Mission accomplished si PNoy

                                                             Mission accomplished si PNoy  
                                                                        REY MARFIL

Hindi biro ang 12-araw na working visit ni Pangulong Noynoy “PNoy” Aquino III sa iba’t ibang bansa sa Europe at ilang estado sa Amerika. Sa layo ng mga lugar na pinuntahan at paghahandang kailangang gawin sa mga pagpupulong, tiyak na nakakapagod at hindi mawawala siyempre ang panganib ng aksidente sa bawat biyahe.

Pero salamat naman at maayos na nakauwi si PNoy sa bansa at ang kanyang mga kasama sa biyahe. Sa kanyang pagbabalik sa Pilipinas, bitbit ng Pangulo ang magagandang balita na iniulat niya sa kanyang “boss” na mamamayang Pilipino.

Siyempre, una sa magandang balita ang mahigit $2 bilyong investment at mga pangako mula sa mga nakausap niyang negosyante at kumpanya na maglalagak o magpapalaki pa ng kanilang negosyo sa ating bansa. Mukhang hindi nga nahirapan si PNoy na manghikayat sa mga mamumuhunan na magnegosyo sa Pilipinas.

Aba’y sa kabi-kabilang positibong puna at upgrade na nakakamit ng Pilipinas sa credit ratings, hindi na kataka-taka na batid na rin ng mga dayuhan na “the real deal” ang Pilipinas bilang bansa na dapat pag­lagakan ng puhunan. Kaya nga hindi ba kamakailan ay may lumabas pang “anti-Philippine” ad na ang layunin ay sulutin ang napakalaking BPO industry natin.

Maliban sa mga nahikayat na mamuhunan sa Pilipinas, nagawa rin ni PNoy na maipaalam sa mga bansang makapangyarihan sa Europa ang posisyon ng Pilipinas sa usapin ng agawan ng teritoryo sa West Philippine Sea.

***

Sa mga pakikipag-usap na ito ni PNoy, natiyak natin na kaisa at katulad ng Pilipinas ang pananaw ng mga lider sa European Union na dapat igalang ng lahat ang pandaigdigang alituntunin sa usapin ng pinag-aagawang teritoryo. Kaisa natin sila na hindi dapat gumamit ng dahas o puwersa ang sinuman na nang-aangkin ng teritoryo.

Nagawa rin ni PNoy na maiparating sa United Nations sa isang komperensiya tungkol sa climate change ang tinig ng Pilipinas at marahil maging ng iba pang maliit na bansa na matinding naaapektuhan ng kalamidad na dulot ng pagbabago na ng panahon.

Talaga namang makikita na ang epekto ng climate change sa Pilipinas tulad ng malalakas na pag-ulan kahit wala namang bagyo. At kung may bagyo naman, mas matindi pa ang pag-ulan gaya ng epekto ni Yolanda, at kamakailan ay ang mistulang pagtutulungan ng bagyong Mario at ng habagat.

Bukod sa layunin ni PNoy sa naturang biyahe para sa bansa, maganda rin ang ginawang pagbalik niya sa naging bahay nila sa Boston nang ma-exile ang kanilang pamilya noong panahon ng Batas Militar.
Naging emosyunal siya nang balikan ang mga alaala na kasama pa noon ang kanyang ama na si dating Sen. Ninoy Aquino Jr. at inang si dating Pangulong Cory Aquino.

Mahirap man para sa Pangulo na sariwain ang mga masasaya at malungkot na bahaging iyon ng kanyang buhay sa Boston, makatutulong sa kanya na balikan ang nakaraan upang magkaroon siya ng higit na magandang pananaw at mga gagawing desisyon sa hinaharap.

Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

http://www.abante-tonite.com/issue/sep2914/edit_spy.htm#.VCh_PlctefE

Kapag hitik nga naman ang bunga

                                                        Kapag hitik nga naman ang bunga  
                                                                        Rey Marfil


Walang duda, namumunga na ang ekonomiya ng bansang Pilipinas. Kaya naman hindi katakataka kung may ibang sektor na mula sa ibang bansa na binabato ang ating puno para bumagsak ang bunga at pakinabangan nila.

Isang halimbawa nito ang pagpapalabas ng “travel advisory” o “warning” ng isang bansa dahil delikado raw ang kanilang kababayan kapag nagpunta sa Pili­pinas. Huwag na nating banggitin ang pangalan ng bansang ito.

Pero sa totoo lang, mas delikado ang bansa natin sa ilan nilang kababayan na gumagawa ng kalokohan dito sa bansa natin lalo na iyong mga gumagawa at nagkakalat ng iligal na droga.

Pero dahil sa travel advisory nila, nabawasan ang bilang ng kababayan nilang namamaslang sa Pilipinas.
Nataon ang babala ngayong “Ber” months na marami sa kanilang kababayan ang nais magbakasyon sa ating mga beach lalo na sa Boracay.

Ayaw isipin ng ating kurimaw sa kanto, baka taktika lang daw ang travel advisory para mapigilan ang kanilang kababayan na magtungo sa Pilipinas at mabawasan ang patuloy na paglago ng ating turismo.

***

Isa pang bunga ng pinapukol ngayon ay ang ating business process outsourcing (BPO), na isa sa talaga namang nagpapalago sa ating ekonomiya, kasama ng turismo.

Gaya ng madayang boksingero, parang suntok na “below the belt” ang binitawan ng kompanyang Aegis Malaysia sa ipinalabas nilang advertisement laban sa Pilipinas. Kulang na lang ay duraan nila ang Pilipinas sa naturang anunsiyo na ang layunin at mahikayat ang BPO industry sa Pilipinas na lumipat sa Malaysia.

Nakakagalit ang naturang advertisement pero nilinaw na ng bansang Malaysia na wala silang kinalaman tungkol dito. Maging ang kumpanyang Aegis Limited, humingi ng paumanhin at sinabing hindi nila aprubado ang naturang anunsiyo.

Ngunit sa kabilang banda, pagpapatunay ito na sadyang malaki at nangunguna na ang BPO industry ng Pilipinas sa buong mundo kaya napapansin ng ibang negosyante sa ibang bansa at nais nilang makuha.

Bukod dito, naipakita ng mga Pinoy -- lalo na ng mga netizens -- ang pagmamalasakit at pagpapahalaga nila sa Pilipinas at sa industriya ng BPO sa ginawang pagbatikos sa naturang ads. Aba’y napakarami yatang kababayan natin na aktibo na sa internet kaya madali nilang nakita at natuligsa ang naturang mapanirang ads.

Ang pamahalaan ng Malaysia at maging ang Aegis Limited, naglabas ng pahayag ng suporta sa Pili­pinas na pagpapakita ng hindi nila pagsang-ayon sa anunsiyo ng Aegis Malaysia.

Sa kabila naman ng kontrobersiya, ginagarantiyahan ng pamahalaang Aquino na ginagawa nito ang lahat para manatiling nangunguna ang Pilipinas sa BPO at mapangalagaan ang mga taong nasa industriyang nagbibigay ng daan-daang libong trabaho sa mga Pilipino.

Gaya ng slogan sa turismo, “It’s More Fun” na mamuhunan at magnegosyo ngayon sa Pilipinas dahil na rin sa mga repormang ipinatupad ni Pangulong Aquino. Partikular na rito ang kampanya laban sa katiwalian na irereklamo noon ng mga negosyante.

Patuloy din naman ang pagpapahusay sa mga proyektong pang-imprastruktura at iba pang usapin tungkol sa kaayusan para mapangalagaan at matiyak ang kaligtasan ng lahat habang nasa ating bansa.
Laging tandaan: “Bata mo ko at Ako ang Spy n’yo”. (Twitter: follow@dspyrey)

‘Wag kalimutan ang Batas Militar

                                                   ‘Wag kalimutan ang Batas Militar
                                                              REY MARFIL

Sadyang mabilis lumipas ang panahon. Aba’y 42 ­taon na pala ang nakalipas mula nang ideklara ni dating Pangulong Ferdinand Marcos Sr., ang Batas Militar na nagpakulong ng libu-libong tao na pinaniniwalaan niyang komunista, tagasuporta ng mga rebelde, at mga kalaban niya sa pulitika.

Bukod sa 42 taon na ang nagdaan nang ideklara ang Batas Militar, sa Setyembre 28 ay ika-25 taon na rin ng kamatayan ni Marcos. Samantala, 31 taon na ang nakara­raan nang barilin at patayin sa airport ang pangunahing nakalaban sa pulitika ni Marcos na si dating Sen. Ninoy Aquino Jr., ama ng kasalukuyang Pangulo ng bansa na si Noynoy “PNoy” Aquino.

Hindi nakapagtataka kung maging emosyunal o sentimental ang paggunita ni PNoy ngayon sa Martial Law anniversary dahil nataon ito sa pagpunta niya sa Boston, USA kung saan ilang taon nanirahan ang pamilya-Aquino. Nangyari ito nang mapilitan ang kanilang pamilya na umalis ng bansa bunga ng idineklarang Batas Militar at pagkakasakit ni Ninoy.

Kabilang si Ninoy sa daan-daang politiko at kritiko ni Marcos na nakulong noong Martial Law. Nahatulan pa nga ng parusang kamatayan ng military court martial si Ninoy. Dahil sa pagkakakulong ng may pitong taon, humina ang katawan ni Ninoy at nagkasakit. Sa alok na rin ng gobyernong Marcos, pumayag si Ninoy na magpa­opera ng puso sa Amerika bagaman ang kapalit nito ay pag-iwan niya sa kanyang bayang minamahal.

Matapos ang operasyon sa US, nanirahan na ang pa­milya-Aquino sa Boston, kasama ang noo’y nagbibinatang si PNoy. Pero pagkaraan ng ilang taon, sa kabila ng maayos na pamumuhay sa Amerika, sadyang hindi ka­yang iwanan nang tuluyan ni Ninoy ang Pilipinas. Nagpasya siyang bumalik ng bansa kahit batid niya na may banta sa kanyang buhay. And the rest is history ‘ika nga pag-uwi niya noong Agosto 21, 1983.

***

Hindi lang pamilya-Aquino ang may “bangungot” na karanasan sa ilalim ng Batas Militar ni Marcos na nagtagal sa kapangyarihan sa loob ng 20 taon. Kung tutuusin, masuwerte pa ang mga Aquino dahil nakuha nila ang mga labi ni Ninoy, napagluksaan at nabigyan ng disenteng libing. Sinasabi kasing daan-daan o aabot pa sa libo ang ibang biktima ng paglabag sa karapatang pantao noong panahon ng Martial Law ang hindi na nakita -- o ‘yung mga tinatawag na “desaparecidos”.

Ang Human Rights Victims Claims Board (HRVCB) na namamahala sa mga biktima ng Martial Law na nais mabigyan ng kompensasyon ay nakatanggap na ng mahigit 17,000 aplikante para sa reparation claims.
Inaasahan nilang aabot ito sa 20,000 hanggang 30,000 aplikante.

Bukod sa mga kaso ng pagkulong, pagkawala, pagkamatay, pananakit, sinabi ni PNoy sa kanyang talumpati sa pagbisita niya sa Boston na walang kalayaan noon na magpahayag laban sa diktaturyang rehimen ni Marcos. Walang check and balance ang sangay ng mga ahensya ng gobyerno kaya naman naabuso ang kaban ng pamahalaan.

Aminado si PNoy na noong paslangin ang kanyang amang si Ninoy, pumasok sa isip niya ang maghiganti; na normal lang sa isang pamilyang nawalan ng mahal sa buhay dahil sa karahasan. Subalit tila ang lahat ay nakatakdang mangyari para maibagsak ang diktaturyang rehimen ni Marcos noong 1986 EDSA People Power Revolution. Hindi nasayang ang ibinuwis na buhay ni Ninoy.

Kahit marami sa mga may kinalaman at nakaranas ng lagim ng Batas Militar ay wala na sa mundong ibabaw, dapat patuloy itong gunitain para magsilbing paalala sa mga bagong henerasyon na may madilim na yugtong nangyari sa ating bayan na hindi na dapat maulit muli -- at hindi nila dapat hayaan na maulit pa.

Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

http://www.abante-tonite.com/issue/sep2414/edit_spy.htm#.VCHkE1ctefE

Napapanahong biyahe!

                                                                 Napapanahong biyahe! 
                                                                      REY MARFIL


Produktibo at napapanahon ang ginawang working visit ni Pangulong Noynoy “PNoy” Aquino sa Europa upang mapalakas ang diplomatikong ugnayan sa mga bansang kasapi nito at maipabatid na rin ang nangyayari sa pinag-aagawang West Philippine Sea (WPS) o South China Sea (SCS).

Dahil sa pagtungo ni PNoy sa Europa upang makahikayat din ng mga nais mamuhunan sa Pilipinas na tinatawag na “Next Asian Tiger”, naipaliwanag natin sa mga bansang kasapi ng European Union (EU) ang ginagawang hakbang ng Pilipinas upang mapayapang malutas ang pag-aagawan sa teritoryo sa WPS o SCS.

Bilang trading partner ng China, importante na ma­laman ng Europa ang ginagawa ng China sa WPS o SCS gaya ng mga paglalagay nito ng istruktura at paggawa ng artipisyal na isla sa teritoryo na hindi naman sa kanila.

Katunayan, nasurpresa ang ilang lider ng Europa dahil hindi sapat ang impormasyon na nakararating sa kanila tungkol sa nangyayari sa WPS o SCS. Maging si Spanish King Felipe VI ay interesado umanong malaman ang sitwasyon at nangyayari sa pinag-aagawang karagatan.

Dahil malaking trading partner ng Europa ang China, hindi nakapagtataka kung mas madalas na ang panig lang ng Tsino ang marinig ng mga bansang kasapi nito. Pero dahil sa ginawang pagbisita ni PNoy sa EU, naiparating natin ang bahagi o panig ng Pilipinas, at sa pamamagitan ng mga dokumentasyon gaya ng mga larawan, nakita nila ang totoong ginagawa ng China.

Nagbigay naman ng katiyakan si European Commission President Jose Manuel Barroso, na suportado nila ang anumang hakbang na lutasin sa mapayapang paraan at hindi sa dahas ang sigalot sa WPS o SCS. Maganda itong balita dahil ito rin naman ang posisyon ng Pilipinas kaya naghain tayo ng arbitration case sa International Tribunal.

***

Positibong balita rin ang pagpapalabas ng EU ng bagong maritime strategy, dahil magagamit ng mga malalakas na bansa tulad ng Europa ang kanilang impluwensiya para obligahin ang ibang bansa na sumunod at igalang ang pandaigdigang kasunduan sa paglalayag at teritoryo sa karagatan.

Ngunit bago pa mag-isip ang China na nagsusumbong tayo sa EU, sinabi ni Foreign Affairs Sec. Albert del Rosario, na ang mga lider sa Europa ay sadyang interesado na malaman ang nangyayari sa WPS o SCS.
Katunayan, sa mga pulong bilang paghahanda bago ang pagdating ni PNoy sa Europa, lagi daw kasama at huling itinatanong ng mga lider sa EU ang tungkol sa agawan sa teritoryo.

Patunay ito ng hangarin ng mga lider ng EU na makakuha sila ng sapat na impormasyon mula sa Pilipinas tungkol sa usapin na direktang galing sa ating mga lider at hindi lang base sa nakakalap o ibinibigay sa kanilang impormasyon.

Pero maliban sa paglapit natin sa EU leaders tungkol sa usapin ng WPS o SCS, maganda ring pagkakataon ang pagtungo doon ni PNoy para mahikayat ang ibang negosyante na mamuhunan sa Pilipinas at samantalahin ang masiglang kalakalan sa bansa.

Bukod pa diyan ay nabigyan din ng pagkakataon ang mga kababayan nating naninirahan at nagtatrabaho na sa Europa na makita si PNoy at kahit papaano ay makapagbigay ng kasiyahan at kaunting pride na ang kanilang Pre­sidente ay panauhin ng bansa na kanilang kinaroroonan.

Laging tandaan: “Bata mo ‘ko at Ako ang Spy n’yo”. (Twitter: follow@dspyrey)

-PNP: Pulis nanghuli ng pulis

                                         

                                         -PNP: Pulis nanghuli ng pulis

                                           REY MARFIL/Spy on the Job

Sunud-sunod ang insidente ng mga nababasyo o nahuhuling mga pasaway na pulis na gumagawa ng kalokohan. Pero kung may mga pasaway, hindi naman nawawala ang mga matitinong pulis na pursigidong iposas ang mga lumalabag sa batas kahit pa kabaro nila.

Kaya naman mahirap yatang paniwalaan ang hirit ng isang anti-crime group na nagsabing mas lumala raw ang kaso ng mga pasaway na pulis sa ilalim ng kasalukuyang liderato ni Pangulong Noynoy ‘PNoy’ Aquino kaysa noong panahon ni dating Pangulong Gloria Macapagal-Arroyo.

Mas malala kaya ang kalokohan ng pulis ngayon o mas masigasig na ang mga matitinong pulis ngayon na hulihin ang mga kolokoy nilang mga kabaro? Parang usapin din ‘yan ng katiwalian na umano’y nangyari noong panahon ni Arroyo pero hindi naibalita. Subalit nang maupo si PNoy, isa-isa nang nailantad.

Gaya na lang ng umano’y pang-aabuso sa pork barrel funds ng mga mambabatas kung saan dawit si Janet Napoles. Ang mga alegasyon ng katiwalian ay sinabing nangyari noong 2007 hanggang 2009 pero lumabas sa media noong 2013. 

Bukod pa riyan ang iba pang alegasyon ng katiwalian na nangyari noong panahon ni Arroyo na naisampa na ang reklamo sa Ombudsman at Sandiganbayan tulad ng PCSO intelligence funds, PNP chopper scam, at iba pa.

Hindi naman ibig sabihin na kung ngayon naglalabasan ang kalokohan ng ilang tiwaling pulis ay nanga­ngahulugan na na lumalala ang sitwasyon ngayon. Maaari kasing malala na ang sitwasyon noong nakaraang mga administrasyon pero hindi lumalabas sa media dahil hindi natutukan o nalalaman ng liderato ng kapulisan kaya walang nahuhuli. At kung walang nahuhuli, walang luma­labas sa media, walang nalalaman ang publiko.

Subalit sa ilalim ng liderato ni PNoy na seryoso na putulin ang utak-wangwang -- hindi lang ng mga nasa gobyerno kung hindi maging ang mga nakauniporme -- ang mga pasaway na pulis, nakikita sa media na binabasyo ng mga kapwa nila pulis. 

Katunayan, may isang insidente kamakailan na naibalita na isang pulis na nakasakay sa tricycle na may kasamang dala­wang lalaki ang pinara at sinita ng mga nagpapatrolyang pulis dahil lumabag sila sa batas-trapiko. Kung pinairal ng mga nagpapatrolyang pulis ang isip-chapa, baka pinabayaan lang nila ang sinita nilang pulis nang magpakilala itong kabaro nila.

Pero sa halip, siniyasat nila ang kanilang sinitang kabaro at dalawang kasama at doon nila nakita na kargado ang mga ito ng dalawang pakete ng shabu kaya nila inaresto, ikinulong at kinasuhan.

***

Bukod pa riyan, malaki na rin ang papel ngayon ng modernong social media at mga netizens na aktibo na sa pagpo-post sa mga social networking site ng kanilang mga nakikitang kalokohan ng kahit na mga awtoridad.

Isang magandang halimbawa nito ang tinawag na EDS­A Hulidap na ang pinagmulan ng impormasyon ay sa netizen. Malamang kung hindi lumabas sa social media ang larawan, hindi ito malalaman ng liderato ng PNP at magpapatuloy ang modus ng grupo. Aminin natin ang katotohanan na tiyak na matatakot ang biktima na magsumbong sa pulis dahil nga ang mga salarin ay kapwa pulis.

Pero nang makarating sa liderato ng PNP ang impormas­yon, tahimik nilang inimbestigahan ang larawan hanggang sa matukoy ang mga taong sangkot sa umano’y hulidap, kahit pa ang mga masagasaan nila ay hindi lang isa, dala­wa kundi pito hanggang siyam na kasama nila sa trabaho. 

Alalahanin din natin na hindi ito ang unang pagkakataon na may kinasuhan ang PNP ng mga kabaro nila na inakusahang lumabag sa batas. Mayroon ding mataas na opisyal sa PNP ang kinasuhan kaugnay ng “shootout” umano sa Quezon na ikinasawi ng ilang tao.

At habang seryoso si PNoy at pamunuan ng PNP na alisin ang iilang bulok na pulis sa basket, at habang patuloy na may nakikita tayong matapat na pulis na humuhuli sa mga pasaway nilang kasama, hindi tayo dapat mawalan ng pag-asa at tiwala sa kanila.

Laging tandaan: “Bata mo ko at Ako ang Spy n’yo”. (Twitter: follow@dspyrey)

Magtiwala, alisin ang duda

                                                            Magtiwala, alisin ang duda  
                                                                    REY MARFIL


Matapos ang ilang taon na negosasyon, diskusyon, paghimay at pag-aaral sa legalidad, isinumite na ni Pangulong Noynoy “PNoy” Aquino sa Kongreso ang draft ng Framework Agreement para sa aaprubahang Bangsamoro Basic Law (BBL) na pagmumulan ng bagong pag-asa ng kapayapaan sa Mindanao.

Ang pagsusumite ni PNoy ng 122-pahinang BBL sa Kongreso ay pagpapatunay na desidido at tapat ang kasalukuyang pamahalaan at ang Moro Islamic Liberation Front (MILF) na magtulungan upang makamit ng Mindanao ang katahimikan at kaunlaran sa rehiyon.

Pero paglilinaw ni PNoy, ang BBL na magiging daan para malikha ang Bangsamoro entity na papalit sa kasalukuyang Autonomous Region in Muslim Mindanao o ARMM ay para sa lahat ng Pilipino at hindi lang para sa isang partikular na sektor.

Bakit nga naman hindi, kung aasenso ang Mindanao at magkakaroon ng ganap na katahimikan, tiyak na lalakas ang turismo, negosyo at ekonomiya sa rehiyon. Kung wala nang kaguluhan at giyera sa Mindanao, magagamit ng pamahalaan sa ibang proyekto at programa ang pondo na nagagastos sa pagbili ng mga armas at bala na pambomba sa mga rebelde at bandido.

Idagdag pa natin ang malaking gastos din ng pamahalaan sa pagtulong sa mga kababayan natin na lumilikas sa kanilang tahanan at nagtutungo sa mga evacuation centers upang makaiwas sa kaguluhan. Isaalang-alang din natin ang mga buhay na nasasayang at pangarap na mawawasak na idinudulot ng digmaan sa Mindanao.

Sa pamamagitan ng BBL, tutugunan nito ang anumang kakulangan sa ipinasang batas noon na lumikha sa ARMM na hindi ganap na naging susi para umunlad ang rehiyon at makamit ang katahimikan ng mga kababayan natin sa rehiyon.

Hindi naman natin maiiwasan na may ilan na magdududa sa legalidad ng BBL kung naaayon ba ito sa ating Saligang Batas. Iba pa diyan siyempre ang mga sadyang kokontra sa ngayon ng kagustuhan lang na komontra. Mayroon din naman na papalag at nais masabotahe ang layuning ito ni PNoy dahil sa kanilang personal na interes.

Subalit sa usapin ng legalidad o kung naaayon ba sa ating Saligang Batas ang BBL (na una nang tiniyak ni PNoy na walang lalabaging batas ang BBL), hayaan natin na matalakay ito ng ating mga mambabatas habang hinihimay nila ito sa Kongreso. Baka nga umabot pa ito sa Korte Suprema pero ipagdasal na lang natin na maging mabilis ang pagdadaanan nitong proseso dahil hindi na natin dapat pang paghintayin ang katahimikan sa Mindanao.

***

Samantala, dapat namang maging mapagmatyag at maingat ang ating mga kababayan doon sa mga manana­botahe at gagawa ng intriga at magpapakalat ng mga maling impormasyon tungkol sa BBL at bubuuing Bangsamoro entity para maisulong lang ang personal nilang hangarin.

Sa panig ng ating gobyerno, dapat din sigurong pa­kilusin nang husto ang intelligence community nito para maagapan at mapigilan kung sakaling may grupo na maghahasik na naman ng lagim para perwisyuhin ang isinusulong na kasunduan ng pamahalaan at MILF. Hindi na dapat maulit pa ang nangyaring pag-atake ng ilang armadong tagasuporta ni Nur Misuari sa Zamboanga City, na hanggang ngayon ay marami pa rin sa ating mga ino­senteng kababayan ang nagdurusa.

Sakaling maaprubahan ng Kongreso ang BBL bago matapos ang taong ito ng 2014, maganda itong regalo ng mga mambabatas sa ating bansa. Kung hindi naman nila maihabol ngayong taon dahil abala sila sa pagdinig ng 2015 national budget, puwede naman siguro nilang maipasa ang BBL sa unang bahagi ng 2015.

Laging tandaan: “Bata mo ‘ko at Ako ang Spy n’yo”. (Twitter: follow@dspyrey)

Paghahanda sa krisis sa enerhiya

                                                          Paghahanda sa krisis sa enerhiya  
                                                                   REY MARFIL


Sa susunod na taon, pinangangambahan na baka magkaroon ng kakulangan sa suplay ng enerhiya sa bansa na aabot ng 300 hanggang 1,000 megawatts (MW) na makaa­apekto sa mga residente sa Luzon, lalo na sa Metro Manila.

Upang maagapan ito, hihingi sa Kongreso ng kapangyarihan si Pangulong Noynoy “PNoy” Aquino upang mapahintulutan siyang pumasok sa mga kontrata sa po­wer sector upang mapunan ang tinatayang kakulangan sa suplay ng kuryente.

Pero siyempre, baka bumanat na naman ang mga kritiko na tamang duda o tamang hinala na babatikos ­pero walang irerekomendang solusyon sa problema. Baka may magpapasakalye na naman ng kanilang hinala na may mga opisyal lang na gustong kumita sa mga papasuking kontrata.

Malamang na may mga magpalutang din na baka maulit ang nangyari noong panahon ni dating Pangulong Fidel Ramos na nabigyan din noon ng emergency power na pumasok sa mga Independent Power Produ­cers o IPPs para maagapan ang power crisis.

Ang kaso, natapos na ang termino ni Ramos bilang Pangulo ay pinapasan pa ng mga konsumer ang gastos sa mga IPPs na hindi naman nagamit ang enerhiya dahil sa sobra ang pinasok na kontrata.

Pero noon iyon, iba na ang panahon ngayon lalo pa’t ang hihinging karagdagang kapangyarihan ni PNoy ­para matugunan ang nakaambang power crisis ay alinsunod lamang sa itinatakda ng the Electric Power Industry ­Reform Act of 2001 (EPIRA).

Nakasaad sa Section 71 ng EPIRA na, “[u]pon the determination by the President... of an imminent shor­tage of the supply of electricity, Congress may authorize, through a joint resolution, the establishment of additio­nal generating capacity under such terms and conditions as it may approve.”

Bukod sa kilalang masinop si PNoy sa detalye kung ilan lang dapat talaga ang kukuning reserbang power supply, kasama rin ang mga mambabatas sa Senado at Kamara na bubusisi sa usapin ng power supply at contract para lubos na mapag-aralan ang kinakailangan hakbang ng gobyerno.

***

Tandaan natin na nitong nakaraang mga buwan ay sumakit ang kili-kili sa kapapaypay at tumagaktak ang pawis ng marami nating kababayan at mga negosyante sa Mindanao dahil sa nararanasang rotating brownout bu­nga ng kakulangan sa suplay sa kuryente.

Ang inulan ng puna at kritisismo ay ang Department of Energy, pati na ang pamahalaang Aquino dahil sa kawalan daw ng paghahanda at hindi nakita ang paparating na problema. Kaya naman ngayon, naghahanda na ang gobyerno sa kung anuman ang posibleng mangyari sa suplay sa enerhiya sa Luzon sa 2015 kaya sana naman ay wala nang kokontra at magtamang duda.

Ang paghingi ng emergency power ni PNoy sa Kongreso ay bahagi lang naman ng iba pang ginagawang hakbang upang makatipid sa konsumo ng kuryente para maiwasan ang power crisis. Kabilang na dito ang paghikayat sa mga malalaking kumpanya na magtayo ng sarili nilang pagkukunan ng enerhiya sa ilalim ng Interruptible Load Program o ILP.

Mas maganda kung maging ang mga mamamayan ay magsagawa ng pagtitipid sa konsumo ng kuryente lalo na ngayong papalapit na ang malamig na panahon para madagdagan ang reserba nating suplay sa susunod na taon.

Pero anuman ang mangyari, mabuti pa rin na ma­bigyan ng emergency power si PNoy upang paghandaan ang krisis sa enerhiya kung hindi na talaga maiiwasan. Mas mabuti na nandiyan ang reserbang enerhiya na kung hindi man magamit, kaysa naman kung kailan mo kailangan ay walang magamit na reserbang enerhiya dahil hindi napaghandaan ang problema.

Laging tandaan: “Bata mo ‘ko at Ako ang Spy n’yo”. (Twitter: follow@dspyrey)