng National Economic and Deve­lopment Authority (NEDA), nangangahulugan ang paglago sa ekonomiya ng bansa sa unang tatlong (3) buwan ng 1.101 milyong karagdagang trabaho na nasa industriya ng serbisyo ang karamihan. Dahil sa magandang diskarte ng pamahalaang Aquino, nakapagtala rin ng 1.15 milyong banyagang turista na dumating sa bansa habang umangat ng 5.4% ang remittances ng overseas Filipino workers (OFWs) na umabot ng $4.84 bilyon, ‘di hamak na malayo sa nagdaang siyam (9) na taon. *** Napag-usapan ang paglago ng ekonomiya, walang dudang magpapatuloy sa buong taon ang magandang takbo ng ekonomiya ng bansa dahil sa masigasig na pagsusumikap ng administrasyong Aquino sa promosyon ng transparency at makatotohanang reporma sa pamamagitan ng malinis na pamamahala para lalong mahikayat ang mga mamumuhunan na magnegosyo sa bansa. Malinaw na kayang-kayang makuha ang lima (5) hanggang anim (6) na porsyentong target na paglago sa ekonomiya ng bansa sa pagtatapos ng taon kung maayos at makatwiran ang paggasta ng pondo. Lumago ang ekonomiya dahil na rin sa mataas, ngunit matalinong paggugol ng pamahalaan sa pampublikong pondo, mataas na konsumo ng pamil­yang Filipino, pagbawi ng kita sa pagluluwas ng mga produkto, at pagtaas ng pamumuhunan ng pribadong sektor. Sinuportahan ang pagtaas sa pamumuhunan ng mababang interest rates at maliit na inflation rate na nakatulong upang maging reasonable ang bank loans at production inputs. Noong huling bahagi ng 2011, inihayag ng pamahalaan ang P72-bilyong stimulus package upang bawasan ang masamang epekto sa ekonomiya ng krisis na nangyayari sa Europa -- ito’y hindi kaila sa mga “ex-housemates” na nagpalubog sa utang ng gobyerno. Dapat tayong magpasalamat sa malakas na political will ni Pangulong Aquino sa pagsusulong ng mga pagbabago at reporma na pinakikinabangan ngayon ng mga Filipino. Laging tandaan: “Bata n’yo ko at Ako ang Spy n’yo.” (mgakurimaw.blogspot.com)

Tumibay pa!

Rey Marfil Lalong tumibay ang kampanya ni Pangulong Noynoy Aquino kontra kahirapan matapos aprubahan ng Asian ­Development Bank (ADB) ang pagpapalabas sa P480 milyon para sa lalawigan ng Albay. Gagamitin ang pondong ipalalabas ng ADB sa Albay para sa implementasyon ng Kapit-Bisig Laban sa Kahirapan-Comprehensive at Integrated Delivery of Social Services (KALAHI-CIDSS) na programa. Take note: 6.4% ang naitalang economic growth kaya’t abot-tenga rin ang ngiti ni Gov. Joey Salceda! Konektado ang programang KALAHI-CIDSS sa ipinapatupad na conditional cash transfer (CCT) program ng Department of Social Welfare and Development (DSWD). Naunang nailabas naman ng pamahalaan ang P318.5 milyon para sa pagpapabuti ng pasilidad ng ospital sa Autonomous Region in Muslim Mindanao (ARMM). Tunay na aktibong napakikinabangan ang matuwid na daan ni Pangulong Aquino para isulong ang interes at kagalingan ng mas hindi pinalad na mga tao sa bansa. *** Napag-usapan ang aksyon ng gobyerno, tama at uma­ayon sa mga batas at Konstitusyon ang inilabas na legal na opinyon ng Civil Service Commission (CSC) na dapat makatotohanang ideklara ng mga pampublikong opisyal at kawani sa kanilang statement of assets, liabilities and net worth (SALN) ang lahat ng kanilang bank accounts kahit nasa peso, dollar o anumang dinominasyon ito. Base sa Republic Act (RA) No. 6713 of 1989 o Code of Conduct and Ethical Standards for Public Officials and Employees, dapat manatili ang pananagutan ng mga tao sa pamahalaan, lalung-lalo na ang pinatalsik na si Chief Justice Renato Corona na humahawak ng sensitibo at ika-apat na pinakamataas na posisyon sa bansa. ‘Ika nga ni Mang Kanor: Mali naman talaga ang pa­nanaw ni Corona sa R.A. No. 6426 of 1974 o ang Foreign Currency Deposit Act of the Philippines na naggagarantiya sa confidentiality ng dollar deposits para lamang palusutin ang hindi nito pagdedeklara sa kanyang SALN ng malaking halaga ng kanyang kayamanan. Kinontra ni Krunimar Antonio Escudero III, acting chief ng Office for Legal Affairs ng CSC, ang maling pananaw ni Corona sa batas lalo’t tiningnan niya ito para palusutin ang kanyang pagtatago ng kayamanan. Iginiit ng opisyal ng CSC ang Article XI, Section 17 ng Saligang Batas ng 1987 na mahigpit na nagtagubilin na “public officer or employee shall, upon assumption of office and as often thereafter as may be required by law, submit a declaration under oath of his assets, liabilities, and net worth.” Nakakahiya ang lihis at baluktot na pananaw ni Corona para lamang makapagpalusot sa matinding pagkakanulo nito sa tiwala ng publiko. Isipin na lamang natin na ipapasok na lamang ng mga magnanakaw na pampublikong mga opisyal sa dollar accounts ang kanilang tagong yaman para lamang maka­lusot katulad ng gustong palabasin ni Corona. Hindi naman ganito ang ibig ipakahulugan ng Foreign Currency Deposit na nagnanais lamang protektahan ang banyagang mga deposito sa lokal na mga bangko. Nakakalungkot at nakakapanghilakbot na ganito ang pananaw ni Corona sa mga batas at Konstitusyon para pagsilbihan ang maling pinaggagawa nito. Laging tandaan: “Bata n’yo ko at Ako ang Spy n’yo.” (mgakurimaw.blogspot.com)

Good choice!

REY MARFIL

Siguradong makakatulong sa pagpapasigla ng ­ekonomiya at pagbibigay ng karagdagang mga trabaho ang pahayag ni Pangulong Noynoy “PNoy” Aquino kaugnay sa paglikha ng P25-bilyong “investment fund” sa pamamagitan ng Government Service Insurance System (GSIS) para sa mga proyektong imprastraktura.

Tatawagin itong Philippine Investment Alliance for ­Infrastructure (PInAI) na makikilala bilang pinakama­laking solong pamumuhunan sa imprastraktura na ilu­lunsad ngayong Hulyo para lalong mapabuti ang kalagayan ng mga imprastraktura sa bansa.

Makikipagtulungan ang GSIS sa Macquarie Group na isang global provider sa pagbabangko na mayroong 70 opisina sa 28 bansa para matiyak ang tagumpay ng proyekto.

Talagang isinusulong ni PNoy ang libre sa katiwaliang mga proyekto para sa kaunlaran ng ekonomiya sa buong bansa sa pamamagitan ng paglikha ng maraming trabaho sa mga Filipino.

Hindi lang ‘yan, namamayagpag din ang matuwid na daan ni PNoy sa larangan ng pagpapataas sa kakayahan ng security forces ng bansa na magkaloob ng mas ­epektibong serbisyo sa publiko.

Nakaraang taon, bumili ang administrasyong ­Aquino ng 144 patrol jeeps, 100 patrol utility vehicles, 182 motorcycle units, 500 assault rifles, 148 40mm na ­grenade launchers, at 57 squad automatic weapons para sa ­Philippine National Police (PNP).

Bukod dito, responsable rin ang pamahalaan sa ­konstruksyon ng 21,800 housing units noong nakaraang taon at karagdagang 31,200 yunit na gagawin ­naman ­ngayong 2012 upang ibalik ang serbisyo ng ating mga kapulisan.

Tunay na positibong resulta ito ng mga ­repormang isinusulong ng liderato ni PNoy.

***

Napag-usapan ang good news, mismong dalawang (2) kasapi ng 11-man House contingent sa Commission on Appointments (CA) ang nagsabing hindi mahihirapan sa kanyang kumpirmasyon ang bagong talagang ambassador ng bansa sa China na si Sonia Brady.

Nangangahulugan na napili ni PNoy ang tamang ­opisyal sa posisyon base na rin sa mahabang karanasan ni Brady sa diplomatic service na maaaring makatulong sa paghahanap ng mapayapang solusyon sa bangayan sa teritoryo sa Scarborough (Panatag) Shoal.

Sinabi nina Valenzuela Rep. Magtanggol “Magi” Gunigundo I at Nueva Ecija Rep. Rodolfo Antonino, pawang mga kasapi ng CA, na magsisilbing pinaka­mabisang depensa ni Brady sa kanyang kumpirmasyon ang malawak na karanasan nito sa banyagang pakiki­pagrelasyon.

Isa pa sa magandang balita dito ang kawalan ng anumang negatibong isyu laban kay Brady kaya’t mabilis makalusot sa CA, as in hindi man lamang nag-init ang ­silyang inupuan nito.

Laging tandaan: “Bata n’yo ko at Ako ang Spy n’yo.” (mgakurimaw.blogspot.com)

Naganap na!

REY MARFIL Nagdesisyon na ang mga senator-judge sa impeachment case ni Supreme Court Chief (SC) Justice Renato Corona. Sa botong 20-3, guilty ang hatol sa Punong Mahistrado dahil sa hindi pagdedeklara ng lahat ng kanyang ari-arian sa isinumite niyang Statement of Assets, Liabi­lities and Networth (SALN). Sa paliwanag ng mga senador sa kanilang boto, kapansin-pansin na ilang ulit nabanggit ang kaso ni Delsa Flores, isang court interpreter na sinibak sa kanyang trabaho noong 1992 ng SC dahil sa hindi niya idineklara sa kanyang SALN ang maliit niyang tindahan. Kung may dapat pasalamatan ang mga naghahangad na maalis sa puwesto si Corona, dapat isama nila rito si Flores dahil sa naging kapalaran niya. Ang pagkakaalis niya sa trabaho sa korte ang naging sukatan ng prosecution panel para sa pagpapatupad ng batas -- nang patas. Kung si Flores nga naman na karaniwang kawani ng korte ay nasibak sa trabaho dahil hindi idineklara ang kanyang tindahan na baka wala pang P1 milyon ang halaga, bakit hindi dapat masibak ang isang mataas na opis­yal ng korte na hindi nagdeklara ng kanyang milyun-mil­yong ari-arian? Sa pinakahuling bahagi ng paglilitis ng Senate Impeachment Court sa kaso ni Corona, inamin mismo ng Punong Mahistrado na hindi niya isinama sa kanyang SALN ang laman ng kanyang dollar accounts na umaabot sa US$2.4 milyon o mahigit P100 milyon. *** Napag-usapan si Corona, bagaman inamin niya at pumirma siya sa waiver para masilip ang kanyang mga bank account, ang malinaw dito ay ang pagtatago niya ng kanyang mga ari-arian. Bilang isa sa pinakamataas na opisyal sa pamahalaan -- pang-lima kasunod ng Pangulo, Bise Presidente, Se­nate President at Speaker of the House -- nararapat lang na buo ang tiwala sa kanya ng taong-bayan. Subalit bukod sa hindi pagdedeklara ng tama sa kanyang SALN, malaking bagay din ang naungkat na sigalot sa pamilya ni Corona at sa pamilya ng kanyang asawa tungkol sa negosyo, as in sinasabing nilamangan ng pamilya ng Punong Mahistrado ang pamilya ng kanyang misis na mga Basa. Kaya naman natanim din sa isipan ng publiko -- na kung nagawang lamangan ni Corona ang pamilya ng kanyang asawa, papaano pa kaya ang taongbayan na hindi niya kaanu-ano? Ang mga alegasyon na ito’y mariing pinabulaanan naman ng Punong Mahistrado. Sa hatol na guilty kay Corona, muling narinig ang pangalan ni Flores na hindi na kailanman nabigyan ng pagkakataon na magsilbi sa gobyerno dahil sa naging parusa sa kanya ng SC. Bilang kawani ng pamahalaan, sag­rado ang paalala na “public service is a public trust”. Sinira raw ni Flores ang tiwala ng taongbayan dahil sa hindi niya pagdedeklara ng kanyang tindahan. Bagay na nararapat ding ipatupad sa kaso ni Corona na hindi nagdeklara ng milyones niyang ari-arian. Kabilang si Flores sa napakaraming Pilipino na natutuwa sa naging hatol ng Senado kay Corona. Sa pagpapa­taw ng guilty verdict, napatunayan ng Senado at pamahalaan na patas na umiiral ang batas sa mga karaniwang empleyado at mataas na pinuno ng ahensiya. Pagpapakita rin ito na patuloy na umuusad ang inilatag na reporma ni Pangulong Noynoy ‘PNoy’ Aquino, tungkol sa matapat na panunungkulan sa tuwid na daan. Mahalaga itong maisakatuparan para sa tunay na pagbabago tungo sa kaunlaran ng bansa. Ang pagpapatalsik kay Corona’y hindi lang tagumpay ng pamahalaan, hindi lang tagumpay ng House prose­cution panel, kung hindi tagumpay ng lahat ng Pilipino na minimithi ang pagbabago at makitang patas na umiiral ang batas para sa mga mahihirap at mayayaman. Laging tandaan: “Bata n’yo ko at Ako ang Spy n’yo”. (mgakurimaw.blogspot.com)