Monday, June 29, 2015

Pagpalawak sa benepisyo! REY MARFIL





Pagpalawak sa benepisyo!
REY MARFIL



Hindi ba’t kapuri-puri ang kautusan ni Pangulong Noynoy ‘PNoy’ Aquino sa pamunuan ng Philippine Health Insurance Corp. (PhilHealth) na ipagkaloob ang mas mahusay na serbisyong pangkalusugan para sa mga Filipino?

Nadagdagan nang husto ang benefit package ng mga pasyenteng may sakit sa bato kung saan sasakupin nito ngayon ang 90 dialysis sessions bawat taon mula sa kasalukuyang 45 dialysis sessions.

Inihayag ni PhilHealth president at chief executive officer Alexander Padilla na inaprubahan na ng board of directors ang pagpapalawak sa benepisyo dahil na rin sa lumalalang problema ng bansa sa sakit sa bato.

Ibinaba naman ng PhilHealth sa P2,500 kada sesyon ang kasalukuyang P4,000 hemodialysis session dahil sobra-sobra ang halaga para sagutin ang gastusin.

Batid ng Pangulo na malaki ang maitutulong ng pinalawak na benepisyo upang matugunan ang pangangailangan sa pagpapagamot ng mahi­hirap nating mga kababayan.

Nakakatuwa rin sa naging desisyon ng PhilHealth na hindi maaapektuhan ang kalidad ng gamutang maibibigay sa bawat benepisyunaryo sa kabila ng pinalawak na benepisyo.

***

Sa datos ng PhilHealth noong 2014, naitala ang pinakamataas na bilang na 691,489 na kaso ng hemodialysis sa lahat ng procedures na nagkaka­halaga ng P4,666,806,642.

Nag-ugat ang paglaki ng kaso sa dumadaming bilang ng mayroong diabetes at hypertension.

Nakakatuwa rin na maaaring pakinabangan ang libreng benepisyo sa lahat ng PhilHealth accredited na dialysis centers at ospital sa buong bansa.

Maganda rin ang ginagawang pagbabantay ng PhilHealth sa programa ng pamahalaan upang maiwasang abusuhin ang reimbursement sa mga sumailalim sa programa.

Noong nakaraang buwan, inihayag ng PhilHealth ang pag-imbestiga nito sa Pacific Eye Insti­tute sa Makati City at Quezon City Eye Center sa Quezon City dahil sa umano’y maanomalyang transaksyon na nagkakahalaga ng P402 milyon noong 2013 at 2014.

Karamihan sa isinagawang medical procedures sa dalawang eye centers ang mga pasyenteng may katarata.
Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

Friday, June 26, 2015

Ang basbas at ang survey REY MARFIL




Ang basbas at ang survey
REY MARFIL



Tulad ng inaasahan, nakabawi ang trust at satisfaction ratings ni Pangulong Noynoy ‘PNoy’ Aquino sa bagong survey ngayong June mula sa “pinakamababang” marka na nakuha niya noong Marso. Ngunit kung marami ang natuwa, tiyak na mayroon ding ilan na nabahala habang papalapit ang pampanguluhang halalan sa 2016.

Pero dahil sadyang napakataas ng tiwala ng publiko kay PNoy mula nang inihalal siyang Pangulo noong 2010, kahit ang mataas na 36 percent ay naging “mukhang” mababa.

Sa hiwalay na survey naman ng Social Weather Station na ginawa noong June 5-8, 2015, nakabawi rin ang satisfaction rating ni PNoy (o bilang ng mga taong nasisiyahan sa kanyang trabaho) sa net rating na positive 30, mula sa “record low” din niya na positive 11 noong Marso.

Sa datos ng SWS, lumitaw na muling dumami ang nagsabing nasisiyahan sila sa trabaho ni PNoy sa June survey na 57 percent satisfied at nabawasan ang dis­satisfied sa 27 percent. Noong Marso, 47 percent lang ang nagsabing satisfied sila sa trabaho ng Pangulo at mataas naman ang dissatisfied nasa 36 percent.

Muli, kung ikukumpara sa mga dating lider na papatapos na ang termino, mataas pa rin ang mga markang ito ni PNoy. Kaya naman hindi katataka-taka na makabawi kaagad siya dahil patuloy lang naman sa pagta­trabaho ang Pangulo.

***

Bukod dito, sa paglipas ng mga araw ay nalilinawan ang publiko sa mga isyung ibinabato sa administrasyon. May ilan kasing isyu noong panahon na gawin ang resulta ng March survey na hindi pa lubos na nalilinawan. Kabilang na nga rito ang naganap na trahedya sa Mamasapano, Maguindanao kung saan nasawi ang 44 na ka­sapi ng Special Action Force ng Philippine National Police.

Idagdag pa ang isyu ng Bangsamoro Basic Law na itinataguyod ni PNoy dahil naniniwala siya na makatutulong ito para sa kapayapaan sa Mindanao.

Iyon nga lang, sa pag-angat muli ng ratings ni PNoy, tiyak na may ilan na hindi matutuwa -- kabilang na ang mga kritiko na umaasang tuluy-tuloy na ang pagsadsad ng marka ng Pangulo hanggang sa sumapit ang halalan sa 2016. Karaniwan nga kasing bumababa ang ratings ng Presidente kapag patapos na ang termino nito -- bagay na tila hindi mangyayari kay PNoy.

Bakit nga ba ipinagdadasal ng iba na bumaba nang husto ang tiwala ng publiko kay PNoy at dumami ang hindi na masiyahan sa kanyang trabaho? In short, bakit gusto nilang maging “lame duck” o “walang silbing” Presidente si PNoy habang papalapit ang araw na aalis na siya sa MalacaƱang?
Ang sagot, dahil sa May 2016 elections.

Hindi maaalis na may mga grupo o kandidato na ma­ngamba na iboboto ng mga tao ang sinumang mga kandidato na iendorso niya sa halalan sa iba’t ibang posisyon sa gobyerno. Kung mataas pa rin ang tiwala ng tao kay PNoy at patuloy silang nasisiyahan sa pamamahala niya, natural na pagtitiwalaan din ng mga mamamayan ang sinumang kandidato na babasbasan niya dahil inaasahan na sila ang magpapatuloy ng “daang matuwid”.

Pero sa halip na mangamba, dapat ikatuwa at suportahan ang pagtaas pa ng marka ni PNoy dahil indikasyon ito na patuloy siyang nagsisikap at nagtatrabaho para mag-iwan ng isang maayos na pamahalaan at ekonomiya para sa mga susunod na opisyal na mamumuno sa ating bansa.
Laging tandaan: “Bata mo ‘ko at Ako ang Spy n’yo.” (Twitter: follow@dspyrey)
http://www.abante-tonite.com/issue/june2615/edit_spy.htm#.VY4LzvlViko

Wednesday, June 24, 2015

Simbolo ng sining sa entablado REY MARFIL



Simbolo ng sining sa entablado
REY MARFIL


Nitong nagdaang mga taon, unti-unting umaariba ang isang uri ng sining na halos muntikan nang makalimutan ng mga Pilipino -- ang teatro. Marahil, kung hindi naging bida si Lea Salonga sa stage play na Miss Saigon sa abroad noong 1989, baka tuluyan nang nalaos sa Pilipinas ang buhay na pag-arte na may kasamang pag-awit at sayaw sa ibabaw ng entablado.

Walang duda na malaki ang naitulong ni Lea upang mapanatili sa kamalayan ng mga Pilipino ang stage o musical play. Bakit ba naman hindi, bukod sa pagiging “Kim” sa Miss Saigon, nagbida rin si Lea sa isa pang sikat na stage play na Les Miserables at nanalo siya ng best acting award sa prestihiyosong Tony Awards, ang Oscars sa teatro.

Ngunit bago pa man sa panahon ni Lea at hindi nauuso ang mga sinehan, ang stage play ang pangunahing libangan ng mga ninuno nating Pinoy. Marami sa mga batikan at beteranong artista natin ay nagmula sa pag-arte at pagsasayaw sa entablado o teatro. Katunayan, isa sa mga buhay na makapagpapatunay sa mayamang si­ning ng teatro noon ay si Kuya Germs o German Moreno.

Kaya nga lang, sa paglipas ng panahon, ang mga lugar na pinagdarausan noon ng mga teatro -- na karamihan ay nasa Recto o Avenida Avenue sa Maynila ay ginawang sinehan nang mauso na ang paggawa ng mga pelikula. At sa paglipas pa muli ng mga panahon, ang mga sinehan na ito na dating tahanan ng mga artista ng teatro ay giniba at tinayuan ng ibang gusali, kung hindi man ay nabubulok na at napabayaan.

At marahil kung hindi kumilos ang pamahalaan ni Pangulong Noynoy “PNoy” Aquino, baka ganito rin ang sapitin ng itinuturing na sentro ng sining ng teatro -- ang Manila Metropolitan Theater o MeT, na hindi kalayuan sa Manila City Hall.

***

Dahil sa kasaysayan sa likod ng MeT, idineklara itong national treasure ng National Commission on Culture and the Arts noong 2009. Ngunit gaya ng sining ng teatro, naghingalo rin ang MeT mula nang mapinsala ito noong World War II. Ilang ulit na itong inayos, isinara, inayos at hanggang tuluyang nagsara noong 2012.

Ang dating tahanan ng mga mahuhusay na alagad ng sining, naging tahanan ng mga insekto. Ang dating teatro na dinadayo ng mga manonood, mga istambay at palaboy na lang ang makikita sa labas.
Ang mga maningning na disenyo, unti-unting kumupas at nawalan ng halina.

Pero ngayon, mabibigyan ng bagong pag-asa ang MeT matapos na aprubahan ng pamahalaan ni PNoy ang pagpapalabas ng pondo para mabili ng NCCA ang gusali sa Government Service Insurance System (GSIS), na siyang nagmamay-ari na sa teatro.

Ang pondo na umaabot P270 milyon ay ibinigay ng Department of Budget and Management sa NCCA.
Ang naturang pondo ay mula naman sa National Endowment Fund for Culture and the Arts.

Kung hindi sinuportahan ni PNoy ang NCCA para mabili ang MeT, posibleng napunta ang makasaysayang teatro sa lokal na pamahalaan ng Maynila na interesado rin sa gusali. Pero sino ang nakakaalam sa kung ano ang maaaring gawin sa MeT ng mga susunod na liderato ng city hall?
Pero sa ilalim ng pangangalaga ng MeT, tiyak na mapapangalagaan ang mayamang kasaysayan nito.

Pero gaya ng stage o musical play na muling na­kabalik sa interes ng mga Pilipino, tiyak na makababalik din ang MeT at tiyak na dito na muling mapapanood ang mga palabas sa ibabaw ng entablado.
 Laging tandaan: “Bata mo ‘ko at Ako ang Spy n’yo.” (Twitter: follow@dspyrey)
http://www.abante-tonite.com/issue/june2415/edit_spy.htm

Monday, June 22, 2015

Kaliwa’t kanang pagkilala!



Kaliwa’t kanang pagkilala!
REY MARFIL



Produkto na naman ng matuwid na daan ni Pangulong Noynoy ‘PNoy’ Aquino ang malaking pagbaba sa bilang ng mga batang hindi nag-aaral noon.

Mula kasi sa 11.7 porsiyentong out-of-school youth noong 2008, naging 5.2 porsiyento na lamang ito nitong 2012.

Tinutukan kasi ni PNoy ang mga reporma sa edukasyon kaya naman nagkaroon ng magandang bunga upang lalong makapag-aral ang mga bata.

Base sa pananaliksik ng Philippine Institute for Develop­ment Studies (PIDS) at United Nations Children’s Fund (UNICEF), lumabas na nabawasan ang bilang ng mga batang may edad lima hanggang 15 na hindi nakakapag-aral.

Naiulat ang resulta ng pag-aaral sa Global Initiative on Out-of-School Children Philippine Country Study na inilabas ng UNICEF at iprinisinta mismo ng PIDS at UNICEF sa isang seminar kamakailan.

Nag-ugat ang magandang resulta sa pagkakapasa at implementasyon ng mandatory kindergarten at K to 12 Law; pagtaas sa badyet ng Department of Education; at pagpapalawak ng conditional cash transfer (CCT) program o Pantawid Pamilyang Pilipino Program kung saan hinihimok ang mga pamilya na panatilihin ang kanilang mga anak sa eskwelahan.

Sapul nang maupo si PNoy, tumaas na ng mahigit sa 15 porsiyento ang pondo ng sektor ng edukasyon alinsunod sa direktiba ng Pangulo.

Malinaw na nagbunga ng maganda ang matuwid na daan ni PNoy sa larangan ng edukasyon kaya naman maraming bata ngayon ang mga nasa eskwelahan.

Maganda talaga ang pananaw ng Punong Ehekutibo na walang maiiwan, mahirap man o mayaman sa pagkakaroon ng de-kalidad na edukasyon para sa magandang kinabukasan ng mga kabataan.

***

Inaasahan talaga ang malaking positibong pagba­bago ng Pilipinas sa estado ng Rule of Law Index 2015 o ang pagpapatupad ng umiiral na mga batas.

Sa nailabas na 2015 Rule of Law Index ng World Justice Project, nasa ika-51 na ranggo ngayon ang Pilipinas mula sa kabuuang 102 nasyon.

Naka-base sa Washington D.C. ang World Justice Project na isang independent multidisciplinary organization na tumitiyak na naipatutupad ang umiiral na mga batas sa buong mundo at itinatag noong 2006 sa tulong ng inisyatiba ng American Bar Association.

Umangat ngayon ng siyam na puwesto ang bansa na nasa ika-60 posisyon noong 2014. Kinilala ang Pilipinas bilang “most improved” na nasyon sa mga bansang kasapi ng South East Asian Nations (ASEAN) kung saan nasa ika-siyam na puwesto sa hanay ng 15 bansa sa Silangang Asya at Pasipiko ngayong 2015.

Sa ilalim ng matuwid na daan at malinis na pamamahala ni PNoy, sinabi ni American Bar Association Rule of Law Initiative Director Elizabeth Andersen na kabilang ang Pilipinas sa tatlong bansa na mayroong matagumpay na mga kuwento ng pagpapatupad ng mga batas.

Kabilang sa tinukoy ni Ms. Andersen ang mga pagba­bago sa ‘judicial at policy reforms’ ng bansa, kabilang dito ang court automation ng pamahalaang Aquino para sa Department of Justice (DOJ) at alisin ang bansa sa Intellectual Property Watch List.

Dahil sa malaking tagumpay na ito, asahan nating lalong magsusumikap si PNoy na lalo pang maisulong ang mga reporma sa pamahalaan na siguradong pakikinabangan muli ng maraming Filipino.
Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

Friday, June 19, 2015

Lalo pang sumigla!




Lalo pang sumigla!
REY MARFIL



Magandang balita na naman ang posibilidad na maaaring mabura sa kasulukuyang henerasyon ang kahirapan kung maipagpapatuloy ang paglago ng ekonomiya na itinataguyod ng malinis na pamamahala ni Pangulong Noynoy ‘PNoy’ Aquino.

Sinabi mismo ni World Bank (WB) lead economist Rogier van den Brink na umaarangkada ang ekonomiya ng bansa kahit maging lima, anim at pitong por­siyento ang paglago sa gross domestic product (GDP) ng bansa.

Ipinagmalaki ni Van den Brink na nangunguna sa mundo ang Pilipinas sa larangan ng pagsulong ng ekonomiya kung saan naitala lamang ng kanyang bansang Holland sa limang porsiyento ang pag-angat ng ekonomiya nito.

Inamin ng opisyal na nahirapan silang makita bago sumapit ang 2013 kung papaano mababawasan ang kahirapan ng bansa sa pamamagitan ng paglago ng ekonomiya ng Pilipinas.

Ngunit sapul nang sumapit ang 2013, sinabi nitong mayroong matitibay at maaasahang mga datos katulad ng surveys na nagpapakita na talagang nababawasan ang kahirapan dahil sa pagsulong ng ekonomiya.

Nabatid na bumaba ang underemployment at kahirapan at lumalaki ang kita ng mga mahihirap ng 20 porsiyento o 30 porsiyento na mas mabilis kumpara sa ibang mga bansa.

Kung magpapatuloy ang lima hanggang anim na porsiyentong paglago ng ekonomiya, nanindigan ang opisyal na mabubura ang kahirapan sa kasalukuyang henerasyon.

Posibleng-posible ang ganitong pagtataya ng opisyal lalo’t kitang-kita sa matuwid na daan ni Pangulong Aquino ang kahalagahan na mapagsilbihan ang publiko at sugpuin ang katiwalian.

***

Isa pang nakakatuwang balita ang ulat ng Philippine Statistics Authority (PSA) nitong Abril 2015 kaugnay sa malaking ibinaba ng unemployment at underemployment rates sa bansa dahil sa malinis na pamamahala ni PNoy.

Base sa ulat, bumaba sa 6.4 porsiyento nitong Abril 2015 ang unemployment rate mula sa pitong porsiyento kumpara sa parehong buwan ng 2014. Sa under­employment rate naman, bumaba ito sa 17.8 porsiyento mula sa 18.2 porsiyento sa katulad ring mga panahon.

Sa nasabing datos, nabawasan ng 243,000 Filipinos ang walang trabaho habang natapyasan ng 44,000 ang mga taong ikinukonsidera ang kanilang mga sarili bilang underemployed.

Nakakalat sa 13 mula sa kabuuang 17 rehiyon ang mga manggagawang nakinabang sa masiglang ekonomiya ng bansa kaya naman nagkaroon sila ng mas mabuting oportunidad sa hanapbuhay.
Nakatulong nang husto ang aktibong mga sektor ng serbisyo at industriya sa kabuhayan ng mga Filipino.

Nakatulong ang pagbuti ng lagay ng hanapbuhay sa bansa dahil sa matuwid na pamamahala ni Pangulong Aquino. Hindi talaga tinatantanan ng Punong Ehekutibo ang paghahabol sa tiwaling mga opisyal na nagsamantala sa kaban ng bansa.

Nandiyan rin ang patuloy na mga repormang ginagawa ng Pangulo upang lalong mapagsilbihan ang publiko, lalung-lalo na ang mahihirap na mga sektor.
Laging tandaan: “Bata mo ‘ko at Ako ang Spy n’yo.” (Twitter: follow@dspyrey)
http://www.abante-tonite.com/issue/june1915/edit_spy.htm#.VYS2u_lViko

Wednesday, June 17, 2015

Bagong rebolusyon REY MARFIL



Bagong rebolusyon
REY MARFIL

Sa kauna-unahang pagkakataon, idinaos ng pamahalaan ang selebrasyon ng Araw ng Kasarinlan ng Pilipinas sa Visayas nitong nagdaang June 12 -- partikular sa Sta. Barbara, Iloilo. Pero pagkaraan ng 117 taon mula nang makalaya tayo sa pananakop ng mga Kastila, isang celebrity ang nagtanong sa pamamagitan ng social media:
“Ano raw ba ang ipinagdiriwang nating kalayaan gayong ‘di pa raw naman malaya ang bansa natin sa utang, kahirapan, krimen at katiwalian?”

Kahanga-hanga nga ang ginagawa ni Pangulong Noynoy “PNoy” Aquino na gawin din sa labas ng Maynila ang paggunita at pagdiwang ng Araw ng Kalayaan. Mula nang maupo siyang lider ng bansa noong July 1, 2010, idinaos na ang selebrasyon ng kalayaan ng bansa sa Kawit, Cavite (2011); sa Simbahan ng Barasoain sa Malolos, Bulacan (2012); sa Liwasang Bonifacio sa Maynila (2013), at sa Naga, Camarines Sur (2014).

Pero hindi lang naman basta pinili ang mga lugar na nabanggit na pagdausan ng Araw ng Kalayaan ng bansa. Kung susuriin, ang mga nabanggit na lugar ay may mahalagang bahagi sa kasaysayan ng ginawang pakiki­paglaban ng ating mga ninuno laban sa mga mananakop. 

Gaya na lang sa Sta. Barbara, Iloilo, dito unang iwinagayway ang ating bandila sa labas ng Luzon na nangyari noong Nobyembre 17, 1898. Hudyat ito ng paghihimagsik ng mga nasa Visayas laban sa mga Kastila. At nang manaig ang rebolusyon at maitatag ang Unang Republika ng Pilipinas, kaagad ding nakiisa ang mga kasama sa kilusan.

Kaya naman marapat ang ginagawang ito ni PNoy na iikot sa iba’t ibang bahagi ng bansa ang pagdiriwang ng Araw ng Kasarinlan. Batid kasi ng Pangulo at kinikilala niya na hindi lang naman ang mga mamamayan sa Maynila o Luzon ang nag-aklas laban sa mga Kastila para mawakasan ang 300 taong pananakop nila sa ating bansa. Kasama rin sa mga nagbuwis ng kanilang buhay ang mga kababayan natin sa Visayas at Mindanao.

Katunayan sa kanyang talumpati sa selebrasyon ng Araw ng Kasarinlan sa Sta. Barbara, Iloilo, inihayag ni PNoy ang mithiin na ipagdiriwang ang 118th year ng kalayaan ng bansa sa Mindanao. Magandang plano ito kung matutuloy para sa huling mga araw ng kanyang termino bilang Pangulo ng bansa na magtatapos sa katapusan ng Hunyo 2016.

Pero sa gitna ng selebrasyon ng mga kababayan natin sa tinamasa nating kalayaan mula sa pananakop ng mga Kastila at paggunita rin sa ginawang pag-aalay ng buhay ng ating mga bayani, isang celebrity ang nag-tweet at nagtanong kung ano raw ba ang ipinagdiriwang ng bansa, “gayong hindi pa raw tayo malaya sa utang, kahirapan, krimen at katiwalian.”

***

Dahil sa post na iyon ng celebrity, hindi maiwasan na ma-bash siya o mabatikos ng mga netizen na nakakaunawa sa ibig sabihin ng kalayaan na ipinagdiriwang natin. Marami ang nagpaalala sa celebrity na ang pag-post pa lang niya ng natu­rang tanong ay isa nang dahilan para ipagdiwang ang Araw ng Kalayaan -- dahil may kala­yaan siyang magpahayag.

Kung may bumatikos sa celebrity, mayroon din namang nagdepensa. Tama lang naman daw na punahin ang pagkakatali ng bansa sa utang, kahirapan, katiwalian at krimen. May iba naman na nagsabing ang ipinagdiriwang natin ng June 12 ay paglaya natin sa dayuhang mananakop -- na paalala upang magkaisa ang mga Pilipino upang hindi na muling maulit pang masakop tayo ng mga dayuhan.

Sa huli, magandang nagkakaroon ng diskusyon tungkol sa usapin ng ating kasarinlan. Pagpapakita ito ng sadyang may kalayaan tayo na magbigay ng ating sa­riling pananaw nang walang kinatatakutan -- hindi gaya noong panahon din ng diktaduryang rehimen na bawal ang magsalita nang laban sa gobyerno.

Laging tandaan: “Bata mo ‘ko at Ako ang Spy n’yo.” (Twitter: follow@dspyrey) 
http://www.abante-tonite.com/issue/june1715/edit_spy.htm#.VYIZCflViko

Monday, June 15, 2015

Mayaman ang karagatan ng Pilipinas REY MARFIL



Mayaman ang karagatan ng Pilipinas
REY MARFIL



May isa na namang bagay na dapat ipagmalaki ang mga Pilipino -- at dapat ding ikabahala: ang pagkakatuklas ng mga American scientist kung gaano kayaman sa yamang-dagat ang Pilipinas.

Sa isang ulat kasi na inilathala sa website ng California Academy of Sciences, inilabas nila ang mahigit 100 bagong marine species na nadiskubre nila sa ilalim ng karagatan ng ating bansa. Ang mga bagong uri ng marine species o mga nilalang na nabubuhay sa ilalim ng ating karagatan ay bunga daw ng ilang buwan na paghalughog nila sa bahagi ng karagatan ng Pilipinas na tinatawag na Verde Island Passage sa Luzon, partikular ang malapit sa Mindoro at Romblon.

Masaya ang mga siyentista sa kanilang natuklasan sa Pilipinas dahil kasama pala ang bansa natin sa ilan pang bansa -- kabilang ang Indonesia, Malaysia, the Philippines, Papua New Guinea, Timor Leste at So­lomon Islands -- sa tinatawag nilang The Coral Triangle, na pakay ng kanilang pag-aaral. 

Hindi kasama ang China.

Kabilang sa kanilang mga nakita ay mga pambihira at mga bagong species ng makukulay na sea slugs, heart urchins, barnacles, ilang isda, corals at iba pa. May mga nilalang sa ilalim ng dagat na sinasabing nagliliwanag sa dilim gaya ng jelly fish ay kasama sa mga nadiskubre.

At sa kanilang mga nadiskubre sa Pilipinas, labis na namangha ang mga siyentista. Sabi ng principal investigator ng expedition na si Terry Gosliner, senior curator of invertebrate zoology sa California Academy of Sciences: “The Philippines is jam-packed with diverse and threatened species -- it’s one of the most astounding regions of biodiversity on Earth.”

***

Plano rin ng akademiya na magbukas ng tinatawag nilang Twilight Zone aquarium exhibit para makita ng publiko ang mga nilalang sa malalim na bahagi ng dagat. Kung makikita raw ng publiko ang mga nilalang ng dagat na ito, mas mauunawaan daw natin kung bakit kailangan nating pangalagaan ang karagatan. 

Kung tutuusin, marami sa ating mga Pinoy at maging ang pamahalaan ni Pangulong Noynoy “PNoy” Aquino ay masigasig sa pagsusulong ng mga programa para protektahan ang ating karagatan dahil na rin sa pinagkukunan ito ng kabuhayan at ikabubuhay.

Sabi ni Bart Shepherd, director ng Steinhart Aquarium, “Most of what we observe and collect is so special -- and often new to science.”

Sana ituloy nila ang kanilang planong ipakita sa publiko ang mga magagandang nakita nila sa ilalim ng dagat ng Pilipinas. At unahin nilang ipa-exhibit ito sa China para ipaunawa sa kanila na hindi nila dagat ang winawasak na corals sa West Philippine Sea na hinahakot ng kanilang mga mangingisda at mga nasisira sa ginagawa nilang mga isla.

Ang delikado lang dito, ngayong alam na nila kung saan lugar pa sa Pilipinas na may mayamang yaman ng dagat, baka isama na rin nila ito sa kanilang mapang made China na “nine dash line” kuno.
Laging tandaan: “Bata mo ko at Ako ang Spy n’yo.” (Twitter: follow@dspyrey)

Friday, June 12, 2015

Pasisiglahin pa lalo ang ekonomiya



Pasisiglahin pa lalo ang ekonomiya
REY MARFIL


Habang pulitika na ang simoy ng hangin sa ilan dahil sa nalalapit na 2016 national elections, pagpapalakas pa lalo ng ekonomiya ang nasa isipan naman ni Pangulong Noynoy ‘PNoy’ Aquino para makalikha pa ng mas maraming trabaho sa mga Pilipino sa nalalabing panahon ng kanyang liderato.

Kamakailan lang, kaagad na pinulong ni PNoy ang kanyang gabinete matapos maitala ang mababang 5.2 percent na paglago ng ekonomiya sa unang tatlong buwan ng 2015. Ito na ang itinuturing pinakamababang paglago ng ekonomiya sa bawat bahagi ng taon mula noong 2012.

Kung tutuusin, mataas pa rin naman ang naturang paglago pero nais ni PNoy na mapantayan kung hindi man mahigitan ang karaniwang nasa anim na porsiyentong taunang paglago ng ekonomiya na naitatala sa ilalim ng kanyang halos limang taong liderato.

Ang pagbaba ng growth rate sa unang tatlong buwan ng kasalukuyang taon ay iniuugnay sa mahinang paggastos ng pamahalaan. Kaya naman sa pamamagitan ng nasabing pagpupulong ng gabinete, inatasan ni PNoy ang kanyang mga opisyal na maglatag ng mga programa upang matiyak na makababawi sa mga susunod na buwan para makamit ang target na pito hanggang walong por­siyento ng paglago ng ekonomiya sa pagtatapos ng 2015.

Seryoso at pursigido ang pamahalaan na makamit ang inaasam na paglago ng ekonomiya at maibahagi ito sa mga Pinoy na lubhang nangangailangan. Bukod sa pagtiyak na maibibigay sa mga mamamayan ang mga pangunahing serbisyo at pangangailangan, ang pagkakaloob ng mga trabaho sa mga tao ang nais na mangyari ni PNoy.

Hindi naman bigo ang Pangulo sa hangarin niyang ito, batay na rin sa pinakabagong ulat na inilabas ng Philippine Statistics Authority (PSA) tungkol sa Labor Force Survey para sa unang bahagi ng taon.

Bagaman lumitaw na mas mababa kumpara sa ina­asahan ang paglago ng ekonomiya sa unang bahagi ng 2015, naitala naman ng PSA na nadagdagan ang mga Pinoy na may mga trabaho sa isinagawang LFS nitong Abril.

***

Mula sa seven percent na unemployment rate noong nakaraang taon, napanatili ito sa 6.4 percent. Ang mga tinatawag na underemployed, o iyong mga manggagawa na nagha­hanap ng karagdagang oras ng trabaho para madagdagan ang kita, naibaba sa 17.8 percent mula sa dating 18.2 percent.

Indikasyon ito na ang mga dating underemployed ay posibleng nakahanap na ng mas mahusay na trabaho na makasasapat sa kanilang pangangailangan. Kaya naman hindi na nila kailangang maghanap ng iba pang trabaho o dagdag na oras ng mapagtatrabahuhan para ma­dagdagan din ang kanilang kita.

Ayon kay Socioeconomic Planning Secretary at NEDA Director General Arsenio Balisacan, makakamit at maaaring mahigitan ng pamahalaan ang inaasinta nitong bilang ng trabaho na malilikha at maibibigay sa mga kababayan ngayong taon.

At dahil dumadami rin ang mga kabataan na edad 15 at pataas sa puwersa ng lakas-paggawa sa bansa, napa­panahon talaga ang pagpapatupad ng K to 12 program upang ma­bigyan na kaagad ng sapat na kaalaman at kasanayan ang mga mag-aaral sa senior high school para maihanda sila sa mundo ng paggawa sa darating na mga panahon.

Kung magpapatuloy ang paglago ng ekonomiya na siyang pakay ng ipinatawag na pulong ni PNoy sa mga kasapi ng gabinete, malamang na maging mas maganda talaga para sa mga Pilipino ang pagtatapos ng 2015. Ipagdasal na lang natin na wala sanang matinding kalamidad na dumating sa bansa -- gawa man ng tao o kalikasan.
“Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

Wednesday, June 10, 2015

VFA ng Pilipinas at Japan



VFA ng Pilipinas at Japan
REY MARFIL



Isa sa mga natalakay sa matagumpay na 4-day State Visit ni Pangulong Noynoy ‘PNoy’ Aquino sa Japan kamakailan ay ang posibleng pagkakaroon ng sariling bersyon ng Visiting Forces Agreement (VFA) ng dalawang nabanggit na bansa, na natural ay hindi magugustuhan ng China.

Maganda ang ginawang pagbisita ni PNoy sa Japan kamakailan dahil pinalakas nito ang ugnayang pangkalakalan at diplomatiko ng dalawang bansa. Malaking puhunan ang ipinangakong ilalagay ng ilang negosyanteng Hapon sa Pilipinas na tiyak na magdudulot ng dagdag na trabaho sa ating mga kababayan.

Bukod sa negosyo, tiyak na malaki rin ang maitu­tulong ng pagpapatibay ng relasyon ng Japan at Pilipinas sa larangan ng turismo ng dalawang bansa. Katunayan, sa nakalipas na mga taon, kapwa dumami ang turistang Pinoy sa Japan, gayundin ang pagdagsa ng mga Hapon na turista dito naman sa Pilipinas.

Nakatutuwang isipin na ang dating magkalabang bansa noong World War II ay nagtutulungan na ngayon. Hindi maitatanggi na sa nakalipas na mga panahon ay malaki ang naging kontribusyon ng Japan sa maraming proyektong pang-imprastruktura sa Pilipinas na napondohan mula sa pautang ng Japan, na may mababang interes lang.

At kahanga-hanga rin sa Japan ang naging mabilis nilang pagbangon sa sinapit nilang kalamidad dulot ng lindol at tsunami. Ito’y dahil na rin sa kanilang disiplina at tunay na pagkakaisa bilang isang bansa. Kaya kahit dumanas sila ng matinding kalamidad, hindi pa nila nakalimutang tumulong sa ating bansa nang tayo naman ay bayuhin ni Yolanda.

Sa tulong at suportang ibinibigay ng Japan sa Pilipinas, walang kaduda-duda na isa silang bansang kaalyado ng mga Pilipino, na gaya ng Amerika. Kaya naman nang bumisita si PNoy sa Japan, kabilang sa mga natalakay ay ang posibleng pagkakaroon ng Pilipinas at Japan ng pagsasanay militar gaya ng ginagawa ng Pilipinas at Amerika, na tinatawag na Visiting Forces Agreement.

***

Gaya ng PHL-US Balikatan, ang pagsasanay ng militar ng dalawang bansa ay hindi lamang sa posibleng pagsabak sa digmaan. Daan din ito para palakasin pa lalo ang ugna­yan ng dalawang bansa, makapagbahagi ng kani-kanilang kaalaman at paghahanda sa pagtugon sa iba pang posibleng mangyari tulad ng pagtugon sa kalamidad.

Hindi naman maikakaila na malaki at naging mabilis ang pagdating ng ayuda ng US sa Pilipinas nang tumama ang bagyong Yolanda para makapagligtas ng maraming buhay. At kung kagamitan din lang naman ang pag-­uusapan, natural na mas moderno ang mga gamit ng Japan (gaya ng US) na tiyak na makatutulong sa ating puwersa para madagdagan ang kanilang kaalaman.

Pero gaya ng pagbabalikatan ng PHL at US, kaagad na nagpahayag ng pagtutol ang China sa mungkahing PHL-Japan VFA. Hindi raw makatutulong sa luma­lalang tensyon sa West Philippine o South China Sea ang mga pagbuo ng alyansang militar.

Teka, sino ba ang puno’t dulo o ugat ng paglala ng tensyon sa WPS? Hindi ba ang China dahil sa mapa nilang made in China na “nine-dash line” na inaangkin ang halos buong WPS at isama pa diyan ang ginagawa nilang reclamation ng mga isla.

Baka naman naiinggit ang China sa Pilipinas dahil may mga kaibigan tayong bansa na handang makipagtulungan sa atin.

Ang mabuti pa, itigil na ng China ang pagiging “bully” nila sa Asya. Maging magandang ehemplo sila ng kapayapaan at pagkakaisa sa mundo at magsilbing big brother ng mga bansa sa Asian region. Kapag ginawa nila iyan, baka maisipan ng mga lider natin na magkaroon ng VFA version ng PHL at China sa hinaharap. “
Laging tandaan: “Bata mo ‘ko at Ako ang Spy n’yo.” (Twitter: follow@dspyrey)
http://www.abante-tonite.com/issue/june1015/edit_spy.htm#.VXjvr89Viko

Monday, June 8, 2015

May magpapatuloy!



May magpapatuloy!
REY MARFIL


Hindi ba’t kapuri-puri ang kautusan ni Pangulong Noynoy ‘P-Noy’ Aquino sa Department of Social Welfare and Development (DSWD) na ipagpatuloy ang pagka­kaloob ng kabuhayan sa 90,078 pamilyang naapektuhan ng super typhoon Yolanda sa Leyte sa ilalim ng Sustainable Livelihood Program (SLP).

Batid ni Pangulong Aquino ang kahalagahan na maibigay pa rin ang ayuda kung saan nakapaglaan na ang DSWD ng P547 milyon para sa implementasyon ng SLP ngayong taon.

Malaki kasi ang magagawa ng patuloy na pagtulong ni Pangulong Aquino para makaahon sa kahirapan ang mga pamilyang nasalanta ng bagyo.

Pinangunahan ni DSWD Assistant Secretary Camilo Gudmalin ang isang seminar sa ilalim ng Accelerated and Sustainable Anti-Poverty Program (ASAPP) ng Human Development and Poverty Reduction (HDPR) Cluster.

Isinagawa ang workshop sa Palo, Leyte na inorganisa ng DSWD bilang pinuno ng HDPRC para matulungan lalo ang mga biktima ng bagyong Yolanda.

Dinaluhan ang seminar ni Leyte Governor Dominic Petilla, 40 alkalde ng lalawigan, 26 na pinuno at kinatawan ng pambansang ahensya.

Sa workshop, tinukoy ng local government units (LGUs) ang pangunahing mga negosyo na mayroong kakayahan na magbigay ng trabaho habang inilatag naman ng mga kinatawan ng pambansang ahensya ang kani-kanilang mga programa kontra kahirapan.

Kabilang sa mga sektor na puwedeng pasukin para sa hanapbuhay ang eco-tourism at agrikultura para sa munisipalidad ng Kananga; produksyon ng chicharon sa Tunga; pag­linang ng pantalan sa San Isidro, Calubian, at Tabango; water-refilling, hot spring development, at pagpapalawak ng elektripikasyon sa Burauen; soft broom at hollow block-making sa Julita; at eco-tourism at peanut production sa Dulag.

Hindi natutulog ang pamahalaan sa pagtiyak ng ka­galingan at interes ng mga nasalanta ng bagyong Yolanda.

***

Hindi madali ang kampanya na burahin ang katiwalian sa pamahalaan. Hindi talaga sapat ang anim na taong termino ng isang matinong lider para bunutin ang malalim na ugat ng korupsyon sa bansa na ilang dekada nang nakabaon.

Gayunman, sabi nga ng mga matatanda -- kung hindi man matapos kaagad ang isang gawain, ang ma­halaga ay nasimulan na.

Si PNoy na rin mismo ang nagsabi na hindi ang ikalawang termino ang solusyon para magpatuloy ang mga reporma na kanyang nasimulan. Hindi katulad ng ibang lider, hindi ganid sa kapangyarihan ang Pangulo.

Tulad ng kanyang namayapang ina na si dating Pa­ngulong Cory Aquino, pinili ni PNoy na mag-iwan na lang ika nga ng legacy at ang kanya ng mga “boss” na ang bahalang magpatuloy.

Kung demokrasya ang iniwan ng legacy ni Tita Cory, masasabi natin na matatag na ekonomiya at paglaban sa katiwalian ang iiwan na marka ng administrasyon ni PNoy kahit may mahigit na isang taon pang natitira sa kanyang termino.

Sa ilalim ng panunungkulan ni PNoy, nasampahan ng kasong pandarambong at katiwalian ang maraming opisyal, kabilang na si dating Pangulong Gloria Arroyo at ilang senador. Kahit ang ilang kaalyado niya sa pulitika na nabahiran ng pagdududa ang kredibilidad dahil sa usapin ng katiwalian at kapabayaan sa pamamahala ay hindi nakaligtas.

Sa usapin ng ekonomiya, bumalik na ang kumpiyansa at tiwala ng mundo para mamuhunan sa Pilipinas. Bu­nga ito ng pagkakaroon ng matatag na pulitika sa bansa, pagiging mapayapa at patas sa paglalagak ng negosyo. Kaliwa’t kanan ang natanggap na “credit upgrade” ng Pilipinas sa mga pandaigdigang financial institution. Pagpapatunay ng kanilang tiwala sa katatagan ng bansa sa ilalim ni PNoy.
Laging tandaan: “Bata mo ‘ko at Ako ang Spy n’yo.” (Twitter: follow@dspyrey)

Friday, June 5, 2015

Napakalayo na!



Napakalayo na!
REY MARFIL


Nakakabilib ang malinis na pamamahala ni Pangulong Noynoy ‘PNoy’ Aquino na nagresulta upang lumago ng 7.3 porsiyento ang ekonomiya ng bansa sa unang quarter ng taon base sa Moody’s Analytics.

Kinumpirma ng Moody’s Analytics ang patuloy na paglago ng ekonomiya ng bansa sa ilalim ng matuwid na daang kampanya ni Pangulong Aquino.

Isang think tank ang Moody’s Analytics na kaalyado ng Moody’s Investors Service, isa sa tatlong panguna­hing credit rating agencies sa buong mundo.

Hindi naman nakakapagtaka na lumago sa unang tatlong buwan ng taon ang gross domestic product (GDP) ng bansa dahil sa sobrang laki ng tiwala ng mga namumuhunan kay PNoy.

Asahan nating gagawing inspirasyon nina National Economic and Development Authority Director General Arsenio Balisacan at Philippine Statistics Autho­rity (PSA) National Statistician Lisa Grace Bersales ang magandang 2015 First Quarter Performance of the Philippine Economy para lalong makinabang ang mga Filipino.

***

Kinilala ng Moody’s Analytics ang pagtutok nang husto ni Pangulong Aquino sa pamumuhunan sa pagtatayo ng mga imprastraktura kaya lalong umangat ang ekonomiya ng bansa.

Nakita rin ng Moody’s ang malakas na pagluluwas ng bansa ng electronics dahil sa lumalakas na pangangaila­ngan sa buong mundo lalung-lalo na sa Estados Unidos.

Maganda rin ang naging pakinabang ng bansa sa mababang presyo ng mga produktong petrolyo kaya malaki ang kanilang natipid sa konsumo.

Dahil sa 7.3 porsiyentong pagsikad sa ekonomiya ng bansa, malaki ang maitutulong nito upang makamit ang target ng administrasyong Aquino na 7 hanggang 8 porsiyentong paglago ng ekonomiya ng bansa.

Sa pagtatapos ng 2014, nakapagtala ang Pilipinas ng 6.1 porsiyentong paglago ng ekonomiya.

Noong 2014 rin, kinilala ang Pilipinas bilang ikatlong bansa na nakapagtala ng pinakamabilis na pag­lago ng GDP kumpara sa mga ekonomiya ng Asia-­Pacific Economic Cooperation (APEC), kasunod ng Papua New Guinea at China.

Hindi nakakapagtaka na lalong bumuti ang lagay ng buhay ng maraming pamilyang Pilipino dahil sa ma­linis na pamamahala ni PNoy.
Laging tandaan: “Bata mo ‘ko at Ako ang Spy n’yo.” (Twitter: follow@dspyrey)
http://www.abante-tonite.com/issue/june0515/edit_spy.htm#.VXGfTM9Viko

Wednesday, June 3, 2015

Hinog sa karunungan, hinog sa kaalaman REY MARFIL





Hinog sa karunungan, hinog sa kaalaman
REY MARFIL


Sa pagbubukas ng klase para sa 2015-2016 school year, maraming mag-aaral ang tiyak na excited o sabik sa kanilang pagbabalik sa silid-aralan, makita ang mga kaibigan at magkaroon ng mga bagong kaibigan. Ito rin ang pagkakataon para masubukan ang isinusulong na programa ng pamahalaang Aquino na K to 12 Program.

Ang K to 12 ay alinsunod sa Enhanced Basic Education Act of 2013, na ang layunin ay mapahusay pa lalo ang sistemang pang-edukasyon at maging ang kasanayan ng mga kabataan habang maaga para maihanda sila sa tunay na mundo ng lakas-paggawa.

Batay sa anunsyo ng Department of Education, nasa 23 milyong mag-aaral ang papasok sa elementarya at high school ngayong pasukan. Sa Metro Manila, inaasahan na mas mataas ang bilang ng mga mag-aaral ngayong pasukan ng hanggang 250,000.

Ayon mismo kay DepEd Sec. Armin Luistro, kumpara sa nakaraang tatlo o apat na taon, mas maayos na at organisado ang pagbubukas ng klase ngayong taon. Ito’y bunga na rin sa pagtugon ng pamahalaang Aquino sa mga inabutang problema na iniwan ng nakaraang administrasyon gaya ng kakulangan sa mga guro, silid-aralan, libro at upuan.

Pero bukod sa karunungan na matututunan sa loob ng paaralan, nais din ng pamahalaang Aquino na hubugin ang kasanayan ng mga mag-aaral sa ilalim ng K to 12 Program. Pangunahing layunin ng programa na maireporma ang nakagisnang 10-year basic education cycle. 

Sa ilalim ng programang ito, tututukan ang pagsasanay ng kabataan para maihanda ang mga mag-aaral sa elementarya sa pagtapak nila sa high school, at mga magtatapos naman sa high school, maihanda ang sarili sa pag-akyat nila sa kolehiyo, at maging sa pagsabak nila sa pagtatrabaho kung kanilang nanaisin.

***

Sa totoong buhay, may mga pamilya na hindi sapat ang ikinabubuhay ng magulang para mapag-aral sa kolehiyo ang anak. Kaya may mga kabataan na nagtapos sa high school na natitigil sa pag-aaral, hindi nakakaakyat sa kolehiyo at napapasabak sa trabaho para makatulong sa magulang. Ngunit dahil hindi sapat ang kanilang kasanayan sa pagtapak sa mundo ng lakas-paggawa, kung anu-anong trabaho ang kanilang sasadlakan at kung minsan ay naiisahan pa ng kanilang employer.

Sa ilalim ng K to 12 Program, ang dalawang taon na madadagdag sa pag-aaral ng mga estudyante ay kapapalooban ng mga kasanayan ng elective subjects na maaaring mahasa kaagad ang kanilang husay tulad sa electronics, dress-making, agricultural at iba pa. Kung tutuusin, noon pa naman ay mayroon nang mga ganitong asignatura sa public school pero dahil sa kakula­ngan ng panahon sa pagtuturo at sapat na pondo ay natigil.

Sa isang talumpati ni Pangulong Noynoy “PNoy” Aquino, malinaw at simpleng paliwanag niya kung bakit nararapat na ipagpatuloy ang programa -- makatutulong ito para natural na mahinog ang kasanayan ng mga kabataan at hindi gaya ng mga prutas na kung tawagin ay hinog sa pilit o kinalburo.

Kaya ang isang nagtapos sa high school sa ilalim ng K to 12 Program, maaari na siyang magtrabaho kung nanaisin niya para matustusan ang p ag-aaral sa kolehiyo o kung nais niyang lubos na matulungan ang kanyang pamilya. 

Hindi natin maaalis na may mga tututol sa K to 12 dahil sa iniisip nilang dagdag na dalawang taon na gastos sa pag-aaral ng mga kabataan. Pero sa halip na isi­pin ang gastos, isipin natin na dagdag na puhunan ito ng ating kabataan para sa mas maganda nilang kinabukasan.
Laging tandaan: “Bata mo ko at Ako ang Spy n’yo.” (Twitter: follow@dspyrey)
http://www.abante-tonite.com/issue/june0315/edit_spy.htm#.VW8DXM9Viko

Monday, June 1, 2015

Iba ngayon! REY MARFIL



Iba ngayon!
REY MARFIL

Hindi ba’t kapuri-puri ang matuwid na daan ni Pa­ngulong Noynoy “PNoy” Aquino na nagresulta upang magkaroon ng P36.857 bilyong kita para sa kaban ng bayan o remittances ang tinatawag nating government-owned and controlled corporations (GOCCs).

Sa nakalipas na administrasyon, kadalasang ginagawang gatasan ng ilang ganid na mga opisyal ang GOCCs para magkaroon sila ng malaking suweldo at mga benepis­yo kaya naman halos wala nang napupunta para sa mga serbisyo sa bayan.

Kaya matapos ibuking ng Pangulo sa kanyang kauna-unahang State of the Nation Address (SONA) noong 2010 ang “panggagatas” sa GOCCs, agarang binuo nito ang Governance Commission for GOCCs (GCG) upang siguruhing bayan ang makikinabang at hindi iilang mga opisyal ng pamahalaan.

Matinding reporma talaga ang ipinakita ng Pangulo matapos umabot ang kita ng GOCCs sa P131.28 bilyon mula 2010 hanggang sa kasalukuyan kumpara sa nakolektang P84.18 bilyon mula 2001 hanggang 2009 o siyam na taong panunungkulan ng administrasyong Arroyo.

Lalong hinimok ng Pangulo ang GOCCs na magsumikap upang maging P160 bilyon ang kita nito at doblehin ang P84.18 bilyong naitala ng nakalipas na pamahalaan. Kapuri-puri ang magandang ginawa ng Government Service Insurance System (GSIS) na naitaas sa P131 bilyon ang kita nito noong nakalipas na taon kumpara sa P64 bilyon noong 2010.

Kaya naman napabilib ni GSIS president at general manager Robert Vergara at ng kanyang grupo si Pangulong Aquino.

Lumaki rin ang ari-arian ng GSIS sa P506 bilyon noong 2010 hanggang P910 bilyon nitong 2014 habang naitala sa P84 bilyon ang “claims at benefits” noong 2014 mula sa P46 bilyon noong 2010. Sa matuwid na daan ng Pangulo, talagang bayan ang nakikinabang nang husto at hindi lamang iilang mga opisyal ng pamahalaan.

***

Hindi naman nakakapagtakang bumaba ang insidente ng kagutuman sa bansa dahil laging tinitiyak ni PNoy na parte ng mga prayoridad ng pamahalaan ang pagsugpo sa kahirapan.

Tama ang resulta ng Social Weather Stations (SWS) survey na bumaba sa 13.5 porsiyento nitong Marso 2015 ang mga Filipino na nakaranas ng kagutuman mula sa 17.2 porsiyento noong Disyembre 2014. Nakakabilib ang resulta ng pananaliksik ng SWS dahil ito ang pinaka­mababang antas na naitala sa nakalipas na 10 taon.

Sa pagtataya ng SWS, umaabot sa 800,000 na pamilya ang hindi na nakaranas ng kagutuman base sa 3.7 porsi­yentong pagbaba ng nasabing problema.

Namamayagpag kasi sa “Tuwid na Daan” ng Pangulo ang Pantawid Pamilyang Pilipino Program na labis na nakakatulong sa mga mahihirap.

Pakay ng Pangulo sa programa na itaas ang kalidad ng buhay ng mga mahihirap upang magkaroon sila ng positibong pananaw at panibagong oportunidad sa buhay sa pamamagitan ng social services.

Bagama’t isang taon na lamang ang nalalabi sa termino ni Pangulong Aquino, asahan nating lalong pagbubutihin nito ang paglilingkod para sa kapakinabangan ng mas nakakaraming sektor. Laging tandaan: “Bata mo ‘ko at Ako ang Spy n’yo.” (Twitter: follow@dspyrey)
http://www.abante-tonite.com/issue/june0115/edit_spy.htm#.VWxaUM9Viko