Magtiwala, alisin ang duda

                                                            Magtiwala, alisin ang duda  
                                                                    REY MARFIL


Matapos ang ilang taon na negosasyon, diskusyon, paghimay at pag-aaral sa legalidad, isinumite na ni Pangulong Noynoy “PNoy” Aquino sa Kongreso ang draft ng Framework Agreement para sa aaprubahang Bangsamoro Basic Law (BBL) na pagmumulan ng bagong pag-asa ng kapayapaan sa Mindanao.

Ang pagsusumite ni PNoy ng 122-pahinang BBL sa Kongreso ay pagpapatunay na desidido at tapat ang kasalukuyang pamahalaan at ang Moro Islamic Liberation Front (MILF) na magtulungan upang makamit ng Mindanao ang katahimikan at kaunlaran sa rehiyon.

Pero paglilinaw ni PNoy, ang BBL na magiging daan para malikha ang Bangsamoro entity na papalit sa kasalukuyang Autonomous Region in Muslim Mindanao o ARMM ay para sa lahat ng Pilipino at hindi lang para sa isang partikular na sektor.

Bakit nga naman hindi, kung aasenso ang Mindanao at magkakaroon ng ganap na katahimikan, tiyak na lalakas ang turismo, negosyo at ekonomiya sa rehiyon. Kung wala nang kaguluhan at giyera sa Mindanao, magagamit ng pamahalaan sa ibang proyekto at programa ang pondo na nagagastos sa pagbili ng mga armas at bala na pambomba sa mga rebelde at bandido.

Idagdag pa natin ang malaking gastos din ng pamahalaan sa pagtulong sa mga kababayan natin na lumilikas sa kanilang tahanan at nagtutungo sa mga evacuation centers upang makaiwas sa kaguluhan. Isaalang-alang din natin ang mga buhay na nasasayang at pangarap na mawawasak na idinudulot ng digmaan sa Mindanao.

Sa pamamagitan ng BBL, tutugunan nito ang anumang kakulangan sa ipinasang batas noon na lumikha sa ARMM na hindi ganap na naging susi para umunlad ang rehiyon at makamit ang katahimikan ng mga kababayan natin sa rehiyon.

Hindi naman natin maiiwasan na may ilan na magdududa sa legalidad ng BBL kung naaayon ba ito sa ating Saligang Batas. Iba pa diyan siyempre ang mga sadyang kokontra sa ngayon ng kagustuhan lang na komontra. Mayroon din naman na papalag at nais masabotahe ang layuning ito ni PNoy dahil sa kanilang personal na interes.

Subalit sa usapin ng legalidad o kung naaayon ba sa ating Saligang Batas ang BBL (na una nang tiniyak ni PNoy na walang lalabaging batas ang BBL), hayaan natin na matalakay ito ng ating mga mambabatas habang hinihimay nila ito sa Kongreso. Baka nga umabot pa ito sa Korte Suprema pero ipagdasal na lang natin na maging mabilis ang pagdadaanan nitong proseso dahil hindi na natin dapat pang paghintayin ang katahimikan sa Mindanao.

***

Samantala, dapat namang maging mapagmatyag at maingat ang ating mga kababayan doon sa mga manana­botahe at gagawa ng intriga at magpapakalat ng mga maling impormasyon tungkol sa BBL at bubuuing Bangsamoro entity para maisulong lang ang personal nilang hangarin.

Sa panig ng ating gobyerno, dapat din sigurong pa­kilusin nang husto ang intelligence community nito para maagapan at mapigilan kung sakaling may grupo na maghahasik na naman ng lagim para perwisyuhin ang isinusulong na kasunduan ng pamahalaan at MILF. Hindi na dapat maulit pa ang nangyaring pag-atake ng ilang armadong tagasuporta ni Nur Misuari sa Zamboanga City, na hanggang ngayon ay marami pa rin sa ating mga ino­senteng kababayan ang nagdurusa.

Sakaling maaprubahan ng Kongreso ang BBL bago matapos ang taong ito ng 2014, maganda itong regalo ng mga mambabatas sa ating bansa. Kung hindi naman nila maihabol ngayong taon dahil abala sila sa pagdinig ng 2015 national budget, puwede naman siguro nilang maipasa ang BBL sa unang bahagi ng 2015.

Laging tandaan: “Bata mo ‘ko at Ako ang Spy n’yo”. (Twitter: follow@dspyrey)

Paghahanda sa krisis sa enerhiya

                                                          Paghahanda sa krisis sa enerhiya  
                                                                   REY MARFIL


Sa susunod na taon, pinangangambahan na baka magkaroon ng kakulangan sa suplay ng enerhiya sa bansa na aabot ng 300 hanggang 1,000 megawatts (MW) na makaa­apekto sa mga residente sa Luzon, lalo na sa Metro Manila.

Upang maagapan ito, hihingi sa Kongreso ng kapangyarihan si Pangulong Noynoy “PNoy” Aquino upang mapahintulutan siyang pumasok sa mga kontrata sa po­wer sector upang mapunan ang tinatayang kakulangan sa suplay ng kuryente.

Pero siyempre, baka bumanat na naman ang mga kritiko na tamang duda o tamang hinala na babatikos ­pero walang irerekomendang solusyon sa problema. Baka may magpapasakalye na naman ng kanilang hinala na may mga opisyal lang na gustong kumita sa mga papasuking kontrata.

Malamang na may mga magpalutang din na baka maulit ang nangyari noong panahon ni dating Pangulong Fidel Ramos na nabigyan din noon ng emergency power na pumasok sa mga Independent Power Produ­cers o IPPs para maagapan ang power crisis.

Ang kaso, natapos na ang termino ni Ramos bilang Pangulo ay pinapasan pa ng mga konsumer ang gastos sa mga IPPs na hindi naman nagamit ang enerhiya dahil sa sobra ang pinasok na kontrata.

Pero noon iyon, iba na ang panahon ngayon lalo pa’t ang hihinging karagdagang kapangyarihan ni PNoy ­para matugunan ang nakaambang power crisis ay alinsunod lamang sa itinatakda ng the Electric Power Industry ­Reform Act of 2001 (EPIRA).

Nakasaad sa Section 71 ng EPIRA na, “[u]pon the determination by the President... of an imminent shor­tage of the supply of electricity, Congress may authorize, through a joint resolution, the establishment of additio­nal generating capacity under such terms and conditions as it may approve.”

Bukod sa kilalang masinop si PNoy sa detalye kung ilan lang dapat talaga ang kukuning reserbang power supply, kasama rin ang mga mambabatas sa Senado at Kamara na bubusisi sa usapin ng power supply at contract para lubos na mapag-aralan ang kinakailangan hakbang ng gobyerno.

***

Tandaan natin na nitong nakaraang mga buwan ay sumakit ang kili-kili sa kapapaypay at tumagaktak ang pawis ng marami nating kababayan at mga negosyante sa Mindanao dahil sa nararanasang rotating brownout bu­nga ng kakulangan sa suplay sa kuryente.

Ang inulan ng puna at kritisismo ay ang Department of Energy, pati na ang pamahalaang Aquino dahil sa kawalan daw ng paghahanda at hindi nakita ang paparating na problema. Kaya naman ngayon, naghahanda na ang gobyerno sa kung anuman ang posibleng mangyari sa suplay sa enerhiya sa Luzon sa 2015 kaya sana naman ay wala nang kokontra at magtamang duda.

Ang paghingi ng emergency power ni PNoy sa Kongreso ay bahagi lang naman ng iba pang ginagawang hakbang upang makatipid sa konsumo ng kuryente para maiwasan ang power crisis. Kabilang na dito ang paghikayat sa mga malalaking kumpanya na magtayo ng sarili nilang pagkukunan ng enerhiya sa ilalim ng Interruptible Load Program o ILP.

Mas maganda kung maging ang mga mamamayan ay magsagawa ng pagtitipid sa konsumo ng kuryente lalo na ngayong papalapit na ang malamig na panahon para madagdagan ang reserba nating suplay sa susunod na taon.

Pero anuman ang mangyari, mabuti pa rin na ma­bigyan ng emergency power si PNoy upang paghandaan ang krisis sa enerhiya kung hindi na talaga maiiwasan. Mas mabuti na nandiyan ang reserbang enerhiya na kung hindi man magamit, kaysa naman kung kailan mo kailangan ay walang magamit na reserbang enerhiya dahil hindi napaghandaan ang problema.

Laging tandaan: “Bata mo ‘ko at Ako ang Spy n’yo”. (Twitter: follow@dspyrey)

Para sa mga senior!

                                                                
                                                              Para sa mga senior!  
                                                                    Rey Marfil


Hindi ba’t kapuri-puri ang paglalaan ni Pangulong Noynoy ‘PNoy’ Aquino ng P4.8 bilyon upang pagkalooban ng P500 buwanang allowance ang 739,609 mahihirap na senior citizens sa susunod na taon.

Nalaman natin kay Makati City Rep. Abby Binay na mas malaki ito ng 53.2 porsiyento kumpara sa kasalukuyang taong pondo sa ilalim ng Social Pension for Indigent Senior Filipino Citizens. Nakapaloob ito sa P2.606-trilyong General Appropriations Act (GAA) para sa 2015.

Magandang balita ito dahil lalong inaasahang lalaki ang bilang ng mga matatanda na makikinabang sa programa, kabilang ang mga nasa edad 65 hanggang 76.

Makakatulong ang pondo sa mga matatanda na nakakakuha lamang ng maliit na suporta o talagang wala mula sa kanilang mga kamag-anakan.

Umaayon din ang programa sa mandato ng Saligang Batas ng 1987 at Expanded Senior Citizens Act na pagkalooban ng serbisyo ang mga matatanda.

Sa ngayon, kabilang sa nasa prayoridad para sa P500 buwanang allowance ang seniors na nasa edad 77 pataas at hindi nakakatanggap ng pensiyon alinman sa Social Security System, Government Service Insurance System o anumang retirement fund at mahina, maysakit at walang permanenteng kinikita.

Naglaan din ang pamahalaan ng P3.3 bilyon sa 2015 pambansang badyet para sa pneumococcal vaccination ng 1.4 milyong senior citizens at 429,000 sanggol. Sakop din ng pondo ang bakuna para sa 2.2 milyong mga bata.

Sa ilalim ng 2015 pambansang badyet, maglalaan din ng pondo ang state-run Philippine Health Insurance Corp. sa subsidya sa health insurance ng 15.4 milyong mahihirap na mga pamilya, kabilang ang senior citizens at mga bata.

Hindi pa kasama rito ang regular na 20 porsiyentong diskuwento ng senior citizens sa pagbili ng goods at serbisyo at iba pang benepisyo alinsunod sa Expanded Senior Citizens Act.

***

Sa tulong ng matuwid na pamahalaan ni PNoy nagawa ng Technical Education and Skills Development Authority (TESDA) na maitaas ang bilang ng mga nagsipagtapos ng mga kursong techvoc sa bansa.

Magandang balita ang iniulat ni TESDA director general Joel Villanueva na umabot sa anim na milyon ang mga nakatapos ng techvoc sa nakalipas na apat na taon.

Mula Hulyo 2010 hanggang Hunyo 2014, naiulat ng TESDA ang kabuuang 6,281,328 techvoc graduates. Napakalaki ng naturang datos kumpara sa naitalang 15 milyong techvoc graduates mula 1986 hanggang 2010.

Bukod dito, ibinunyag ni Villanueva na mahigit sa tatlong milyong techvoc graduates ang nakakuha ng mataas na performance alinsunod sa isinagawang assessment.

Nagkaroon kasi ng malaking bilang ng mga nagsipagtapos sa mga kursong techvoc dahil na rin sa malaking pangangailangan sa skilled workers dito at sa ibang bansa.

Iyun naman ang napakaganda dahil agarang nakakakuha ng trabaho ang TESDA graduates at hindi nag­ging istambay. Naitala nga sa 65.3 porsiyento ang employment rate ng techvoc graduates na pinakamalaki sa kasaysayan ng ahensiya.

Pinakamalaki ang employment rate na 91.4 porsiyento sa mga nagsipagtapos ng electronics and semiconductor program habang 70.9 porsiyento ang mga nagtapos ng mga kursong may kinalaman sa information technology-business process management.

Asahan na natin na lalong ipagpapatuloy ni Villanueva ang magandang ginagawa nito alinsunod sa mandato ng TESDA na itaas ang kalidad ng techvoc courses sa bansa.

Paunti-unti, nagawa ni Villanueva na maipakita ang malaking potensiyal ng techvoc courses upang hanapan ng solusyon ang problema sa kawalan ng trabaho. Laging tandaan: “Bata mo ko at Ako ang Spy n’yo”. (Twitter: follow@dspyrey)

Good cops at responsible good netizens

                                                  Good cops at responsible good netizens  
                                                                   REY MARFIL


“Like.” Ito ang dapat nating gawin sa kahanga-hangang nagawa ng netizen na kumuha ng larawan tungkol sa tutukan ng baril sa EDSA. Nang i-upload niya ang larawan sa kanyang social media account, nag-viral o kumalat ito sa internet na ang naging resulta ay pagkakabisto ng isang karima-rimarim na modus-operandi ng mga bugoy na pulis.

Minsan pa, naipakita ng social media at internet ang kabutihang dulot ng modernong teknolohiya kung magagamit nang tama. Hindi iyong gawain ng ibang kurimaw na netizens na panakaw na kumukuha ng larawan sa ilalim ng palda ng babae at ia-upload sa internet o kaya naman ay mga technician na dedekwatin ang sex video ng kliyente nilang nagpagawa lang ng cellphone o laptop at pagkatapos ay ia-upload ang sex video sa internet.

Pero kung may mga buraot o iresponsableng netizens, naniniwala ako na mas marami ang matino at responsable sa paggamit ng kanilang kapangyarihan gamit ang kanilang dalari at armado ng wifi o internet connection.

Isipin ninyo mga ‘tol, kung walang nakakuha ng larawan sa nangyaring iyon ng tutukan ng baril sa EDSA noong nakaraang linggo, aba’y malamang nagha-happy-happy pa sa sauna bath at night club ang mga sinasabing pulis-Quezon City na sangkot sa umano’y hulidap con kidnap. Hindi yata maliit na halaga ang P2 milyon na sinasabing nakuha ng mga suspek sa kanilang biktima.

Para sa mga hindi pa nakakaalam sa nabanggit nating insidente, noong nakaraang linggo ay kumalat sa Facebook o naging viral ang larawan tungkol sa isang SUV na pinalibutan ng iba pang sasakyan at may mga armadong lalake na tumutok ng baril.

Dahil walang nakakaalam kung iyon ba ay shooting lang sa pelikula, o kidnapping ba o lehitimong police operation, ang mga kababayan nating netizens at maging ang media ay naging pursigido na malaman ang kasagutan.

***

Pagkaraan nga ng may isang linggong imbestigasyon ng ating mga matitinong pulis, lumabas na ang kasagutan at nabistong may mga aktibong pulis na sangkot sa kalokohang iyon. Ang tanong, iyon kaya ay unang beses lang ginawa ng mga suspek? Dahil kung dati na nila iyong ginagawa at kung hindi natutukan ng netizens, aba’y malamang na maulit pa.

Batay na rin kasi sa imbestigasyon ng ating mga matitino at tapat na mga pulis na sumusunod sa “daang matuwid” ni Pangulong Noynoy Aquino, sinabing nag-atubiling magsumbong ang mga biktima dahil nga mga pulis ang sangkot. Kaya naman napakahalaga ng impormasyon na ibinigay ng larawang kumalat sa social media para magkaroon ng “lead” na susundan sa imbestigasyon ng ating mga malilinis na pulis.

Sa totoo lang, marami ring negatibong komentong lumabas patungkol sa ating mga pulis dahil sa insidenteng iyon sa EDSA. Pero sa totoo lang mga kabayan, tingnan din natin ang kabilang bahagi ng eksena – hindi ba mga pulis din ang nakabisto sa kalokohan ng kanilang mga kabaro? Bagama’t nakakalungkot dahil sariling mga tauhan ang sangkot, good job kay General Albano, talagang hinimay ang bawat detalye sa nakunang litrato!

Sadyang hindi kaagad natin maiaalis ang mga bulok na pulis sa institusyon, subalit hangga’t marami pa rin naman ang matitinong pulis at handang sumunod sa direktiba ni PNoy na linisin ang hanay ng kapulisan, hindi tayo dapat mawalan ng pag-asa. Kung may mga responsableng netizens, mayroon ding matitinong pulis.

Tandaan natin na hindi naman ito ang unang insidente na may mga pulis na sangkot sa umano’y iregularidad pero nabisto rin ang kalokohan nila ng kanilang mga kabaro sa ilalim ng administrasyon ni PNoy at sila’y nakasuhan.

Kaya hindi tayo dapat mawalan ng pag-asa at patuloy tayong magtiwala sa kapulisan. At sa tulong ng modernong teknolohiya, ang mga responsableng netizens ang magiging pinalakas na kakampi ng mga matitinong alagad ng batas para masugpo ang mga bugok na pulis at mga kriminal.

Laging tandaan: “Bata mo ‘ko at Ako ang Spy n’yo”. (Twitter: follow@dspyrey)

Hindi duwag ang mga Pinoy

                                                            Hindi duwag ang mga Pinoy
                                                                       Rey Marfil


Sa halip na tawaging “act cowardice” ng isang komandante ng United Nations (UN) Peacekeeping Force ang ginawang “greatest escape” ng mga Pinoy UN Peacekeeper sa Golan Heights sa Syria, dapat pa ngang pasalamatan niya ang matatapang nating tropa dahil hindi sila naging dagdag sa problema sa tropa ng Fijian peacekeepers na binihag ng mga sumalakay na rebelde.

Aba’y hanggang ngayon yata ay nakatunganga at nakikiusap pa ang liderato ng UN na pakawalan ng mga rebeldeng al-Nustra Front, na konektado sa Al-Qaeda, ang may 45 Fijian peacekeepers na kanilang binihag.

Kung hindi natulungan ng tropa ng Irish peacekeepers ang mga katropa nilang Pinoy na nasa Position 69, at kung hindi naman nakatakas ang iba pang Pinoy peacekeepers na nasa Position 68, baka sa halip na 45 peacekeepers ay mahigit 100 UN peacekeepers ang ipinagmamakaawa ng UN na pakawalan ng mga rebelde, na sinasabing kasama sa listahan ng itinuturing na mga terorista.

Para sa mga kababayan natin na hindi lubos na batid ang nangyari sa Golan Heights sa Syria ilang linggo na ang nakalilipas, ipaliwanag natin na unang nabihag ng mga rebelde ang tropa ng mga Fijian dahil isinuko nila ang kanilang armas.

Nang puntiryahin na ng mga rebelde ang kinalalagyan ng mga Pinoy peacekeepers, hindi sila bumigay sa gusto ng mga rebelde. Sa halip, nagkulong sila sa kanilang kinalalagyan at naghandang ipagtanggol ang kanilang sarili.

Makalipas ang may ilang araw na standoff, duma­ting ang tropa ng Irish peacekeepers at naisalba nila ang mga katropa nilang Pinoy na nasa Position 69. Pero naiwan ang iba pang Pinoy peacekeepers sa Position 68 na pinaputukan na ng mga rebelde.

To make the story short, nagawang makatakas ang mga Pinoy na nasa Position 68 kahit pa may itinanim na landmine ang mga rebelde. Nakatakas sila nang walang tulong ng iba. Dahil dito, hinangaan ang katapangan ng mga sundalong Pinoy dahil hindi sila nagpasindak sa mga rebelde at hindi hinayaan na maging bihag.

***

Pero may hindi natutuwa sa ginawa ng mga kababayan natin. Tandaan niyo mga kababayan ang pangalan ng sundalong Indian na ito na si Lieutenant General Iqbal Singh Singha, ang Force Commander ng UN Disengagement Force.

Tinawag niyang “kaduwagan” ang ginawang pagtakas ng mga Pinoy peacekeepers dahil iniwan daw ng mga kababayan natin ang kanilang puwesto. Inamin din niya na iniutos niyang isuko ng mga Pinoy ang kanilang armas habang nagsasagawa daw sila ng negosasyon para mapalaya ang mga bihag na Fijian. At dahil sa hindi raw sinunod ng mga Pinoy ang utos niya, nalagay daw sa alanganin ang buhay ng mga Fijian.

Aba’y anong garantiya ni Singha na hindi bibihagin ng mga rebelde ang mga kababayan natin kapag isinuko nila ang kanilang armas? Anong garantiya ni Singha na hindi papatayin ng mga rebelde ang mga UN peacekeepers? Sa mga naibabalitang masaker at pagpugot ng ulo ng iba’t ibang rebelde sa mga bihag nila, at pagpatay ng mga rebeldeng Syrian sa kanilang mga mismong kababayan, anang garantiya ni Singha na magiging ligtas ang mga Pinoy?

Dahil sa pagiging matapang ng mga Pinoy, hindi na sila nakadagdag sa problema ng UN na patuloy na nakikiusap sa mga rebelde para mapalaya ang mga bihag na peacekeepers. Katunayan, ang patuloy na pagkakabihag ng mga Fijian ay patunay na walang magawa ang UN para mai-rescue ang sarili nilang tropa.

Isa pa, tama ba ang pagkakasabi ni Singha na nakiki­pagnegosasyon sila sa mga rebelde para mapalaya ang mga Fijian? Tila hindi yata tama at nagbibigay ng maling senyales na ang mga opisyal ng UN Peacekeepers ay nakiki­pagnegosasyon sa mga rebelde na kaalyado ng mga terorista.

Dapat lang talagang imbestigahan ng UN itong si Singha at dapat purihin ang mga matatapang nating kababayan na peacekeepers.

Laging tandaan: “Bata mo ‘ko at Ako ang Spy n’yo”. (Twitter: follow@dspyrey)

Pinabayaan noon, inaayos ngayon!

                                                       Pinabayaan noon, inaayos ngayon!
                                                                         Rey Marfil


Magandang balita ang 6.4 porsiyentong paglago ng ekonomiya ng bansa sa ikalawang quarter ng taon dahil sa malakas na sektor ng industriya at serbisyo, at matikas na remittances ng overseas Filipino workers (OFWs).

Mula April hanggang Hunyo ng 2014, mas malakas ang naitalang paglaki ng gross domestic product (GDP) kumpara sa 5.6 porsiyento sa first quarter ng taon.

Ayon kay Socioeconomic Planning Secretary Arsenio Balisacan, maikukumpara ang 6.4 porsiyentong paglago sa GDP ng bansa sa naitala ng Malaysia sa unang quarter ng taon.

Sa tulong ng matuwid na daan ni Pangulong Noynoy ‘PNoy’ Aquino naniniwala si Balisacan, director-­general ng National Economic and Development Authority (­NEDA), na maitatala ng bansa ang 6.5 hanggang 7.5 porsiyentong pag­lago ng ekonomiya sa pagtatapos ng taon.

Tumaas ang pribadong konstruksyon ng 12.7 por­siyento sa second quarter ng taon kumpara sa nakalipas na taon habang humina naman ang pampublikong konstruksyon dala ng mga kautusan ng Supreme Court (SC) na nagbawal sa ilang paggastos ng pamahalaan.

Nakapagtala rin ng pag-angat ang halos lahat ng sektor sa larangan ng suplay. Umangat rin ng 3.6 porsiyento ang sektor ng agrikultura na mas malaki ng 0.2 porsiyento sa second quarter ng 2014 dahil sa lumaking ani.

Namayagpag rin ang sektor ng industriya na umangat ng 7.8 porsiyento. Anim na porsiyento naman ang inasenso ng sektor ng serbisyo dahil sa abalang aktibidad sa larangan ng trade, real estate, transport, storage at communications, at iba pa.

Asahan nating lalong lalago pa ang ekonomiya ng bansa sa kapakinabangan ng nakakaraming Pilipino sa pagtatapos ng taon dahil sa matuwid na daan at malinis na pamamahala ni PNoy.

***

Tiniyak din ng pamahalaan na masisimulan sa lalong madaling panahon ang mga proyekto ng mass transit system na libre sa katiwalian.

Bagama’t maraming aberya dahil napabayaan sa ma­habang panahon at hindi prayoridad ng dating nakaupo, magsisimula sa termino ni PNoy ang pagbuti sa kalagayan ng mga mananakay ng Metro Rail Transit (MRT).

Tama ang pamahalaan na madaliin ito dahil lubhang mahalaga para sa publiko ang maayos at mabuting serbisyo ng mass transport system para sa pagsusulong ng ekonomiya ng bansa, lalung-lalo na sa Metro Manila.

Kabilang sa mga proyektong nakalinya na ang MRT-7 na tatakbo simula sa North Avenue sa Quezon City patungong San Jose del Monte, Bulacan. Kasama rin ang ekstensyon ng MRT Line 1 at karagdagang coaches para mahanapan ng solusyon ang lumalaking bilang ng mga mananakay.

Isasagawa ang konstruksyon ng mga pangunahing proyekto sa ilalim ng tinatawag na public-private partnership (PPP). Aminin o hindi ng mga kritiko, sampu ng mga malalabo ang mga mata sa ginagawang transpormasyon sa gobyerno, kapalaran ni PNoy ang maging taga-kumpuni ng sira at taga-tuwid ng baluktot subalit sadyang “feeling-henyo” lamang ang mga ito na walang ginawa kundi “magkiyaw-kiyaw” at magpa­interview!

Kailangan lang natin ng kaunting pasensya dahil hindi naman nagpapabaya ang pamahalaan sa pagtiyak na magi­ging maayos ang serbisyo ng MRT, kabilang dito ang pagbili ng karagdagang mga bagon na makukuha na simula sa susunod na taon.

Sa pagsusumikap nga ng pamahalaan na mapabuti ang kalagayan ng mga mananakay, binuksan ang ferry service sa kahabaan ng Pasig River upang makatulong sa pagsisikip ng pangunahing mga lansangan sa Metro Manila dahil sa mga isinasa­gawang mga proyekto.

Malinaw: Hindi magpapabaya ang administra­syong Aquino sa pagsusulong ng mga proyekto para ma­tulungan ang mga mananakay.

Laging tandaan: “Bata mo ko at Ako ang Spy n’yo.” (Twitter: follow@dspyrey)

Bata, bata, may bakuna ka na ba?

                                                        Bata, bata, may bakuna ka na ba?  
                                                                      REY MARFIL



Dapat ihanda na ng mga magulang ang linyang, “parang kagat lang ‘yan ng langgam.” Ito ay para sa gagawing pagpapabakuna sa kanilang mga anak nga­yong sinimulan na ng pamahalaang Aquino ang mala­wakang immunization program para sa mga bata.

Sa loob ng isang buwan ngayong Setyembre, target ng programa na maabot at mabakunahan ng pan­laban sa tigdas at polio ang may 95 porsiyento ng mga bata na siyam na buwang gulang hanggang limang ­taong gulang sa buong bansa.

Hindi naman dapat mag-alala ang mga magulang dahil LIBRE ang bakuna. Dapat lang na dalhin nila sa mga health center ang mga bata para mabakunahan at mapainom (patak) ng kinakailangang gamot upang mabigyan sila ng panlaban sa dalawang peligrosong sakit na nag-iiwan din ng permanenteng kapansanan sa katawan patikular ang polio.

Bukod sa mga health center, may mga government health workers din na ipakakalat si Department of Health (DOH) Secretary Enrique Ona para magbahay-bahay at magsagawa ng immunization program lalo na sa mga malalayong komunidad.

Isa rin naman kasi ito sa hangarin ni Pangulong Noynoy “PNoy” Aquino na ilapit at dalhin ng gobyerno ang serbisyo sa mga tao lalo na sa mga mahihirap na komunidad. Habang ang iba ay nagbabangayan sa pulitika, ang pamahalaan, tuloy lang sa pagkakaloob ng serbisyo na kailangan ng kanyang mga “boss” na mamamayang Pilipino.

***

Katunayan, sa isinagawang paglulunsad ng programang ito, hindi na binasa ni PNoy ang inihandang talumpati ng kanyang mga tauhan dahil may kahabaan. Nais kasi ng Pangulo na gawin lang na maigsi ang kanyang sasabihin at nang maisagawa na agad ang trabaho sa pagbabakuna.

Mas kailangan nga naman sa ganitong programa ang gawa o aksyon at hindi daldal. Dahil ginawa lang ni PNoy na maigsi ang kanyang talumpati, mas naging mabilis at mas marami ang batang nabakuhan nang araw na iyon at makaliligtas na sila sa panganib ng tigdas at polio.

Simple lang naman ang layunin ni PNoy at DOH sa isinagawang malawakang immunization program na ito – preventive is better than cure. Mas mabuting ma­bigyan ng bakuna at gamot ang mga bata para hindi magkasakit. Kaysa naman magkumahog sa pagha­hanap ng lunas sa bata kung kailan tinamaan na ng sakit.

Kahit polio-free na ang Pilipinas sa nakalipas na mga taon, kailangan pa rin na mabigyan ng oral anti-polio vaccine ang bata dahil may mga bansa pa rin na may kaso ng polio. At maaaring madala ng mga dayuhan na pumupunta sa Pilipinas ang virus na pinagmumulan nito kaya mabuti na rin ang may panlaban na ang katawan ng mga batang Pinoy.

Samantala, mula noong 2011, nagkaroon ng pagtaas ng kaso ng tigdas dahil na rin sa paniwala na naging mababa ang coverage ng vaccination campaign noong 2011 na nasa 84 percent lang. Pero sa paglipas ng taon, tumataas na ito at nais nga ng pamahalaan na umabot sa hindi bababa sa 95 percent ang mga bata na masasakop ng bakuna ngayong Setyembre.

Kaya kung mahal natin ang ating mga anak, dalhin sila sa mga health center para mabakunahan at maki­pag-ugnayan sa ating mga barangay para malaman kung ano ang dapat gawin upang makinabang sa maha­lagang programang ito ng pamahalaan para sa mga bata.

Laging tandaan: “Bata mo ‘ko at Ako ang Spy n’yo”. (Twitter: follow@dspyrey)