Friday, May 31, 2013

Ayaw ni PNoy!


Ayaw ni PNoy!
REY MARFIL


Hindi ba't kapuri-puri ang desisyon ni Pangulong Noynoy 'PNoy' Aquino na lagdaan ang Administrative Order (AO) No. 38 na lumikha sa Task Force on Ease of Doing Business (EODB Task Force) na naglalayong pabilisin ang proseso ng pagtatayo ng negosyo sa bansa?
Panibagong reporma na naman ito na siguradong magpapataas sa "competitiveness ranking" ng bansa sa buong mundo at lalo pang mapabuti ang pagkakaroon ng negosyo sa bansa.
Ginawa ang bagong plano ng National Competitiveness Council (NCC) at nakikita itong susi upang lalong umangat ang estado ng bansa sa survey lalo't mandato nitong ipatupad nang buo ang Gameplan for Competitiveness na inendorso ng Economic Development Cluster.
Sa ngayon, nasa ika-138th mula sa hanay ng 185 mga bansa ang ranggo ng Pilipinas sa buong mundo, ikawalo sa kabuuang 10 kasaping Association of South East Asian Nations (ASEAN) sa isinagawang Doing Business Survey (DBS) ng World Bank International Finance Corporation (IFC).
Isang estratehiya ang Gameplan for Competitiveness na naglalatag ng reporma para mapabuti ang serbisyo ng mga ahensya ng pamahalaan base sa 10 indicators na nagiging batayan sa magiging estado ng bansa sa DBS.
Tutukuyin rin dito ang pangunahing mga lugar para lumahok ang pribado at pampublikong mga sektor upang mapataas ang ranggo sa pandaigdigang kakayahan ng bansa sa negosyo.
Sinusukat ng IFC survey ang regulasyon sa negosyo sa pamamagitan ng 10 indicators na kinabibilangan ng pagsisimula ng negosyo, pagkuha ng mga permiso, pagkakaroon ng kuryente, pagrehistro ng mga ari-arian, pagkuha ng utang, proteksyon sa mga mamumuhunan, pagbabayad ng buwis, pakikipagpalitan ng kalakal, implementasyon ng mga kontrata at pagresolba sa mga nabangkarote.
Sa ilalim ng AO No. 38, pangungunahan ang task force ng kalihim ng Department of Trade and Industry (DTI) kung saan magiging kasapi naman ang mga kinatawan ng NCC; Departments of Finance (DOF), Interior and Local Government (DILG), at Justice (DOJ); Bureaus of Internal Revenue (BIR) at Customs (BOC); Land Registration Authority (LRA); Credit Information Corp. (CIC); Securities and Exchange Commission (SEC); Social Security System (SSS); Home Development Mutual Fund (HDMF); at Philippine Health Insurance Corp. (PHIC).
Maganda rin ang panawagan ni PNoy para sa partisipasyon at ayuda ng kinauukulang mga lokal na pamahalaan, pribado at mga pampublikong mga institusyon, kabilang ang government-owned and controlled corporations (GOCCs) sa implementasyon ng programa na nakapaloob sa Gameplan for Competitiveness para sa lalong ikatatagumpay ng mga reporma.
Siguradong maisusulong ng hakbang na ito ang mas ma­tingkad na promosyon ng transparency at epektibong transaksyon sa negosyo.
***
Bagama't maganda ang layunin ng mga nagtutulak sa Charter Change (Cha Cha), walang choice ang publiko kundi suportahan ang paninindigan ni PNoy na ibasura ang panibagong panawagan para amyendahan ang ilang probisyon sa ekonomiya ng Saligang Batas ng 1987.
Sa paningin ng ilan, maraming butas ang Saligang Batas at napapanahon ang pagretoke, subalit iba ang pananaw ni PNoy, katulad ang paniniwalang hindi naman kailangan pang amyendahan ang Konstitusyon para lamang makaakit ng mga mamumuhunan sa panahong patuloy na lumalago at lumalakas ang ekonomiya ng bansa.
Nais ng mga mambabatas sa pangunguna nina Speaker Feliciano 'Sonny' Belmonte at Senate President Juan Ponce Enrile na isulong ang Charter Change (Cha Cha) at puntiryang luwagan ang ilang probisyon sa Konstitusyon na nagbabawal sa mga dayuhan na mag-ari ng lupa sa bansa.
Sa pananaw ni PNoy  mas mabuting tutukan sa nga­yon ang pagresolba sa krisis na may kinalaman sa red tape, kapayapaan at kaayusan, at kawalan ng imprastraktura.
Laging tandaan: "Bata mo ko at Ako ang Spy n'yo." (mgakurimaw.blogspot.com)

Wednesday, May 29, 2013

Magbasa at magsulat!



Magbasa at magsulat!
REY MARFIL


Isang nakakaantig na larawan ang naging viral sa social networking site na Facebook kamakailan na nagpapakita ng larawan ng isang gusgusing bata, na nakayapak, at nakasalampak sa sahig.
Ang kakaiba sa larawang ito, nakasalampak ang musmos na bata hindi sa sahig ng bangketa kundi sa loob ng isang book store.
Nasa loob ng book store ang mukhang pulubing bata hindi para manglimos kundi para magbasa ng libro. Dahil hindi naman tayo araw-araw na nakakakita ng “book worm” na pulubi, naging pambihira ang larawan kaya mabilis itong kumalat sa internet.
Katunayan, na-feature rin ang bata sa isang television network, na indikasyon na sadyang kakaiba ang ipinakitang interes ng bata.
Bakit nga ba pumatok sa paningin ng marami ang larawan ng bata na marahil ay nasa pito (7) o walong (8) taon pa lamang?
Una, hindi maganda ang damit niya at walang sapin sa paa pero pinayagan siyang makapasok sa book store at magbasa ng libro; ikalawa, libro ang tangan ng bata, gayung ang kadalasan na pulubi na ating nakikita sa kalye, kundi man namamalimos ay sumisinghot ng solvent o rugby.
Samantala, masdan din naman natin ang mga batang maayos o magaganda ang kasuotan at sapatos na nasa mall, marahil sa 10 bata, masuwerte na tayo kung makakita ng isa na nagbabasa ng libro sa loob ng book store. Tiyak kasi na ang dala nila at pinagkakaabalahan, kung hindi cellphone, iPad o kaya ay tablet, at busy sa paglalaro ng games.
Sa isang bansa na katulad natin na mayroon pa ring mga lumalaki na hindi marunong bumasa at sumulat, magandang ehemplo ang ipinakita ng batang gusgusin na nagbabasa ng libro sa loob ng book store.
***
Napag-usapan ang bata, magandang hakbang rin ang ginawang paglagda ni Pangulong Noynoy “PNoy” Aquino sa Republic Act 10556 na nagdedeklara bilang “Araw ng Pagbasa” ang Nobyembre 27, na kaarawan ng kanyang namayapang ama na si dating Senador Benigno “Ninoy” Aquino, Jr.
Sa ilalim ng nabanggit na bagong batas, inaatasan ang Department of Education (DepEd) na pangunahan ang story-telling at reading sessions sa lahat ng elementary at secondary schools sa buong bansa.
Ang pagbabasa ay maaaring gawin sa regional languages o dayalekto sa lugar na mas madaling mauunawaan ng mga bata, bukod pa siyempre ang Filipino at English.
Sa pamamagitan ng nasabing batas, inaasahang makatutulong ito para mapaunlad ang interes ng mga kabataan sa pagbabasa at mapalaganap rin at mapreserba ang kulturang Pilipino, maging ang ginawang pag-aalay ng buhay ni Ninoy para sa demokrasya ng bansa.
Kaysa nga naman lumabo ang mga mata ng mga bata ngayon dahil sa paglalaro ng Candy Crush at kung anu-ano pang electronic games, hindi ba’t mas magiging kapaki-pakinabang sa kanilang paglaki ang matuto silang bumasa?
Sa tumitinding kompetisyon sa mundo ng labor market, bago natin problemahin ang tinatawag na “mismatch” o hindi tugmang kurso na kinuha ng aplikante sa bakanteng trabaho, dapat na tutukan muna ang pangunahing usapin sa paghahanda sa ating kabataan sa edukasyon ang matuto silang bumasa at sumulat.

Laging tandaan: “Bata mo ‘ko at Ako ang Spy n’yo.” (mgakurimaw.blogspot.com)

Friday, May 24, 2013

Mamuhunan sa edukasyon!


Mamuhunan sa edukasyon!
REY MARFIL


May kasabihan ang ating mga nakatatanda: "Mag-aral habang bata pa dahil ito lamang ang kayamanan na maipamamana ng ating mga magulang na hindi mananakaw ninuman."
Ngayon, ang pamanang ito ay nais dagdagan ng pamahalaan sa pamamagitan ng K to 12 Program.
Kamakailan lang ay nilagdaan na ni Pangulong Noynoy "PNoy" Aquino ang batas na inaasahang magsisilbing pundasyon para sa mas magandang kinabukasan ng ating mga kabataan, ang Enhanced Basic Education Act of 2013 o mas kilala bilang ang K to 12 Act.
Sa ilalim ng naturang batas, madadagdagan ng dalawang taon ang kasalukuyang 10 taong education system sa ating bansa.
Layunin nito na lalo pang mahasa at maihanda ang mga mag-aaral sa kanilang pagsabak sa pag-aaral hanggang sa makatapos sa kolehiyo at pumalaot sa mundo ng paggawa kung saan matindi ang kompetisyon.
Sa halip na tingnan bilang dagdag na taon sa ilalagi sa eskwelahan, higit na dapat itrato ang K to 12 Program na dagdag-karunungan ng mga kabataan na pakikinabangan nila pagdating ng pagtungtong sa kolehiyo, na isang hakbang na lang tungo sa tunay na laban ng kanilang buhay ang pagsabak sa trabaho.
Sa ngayon, napag-iwanan na ang Pilipinas sa sistema ng edukasyon kung saan napako tayo sa 10 taong basic education system. Kaya naman hindi kataka-taka na sa mundo ng tumitinding kompetisyon, medyo nadedehado ang ating mga kabataan kumpara sa mga mag-aaral sa ibang bansa.
Sa pamamagitan ng bagong batas na ito sa edukasyon, magkakaroon ng mas mataas na antas ng kaalaman sa ating mga kabataan at makakasabay sa hamon ng kaunlaran.
***
Sa ilalim ng programa, itatatag na ang universal kindergarten sa mga pampubliko at pribadong paaralan, gagamitin ang tinatawag na "mother tongue" sa unang tatlong (3) taon sa elementary.
Hindi lang 'yan, makakaroon ng senior high school kung saan makakapili ang mag-aaral ng specialized tracks para sa akademya, technical education, at sports and arts, na maghahanda sa kanila sa tatahaking kurso sa pag-akyat sa kolehiyo.
Ang kagandahan nito, dahil mayroon nang kaalaman sa technical education bago pa man sila umakyat ng kolehiyo, ang mga mag-aaral na hirap sa buhay ay maaari nang mag-part time job, gamit ang kanilang natutunan sa senior high school upang matustusan ang gastusin sa kanilang pagko-kolehiyo.
Ang programang ito ay bahagi lamang ng pangkalahatang layunin ng pamahalaang Aquino na maitaas ang kalidad ng edukasyon sa bansa. Kasama rin dito ang pagtugon sa matagal nang problema sa kakulangan ng mga silid-aralan, libro, guro at iba.
Sa ngayon, natugunan na ang problema sa kakulangan ng mga libro at upuan, at inaasahang malulutas na rin ang kakulangan ng mga silid-aralan at guro sa pamamagitan ng paglalaan ng mas malaki pang pondo sa edukasyon.
Sa katunayan, mula sa mahigit P161 bilyong pondo sa edukasyon noong 2010, naitaas na ito sa mahigit P232 bil­yon ngayong 2013.
Ngunit huwag asahan na kaagad mararamdaman ang benipisyo ng K to 12 Program sa susunod na taon o dalawang (2) taon mula ngayon o sa malapit na hinaharap.
Ang programa ay magsisimula pa lamang at bibilang pa ng ilang taon bago makapagtapos ang bagong sibol ng mga mag-aaral na silang makikinabang sa pinahusay na sistema ng edukasyon sa bansa.
At sa magiging tagumpay ng mga kabataan sa kanilang buhay bunga ng programa ito, asahan din na makikinabang dito ang lipunan at bansa dahil higit na silang may kakayahan na makahanap ng trabaho at hindi lamang basta mga nagsipagtapos na tanging diploma ang maipakikitang kayamanan sa kanilang mga magulang.

Laging tandaan: "Bata mo 'ko at Ako ang Spy n'yo." (mgakurimaw.blogspot.com)

Monday, May 20, 2013

‘Ang kay Juan ay kay Juan’



‘Ang kay Juan ay kay Juan’
REY MARFIL


Dapat suportahan ang posisyon ni Pangulong Noynoy “PNoy” Aquino na hindi magkaroon ng anumang hindi magandang pangyayari, lalung-lalo na sa relasyon ng Taiwan at Pilipinas, ang kamatayan ng isang mangingisdang Taiwanese na sinasabing nagtangkang sagasaan ang sasakyan ng Philippine Coast Guard kamakailan na sumita sa kanyang ilegal na pangingisda.
Maganda rin ang agarang pagharap ni Pangulong Aquino sa isyu matapos bumoto sa Tarlac sa gitna ng banta ng pamahalaang Taiwan na magpapataw ng parusa sa pamahalaang Pilipinas, kabilang ang hindi pagkuha sa serbisyo ng overseas Filipino workers (OFWs) at pagpapauwi ng kanilang kinatawan sa bansa.
Hindi rin talaga makakatulong kung patuloy na magsasalita o magbibigay ng mga komento ang dalawang magkabilang panig dahil inaasahang lalong tataas lamang ang tensyon.
Mabuti rin ang naging desisyon ni PNoy na ipasiyasat nang mabuti ang nangyaring pamamaril upang malaman ang puno’t dulo ng nangyaring insidente at rebyuhin ang umiiral na mga proseso.
Patuloy ang pakikipag-usap ng Department of Foreign Affairs (DFA) sa kanilang katulad na mga opisyal sa Taiwan upang tiyakin na hindi magkakaroon ng negatibong epekto sa relasyon ng dalawang bansa ang pangyayari.
Naunang humingi ng paumanhin ang pamahalaan sa pamamagitan ni Manila Economic and Cultural Office (MECO) resident representative sa Taipei na si Antonio Basilio at nagpahatid ng pakikiramay sa pamilya ng nasawing mangingisdang Taiwanese.
Sa kabila ng malungkot na pangyayaring ito, patuloy na ipagtatanggol ng bansa ang teritoryo nito sa karagatan laban sa ilegal na mga mangingisda, as in “Ang kay Juan ay kay Juan”.
***
Napag-usapan ang eleksyon, maganda ang naging pahayag ng MalacaƱang na hindi ito manghihimasok sa susunod na komposisyon ng Senado na inaasahang magpapatingkad sa pagiging independiyente ng institusyon.
Tama si PNoy sa pagsasabing ipauubaya niya sa ma­talinong desisyon ng mga senador kung sino ang kanilang nais na maging Senate President. Sa ngayon, pinamumunuan ang institusyon ni Senate President Juan Ponce Enrile.
Kung talagang nais ng mga senador sa pangunguna ni Sen. Antonio Trillanes IV, pangunahing kritiko ni Enrile, na palitan ang 87-anyos na mambabatas at iluklok si Sen. Franklin Drilon, tumayong Team PNoy campaign manager, isa itong malayang pagkilos at desisyon ng mga mambabatas.
Sa ganitong paniniyak, hindi na dapat isangkot pa ng mga kritiko ng pamahalaan si PNoy sa anumang magiging desisyon ng mga senador sa pagbubukas ng ika-16 na Kongreso sa ika-apat na Lunes ng Hulyo.
Aminin man o hindi ng mga kritiko, ang matinong pamamahala ni PNoy ang nasa likod ng naging mapayapa sa pangkalahatang halalan. 
Bagama’t nagkaroon ng kaunting aberya sa counting machine, ilang insidente ng kawalan ng kuryente at ilang kaso ng karahasan, nakamit naman ng mga tao ang kanilang karapatang mamili ng mga lider kung saan naitala ang 70% pagboto ng 52,014,648 rehistradong mga botante.
Sa katunayan, naging mabilis ang proklamasyon ng mga lokal na kandidato, kabilang ang mainit na labanan sa Lungsod ng Maynila kung saan nanalo si Mayor-elect Joseph Estrada. Mga katibayan ito na buhay na buhay ang demokrasya sa ilalim ng administrasyong Aquino.
Binabati natin ang mga ahensya ng pamahalaan na nasa likod ng tagumpay na ito sa pangunguna ng Commission on Elections (Comelec), Philippine National Police (PNP), Armed Forces of the Philippines (AFP) at iba pa at maging ang malaking sakripisyo ng matatapang at masisipag na mga guro na tumulong sa pagkamit ng mapayapa, kapani-paniwala, maayos at matiwasay na halalan.
Kung hindi dahil sa matuwid na pamamalakad ni PNoy, asahan na nating naghari na naman ang iba’t ibang porma ng dayaan na makakasira sa sistema ng halalan sa bansa.

Laging tandaan: “Bata mo ‘ko at Ako ang Spy n’yo.” (mgakurimaw.blogspot.com)

Friday, May 17, 2013

Grading period!




Grading period!
REY MARFIL

Nagsalita na ang mga mamamayan at naihalal na ang mga bagong pinuno ng bayan.
Sa kabila ng ilang naitalang mga karahasan at aberya, sa pangkalahatan, matiwasay na nairaos ang mapayapang halalan.
Dapat na maging masaya ang lahat sa naging resulta ng katatapos na eleksyon, hindi lamang sa pagkapanalo ng maraming kaalyadong kandidato sa lokal at mga senador, kundi dahil ito ang unang halalan sa ilalim ng tuwid na pamamahala ni Pangulong Noynoy 'PNoy' Aquino.
Ang susunod na halalan bago matapos ang nalalabing tatlo pang taon na termino ni PNoy ay ang barangay at Sangguniang Kabataan elections sa darating na Oktubre at ang presidential elections sa 2016.
Ang pangunguna ng 9 sa 12 kandidatong senador ng Team PNoy sa partial at unofficial count ng Comelec ay indikasyon ng "vote of confidence" o tiwala ng mamamayan sa liderato ni Pangulong Aquino.
Ang dagdag na kaalyado ng administrasyon sa Senado ay mangangahulugan ng dagdag na makakasama niya upang isulong ang mga panukalang batas na itataguyod ni PNoy para sa kagalingan ng mga mamamayan at ng bansa.
Itinuturing na "referendum" o "grading period" sa isang administrasyon ang "midterm elections" gaya ng katatapos lang na halalan.
Kung hindi natutuwa ang mga mamamayan sa ginagawa ng nakaupong administrasyon, pihadong hindi nila iboboto ang mga kandidato nito sa lokal lalo na sa nasyunal na posisyon o sa Senado.
Pero dahil sa lumilitaw sa mga paunang bilang ng mga boto sa Senado na 9 sa 12 kandidato ng Team PNoy ang makakapasok sa susunod na pagbubukas ng sesyon ng Kongreso, hi­git pa sa kumpiyansa ang ipinakitang pagtitiwala ng ating mga kababayan kay PNoy.
***
Napag-uusapan ang resulta ng eleksyon, lumilitaw ding maraming kandidatong kongresista ng administrasyon ang namamayani sa bilangan kaya asahan na ring makakakuha ng lubos na suporta si PNoy sa Mababang Kapulungan.
Idagdag pa diyan ang mga kandidato sa lokal na posisyon tulad ng gobernador, bise gobernor, alkalde, bise alkalde at mga konsehal.
Ngunit hindi naman natin makakamit ang mapayapang halalan kung hindi sa pagsisikap ng ating mga opisyal sa Commission on Elections (Comelec), sa pagpupursige ng mga guro at mga nagsilbing Board of Election Inspectors (BEIs), sa pagbabantay ng mga tauhan ng Philippine National Police (PNP) at Armed Forces of the Philippines (AFP), at ang bolunterismo ng mga mamamayan na nagsilbing poll watchers, at maging ang mapanuring media na katuwang sa pagpapakalat ng impormasyon.
Kung nagkaroon man ng ilang kaguluhan dahil sa init ng tunggalian ng mga naglalabang kandidato, kung may mga PCOS machine man na nagkaaberya dahil sa teknikal na kadahilanan, o iba pang aberya tulot ng kalikasan, sa pangkalahatan ay matiwasay natin na naidaos ang ikalawang pambansang halalan gamit ang modernong sistema ng automation.
Marahil ay masasabi natin na hindi pa natin ganap na perpekto ang sistemang ito, pero ang lahat ng bagay ay mayroong "room for improvement" 'ika nga. Ikalawang pagkakataon pa lamang ito sa ating kasaysayan kaya maaari pang paghusayin ang anumang pagkukulang.
Ang mahalaga ay magawa natin ang isang sagradong bagay sa isang demokrastikong bansa ang mapayapang halalan.
Wala ring saysay ang paghahanda sa halalan kung wala ang mga kababayan natin na nagtungo sa mga presinto para bumoto. Kaya lahat tayo ay may bahagi sa matagumpay na eleksyong ito.
Kasabay nito, asahan natin na lalo pang pag-iibayuhin ng administrasyong Aquino ang pagsisikap na maiangat ang ekonomiya at kabuhayan ng mga mamamayan sa panibagong tiwala na ipinagkaloob sa kanya ng mga ito, na una na nilang ginawa mula nang iboto siyang Pangulo noong 2010 elections.

Laging tandaan: "Bata mo ko at Ako ang Spy n'yo". (mgakurimaw.blogspot.com)

Wednesday, May 15, 2013

Dumarami sila!


Dumarami sila!
REY MARFIL



Kabilang sa magandang bagay na ibubunga ng nangyaring pagtataas ng internasyunal na credit rating firm na Standard and Poor's (S&P) sa credit rating ng bansa patungo sa "investment grade" ang pagbabayad ng mga Pilipino ng mababang interes sa kanilang hinuhulugang mga sasakyan.
Ilan lamang ang mababang interes sa car loans sa mga benepisyo na pakikinabangan ng ordinaryong mga Pilipino sa naganap na credit upgrade sa ilalim ng matuwid na daan ni Pangulong Noynoy "PNoy" Aquino.
Itinaas ng S&P ang rating ng bansa mula BB+ patungong BBB- dahil sa gumagandang macroeconomic fundamentals ng bansa.
Hindi naman nakakapagtaka ang naganap na upgrading dahil sa bumubuting lagay ng ekonomiya ng bansa na nag-ugat sa malinis at matuwid na pamamamahala ng administrasyong Aquino.
Asahan na natin na lalong bubuti ang estado ng pamumuhunan sa Pilipinas kung saan mahihikayat ang mga banyagang mamumuhunan na maglagak pa ng mas malaking kapital sa ating merkado.
Nangangahulungan ang karagdagang pamumuhunan ng bagong mga trabaho para sa mga Pilipino.
Nag-ugat ang panibagong positibong credit rating ng bansa matapos itaas ng S&P ang paglago ng ekonomiya ng Pilipinas ngayong taon mula 5.9% tungong 6.5%.
***
Hindi lang 'yan, tiwala ang publiko na makakamit ng administrasyong Aquino ang target na 5.5 milyong turista sa pagtatapos ng 2013. Nalampasan na nga sa unang tatlong buwan ng taon ang isang milyong banyagang turista na nakapunta sa bansa dahil sa magandang kampanya ng Department of Tourism (DOT).
Pangalawang pagkakataon ito na lumampas ng isang milyon ang bilang ng mga dayuhan na nakapasyal sa bansa sa loob ng unang tatlong buwan ng taon.
Naitala ng DOT ang nakakabilib na 1.27 milyong tu­rista na nakarating sa bansa mula Enero hanggang Marso ng kasalukuyang taon o mas mataas ng 10.76% kumpara sa 1.15 milyong mga turista na dumating sa unang tatlong buwan ng 2012.
Nangangahulugan na talagang inaani ng DOT ang magandang bunga ng kanilang pagsusumikap na ibenta sa banyagang mga turista ang magagandang tanawin sa Pilipinas.
Para makamit ang 5.5 milyong turista na target ngayong taon at 10 milyon sa 2016, masigasig ang DOT sa kanilang kooperasyon sa kinauukulang mga ahensya sa ibang bansa na sinasabayan naman ng pagpapaunlad ng pamahalaan sa ating mga imprastraktura para marating ang magagandang mga tanawin sa bansa.
Nananatiling nangungunang bumibisita sa bansa ang mga taga-Korea na mayroong 25.83% porsiyento o kabuuang 328,454 Koreans na sinundan ng 14.63% o 186,065 na mga turista sa Estados Unidos (US).
Nasa ikatlong posisyon naman ang Japanese na nakapagtala ng 114,269 turista na nakarating sa bansa o 8.99%.
Sumunod dito ang China na mayroong 98,242 at 53,867 bisita naman mula sa Taiwan. Tumaas naman sa 23.93% ang bilang ng mga turista mula Korea, pinakamalaking pagtaas sa limang nangungunang nationals na nakapunta sa bansa.
Kabilang rin sa mga bumibisita sa bansa ang mga Australians na mayroong 53,679; 41,524 Singaporeans; 38,486 Canadians; 36,005 Hong Kong nationals; 32,475 na nanggaling sa United Kingdom; 27,212 Malaysians; at 22,491 Germans.
Nandiyan rin ang 26.9% pagtaas sa bilang ng mga tu­rista na nakarating sa Pilipinas mula sa Russian Federation, tumaas rin ng 25.04% ang bilang ng Hong Kong nationals, 23.93% sa Korea, 22.1% sa India, 15.42% sa Singapore, 12.65% sa Australia, at 11.86% sa Malaysia.
Sa pangkalahatan, tumaas ang merkado ng ASEAN ng 14.82% habang 14.15% sa East Asia.

Laging tandaan: "Bata mo 'ko at Ako ang Spy n'yo." (mgakurimaw.blogspot.com)

Monday, May 13, 2013

2013 muna!


2013 muna!
REY MARFIL



Pagkatapos ng mid-term elections ngayong 2013, bibilang muli tayo ng panibagong tatlong taon para naman sa presidential elections sa 2016.
Ngunit ngayon pa lamang, may ilan nang naglalabasang espekulasyon kung sinu-sino ang posibleng magkampihan at kung sino ang maglalaban-laban.
Isa na nga marahil sa pinakapaboritong petsa ng mga kababayan natin sa kalendaryo ang araw ng halalan. Bakit nga naman hindi, ito lang naman ang panahon na napapansin tayo ng mga opisyal sa ating gobyerno para ligawan ang ating boto.
At sa araw ding ito ay nagiging pantay ang mga mahihirap at mayayaman dahil pare-pareho tayong tig-isang boto lamang, maliban na lamang iyong mga nakalulusot na flying voters sa kung saan-saang lugar.
Gaya ng mga nagdaang halalan, nagbatuhan ng putik ang ilang kandidato sa iba’t ibang posisyon na pinaglalabanan. Tubong lugaw na naman ang mga telecom companies dahil marami silang SIM card na naibenta na ginamit ng mga dirty trick department ng ibang kandidato para manira o magpa­pogi sa paraan na kung tawagin ay text brigade.
Ngunit sana lang, hangad natin na tanggapin ng mga kandidato at igalang ang pasya ng mamamayan. Tanggapin sana ng mga natalo ang desisyon, at iabot naman sana ng mga nanalo ang kamay ng pagkakaisa sa kalaban kahit pa nasaktan sila sa siraan ng kampanya.
***
Dito sa atin, dalawang uri lang daw ang kandidato ang mga nanalo at nadadaya. Wala raw natatalo. Pero hindi tayo naniniwala doon, marami pa rin naman sa ating mga kandidato ang magalang na tumatanggap ng pagkatalo at nakikipagtulungan din sa kandidatong nanalo.
Kung tutuusin, kung sadyang paglilingkod at ikabubuti ng kanilang nasasakupan ang tunay na pakay ng kanilang kandidato, hindi ba magiging mas mabilis ang katuparan ng mithiing ito kung ang natalo ay makikiisa o hindi hahadlang sa mga magiging programa ng nanalo? Iyan naman ay kung matino at may malasakit din sa bayan ang nanalo.
Kaya naman hangad natin na kung sino man sa mga kandidatong senador ang mananalo, sana’y isantabi nila ang pulitika at tulungan si Pangulong Noynoy “PNoy” Aquino sa nalalabing tatlong taon nito sa Palasyo para maipatupad ang lahat ng reporma sa gobyerno na kanyang nais mangyari.
Hindi kasi maikakaila na mayroon ding mga pulitiko na nakatuon na agad sa 2016 ang kanilang atensyon kaya ang kanilang mga magiging diskarte ay baka maapektuhan ng kanilang plano sa susunod na halalan.
Sana lang, isantabi muna nila ang malayo pang halalan at ituon ang pansin sa kasalukuyang mga problema ng ba­yan na kailangan ng solusyon.
Kailangang-kailangan ni PNoy ang tulong ng lehislatura upang maipasa ang mga panukalang batas na maga­gamit para maipagpatuloy ang mga reporma na nais niyang maisakatuparan.
Napakaganda ng mga nasimulan ng Pangulo tulad sa aspeto ng ekonomiya kung saan nakabawi na ang imahe ng bansa sa mga dayuhang rating firm.
Nakabuwelo na rin ang ating sektor ng agrikultura kung saan nagawa na muli nating maging rice sufficient kaya naman nakapagpaluwas o export na uli tayo ng bigas sa ibang bansa.
Kahit limitado lang sa ngayon, magandang panimula na ito para makapagsanay tayo pagdating ng panahon na mas maraming produkto na ang ating i-export.
Maliban sa malinis at mapayapang halalan, hangad rin natin na mangibabaw sa mga mananalo ang pagmamalasakit din sa bayan upang unahin nila ang pakikipagtulungan kay PNoy upang tuluyang maiahon sa hirap ang marami nating kababayan kaysa isipin ang susunod na eleksyon.

Laging tandaan: “Bata mo ‘ko at Ako ang Spy n’yo.” (mgakurimaw.blogspot.com)

Friday, May 10, 2013

Nasa ayos ang lahat!




Nasa ayos ang lahat!
REY MARFIL



Hindi ba't kapuri-puri ang kautusan ni Pangulong Noynoy 'PNoy' Aquino na bumuo sa inter-agency committee na naglalayong palakasin ang kampanya ng kanyang pamahalaan laban sa extra-judicial killings at ibang porma ng paglabag at pang-aabuso sa karapatang-pantao sa bansa?
Magandang senyales ito sa panig ng pamahalaan na tumitiyak na ginagawa ang lahat ng makakaya para pigilan ang karahasan sa bansa.
Ibig sabihin nito na hindi titigil si PNoy sa mga hakbangin nito na supilin ang pandarahas maging sa mga mamamahayag, at iba pa. Tiwala tayong epektibong maipatutupad ng pamahalaan ang mga polisiya nito para hulihin ang mga kriminal.
Nilikha ni PNoy ang inter-agency committee (IAC) sa pamamagitan ng Administrative Order No. 35 noong nakaraang Nobyembre para imbestigahan ang pang-aabuso sa karapatang pantao at maresolba ang naunang mga kaso.
Sa ilalim ng AO 35, tumatayong chairperson ng IAC ang kalihim ng Department of Justice kung saan mga kasapi naman ang mga pinuno ng Presidential Human Rights Committee, mga kalihim ng Department of Interior and Local Government at National Defense, presidential advisers ng Peace Process and Political Affairs, chief-of-staff ng Armed Forces of the Philippines, chief ng Philippine National Police at director ng National Bureau of Investigation.
Nakamasid naman at resource persons ang chairperson ng Commission on Human Rights at Ombudsman sa IAC.
***
Hindi lang 'yan, tiwala ang sambayanan sa mataas na kakayahan ng administrasyong Aquino na tiyakin ang malaya, maayos, matapat, mapayapa at kapani-paniwalang halalan sa bansa.
Sa katunayan, naglatag na ang kinauukulang law enforcement agencies ng kanilang mga plano sa ilalim ng matuwid na daang kampanya ni PNoy at nagpatawag ng command conference ang Punong Ehekutibo noong Miyerkules upang tiyakin ang seguridad ng publiko ngayong halalan.
Inilunsad na ng Department of Interior and Local Government (DILG) ang "Oplan Last Two Weeks" para magamit nang husto ng ahensya at Philippine National Police (PNP) ang kanilang mga tao sa iba't ibang panig ng bansa sa araw ng halalan.
Masidhi rin ang koordinasyon ng Armed Forces of the Philippines (AFP) sa PNP para epektibo nilang maisakatuparan ang kanilang mandato na tiyakin ang maayos na halalan at kaligtasan ng publiko.
Nagsagawa pa ang DILG ng Operation Last Two Weeks para talakayin ang paghahanda ng seguridad.
Kabilang dito ang paghayag sa bilang ng nabuwag na armadong mga grupo at dami ng nakumpiskang mga armas.
Inatasan rin ni PNoy ang DILG, PNP, AFP at iba pang mga ahensya ng pamahalaan na palakasin at doblehin ang pagsisikap sa kanilang paghahanda sa seguridad.
Maaari na nating masabi ngayon na talagang ang tunay na tinig ng mga tao ang lalabas sa mga resulta ng halalan.

Laging tandaan: "Bata mo ko at Ako ang Spy n'yo." (mgakurimaw.blogspot.com)

Wednesday, May 8, 2013

Higit pa sa 'ka-epalan'



Higit pa sa 'ka-epalan'
REY MARFIL



Bukod sa usapin ng dinastiya, nauso ngayong halalan ang katagang "epal politicians" na ikinakampanya ng ilang grupo na ibasura ng mga botante o huwag suportahan.
Kung tutuusin, mahirap pagtalunan ang usapin ng dinastiya dahil sa totoo lang, mayroon naman talagang angkan ng mga pulitiko na mahusay magsilbi sa kanilang nasasakupan kaya sila nananalo.
Bukod pa riyan, automated na rin ang halalan ngayon kaya nasa tao na talaga ang pagpapasya kung nais nilang ipamana sa kamag-anak ng magtatapos na opisyal ang iiwanan niyang puwesto.
Ganuon din naman sa usapin ng mga "epal", o pulitikong dumidiskarte para makilala sila ng publiko gaya ng paglalagay ng poster sa iba't ibang lugar, o paglalagay ng pagmumukha nila sa ipinamimigay nilang produkto.
Pero mayroong higit na mahalagang isyu tuwing halalan na dapat tutukan at kondenahin nang walang humpay ng lahat ng sektor na nagmamalasakit sa malinis, tapat at maayos na eleksyon ang karahasan.
Ang mga pulitiko na gumagawa ng karahasan ay wala nang puwang sa itinataguyod na daang matuwid ng administrasyong Aquino. Walang mapapalang maganda ang mga tao kung ang mauupo nilang opisyal ay gumamit ng dahas.
Hindi na nga natin mabilang ang mga biktima ngayon ng karahasan sa halalan partikular sa lokal na posisyon. Ang masaklap pa nito, hindi lang ang mga kandidato ang pinupuntirya ng mga pag-atake kundi maging ang kanilang pamilya at mga tagasuporta.
***
Ang pinakabagong biktima ng karahasan ngayong eleksyon ay ang kumakandidatong alkalde sa bayan ng San Jose, Tarlac. Pinagbabaril siya ng mga hindi pa kila­lang suspek sa gitna ng kanyang pangangampanya.
Sa Iloilo naman, pinagbabaril din ng mga salarin ang asawa ng re-electionist mayor ng Lemery. Isang kasamahan niya ang malubhang nasugatan.
Ngunit maliban sa kanilang uri ng mga karahasan, hindi maaalis na paghinalaan na mayroong mga pulitiko na isinasakripisyo ang mismo nilang mga tauhan o tagasuporta para ibintang sa kalaban ang krimen.
Mayroon ding mga pulitiko o lider na sa halip na sila ang maging ehemplo ng kaayusan ay sila pa ang na­ngunguna at nagsusulsol sa kanilang mga tagasuporta na gumawa ng hakbang para makalikha ng karahasan sa kanilang lugar.
Sa ganitong paraan kasi, maaari nilang palabasin na magulo sa kanilang bayan at makikiusap sa Comelec na isailalim sa kontrol ang kanilang bayan upang mabawasan ang kapangyarihan ng katunggali nilang nakaupong opisyal.
Nakalulungkot dahil sa pag-usad ng panahon, nagbago ang sistema ng halalan pero hindi ang mentalidad ng ilang kandidato. Hindi pa rin sila maka-move on sa "3G" o tatlong "G", as in guns, goons and gold.
Higit sa mabilis na pagbilang ng mga boto, dapat ding hanapan ng lunas na matigil na ang mga karahasan tuwing halalan. Sa bagay na ito ay malaki at mahalaga ang papel na gagampanan ng ating mga mamamayan huwag tangkilikin ang mga kandidatong may bahid ng dugo ang kamay.

Laging tandaan: "Bata mo 'ko at Ako ang Spy n'yo." (mgakurimaw.blogspot.com)

Monday, May 6, 2013

Ibang-iba ngayon!




Ibang-iba ngayon!
REY MARFIL



May panibagong magandang balita na ang Standard and Poor's (S&P) ay nagbigay ng panibagong positibong investment rating na garantisadong magbibigay ng dagdag na kumpiyansa sa katatagan ng ekonomiya ng ating bansa.
Mula sa dating BB+ rating, iniangat ng S&P ang kanilang pananaw sa katatagan ng ekonomiya ng Pilipinas sa BBB-. Ang marka ay ipinagkaloob ng S&P, ilang buwan pa lang ang nakararaan makaraan din tayong pagkalooban ng positibo ring marka mula sa Fitch Rating.
Marahil ang tanong ng iba nating kababayan, "eh ano naman ngayon kung maging positibo ang mga rating na nakukuha ng ekonomiya ng Pilipinas? Eh hindi naman nadadagdagan ang trabaho sa atin.
Marami pa rin sa atin ang mahirap."
Ang pagkakaroon ng mga ganitong positibong marka sa ating bansa ay mahalaga sa ating ekonomiya lalo na sa paghikayat ng mga namumuhunan at sa paghiram ng pondo sa ibang bansa.
Huwag sana nating kalimutan na ngayon lang nakababawi ang imahe ng ating ekonomiya mula sa pagkaka­subsob ng nagdaang mga administrasyon.
Dapat ding tandaan na sa siyam (9) na taong termino ng nakaraang liderato, pawang negatibo ang marka na nakamit ng ating ekonomiya. Kaya naman hindi rin kataka-taka na lumobo rin ang ating utang-panlabas dahil sa mataas na interes na kinukuha sa mga inuutang natin sa mga dayuhan.
***
Ang positibong marka na nakakamit ng halos tatlong taon pa lamang na liderato ni Pangulong Noynoy "PNoy" Aquino ay isang napakagandang balita sa ating ekonomiya. Una, pagpapakita ito na lalong lumalakas ang kumpiyansa ng mga dayuhan sa katatagan ng ating pananalapi; ikalawa, magbibigay din ito ng tiwala sa mga dayuhang nagpapautang na kaya nating magbayad ng ating hihiramin.
Dahil sa mga positibong marka na ito, maaaring humiram ng pondo ang ating gobyerno sa mga dayuhang nagpapautang sa mas maliit na interes. Dahil mas malaki ang tiyansa ng isang bansa na hindi makapagbayad kapag mababa ang investment ratings, natural na maniningil ng mas mataas na interes ang mga nagpapautang.
Kaya hindi magiging kataka-taka kung may mga da­yuhang nagpapautang na naghihikayat na sa atin ngayon na mangutang tayo sa kanila dahil tiwala sila na kaya natin silang bayaran.
Hindi katulad ng ibang bansa na mababa ang marka, na sila pa ang naghahanap ng mauutangan ng pondo o baka walang mahiraman.
Dahil mataas ang kumpiyansa ng mga dayuhang nagpapautang sa ating mga Pilipino, maaaring humiram ng pondo ang ating gobyerno na magagamit nito sa pagpa­patayo ng mga dagdag na paaralan, pagpapagawa ng mga farm-to-market roads, irigasyon, at iba pang proyekto na magpapalakas sa ating sektor ng agrikultura.
Ang pagpapalakas sa sektor ng agrikultura ang isa sa mga layunin ng gobyerno para makalikha ng mga trabaho sa bukirin at mabawasan ang bilang ng mga walang hanapbuhay.
Bukod diyan, masisiguro ang suplay ng ating pagkain, at matutuloy ang isang hangarin ni Pangulong Aquino na makapag-export na muli tayo ng bigas sa ilalim ng kanyang administrasyon.

Laging tandaan: "Bata mo 'ko at Ako ang Spy n'yo." (mgakurimaw.blogspot.com)

Friday, May 3, 2013

Mas masipag!



Mas masipag!
REY MARFIL


Mayroon basehang ikonsidera ng publiko ang apela ni Pangulong Noynoy 'PNoy' Aquino na ihalal ang 12 kandidato nito sa Senado sa ilalim ng Liberal Party-led coalition na Team PNoy.
Kung mailuluklok sa Senado ang 12 senatorial candidates, matitiyak nating magtutuluy-tuloy ang magagandang mga repormang nasimulan ng administrasyong Aquino sa susunod na tatlong taon.
Sa ngayon, siyam sa 12 kandidato ng Pangulo ang pasok sa winning circle o tinatawag na Magic 12 base sa resulta ng iba't ibang pre-election surveys.
Malinaw sa pagpasok ng mayorya ng mga kandidato ni PNoy na kinikilala ng publiko ang malinis nitong pamamahala na epektibo upang maisulong ang magandang ekonomiya ng Pilipinas.
Kapuri-puri rin ang "extra effort" na ginagawa ni PNoy para matulungan ang tatlo pa niyang mga kandidato na makahabol at makapasok sa winning circle sa pamamagitan ng patuloy na pagkumbinse sa mga lokal na lider na kaalyado ng administrasyon na suportahan ang kanyang mga kandidato.
Hindi naman talaga imposible na makuha ang 12-0 para sa mga kandidato ni PNoy lalo't malinis at mabuting pamamahala ang ibinebenta nito sa publiko. Ang komento nga ni Mang Kanor: Mas masipag pang mangampanya ni PNoy kumpara sa ilang senatoriables.
***
Nananatiling nakatutok ang pamahalaan sa paglikha ng disenteng mga trabaho para sa mga Filipino sa urban areas at malalayong mga lugar sa buong bansa para matiyak na mababawasan ang kahirapan.
Hindi naman talaga nangangahulugang lalong naghirap ang mga Pilipino matapos lumabas ang ulat na nananatiling hindi nagbago ang porsiyento ng mga taong nanatiling mahirap sa nakalipas na anim na taon.
Numero noong 2006 at 2012 ang pinagbatayan, as in hindi kasalukuyang datos ang resulta ng pananaliksik na isinagawa ng National Statistical Coordination Board (NSCB) sa unang anim na buwan ng nakalipas na taon o unang kalahati lamang ng 2012.
Malaki ang kumpiyansa ko na magiging mabuti ang resulta ng numero ng susunod na estadistika kaugnay sa mga mahihirap na Filipino dahil na rin sa masigasig na pagsusulong ng pamahalaan ng pro-poor programs.
Kung inyong matatandaan, lumago ang ekonomiya ng bansa ng 5.9% na nirebisa kinalaunan sa 6% sa ikalawang semestre ng 2012 o panahong matapos isagawa ang survey.
Sa ikatlong quarter ng 2012, lumago ang gross domestic product (GDP) ng bansa sa 7.1%, umangat ang sektor ng pa­ngisdaan sa 4.1% mula sa .7% ng ikalawang quarter ng 2012.
Sa ikaapat na quarter, naitala ang 6.8% GDP at 4.7% namang paglago sa agricultural-fisheries na sektor.
Nakatulong dito ang tumataas na pamumuhunan ng mga pribadong sektor dahil sa kanilang malaking kumpiyansa sa pamahalaan at pagtaas rin ng salaping ginugugol ng pamahalaan sa magagandang mga programa nito.
Nangunguna sa paglikha ng trabaho ang Human Development and Poverty Reduction Cabinet cluster.
Mayroon ring iba't ibang mga programa para suportahan ang mga magsasaka para sumulong ang sektor agrikultural.
Higit na mahalaga sa ngayon ang patuloy na pag-alalay ng pamahalaan sa mga magsasaka para maunawaan ang mga makabagong teknolohiya at pinagmumulan ng puhunan.
Kaya naman ating asahan ang mas malaking positibong pagbabago ng mga numero kaugnay sa isyu ng kahirapan dahil hindi tumitigil si PNoy sa pagtulong sa mga mahihirap.

Laging tandaan: "Bata mo ko at Ako ang Spy n'yo." (mgakurimaw.blogspot.com)

Wednesday, May 1, 2013

Positibo!



Positibo!
REY MARFIL




Kabilang sa mga mapagpalang resulta sa biyahe ni Pangulong Noynoy 'PNoy' Aquino sa Brunei ang nakuhang paniniyak ni Sultan Haji Hassanal Bolkiah at iba pang mga lider ng Association of Southeast Asian Nations na igagalang ang mahigpit na implementasyon ng Declaration on the Conduct of Parties in the South China Sea (DOC).
Si Sultan Bolkiah ng Brunei ang chairman ng 22nd ASEAN Summit ngayong taon. Nangungunang usapin ng mga lider sa ASEAN ang kahalagahan na mapalakas ang kooperasyon sa hanay ng mga bansang kasapi na mapayapang maresolba ang agawan sa teritoryo sa rehiyon.
Bukod sa inaning magandang bagay sa DOC, isinulong rin ng Pangulo ang agarang pagbuo ng Code of Conduct of Parties na mayroong interes sa West Philippine Sea.
Sa isinagawang bilateral meeting kay Vietnamese Prime Minister Nguyen Tan Dung, nabatid sa Pangulo ang pagpapasalamat nito sa kanya dahil sa mga ginagawang hakbang upang palakasin ang relasyon ng Pilipinas at Vietnam.
Nagkasundo ang dalawang bansa na magpakita ng mataas na kooperasyon sa mga lugar na mapagyayaman ang yamang-dagat at mapalawak ang negosyo dahil masisiguro dito ang progreso.
Nakinabang ng husto ang ekonomiya ng bansa at sektor ng tursimo sa positibong pakikipag-usap ng Pangulo sa mga lider na kasapi ng 22nd ASEAN Summit.
Iginiit rin ng mga lider ang kanilang maigting na paninindigan na maging libre ang rehiyon sa mapamuksang armas nukleyar at iba pang sandatang makakasira sa sangkatauhan.
Nawa'y malagdaan sa lalong madaling panahon ang kanilang inaasam na protocol sa Treaty on Southeast Asia Nuclear Weapon-Free Zone (SEANWFZ) at katulad na mga dokumento ng walang anumang alinlangan at kondisyon.
Inaasam rin ng mga lider sa ASEAN ang ganap at epektibong kooperasyon ng ASEAN Institute for Peace and Reconciliation (AIPR) sa Jakarta, Indonesia sa lalong madaling panahon para lalong maisulong ang promosyon ng mga pananaliksik at aktibidad para sa kapayapaan, paghawak at paghahanap ng solusyon sa mga kaguluhan sa rehiyon.
***
Napag-uusapan ang good news, inaasahan natin sa ilalim ng matuwid na daang kampanya tungo sa malinis na pamamahala ni PNoy ang ulat ng Moody's Analytics na nagsasabing "Asia's rising star" ang Pilipinas matapos masustina ang ma­lakas na ekonomiya sa kabila ng nagaganap na pandaigdigang krisis sa pananalapi.
Binigyang-diin ng Moody's Analytics, research unit ng Moody's Investors Service, ang pagsulong ng ekonomiya ng bansa at malakas na macroeconomic fundamentals kaya naman nananatiling matatag ito.
Isa na namang pagkilala ng internasyunal na lupon ang positibong pahayag na nag-ugat sa matagumpay at makatotohanang reporma na dahilan upang lalong tumaas ang kumpiyansa ng mga mamumuhunan na maglagak ng kapital sa bansa at maibalik ang tiwala ng publiko.
Inaasahang patuloy na aanihin ng bansa ang benepisyo ng naipatupad na positibong mga reporma kung saan pinatutunayan na susi ang malinis na pamamahala sa pagkakaroon ng magandang ekonomiya.
Sa ulat ni Moody's Analytics senior economist Glenn Levine na may titulong "Philippines Outlook: Asia's Rising Star", sinabi nitong mayroong potensyal ang Pilipinas na maging isa sa mga ekonomiya sa buong mundo na magkakaroon ng mabilis na pag-asenso na maaaring lumaki ng 8% sa 2016.
Naniniwala si Levine na mamimintina ng bansa ang malakas nitong ekonomiya na maaaring makapagtala ng gross domestic product (GDP) growth sa pagitan ng 6.5% hanggang 7% ngayong taon at sa 2014.
Kinilala nito ng husto ang malinis na pamamahala ng administrasyong Aquino, paglaki sa halaga ng pamumuhunan ng pribadong sektor at mataas na halaga ng salaping ginugugol ng pamahalaan sa mga proyekto para magtuluy-tuloy ang positibong direksyon ng ekonomiya ng Pilipinas.

Laging tandaan: "Bata mo ko at Ako ang Spy n'yo." (mgakurimaw.blogspot.com)