Wednesday, January 30, 2013

Magandang hamon!


Magandang hamon!
REY MARFIL



Sa pagsisimula ng taon, isang magandang balita ang hatid ng 2013 Index of Economic Freedom dahil sa paglagay nila sa Pilipinas sa ika-97 puwesto ng mga tinatawag na “bansang malaya ang ekonomiya”.
Ang puwesto natin ngayon ay mas mataas ng 10 baitang kumpara sa ika-107 puwesto noong nakaraang taon. Ang nakamit na 58.2 Economic Freedom Score ng Pilipinas ay pinakamataas sa mga bansa sa Southeast Asia, na pagpapatunay ng masiglang ekonomiya na nagawa ng liderato ni Pangulong Noynoy “PNoy” Aquino noong nakaraang taon.
Maging ang lider ng oposisyon sa House of Representatives ay nagpahayag ng paghanga sa administrasyong Aquino sa magandang marka na nakuha ng Pilipinas sa 2013 Index of Economic Freedom.
Sadyang kahanga-hanga raw ang nagawa ni PNoy at ng kanyang mga tauhan. 
Pero hindi raw dapat tumigil ang pamahalaan at kailangang pag-ibayuhin pa ang trabaho para sa patuloy na pagpapalago ng ekonomiya.
Kung tutuusin, bago pa man lumabas ang magandang balita tungkol sa economic freedom ay nagsabi na si PNoy na ipagpapatuloy ng kanyang liderato ang mga nasimulang programa na pahusayin ang ekonomiya upang mabawasan kung hindi man mabura ang kahirapan sa bansa.
Matapos ang mga record-breaking na puntos sa paglago ng ekonomiya ng bansa sa pagtatapos ng 2012, at record breaking din sa transaksyon ng Philippine Stock Exchange (PSE) sa unang linggo ng kalakalan sa merkado ngayong 2013, talagang maganda ang bungad ng taon sa ekonomiya dahil nasundan pa ito ng pagkilala ng econo­mic freedom report.
***
Napag-usapan ang mga datos, kung tutuusin, papasok pa lang sa ikatlong taon ang administrasyon ni PNoy pero malaki na ang pagbabagong nagawa nito para maibalik ang kumpiyansa ng mga namumuhunan at maging ng mga dayuhang financial institution sa Pilipinas.
Binigyan ng mahalagang pansin sa economic freedom report ang kampanya ng pamahalaan kontra sa katiwalian at patuloy na pagpapalakas ng pananalapi ng bansa upang hindi na umaasa sa mga pautang ng dayuhan, na dahilan para umangat ang ranggo natin sa kanilang listahan.
Kung hindi marahil nagkaroon ng pagbabago at reporma sa ating gobyerno, baka hindi natin mababalitaan na mayroon pa lang mga ganitong economic freedom report na nagbabantay sa kalayaan ng mga bansa sa mundo pagdating sa ekonomiya.
Sa totoo lang, sa nakaraang administrasyon na tumagal ng siyam (9) na taon ang liderato, puro negatibong balita sa ekonomiya gaya ng pag-downgrade sa credit ratings ng iba’t ibang financial institution ang ating nabalitaan.
At baka kung wala ang mga dollar remittance ng ating mga overseas Filipino worker (OFW), marahil ay bumagsak na ang ekonomiya natin noong nakaraang administrasyon kasabay ng paghina ng ekonomiya sa buong mundo.
Kaya naman ngayon sa ilalim ng pamamahala ni PNoy, magiging malaking hamon sa kanyang liderato na ipagpatuloy ang sunud-sunod na magagandang nangyayari sa ating ekonomiya. Bukod dito, magiging hamon din sa gobyerno kung papaano ganap na mararamdaman ng mga mahihirap ang pag-unlad.
Hindi naman ikinaila ni PNoy na mahirap pantayan ang magandang naitala ng bansa sa paglago ng ekonomiya noong 2012. Kaya naman nanawagan siya sa mga mamamayan na patuloy siyang samahan at tulungan para maipagpatuloy niya ang kanyang mga nasimulan.
Ngunit kung tutuusin, hindi magiging mahirap sa bansa na makamit ang higit na pag-unlad ngayong taon. Dahil maliban sa tuluy-tuloy ang kampanya kontra sa katiwalian, patuloy din ang programa ng pamahalaan para palakasin ang sektor ng agrikultura na marami ring manggagawa na umaasa.

Laging tandaan: “Bata mo ko at Ako ang Spy n’yo.” (mgakurimaw.blogspot.com)

Monday, January 28, 2013

Bawas “I.S.B.”!




Bawas “I.S.B.”!
Rey Marfil


Ilang buwan na lang at magmamartsa na ang libu-libong estudyante sa kolehiyo na tanda ng kanilang pagtatapos. Ibig sabihin nito, madadagdagan na naman ang ating mga kababayan na maghahanap ng trabaho.

Ang mga papalarin na makakahanap agad ng trabaho, mapapasama sa listahan ng mga “employed”, habang ang mga mabibigo naman ay madadagdag sa mga istambay o “unemployed”.

Pero maganda ang tiyansa ng mga kabataan ngayon na maghahanap ng trabaho sa ilalim ni Pangulong Noynoy “PNoy” Aquino. Batay kasi sa ulat ng isang pandaigdigang organisasyon, pababa o patuloy na nababawasan ang bilang ng mga walang trabaho sa Pilipinas sa nakalipas na tatlong taon.

Kung ang takbo ng “employment” rate sa mundo ay pababa o dumadami ang walang trabaho, hindi naman ito ang nangyayari sa Pilipinas, batay sa pagsusuri ng International Labor Organization (ILO).

Ayon sa ulat na ILO Global Employment Trends 2013, ang unemployment rate sa Pilipinas ay bumaba sa 6.9 percent sa ikalawang bahagi ng 2012, kumpara sa 7.2 percent sa kaparehong panahon noong 2011.

Lumitaw na nabawasan ang bilang ng mga lalake na walang trabaho na naging 7.0 percent mula sa dating 7.6 percent. Habang hindi naman nagbago ang datos sa mga babaeng manggagawa sa 6.7 percent.

***

Hindi lang ‘yan, maging ang unemployment rate sa mga kabataang manggagawa ay nabawasan din sa 16.0 percent, mula sa 16.6 percent noong 2011 at 18.8 percent noong 2010.

Ngunit kung tutuusin, tiyak na mas bababa pa ang datos ng mga walang trabaho sa Pilipinas kung malulutas ang problema sa tinatawag na “job mismatch” o hindi tugmang kasanayan ng mga manggagawa sa bakanteng trabaho.

Ang problemang ito ang hinahanapan ng solusyon ng Department of Labor and Employment (DOLE) dahil maraming bakanteng trabaho ngunit hindi inaaplayan ng mga tao dahil hindi ito akma sa kurso na kanilang kinuha.

Marami sa mga kabataan ang kumukuha ng kurso na pang-opisina samantalang ang pangangailangan ngayon sa industriya ay para sa construction, electronics, tou­rism, business processing at outsourcing at agri-fishe­ries, ayon sa DOLE.

Magandang hakbang din ang gagawin ng pamahalaang Aquino sa pamamagitan ng DOLE na magsagawa ng mga job fair sa mga lalawigan upang makapag-aplay ng trabaho ang ating mga kababayan doon.

Marami nga naman sa ating mga kababayan ang walang sapat na pera o pamasahe para magtungo sa mga malalaking lungsod gaya sa Metro Manila para magha­nap ng trabaho. Kaya magiging malaking ginhawa sa kanila kung sa kanilang mga lugar gagawin ang mga job fair.

Sana lang, ang mga bakanteng trabaho na iaalok ng DOLE ay nandoon din o malapit lang sa lugar ng mga aplikante para hindi na sila kailangang lumayo sa pamilya at hindi gumastos ng malaki sa pamasahe.

Kapag nagpatuloy ang ganitong pagsisikap ng pamahalaan na lumikha ng mga trabaho at dadalhin mismo sa mga tao, asahan na tuluy-tuloy din na bababa ang bilang ng mga I.S.B. o “istambay sa bahay”. Laging tandaan: “Bata mo ko at Ako ang Spy n’yo.”

(mgakurimaw.blogspot.com)

Friday, January 25, 2013

Alin ang paniniwalaan?



Alin ang paniniwalaan?
REY MARFIL


Nabawasan ang nagugutom, pero nadagdagan naman daw ang nagsasabing naghihirap, batay iyan sa pinakahuling survey ng Social Weather Station noong nakaraang buwan ng Disyembre na ginawa matapos lamang ang pana­nalasa ng bagyong si Pablo sa ilang bahagi ng Mindanao at Luzon. Pero ang tanong, alin dito ang dapat paniwalaan?
Sa simpleng lohika ng karaniwang tao, tila mahirap paghiwalayin ang gutom at kahirapan. Natural na magutom ang isang taong mahirap, pero ang mahirap ay puwedeng hindi naman magutom. Mahirap po bang intindihin?
Ganito 'yon, bigyan natin ng tinatawag na benefit of the doubt ang mga survey ng SWS kahit pa 1,200 katao lang ang kanilang tinatanong bilang respondents sa buong bansa upang maging kinatawan ng tinatayang 90 mil­yong Pilipino.
Sa nakalipas na mga administrasyon, karaniwang nagsasabay na kapag dumami ang bilang ng nagsasabing nagugutom sila, lalabas din na dumadami ang nagsasabing naghihirap sila. Natural lang na kapag mahirap ka, wala kang pambili ng pagkain, gutom ang resulta nito.
Pero sa ilalim ng administrasyon ni Pangulong Noynoy 'PNoy' Aquino, may pagkakataon din na dumami ang nagsabing naghihirap, pero nabawasan naman ang nagugutom o kaya naman ay kabaligtaran na dumami ang nagugutom, pero nabawasan ang naniniwalang naghihirap sila.
***
Napag-usapan ang survey, ang hindi makakain ng isang beses isang araw ay tinatawag na "extreme hunger" o ma­tinding gutom. Pero sa resulta ng kanilang nakaraang survey, bumuti ang kalagayan ng ating mga kababayan na nabawasan ng nagugutom na naging 16.3% noong Dis­yembre 2012 mula sa 21% noong Agosto 2012.
Bagay na dapat na ikatuwa ng gobyerno na ibayong nagsisikap na mapahusay ang kalidad ng pamumuhay ng mga Pilipino.
Ngunit matapos ang magandang balitang ito sa nabawas na bilang ng mga nagugutom, nadagdagan naman ng pitong porsiyento ang nagsasabing maghihirap sila ngayon sa December survey (54%) kumpara noong Agosto na 47%.
Paniwala ng isang tagamasid, ang pagkonsidera ng isang tao na mahirap siya ay bunga ng pagtaas ng mga bilihin at serbisyo, nangyaring mga kalimidad sa bansa, at ang paglakas ng piso.
Ngunit kailangan din nating isipin na ang pagturing sa sarili na mahirap ay "pananaw" o "perception" lamang ng respondent o tinanong sa survey. Pwedeng nakakaraos ka sa buhay gaya ni Manang na dumidiskarte sa bahay para kumita nang sapat at may makain.
Ang tanong ng mga kurimaw: May madidiskartehan ba sila ng pera kung walang hanapbuhay ang kanilang mga nilalapitan? Ibig sabihin, kahit papaano ay dumami rin ang may kakayanan na magbayad ng serbisyo ng iba.
Ang perception ng kahirapan ay ibang-iba sa gutom; hindi 'yan produkto ng imahinasyon o paniniwala.
Kung ikaw ay gutom, ikaw ay walang makain, mararamdaman mo ang katotohanan. Pero nabawasan daw sila kaya magandang balita ito. 
Kung bawasan ang nagugutom, indikasyon ito na sa kasalukuyang administasyon ay may napagkukunan ng kabuhayan ang mga tao kahit papaano para mayroon silang ipangtustos sa kanilang makakain.

Laging tandaan: "Bata mo ko at Ako ang Spy n'yo". (mgakurimaw.blogspot.com)

Wednesday, January 23, 2013

Helmet mo, tay!



Helmet mo, tay!
REY MARFIL




Maling sabihin na hindi na interesado ang administrasyong Aquino na isulong ang paghahabol sa hinihinalang mga nakaw na yaman ng pamilya Marcos.
Malinaw naman na nananatili ang paninindigan ni Pa­ngulong Noynoy "PNoy" Aquino na mabawi ang sinasabing mga nakaw na yaman ng pamilya at cronies ni dating Pa­ngulong Ferdinand Marcos at isulong ang nakabimbing mga kaso ng katiwalian sakaling buwagin na ng Kongreso ang Presidential Commission on Good Government (PCGG).
Sa kabila ito ng plano ng PCGG na ipasa na lamang ang nakabimbing mga kaso sa Department of Justice (DOJ), malinaw naman na ipagpapatuloy ang pagbuwag.
Naunang ipinanukala ni PCGG Chair Andres Bautista sa MalacaƱang na buwagin na ang PCGG at gawin na lamang Institute for Good Governance.
Sa ilalim ng administrasyong Aquino, naging mahigpit ang PCGG sa paghahabol ng umano'y mga nakaw na yaman ni dating Pangulong Marcos.
***
Anyway, makatwirang batiin si Pangulong Noynoy "PNoy" Aquino dahil matagumpay na naitala ng kanyang administrasyon ang "average" na mababang implasyon o pagtaas sa presyo ng mga bilihin noong 2012 na pinaka­mababa sa nakalipas na limang (5) taon - ito'y epekto ng sinserong pagsusumikap na matulungan ang mga mahihirap.
Naitala ang "average" na mababang implasyon sa na­kalipas na limang taon kahit bahagyang tumaas ng 2.9% ang implasyon noong nakaraang taon, alinsunod sa ulat ng National Statistics Office (NSO).
Sa kabila ng napakaliit na pagtaas, lubhang mababa naman ang 3.2% implasyon sa kabuuan ng 2012 na maliit sa tatlo hanggang limang porsyentong (5%) tinaya ng Bangko Sentral ng Pilipinas (BSP) at maliit din kumpara sa 4.6% noong 2011.
Siyempre, walang kuwenta ang lahat kung hindi sa matino at mahusay na pamamahala ni PNoy na mayroon laging busilak na layuning matulungan ang mga Pilipino na malampasan ang kahirapan.
Hindi lang 'yan, ipinakita ni PNoy ang kanyang pagpapahalaga sa kaligtasan ng mga motorista, lalung-lalo na sa mga pamilyang delikadong sumasakay ng motorsiklo na walang helmet dahil sa mahigpit na kautusang ipatupad ang bagong batas sa pagsusuot ng helmet.
Nais lamang ng Pangulo na tapusin na ang iresponsableng nakagawian ng mga sumasakay ng motorsiklo na hindi nagsusuot ng helmet.
Sa inisyal na ulat ng panimulang implementasyon ng batas, 20 motorcycle riders ang nahuli at naharap sa parusa dahil sa paglabag sa Motorcycle Helmet Act.
Nagsimula ang kampanya ng mga operatiba ng Land Transportation Office (LTO) sa Commonwealth Avenue, Philcoa and Quezon Memorial Circle upang ipatupad ang Republic Act 10054 o Motorcycle Helmet Act.
Sa ilalim ng batas, obligado ang isang sumasakay ng motor na magsuot ng half-faced helmet na mayroong clear visor o full-faced helmet na mayroon ding clear visor bilang kanilang proteksyon. Ang buhay ay mahalaga kaya't paboritong linya ni Pareng Jun Lingcoran ng dzMM... "Helmet mo Tay"!
Kailangang nagtataglay din ang helmets ng Import Commodity Clearance (ICC) sticker na isang kondisyon mula sa Department of Trade and Industry (DTI) bilang patunay na sumunod ang gumawa ng mga ito sa mandatory safety standards ng mga produkto. Naging epektibo ang Motorcycle Helmet Act noong nakaraang Enero 4.
Laging tandaan: "Bata mo ko at Ako ang Spy n'yo." (mgakurimaw.blogspot.com)

Monday, January 21, 2013

Nakikita ang bunga!




Nakikita ang bunga!
REY MARFIL




Pinatunayan ni Pangulong Noynoy 'PNoy' Aquino na magbubunga ang malinis na pamamahala upang lalong tumaas ang kumpiyansa ng mga mamumuhunan matapos makapagtala ng bagong tala ang Philippine stock market nang mahigitan ang 6,000-point mark na kauna-unahan sa 86-taong kasaysayan ng stock trading.
Labis na nagbunyi ang mga mamumuhunan sa positibong mga balita kaugnay sa ekonomiya sa loob at labas ng bansa dahil sa "matuwid na daan" ni PNoy, as in umarangkada ang Phi­lippine Stock Exchange (PSE) index nang 1.23 % o 73.46 puntos para maitala ang record breaking na 6,044.91 marka.
Inaasahan din ng mga eksperto na magpapatuloy ang pag-asenso sa stock market ngayong taon at hindi na nakakapagtaka ito dahil na rin sa makatotohanang mga reporma ng administrasyong Aquino.
Kaya't huwag nang magtaka kung umabot man ang marka sa stock market mula 6,680 hanggang 7,000 ngayong taon.
Hindi lang 'yan, sumisikad ang positibong epekto ng mga programa para sa mahihirap ni PNoy base sa resulta ng bagong survey ng Social Weather Stations (SWS) kung saan bumaba ng isang milyon ang pamilyang Filipino na nakaranas ng pagkagutom sa nakalipas na tatlong buwan ng 2012 kumpara sa nauna pang tatlong buwan.
Sa isinagawang survey noong Disyembre 8 hanggang 11, lumitaw na 16.3% ng respondents o 3.3 milyong pamilya na lamang ang nakaranas ng pagkagutom mula Oktubre hanggang Disyembre 2012.
Bumaba ito nang 21% kumpara sa 4.3 milyong pamilya na nagsabing nakaranas sila ng pagkagutom sa huling tatlong buwan bago pumasok ang Oktubre.
Mismong ang SWS ang nagsabing naitala noong Disyembre 2012 ang pinakamababang datos ng pagkagutom sa nakalipas na isa at kalahating taon.
Pinakamababa itong hunger rate sapul nang maitala ang 15.1% o tatlong milyong pamilya noong Hunyo 2011 at napakalayo sa naitalang pinakamataas na 23.8% o 4.8 milyong pamilyang nagutom noong Marso 2012.
Asahan na natin ang mas mainam at maganda pang mga resulta sa darating na mga buwan dahil sa patuloy na pagsusumikap ni PNoy na isulong ang interes ng mahihirap na mga tao katulad ng conditional cash transfer (CCT) o subsidiya sa mahihirap na mga pamilya.
***
Napag-usapan ang good news, ipinamalas ni PNoy ang kanyang matinding malasakit sa kagalingan at interes ng mga bata sa implementasyon nito ngayong taon sa pamamagitan ng Department of Labor and Employment (DOLE) ng kampanya na mayroong badyet na P9 bilyon para supilin ang problema sa child labor sa bansa.
Sa tulong ni Labor Sec. Rosalinda Baldoz, ilulunsad ng administrasyong Aquino ang apat na taong programa na tinatawag na "HELP ME". Nangangahulugan ang HELP ng health, education, livelihood and prevention habang monitoring and evalua­tion ang ME.
Sa programang ito, layunin ni PNoy na mailigtas ang tinatayang 893,000 mga bata mula sa mabigat at delikadong mga trabaho. Gagamitin ng HELP ME ang mga komunidad para labanan ang child labor at ipatutupad simula ngayong taon hanggang 2016 gamit ang P9 bilyon.
Makakatulong ang programa para makasunod ang bansa sa pamantayan ng Millennium Development Goal na naglalayong matigil ang kahirapan sa pamamagitan ng disenteng trabaho.
Sa 2016, inaasahang 75% ng 2.9 milyong mga manggagawang bata ang maililigtas sa delikado at mabigat na hanapbuhay.
Ginawa ang HELP ME ng Human Development and Pover­ty Reduction Cluster ng Gabinete kung saan pangungunahan ng DOLE at Department of Social Welfare and Development (DSWD) ang implementasyon.
Sa tulong ng P9 bilyon, masusuportahan nito ang umiiral na mga programa at serbisyo para alalayan ang kalusugan sa paglaki ng mga bata, ayuda sa edukasyon katulad ng allowance sa transportasyon at pagkain, school uniforms at suplay, kabuhayan para sa mga magulang ng manggagawang mga bata, at pagpigil sa pagkakaroon ng child labor at proteksiyon at prosekusyon ng mga lumalabag sa batas.

Laging tandaan: "Bata mo ko at Ako ang Spy n'yo". (mgakurimaw.blogspot.com)

Friday, January 18, 2013

Target ang Mindanao!



Target ang Mindanao!
REY MARFIL



Malinaw na indikasyon ng kahandaan ng administrasyong Aquino na wakasan ang rebelyon ng makakaliwang rebelde sa ipinakitang positibong pagtingin ng MalacaƱang sa pinahabang tigil-putukan ng rebeldeng komunista.
Idineklara ng Central Committee of the Communist Party of the Philippines (CPP) na magpapatuloy ang tigil-putukan hanggang Enero 15.
Sa ganitong bagay, mabibigyan ng pagkakataon ang mga sundalo at mga rebelde ng mas mahabang panahon na makasama ang kanilang mga mahal sa buhay.
Kitang-kita ang kagustuhan ng pamahalaan na isulong ang kapayapaan sa pamamagitan ng pag-aabot nito ng kamay.
Naunang nagkita ang mga kinatawan ng CPP-New People's Army-National Democratic Front (CPP-NPA-NDF) sa The Hague, Netherlands para mapagkasunduan ang tigil-putukan simula Disyembre 20, 2012.
Magandang senyales na tinitingnan ng administrasyong Aquino ang posibleng pagbubukas ng usapang-pangkapayapaan sa CPP-NPA-NDF para sa wagas na kapayapaan sa bansa.
***
Napag-usapan ang good news, ipinag-utos ni Pangulong Noynoy 'PNoy' Aquino ang pagpapalabas ng karagdagang P745.5 milyon para sa mahihirap na mga residente ng Autonomous Region in Muslim Mindanao (ARMM) na pinamumunua­n ni officer-in charge Gov. Mujiv Hataman.
Bahagi ito ng P32.3 bilyon ng programa para masustina ang mga aktibidad sa pagsusulong ng kapayapaan sa rehiyon at hindi kasama rito ang nailabas na P318.5 milyon noong Mayo 2012 para sa serbisyong kalusugan at P526 milyon noong Pebrero 2012 na pambili naman ng kailangang mga kagamitan sa pagmintina ng kaayusan at kapayapaan.
Dahil dito, aabot na sa P1.59 bilyon ang kabuuang pondo na naipalabas sa ARMM sapul noong 2012, isang patunay kung gaano kaseryoso si PNoy na mabigyan ng makatotohanang reporma ang ARMM sa pamamagitan ng paglalaan ng pondo na direktang pakikinabangan ng mga tao sa rehiyon, lalung-lalo na ang pagtiyak ng seguridad at pagsusulong ng progreso.
Sa ilalim ng pamumuno ni Hataman, isa sa labis na pinagkakatiwalaang lider Muslim ni Pangulong Aquino, siguradong makakatulog tayo nang mahimbing na magagamit ang pondo sa tama para ayudahan ang pangangailangan ng mahihirap na mga pamilya sa rehiyon sa pamamagitan ng pagkakaloob ng pangunahing mga pangangailangan at serbisyo na nakompromiso sa nakalipas na pamahalaan na pinalala rin ng armadong labanan.
Gagamitin ang ipalalabas na P745.5 milyon para suportahan ang kaunlaran sa mahihirap na mga lugar sa rehiyon, pagsuko ng mga armas at puwersa, at konstruksiyon ng estratehikong mga kalsada at pampublikong mga istruktura at iba pang positibong mga programa tungo sa progreso.
Ilalabas ang pondo sa pamamagitan ng Payapa at Masaganang Pamayanan Program para suportahan ang patuloy na pagsusulong ng kaunlaran at pagmitina ng mga aktibidad para sa kapayapaan sa ARMM.
Magkatuwang na ipinapatupad ang PAMANA ng Office of the Presidential Adviser for the Peace Process (OPAPP), Department of National Defense-Armed Forces of the Philippines (DND-AFP), Department of Public Works and Highways (DPWH) at ARMM.
Layunin ng programa na isulong ang polisiya sa reporma sa pambansang antas, pagkakaloob ng serbisyong sosyal sa mga lugar na mayroong labanan, at pagdugtong sa mga komunidad sa merkdao para makalikha ng trabaho at maging madali ang pagdadala ng mga produkto at serbisyo sa pamamagitan ng mahalagang imprastraktura katulad ng farm-to-market roads.
Dahil sa pagsusumikap ng pamahalaan, nakapasok ang Pili­pinas sa 2012 Global Peace Index by the Institute for Economics and Peace bilang isa sa limang nangungunang mga bansa na mayroong mataas na pagbabago sa usapin ng pagkakaroon ng kapayapaan noong 2012 kasama ang Sri Lanka, Zimbabwe, Bhutan, at Guyana.

Laging tandaan: "Bata mo ko at Ako ang Spy n'yo". (mgakurimaw.blogspot.com)

Wednesday, January 16, 2013

Pagkatiwalaan



Pagkatiwalaan
REY MARFIL


Hindi ba't kapuri-puri ang paniniyak ng MalacaƱang na makukuha ng retiradong mga kasapi ng Philippine National Police (PNP) ang kanilang pensyon at mga benepisyo sa lalong madaling panahon.
Alam ng pamahalaan na labis na importanteng makuha sa takdang panahon ng 62,000 retiradong mga pulis ang kanilang mga benepisyo.
Mabuti ring malinis na ng PNP ang kanilang listahan alinsunod sa kanilang programa na madetermina ang kuwalipikado at lehitimong mga retirado na dapat makakuha ng mga benepisyo.
Dapat namang sumunod ang mga retirado sa pa­ngangailangan na kumuha at isumite nila ang kanilang automated teller machine (ATM) accounts upang maging madali ang pagpapadala sa kanila ng pension.
Dito kasi mabeberepika ang kanilang pensyon at malalaman din kung sino sa mga ito ang namatay na.
***
Makatwirang magkaroon si Pangulong Noynoy "PNoy" Aquino ng malayang kamay sa pag-organisa ng kanyang gabinete matapos mapabalitang dadalhin nito si dating Department of Interior and Local Government (DILG) Undersecretary Rico Puno sa Department of Agriculture (DA).
Mas mainam na pagkatiwalaan nang husto si PNoy na gumawa ng desisyon para sa pamamahala sa bansa at karapatan ng Pangulo ang pumili ng mga taong pagkakatiwalaan.
Alam ni PNoy ang pinakamainam sa isyu ng pagkakaloob ng responsibilidad sa mga taong kanyang itatalaga para pamunuan ang iba't ibang mga ahensya ng pamahalaan.
Marami nang napatunayan si PNoy sa usapin ng implementasyon ng makatotohanang mga reporma at pagbabago sa bansa kaya't hindi kuwestyon ang mga pangalang itinatalaga nito.
At hindi rin naman naakusahan o napatunayang nagkasala sa anumang masamang gawain si Puno kaya kuwalipikado itong magsilbi sa pamahalaan lalo pa't puro espekulasyon at bahagi na lamang ng demolition job ang natikman ng dating opisyal.
Kaya nararapat na igalang at irespeto ng mga kritiko ang diskarte ng Pa­ngulo bilang Punong Ehekutibo sa paggamit niya ng presidential powers.
Kung maitatalaga si Puno sa DA, malinaw na isa siyang epektibong asset lalo na sa teknikal na aspeto ng trabaho sa ahensya dahil sa kanyang malawak na karanasan at kaalaman sa agrikultura. 

Laging tandaan: "Bata mo ko at Ako ang Spy n'yo." (mgakurimaw.blogspot.com).

Monday, January 14, 2013

Kriminal ang happy!




Kriminal ang happy! 
REY MARFIL


Tama ang desisyon ni Pangulong Noynoy "PNoy" Aquino na higpitan na lamang ang batas tungkol sa pagmamay-ari ng mga baril sa halip na tuluyan itong ipagbawal sa mga sibilyan.
Kung tutuusin, hindi naman ang mga lisensyadong baril ang madalas masangkot sa krimen kundi ang tinatawag na loose firearms o mga baril na hindi lisensyado. At sino naman ang mga taong ayaw iparehistro ang kanilang baril, siyempre ang mga kriminal o may balak na gamitin ito sa hindi maganda.
Sa sandali kasing ipalisensya ang baril, magkakaroon na ito ng rekord sa pulisya kaya madali ring matutukoy ng mga awtoridad kapag nasangkot sa krimen. Kung tutuusin, ang pagkakaroon ng lisensyang magmay-ari ng baril ay hindi naman awtomatikong karapatan para bitbitin ito sa labas ng bahay.
Para mailabas ng bahay ang baril, kailangan pa rin itong ihingi ng permiso sa pulisya o kung tawagin ay permit to carry (PTC). Ngunit hindi rin basta-basta makakakuha ng permisong ito kung wala namang banta sa iyong buhay.
Naging mainit ang usapin sa baril dahil na rin sa ilang emosyunal na kasong nangyari nitong nakaraang mga linggo na kinasangkutan ng baril. Isa na rito ang pagkamatay ni Stephanie Nicole Ella at ang walang habas na pamamaril sa Cavite na ikinamatay ng walong tao.
***
Sa kaso ni Nicole, wala pang linaw kung lisensyado o hindi ang pinagmulan ng bala na tumama sa kanyang ulo na dahilan ng kanyang kamatayan. Ang mga kapitbahay niya na may lisensyadong baril, isinuko na sa pulisya ang mga baril para masuri.
Sa nangyari sa Cavite, lumilitaw na paso na ang lisensya ng baril na ginamit sa karumal-dumal na krimen kaya maituturing na loose firearms na ito. Sa iba pang kriminal na napaslang ng mga awtoridad o nahuli, hindi rin lisensyado ang kanilang mga baril.
Kaya tama rin naman ang katwiran ni PNoy na ang mga kriminal na lihim na nagdadala ng mga hindi lisensyadong baril ang matutuwa kapag tuluyang ipinagbawal sa sibilyan ang magmay-ari ng baril. Mas madali na nilang matatarget ang sinuman na pupuntiryahin nila dahil wala nang panlaban ang kanilang bibiktimahin.
Halimbawa sa loob ng bahay, kung ang isang pamil­ya ay walang baril, papaano nila maipagtatanggol ang kanilang sarili sakaling pasukin sila ng magnanakaw na mayroong baril? Hindi naman uubra na mahusay ka lang sa karate at lalong walang binatbat ang tirador o yantok na nakasabit sa dingding.
Hindi rin makatwiran na puna ng ilang lihis na kritiko na kaya ayaw ni PNoy ng total gun ban ay dahil siya mismo'y mahilig sa baril. Marahil kung siya lang ay papayag si PNoy na ipagbawal sa lahat ang baril at hayaan na lamang ang awtoridad gaya ng sundalo at pulis ang magdala ng baril.
Mataas na opisyal si PNoy kaya hindi magiging problema sa kanya na kumuha ng bodyguard na may baril para siya protektahan.
Pero ang inisip ng Pangulo ang kaligtasan ng mga sibilyan na may karapatan din naman na protektahan ang kanilang sarili, kanilang pamilya, at kanilang ari-arian, o marahil maging ang ibang tao na malalagay sa panganib ang buhay dahil sa mga kriminal na armado ng hindi lisensyadong baril.
Ang kailangan lang talaga ay higpitan ang proseso para makapagmay-ari ng baril ang isang tao, bigatan ang parusa sa mga masasangkot sa krimen, at hulihin ang mayroong hindi lisensyadong baril.

Laging tandaan: "Bata mo ko at Ako ang Spy n'yo." (mgakurimaw.blogspot.com)

Friday, January 11, 2013

Good news sa 2013!



Good news sa 2013!
REY MARFIL




Magandang balita ang hatid ng stock market nitong Lunes matapos na magtala ng mahigit sa 6,000 level ang transaksiyon sa Philippine Stock Exchange index (PSEi) na indikasyon ng patuloy na pag-angat ng ekonomiya ng bansa sa ilalim ng halos tatlong taon pa lamang na administrasyon ni Pangulong Noynoy 'PNoy' Aquino.
Excited ang mga taong naglalaro sa stock market ngayong 2013 dahil inaasahan nilang magiging mas masigla ang kalakalan ngayong taon. Bakit nga naman hindi, noong nakaraang 2012, umabot sa 38 all-time high ang naitala sa merkado.
At sa pagsisimula ng kalakalan nitong Lunes, nagsara ang PSEi sa 6,044.91, mataas ng 1.23% o 73 points. Puna ng mga traders, mas marami ang dayuhan na heavy buyers, pagpapakita ng kumpiyansa ng mundo sa kalakalan sa ating bansa.
Mahigit 3.3 bilyong sapi o shares na aabot ang halaga sa P8.51 bilyon ang naikalakal; mas marami ang kumpanya na tinatawag na "nanalo" o gainers sa bilang na 107, kumpara sa losers o natalo dahil bumaba ang presyo ng kanilang sapi na nasa 71, at 39 stocks ang hindi nagbago.
***
Napag-usapan ang stocks, marahil sa iba, iisipin nila na ano naman ang pakinabang ng karaniwang Pinoy sa pagsigla ng merkado? Anong buti ang idudulot nito sa kanilang buhay? Magbibigay ba ito ng trabaho na hinaharap ng marami sa administrasyong Aquino?
Hindi man direktang pakinabang ang maramdaman ng mga karaniwang mamamayan sa patuloy na pagsigla ng kalakalan, magbibigay naman ito ng kumpiyansa sa pangkalahatan ng bansa sa mata ng mga dayuhang mamumuhunan para lalong sumigla ang ating ekonomiya.
Ang pagdami ng mga dayuhan na naglalagak ng puhunan sa pamamagitan ng pagbili ng sapi sa mga kumpanyang nakalista sa PSEi ay magiging daan ng pagtatag ng kumpanya na kanilang napipili.
Ang resulta nito, mananatiling may trabaho ang mga Pinoy na nasa kumpanyang ito, o kung hindi man, maging daan ng tinatawag na "expansion" o pagpapalaki pa ng kumpanya na magiging dahilan ng pagkuha ng mas maraming trabaho.
Bukod dito, makatutulong din ang patuloy na paglago ng kalakalan sa merkado upang lalo pang mapalakas ang piso kontra dolyar, na indikasyon din ng malakas na ekonomiya ng bansa. 
Bagaman magkakaroon ng negatibong epekto sa mga overseas Filipino workers at exporters ang malakas na piso, dapat tingnan ang pangkalahatang kabutihan sa bansa at sa mga Pilipino ng mas malakas na piso.
Marahil, sa pagkakataong ito ay makabubuting makagawa ng programa ang pamahalaan upang mabigyan ng edukasyon ang mga Pilipino kung papaano maglaro o mamuhunan sa stock market lalo na ang mga pamilya ng OFWs na kadalasang natutulog lang sa bangko ang mga padalang remittance ng kanilang mahal sa buhay.
Ang pagbabalik ng kumpiyansa ng mga dayuhan sa pagsali sa merkado ay pagpapakita rin ng paglakas ng pananalig ng mga namumuhunan na kayang ipagpa­tuloy ni PNoy na pasiglahin ang ekonomiya ng bansa.
Bagaman nasa kalahati pa lamang ng kanyang termino si PNoy, marami nang pagbabago at reporma na naipatupad ng kanyang liderato para mapasigla ang merkado at makapagtala ng mataas na puntos sa paglago ng ekonomiya. Hindi man kaagad maramdaman ng iba ang epekto ng magandang balitang ito, nagsisimula pa lang ang taon kaya konting tiis muna.

Laging tandaan: "Bata mo ko at Ako ang Spy nyo". (mgakurimaw.blogspot.com)

Wednesday, January 9, 2013

Bagong inspirasyon!




Bagong inspirasyon!
REY MARFIL




Panibagong inspirasyon sa ating mga Filipino ang pagkakakuha ng bansa sa ika-87th posisyon mula sa hanay ng 141 nasyon bilang pinakamagandang lugar para magnegosyo base sa Forbes' Best Countries for Business List.
Sa pagsulong pa natin sa matuwid na daan ni Pangulong Noynoy "PNoy" Aquino, asahan nating lalo pang mapapabuti ang ating posisyon sa hinaharap.
Base sa listahan, tinalo pa ng Pilipinas ang China at India na nasa ranggong 96th at 97th, ayon sa pagkakasunud-sunod, bilang bansa na pinakamainam na magsimula ng negosyo.
Nakakatuwa na nakakuha ang bansa ng mataas na marka dahil sa tinatawag na kalayaan sa pananalapi at iba pang mga positibong pagbabago, kabilang ang pangangalaga sa kapakanan ng mga mamumuhunan bilang pangkalahatan.
Hindi naman na nakakapagtaka ito dahil talagang masugid na binabantayan ng Pangulo ang parehas na kapaligiran kung saan walang kinikilingan para sa mga negos­yanteng nais na mamuhunan sa Pilipinas.
Kabilang sa ikinonsidera sa Forbes' list ang kalayaan sa kalakal, pinansiyal na kalayaan, karapatan sa ari-arian, mga positibong pagbabago, teknolohiya, pagsugpo sa katiwalian at magandang implementasyon ng mga programa.
Umangat nga ng 21 posisyon ang bansa sa usapin ng pagpapagaan sa binabayarang buwis para maging ika-110th posisyon at pitong puntos naman ang inasenso para maging ika-86th posisyon sa larangan ng kalayaan sa pangangalakal.
Sa isyu naman ng red tape, maganda rin ang nangyari sa bansa na napababa ng limang porsyento ang posisyon para maging ika-128th na lamang at bumuti rin ang Pilipinas sa larangan ng pagsugpo sa katiwalian matapos maitala ang ika-112th posisyon. Salamat sa mabuti at malinis na pamamahala ni PNoy.
***
Napag-usapan ang "good news", asahan na natin ang karagdagang mas maraming trabaho para sa mga Pilipino matapos aprubahan ng National Economic and Development Authority (NEDA) Board na pinamumunuan ni Pangulong "PNoy" Aquino ang implementasyon ng 11 pangunahing mga proyekto upang tiyakin ang pag-unlad sa malalayong mga lugar sa bansa.
Ginawa ng Pangulo ang pag-apruba sa mga ito sa NEDA Board Meeting sa MalacaƱang noong nakalipas na Nobyembre 29.
Kabilang sa mga proyekto ang P1.14 bilyong Albay West Coast Road Project, P43 bilyong Cavite-Laguna Expressway (inaprubahan sa prinsipyo habang ginagawa ang pagrebyu sa halaga), P2.1 bilyong Tacloban Airport Redevelopment Project, at P8.8 bilyong pagbili ng Multi-Role Response Vessels.
Kasama rin ang P8.87 bilyong Mactan, Cebu International Airport Terminal; P1.7 bilyong Contactless Automatic Fare Collection System, P68 milyong (Component A lamang) Convergence on Chain Enhancement for Rural Growth and Empowerment Approved at P7.39 bilyong ekstensyon ng Mindanao Rural Development Project 2.
Kabilang din sa mga proyekto na inaprubahan ng NEDA Board ang P1.16 bilyong rehabilitasyon ng Angat Hydro­electric Plant (Turbines 4 at 5), P13.14 bilyong school infrastructure project (10,679 silid-aralan), at P25.56 bilyong NLEX-SLEX Connector (aprubado sa prinsipyo habang nirerebyu ang halaga).

Laging tandaan: "Bata mo ko at Ako ang Spy n'yo." (mgakurimaw.blogspot.com)

Monday, January 7, 2013

Malinis kasi!




Malinis kasi!
REY MARFIL



Resulta ng malinis na pamamahala ni Pangulong Noynoy ‘PNoy’ Aquino ang sobra sa target na 7.1 porsiyentong paglago ng ekonomiya ng bansa sa ikatlong quarter ng taon na naging dahilan upang kilalanin ang Pilipinas na mayroong pinakamabilis na paglago ng ekonomiya sa Timog Silangang Asya.
Sa pagsulong kasi ng ekonomiya, siguradong mapapalakas nito ang kapangyarihan ng mga mamimili na bumili o nangangahulugang mayroong pera ang mga tao para gumastos.
Tuluy-tuloy ang pagsulong ng ekonomiya ng bansa sa unang tatlong quarter ng taon matapos makapagrehistro ng bagong 7.1% paglago kumpara sa 3.2% sa parehong panahon ng nakalipas na taon.
Sa report ng National Statistical Coordination Board, maganda ang takbo ng sektor ng serbisyo, transportasyon, storage at komunikasyon, financial intermediation, at real estate, renta at iba pang aktibidad sa ekonomiya na sinuportahan ng limang quarters nang walang puknat na pagsulong ng mga industriya, kabilang ang agrikultura sa kabila ng mga bagyo.
Nalaman din sa datos ng NSCB ang iba pang detalye ng paglago ng ekonomiya ng iba pang mga bansa na kinabibilangan ng 6.2% ng Indonesia, 5.2% ng Malaysia, 4.7% ng Vietnam, 3% ng Thailand, at 0.3% ng Singapore.
Inaani na ng bansa ang malinis na pamamahala at asahan nating magpapatuloy ang administrasyong Aquino sa ganitong patakaran upang lalo pang umunlad ang Pilipinas.
Sa nakalipas na 10 buwan, nagpakita ng kakaibang pinansiyal na lakas ang Pilipinas sa kabila ng pandaigdigang krisis sa pananalapi na nararanasan sa buong mundo.
Patunay ito na tama ang pinansiyal na mga polisiya ng pamahalaan na pinalakas ng malinis na gobyerno ni Pangulong Aquino.
***
Huling hirit sa Reproductive Health, tama si PNoy sa pagsusulong ng “conscience vote” sa pagboto sa Reproductive Health (RH) sa kabila ng kanyang pagsuporta sa panukala.
Isang paraan ang ipinatawag na tanghalian sa MalacaƱang upang pinal na malaman ang kapalaran ng panukala.
Tama ring sinuportahan si PNoy sa kanyang apela sa mga mambabatas na tiyaking mayroong quorum bago mag-Christmas break para naman magtuluy-tuloy ang trabaho sa Kamara de Representantes at madesisyunan na ang RH bill.
Mananatili ang dibisyon sa hanay ng mga kongresista kung hindi nagkaroon ng katapusan ang usapin sa RH at naipakita ang separation of power ng simbahan at gobyerno sa nangyaring botohan.
Malinaw naman ang posisyon ni PNoy at hindi nagbabago ito, suportado niya ang panukala dahil ito ang nararapat upang umasenso ang bawat pamilyang Pilipino.
Pinakamaganda sa pangyayaring ito ang labis na respeto at pagpapahalaga ni PNoy sa karapatan ng bawat mambabatas na magdesisyon sa RH bill, alinsunod sa kanilang paniniwala na ginagabayan ng konsensiya.

Laging tandaan: “Bata mo ko at Ako ang Spy nyo”. (mgakurimaw.blogspot.com)

Friday, January 4, 2013

Collateral damage!



Collateral damage!
Rey Marfil




Kung anuman o gaano man kalaki ang pag-angat sa ekonomiya na makakamit ng bansa ngayong taon, tiyak na malaking bahagi nito ang hindi magagamit sa nakaplanong mga programa na makatutulong sa pagpapaunlad ng bansa iyan ay dahil sa bagyong si ‘Pablo’.

Lubhang napakalawak ng pinsalang iniwan ni Pablo lalo na sa Min­danao, na hindi lang mga kalsada, tulay, pananim ang sinira, kundi pati buhay ng napakarami na­ting kababayan mga nasira na magiging prayoridad nga­yon ni Pangulong Noynoy ‘PNoy’ Aquino na buuin nito.

Sa simpleng matematika ng gastusin sa bahay kung si tatay ay nakaipon ng P100 ngayong taon at plano niyang ipambili ng magarang tsinelas sa susunod na taon pero biglang nabutas ang bubong ng bahay at kailangang bilhan ng bagong yero para hindi mabasa ang loob ng bahay; uunahin na niyang bilhin ang bubong at saka na lang bibili ng tsinelas kapag muling nakaipon.

Marahil ay ganito rin ang mangyayari sa ating bansa na matapos makapagtala ang gobyerno na kahanga-hangang 7.1% economic growth sa ikatlong bahagi ng taon, ay bigla namang namerwisyo si ‘Pablo’.

Ang lintek na si ‘Pablo’, umabot na sa mahigit P24 bil­yon ang pinsalang idinulot sa imprastruktura at mga pananim. Kinitil pa niya ang buhay ng mahigit 1,000 katao at nawawala pa ang mahigit 800.  

Ang halaga ng pinsala ni ‘Pablo’ ay mahi­git pa sa pondong inilaan sa Department of Environment and Natural Resources (DENR) na mahigit P23 bilyon para na sa “buong taon” ng 2013. Ganoon katindi ang pinsala na a­ting pinag-uusapan na tutugunan ng pamahalaan ngayon.

***

Napag-usapan ang pinsala ni Pablo, maraming kalsada, tulay, at mga gusali gaya ng paaralan at ospital ang kailangan ding itayong muli para magamit.
Ngunit magagawa lamang ang mga ito kung may pondong ilalaan. At dahil sa pangako ni PNoy na bilisan ang rehabilitasyon ng lugar na sinalanta ng bagyo, natural na bibigyan ito ng prayoridad sa alokasyon.

Kaya naman hindi magiging kataka-taka na ipagpali­ban o kaya naman ay mabawasan ang ibang naunang proyekto na gagawin ng pamahalaan, para mabuhusan ng malaking pondo ang gagawing rehabilitasyon sa mga sinalantang lugar, na tantiya ng NDRRMC ay aabutin ng ilang taon.

Dito ay magiging malaking tulong ang mga ipinagkakaloob ng donasyon ng iba’t ibang bansa para sa rehabilitasyon ng mga sinalantang lugar.
Ang maganda lamang ngayon, makatitiyak ang mga bansang nagbigay ng donasyon at kumpiyansa ang mga mamamayan na gaga­mitin ng gobyernong Aquino ang mga donas­yon sa tama at hindi mapupunta sa bulsa ng ilang loku-lokong opisyal.

Nakakapanghinayang nga lamang na kung wala sanang matitinding kalamidad na tumatama sa bansa gaya ni ‘Sendong’ na naghasik ng perwisyo sa Mindanao, partikular sa Cagayan de Oro noong 2011 at si ‘Pablo’ ngayong taon mas marami sanang programa at proyekto na nagagastusan ang pamahalaan.

Gayunpaman, dapat unahin at unawain na kailangan bigyan ng prayo­ridad ang rehabilitas­yon ng mga sinasalanta ng kalamidad para matulu­ngang makabangon ang ating mga kababayan. 

Magtulungan na lamang tayo at maging handa kapag dumarating ang kalamidad. Sumunod sa payo kung kailangan talagang lumikas, umalis sa lugar kung sadyang peligroso sa mga pagbaha at pagguho ng bundok para mabawasan ang pinsala ng trahedya.

Sa kabila ng lahat ng ito, nakatutuwang isipin na mataas ang pag-asa (9 sa bawat 10 Pinoy) ng a­ting mga kababayan na magiging mas maganda ang buhay sa Pilipinas sa ilalim pa rin ng gobyernong Aquino sa 2013, batay iyan sa resulta ng isang survey.  Laging tandaan: “Bata mo ko at Ako ang Spy n’yo”.
(mgakurimaw.blogspot.com)

Wednesday, January 2, 2013

Ano kaya?





Ano kaya?
REY MARFIL


Nakatutok ngayon ang atensyon ng pulitika sa Cebu dahil sa pagsuspendi ng Department of Interior and Local Government (DILG) ng anim (6) na buwan kay Gover­nor Gwendolyn Garcia kaugnay sa reklamong administratibo na isinampa sa kanya.
Ang reklamo laban kay Garcia ay inihain sa DILG noong 2010 nang panahon na buhay pa si Sec. Jesse Robredo. Pero ngayon, dahil si Sec. Mar Roxas na ang pinuno ng DILG, madaling gamiting depensa ng kampo ni Garcia ang salitang "pulitika lang iyan."
Si Roxas kasi ang presidente ng Liberal Party, habang kaalyado naman si Garcia ng United Nationalist Alliance (UNA) na pinamumunuan ni Vice President Jejomar Binay.
Hindi lingid sa kaalaman ng publiko, sina Binay at Roxas ang naging mahigpit na magkalaban sa nakaraang vice presidential race noong 2010 elections. At sa susunod na halalan sa 2013, ang UNA at ang koalisyon na pinangungunahan ng LP ang inaasahang magkakasagupa sa senatorial race.
Hindi lang iyan, posible rin na sina Binay at Roxa­s ang magharap sa presidential race sa 2016 elections.
Pero kung aalisin ang usapin ng mga magaganap na halalan at pagtutuunan ng pansin ang reklamo laban kay Garcia, maiiwan ang pangunahing isyu sa kontrobersyang ito dapat na sundin ni Garcia ang proseso ng batas at bumaba sa kapitolyo habang iniaapela ang kaso.
Sa reklamo ng namayapang dating Cebu vice governor Greg Sanchez Jr., inakusahan niya si Garcia na ginamit ang pondo ng kanyang tanggapan sa ibang pang gamitan. 
Ang reklamo ay inimbestigahan ni Robredo pero hindi na naipatupad ang resulta ng kanyang imbestigasyon dahil sa trahedyang sinapit nito na dahilan ng kanyang pagkamatay. 
Ang tanong ni Mang Kanor: Kung buhay kaya si Robredo at ipinatupad ang suspension order kay Garcia, magrereklamo rin kaya ang UNA ng pamumulitika?
***
Napag-usapan ang kaso, bukod sa reklamo ni Sanchez, may dalawang kasong graft at isang illegal use of public funds na kinakaharap si Garcia sa Office of the Ombudsman.
Ito ay bunga ng umano'y maanomalyang pagbili ng Balili Estate noong 2008 na nagkakahalaga ng P99 milyon. Bukod daw kasi sa walang pondo ang kapitolyo tungkol sa naturang proyekto, agrabyado umano ang mga mamamayan ng Cebu sa naturang transaksyon.
Papaano kaya kung may lumabas na desisyon ang Ombudsman o maging ang Sandiganbayan tungkol sa nabanggit na mga kaso na hindi paborable kay Garcia, sasabihin ba nila na ito'y may bahid ng pulitika?
'Ika nga ni Mang Gusting: Bilang isang opisyal ng isang premyadong lalawigan, hindi magandang ehemplo na suwayin ang proseso ng batas. Hindi rin magiging maganda sa pananaw ng publiko kung maging ang iba pang matataas na opis­yal ay mag-uudyok kay Garcia na manatili sa kapitolyo at huwag igalang ang kautusan ng DILG.
Sa pagtitimbang ng magkumpareng Kanor at Gusting, mas magiging kahanga-hanga sana ang gobernadora kung kinilala niya ang desisyon ng DILG, bumaba ng kapitolyo, at saka nagsampa ng petisyon sa korte para kwestyunin ang desisyon ng DILG.
Kung pumabor sa kanya ang pasya ng Korte, mapapatibay nito ang kanyang paninindigan at naipakita pa ang tamang pagsunod sa proseso ng batas. Ngunit papaano kung hindi kumampi sa kanya ang pasya ng korte, susuwayin din ba niya ang hukuman?
Hirit pa ni Mang Kanor: Kung talagang naniniwala si Garcia at mga opisyal ng UNA na nasa kanila ang suporta ng mga Cebuano, ano ang ikatatakot nila sa 2013 elections kahit wala sa kapitolyo si Garcia, maliban na lamang siguro kung mayroong alam si Garcia at ang UNA officials na taktika kung papaano magpaparami ng boto na hindi natin alam?
Alalahanin ng publiko na ang mahigit isang milyong boto ang nakuha ni dating Pangulong Gloria Macapagal-Arroyo sa Cebu ang nagpapanalo sa kanya laban kay Fernando Poe Jr. noong 2004 elections ito'y sariwa pa sa puso't isipan ng mag-inang Grace Poe at Susan Roces! 
Noon, nagrereklamo ang mga kaalyado ni FPJ na nadaya sila sa Cebu ito''y nalalaman ng buong tropa sa UNA pero ngayon, full force sila sa pagtatanggol sa Garcia. Huling hirit pa ni Mang Kanor na kapitbahay ni Mang Gusting: Iyan ang malinaw na pulitika.

Laging tandaan: "Bata mo ko at Ako ang Spy n'yo." (mgakurimaw.blogspot.com)