Wednesday, October 31, 2012

Batu-bato sa langit!



Batu-bato sa langit!
REY MARFIL




Sa official visit ni Pangulong Noynoy 'PNoy' Aquino sa New Zealand, hindi lang natuwa ang mga kababayan natin doon nang makita siya, napatawa pa sila sa mga "political jokes" na binitiwan nito.
Pero mayroon tayong kababayan na wala naman sa naturang pagtitipon doon sa New Zealand at nandito sa Pilipinas ang tila hindi nasiyahan sa naturang joke ni PNoy tungkol sa mga kurap na kababayan sa bansa.
Sa harap ng may 1,000 Pinoy sa naturang pagtitipon sa New Zealand, malinaw ang pahayag ni PNoy, isi-share niya ang narinig niyang joke. Karaniwan na rin naman sa speaker ang magpatawa bago ang seryosong talakayan para makuha ang atensiyon ng mga tao.
Panimula ni PNoy: "Share ko ho lang sa inyo isang…tawang-tawa ako sa narinig kong joke. 'Yung mga kababayan raw ho nating kurap sa Pilipinas, kagagara ng kotse, kamamahal, katutulin, pero pagka ginustong tumakas ang ginagamit wheelchair.
May binanggit din ang Pangulo tungkol sa mga taong "ginatasan" na ang baka, gusto pang gawing "bulalo".
Malinaw ang biro ng Pangulo, wala siyang tinukoy na pangalan ng kurap na Pilipinas. At ang biro ay hindi sa kanya nagmula kundi ibinahagi lang niya ang kanyang narinig na nagpasaya sa kanya.
Kung tutuusin, hindi naman nabigo si PNoy sa kanyang intensyon dahil nagtawanan ang mga tao, nabuhayan ng sigla kaya nakuha niya ang intensiyon.
***
Napag-usapan ang joke -- pumalag sa Pilipinas ang kampo ni dating Pangulong Gloria Macapagal-Arroyo na gustong palitawin na sila ang pinatatamaan ni PNoy.
Hindi raw maganda na gawing katawa-tawa ang sitwasyon ng dating lider na naka-hospital arrest ngayon dahil sa mga alegasyon ng kasong katiwalian.
May karamdaman umano si Mrs. Arroyo kaya pinayagan siyang manatili sa ospital ng Sandiganbayan kaysa ilipat at idetine sa regular na kulungan. Kung tutuusin, dapat pang magalit ng mga taong meron kapansanan dahil kinakasangkapan ng ilang corrupt officials ang kanilang sektor o kapansanan upang makaiwas sa pag-uusig ng batas, as in dobleng insulto ang ginawa!
Mayroon ding humirit na nagsabing may sakit siya at gumagamit ng wheelchair at hindi raw nito nagustuhan ang birong iyon ni PNoy.
Pero kung tutuusin, hindi kay PNoy dapat magalit ang sinumang tunay na may sakit at nakabilanggo sa wheelchair. Sa halip, dapat silang magalit sa mga kurap na pulitiko na kapag huhulihin sa kasong katiwalaan ay biglang nagkakasakit at makikitang nakasampa sa wheelchair.
Sa mga taong ito sila dapat magalit at mainis dahil kinakasangkapan ang wheelchair para magmukhang kaawa-awa at makakuha ng simpatya makaiwas lang sa kulungan.
Samantala, kung alam mo malinis ang iyong konsensiya at hindi totoo ang ibinibintang sa iyo, hindi mo dapat ikairita ang anumang biro o pahaging na ibabato sa ito. Maliban na lamang kung akma sa iyo ang kasabihang: "batu-bato sa langit, ang tamaan 'wag magalit".
Dahil kung ikaw ay pumiyok kahit hindi naman tinamaan ng bato, pag-iisipan na ikaw ay "feeling guilty".

Laging tandaan: "Bata mo ko at Ako ang Spy n'yo". (mgakurimaw.blogspot.com)



Monday, October 29, 2012

Wag 'utak-talangka'



Wag 'utak-talangka'
REY MARFIL




Makatwirang suportahan at purihin ang maigting na pagsusumikap ng pamahalaan na maselyuhan ang usapang pangkapayapaan sa Moro Islamic Liberation Front (MILF) dahil siguradong hindi lamang makikinabang ang maraming mga komunidad sa Mindanao kundi ma­ging ang sektor ng negosyo.
Nakakabilib ang sensiridad ni Pangulong Noynoy 'PNoy' Aquino na makamit ang wagas at mailap na kapayapaan na inaasam ng ating mga kababayang naiipit ng labanan sa Mindanao, as in nais ng pamahalaan na maiangat ang kabuhayan ng ating mga kabayayan sa Min­danao sa lalong madaling panahon.
Ito ang nagtutulak kay PNoy upang agresibong maisulong ang iba't ibang magagandang mga programa katulad ng mga proyektong imprastraktura at karagdagang pondo sa sektor ng edukasyon. Malinaw na ang pagpapalakas sa kakayahan at kapangyarihan ng mga Pilipino ang nagsisilbing pundasyon ng mga reporma.
Sa ganitong bagay kumukuha ng inspirasyon si PNoy para isulong ang framework agreement sa MILF na tatapos sa armadong pakikibaka ng rebeldeng grupo kaya't tigilan ng mga "nag-uutak talangka" ang pagkontra sa kasunduan kung sila mismo'y walang nagawa sa panahong binigyan ng pagkakataong isaayos ang Mindanao.
Sa pagkakaroon ng kapayapaan, inaasahan nating mailalatag ang mga reporma at pagbabago sa Mindanao dahil isusulong ng framework agreement ang pagkakaisa ng mga Filipino tungo sa pagkakaroon ng hanapbuhay, pabahay, edukasyon at maraming iba pa.
Nilagdaan ng pamahalaan at MILF ang framework agreement para sa kapayapaan ng Mindanao. Dumalo sina Malaysian Prime Minister Datuk Seri Najib Tun Razak, MILF Chairman Al Hadj Murad, MILF contingent at iba pang katuwang na mga grupo sa makasaysayang paglagda ng isinusulong na usapang-pangkapayapaan.
***
Napag-usapan ang Mindanao, magandang balita ang patuloy na pangungumbinse ni PNoy sa business process outsourcing (BPO) na mga kumpanya na mamuhunan sa Mindanao lalung-lalo na ngayong malapit nang maisara ang usapang-pangkapayapaan ng pamahalaan at MILF.
Kinikilala rin ni PNoy ang malaking kontribusyon ng sektor sa pagsulong ng bansa sa pamamagitan ng trabahong naibibigay sa mga Pilipino.
Namumuhunan kasi ang karamihan ng mga kumpanyang BPO sa tinatawag na Next Wave Cities, kabilang dito ang Sta. Rosa sa Laguna, Lipa sa Batangas, at Dumaguete.
Matindi at malawak ang positibong epekto ng BPO dahil nagkakaroon ng hanapbuhay ang mga Pilipino sa buong bansa para sa mas maayos na direksiyon ng kanilang mga buhay.
Umabot sa $11 bilyon ang industriya ng BPO noong 2011 at nakalikha ng 113,000 na bagong mga trabaho ito'y naging daan upang tanghalin ang Pilipinas na nangungunang contact center industry sa buong mundo at malampasan ang India noong 2010.
Inaasahan naman ni PNoy na aabot sa $25 bilyon ang BPO industry sa 2016 upang maging 1.3 milyong Filipino ang magkakaroon ng hanapbuhay sa sektor.
Mapalad tayo sa pagkakaroon ng isang lider na ka­tulad ni PNoy na nagawang maibalik sa pamahalaan ng kanyang malinis at matuwid na pamumuno ang tiwala ng publiko at mga negosyante.

Laging tandaan: "Bata mo ko at Ako ang Spy n'yo". (mgakurimaw.blogspot.com)

Friday, October 26, 2012

Dalawang santo sa dalawang Aquino!



Dalawang santo sa dalawang Aquino!
REY MARFIL




Pinagpala tayong mga Pilipino dahil sa loob lamang ng 25 taon, biruin ninyong nagkaroon tayo ng dalawang santo sa katauhan nina San Lorenzo Ruiz at San Pedro Calungsod.
Si San Lorenzo ay idineklarang santo sa Vatican ni Pope John Paul II sa proseso ng kanonisasyon noong October 28, 1987, samantalang nito lamang October 21, 2012 ginawa ang kanonisasyon ni San Pedro ni Pope Benedict XVI.
Ngunit maliban sa parehong naganap sa buwan ng Oktubre ang pagdedeklarang santo sa dalawa nating kababayan, nagkataon din na naganap ito sa ilalim ng administrasyon ng dalawang Aquino kina dating Pangulong Corazon 'Tita Cory' Aquino noong 1987 at ngayo'y kay Pangulong Benigno 'PNoy' Aquino III.
Gaya ni PNoy, hindi rin nakadalo si Tita Cory sa kanonisasyon ni San Lorenzo dahil nang mga panahon na iyon ay lubhang abala ang unang babaeng Pangulo ng bansa sa pagharap sa dami ng problema ng bayan katulad ng rebelyon.
Sa halip, ipinadala ni Tita Cory sa Vatican na magsisilbing kinatawan niya sina noo'y da­ting Department of Education Secretary Lourdes Quisumbing at dating Department of Finance Sec. Vicente Jaime.
Sa kanonisasyon ni San Pedro, nataon na may official visit si PNoy sa New Zealand at Australia.
Kaya naman ang ipinadala niyang kinatawan sa Vatican sina Vice President Jejomar Binay at Department of Energy Secretary Rene Almendras.
At nagkataon din sa panahon ni Tita Cory umusbong ang pangalan ni Jaime Cardinal Sin, animo'y sinadya ng tadhana ang pagkakahirang ni Bishop Antonio Tagle bilang bagong Cardinal sa panahon ni PNoy.
***
Napag-usapan ang dalawang santo, hindi man kapwa nakadalo sa kanonisasyon ang mag-inang Aquino, hindi naman ito nangangahulugan na hindi mahalaga para sa kanila ang naturang mahalagang pagtitipon ng mga Kristiyano.
Si PNoy ay nagpalabas ng kanyang pahayag ng pagbati at pagbubunyi sa pagkakaroon natin ng ikalawang santo na si San Pedro, at ganoon din naman ang ginawa noon ni Cory nang hiranging santo si San Lorenzo.
Kung tutuusin, hindi naman ang lider ng mga bansa ang bida sa panahon ng kanonisasyon kundi ang mga banal na tao mula sa iba't ibang panig ng mundo na kikilalanin ang kanilang kadakilaan para sila itanghal na santo ng Vatican. 
Sadya ngang mapalad ang mga Pilipino na magkaroon ng dalawang pangulong Aquino na tapat at malinis ang ginagawang pamamahala sa bansa, kaya siguro natataon sa kanila ang pagkakadeklara ng mga Pilipinong Santo ito'y nangyari rin sa loob ng 25-taon!
Sana lang ay magsilbing magandang ehemplo at magbigay ng pag-asa sa ating lahat ang matapat na pamamahala ng mag-inang Aquino at ang kabanalan nina San Lorenzo at San Pedro para sa lubos na ikauunlad ng ating bansa at ng ating mga kababayan.
Laging tandaan: "Bata mo ko at Ako ang Spy n'yo". (mgakurimaw.blogspot.com)


Wednesday, October 24, 2012

Positibo!




                                             Positibo!

                                                                   


Kahanga-hanga ang patuloy na paninindigan ni Pa­ngulong Noynoy “PNoy” Aquino sa pagtiyak na mananaig ang karapatan ng mga konsiyumer na nakapaloob sa Republic Act (RA) No. 7394 o Consumer Act of the Philippines.
Muling tiniyak ng Pangulo ang pagsusulong ng karapatan ng mga konsiyumer sa kanyang talumpati sa pagbubukas ng Consumer Welfare Month sa SMX Convention Center sa Pasay City.
Sa ngayon, pinamumunuan ni Trade Secretary Gre­gory Domingo at iba pang kinauukulang mga ahensya ng pamahalaan ang pagdepensa sa karapatan ng mga mamimili para maging parehas, rasonable ang presyo at manatiling mataas ang kalidad ng mga produkto.
Maigting ang pagsusumikap ng administrasyong Aquino sa pagpapakalat ng kaalaman at impormasyon sa mga isyung nakakaapekto sa karapatan ng mga mamimili.
Dahil sa maigting na programa ng pamahalaan, mabilis at epektibong nabigyan ng solusyon ng Consumer Welfare Desks (CWD) ang mga reklamo ng mga konsiyumer.
Mismong si PNoy ang nagsabing 70,941 ng kabuuang 81,962 o 95% ng mga reklamo ang agarang nahanapan ng solusyon sa loob lamang ng isang linggo.
Umaabot ngayon sa mahigit 3,000 CWD ang nakakalat sa iba’t ibang mga palengke, malls at supermarkets sa buong bansa para tulungan ang mga mamimili sa kanilang problema.
***
Napag-usapan ang good news, hindi imposible na makamit pa ng liderato ni PNoy ang mas progresibong ekonomiya ng bansa dahil sa patuloy na implementasyon ng mga reporma.
Resulta ang patuloy na lumalaking ekonomiya ng bansa ng mga ipinatupad na pagbabago katulad ng masinop na paggugol ng pampublikong pondo o hindi pag-aaksaya ng salapi.
Nakakabilib naman talaga ang paglaki ng ekonomiya ng bansa ngayong taon na malayo sa mabagal na pag-asenso ng ekonomiya ng ibang mga nasyon sa buong mundo.
Nalampasan pa nga ang inaasahang paglago ng Gross Domestic Product (GDP) sa unang tatlong buwan ng 2012 matapos umabot sa 6.1% kaya naman abot-kamay ng pamahalaan ang target na paglaki ng GDP na lima (5) hanggang anim (6) na porsiyento sa pagtatapos ng taon.
Puntuhan rin natin ang positibong datos nitong 2011 sa pagkakautang ng bansa sa GDP ratio na 50.9% na mas mababa sa naitalang 52.4% noong 2010. Kasi nga naman, maraming pumapasok na mga mamumuhunan dahil sa pagbabalik ng kanilang tiwala sa gobyerno.
Kamakailan, naitala ng Pilipinas ang dalawang magkasunod na beses na pagtalon ng 10 puwesto sa World Economic Forum’s 2012-2013 Global Competitiveness Report.
Ipinagmamalaki rin ng Punong Ehekutibo ang lu­malaking bilang ng mga negosyanteng naghahayag ng tiwala kay Pangulong Aquino dahil sa malinis at matuwid nitong pamamahala.
Aasahan nating patuloy na makikinabang ang mga Fi­lipino sa bunga ng mabuting binhi na itinanim ni PNoy sa kanyang matuwid na daan.

Laging tandaan: “Bata mo ‘ko at Ako ang Spy n’yo.” (mgakurimaw.blogspot.com)

Monday, October 22, 2012

Dapat walang bahid!





Dapat walang bahid!
REY MARFIL


Bilyun-bilyong piso ang pinag-uusapan sa industriya ng iligal na droga sa Pilipinas. Kaya naman kung mahina sa tukso ng pera ang mga namamahala sa ahensiyang nakatokang bumuwag sa kanila katulad ng Philippine Drug Enforcement Agency (PDEA), malamang sa malamang, masilaw sila.
Kaya naman nang masangkot sa alegasyon ng korupsiyon ang dalawang pangunahing opisyal sa PDEA, marami sa ating mga kababayan ang nabahala. Kung totoo nga naman na tumatanggap ng suhol ang mga opisyal, papaano pa kaya ang kanilang mga tauhan?
Dahil seryoso ang alegasyon at walang puwang sa krusadang "tuwid na daan" ang katiwalian, inalis sa puwesto ng Malacañang si PDEA Deputy Director General Carlos Gadapan dahil sa tinawatag na "loss of confidence".
Kasunod nito, iniutos ni Pangulong Noynoy 'PNoy' Aquino na imbestigahan ang buong ahensiya para malaman ang katotohanan sa mga naglalabasang impormasyon tungkol sa nagaganap na katiwalian sa PDEA.
***
Napag-usapan ang bangayan, hindi kasi biro ang alegasyon. Sinasabing mayroon isang hinihinalang Chinese drug lord na nadakip ang umano'y nagbigay ng malaking halaga sa mga opisyal ng PDEA para iurong ang kaso laban sa kanya. Gayunpaman, lumabas sa mga ulat na kahit nailabas ang umano'y suhol na pera, nanatiling nakapiit ang sinasabing drug lord.
Pero hindi rito nagtapos ang kontrobersiya. Inakusahan ni Gadapan ang kanyang pinuno na si PDEA Director General Jose Gutierrez Jr., na sangkot sa katiwalian at gumaganti lamang sa kanya.
Bukod pa rito, sinabi ni Gadapan na lulong daw sa pagsusugal sa casino ang misis ni Gutierrez na lalong nagpalala sa usapin tungkol sa gusot ng mga pinuno ng ahensiyang inaasahang magpapatumba sa bilyun-bilyong industriya ng illegal drugs.
Kung nagbabanggaan at nagbabatuhan ng akusas­yon ng katiwalian ang mga lider ng ahensiya na malapit sa tukso ng suhulan, lagayan at pangingikil, asahan na may epekto ito sa kanilang mga tauhan o demoralisyon.
Kahit na itinanggi ng mga opisyal ang alegasyon sa kanila, hindi mawawala ang batik na iniwan nito at patuloy silang pagdududahan.
Magandang hakbang ang ginawa ni PNoy na maghanap na rin ng kapalit ni Gutierrez sa katauhan ni dating Police Deputy Director General Arturo Cacdac Jr. bilang bagong pinuno ng PDEA.
Sa ganitong paraan, magkakaroon ng bagong simula ang PDEA upang linisin ang nadungisang pangalan ng ahensiya dahil sa naging away ng kanilang mga dating pinuno.
Bukod dito, muling pinatunayan ni PNoy na wala siyang sasantuhin sa mga itinatalaga niya sa puwesto na masasangkot sa katiwalian, lalo na kung may kinalaman sa iligal na droga na itinuturing salot ng lipunan.

Laging tandaan: "Bata mo ko at Ako ang Spy n'yo". (mgakurimaw.blogspot.com)

Friday, October 19, 2012

Paghahanda!



Paghahanda!
REY MARFIL





Magandang balita ang pahayag ng European Union na nangunguna ang Pilipinas sa ilalim ng administrasyong Aquino sa kanugnog na mga bansa sa Timog Silangang Asya sa usapin ng paghahanda at pagharap sa mga sakuna para makapagligtas ng mga buhay.
Nasaksihan ni Ambassador Guy Ledoux ng Delegation of the European Union ang progreso ng Pilipinas kaugnay sa mga progma na may kinalaman sa disaster risk reduction.
Sa katunayan, pinuri niya ang pagkakaisa ng mga lokal na pamahalaan, non-government organizations at mga komunidad para makapagsalba ng mga buhay at mabawasan ang pagkasira ng mga ari-arian dulot ng mga sakuna.
Sa selebrasyon ng National Conference for Effective Disaster Risk Reduction and Climate Change Adaptation Practices kung saan naging tagapagsalita si Ledoux, binigyang-diin nitong kahanga-hanga ang mga paghahanda ng bansa sa disaster risk reduction at climate change.
Sa pahayag ng United Nations Office for Disaster Risk Reduction, pinakamatinding naaapektuhan ng mga sakuna ang kontinente ng Asya at matatagpuan din sa Asya ang siyam sa 10 nangungunang mga bansa sa mundo na mayroong pinakamalaking bilang ng mga nasasawi dahil sa mga sakuna.
Dinaluhan ang komperensiya ng mahigit sa 100 disaster risk reduction practitioners mula sa tinatawag na high-risk communities sa Regions II, V, XII, CAR at Caraga na kasama sa programa ng EU sa disaster preparedness program.
***
Napag-usapan ang good news, ginagawa ng administras­yong Aquino ang lahat ng makakaya nito upang mapabuti ang ekonomiya ng bansa at makabangon sa kahirapan ang Pilipinas na minsang tinawag na "sick man of Asia".
Ayon kay Philippine Ambassador to Washington Jose Cuisia Jr., matagumpay na iprinisinta ni Finance Secretary Cesar Purisima sa isang komperensiya sa Estados Unidos ang positibong macroeconomic developments ng bansa na resulta ng matuwid na daan at matinong pamamahala ng administrasyong Aquino. Mabuting nakamtan ito ng administrasyon na nag-iiwan ng magandang kinabuksan para sa ekonomiya ng Pilipinas.
Pinakamainam pang nangyari rito ang pagsang-ayon ng mga opisyal ng US, kinatawan ng mga grupong nagsasagawa ng pananaliksik, executives ng malalaking mga negosyo, mga kasapi ng media at academe, mga Filipino at Amerikano sa pahayag ni Purisima na umaahon ang Pilipinas.
Ipinagmalaki ni Purisima sa komperensiyang pinamunua­n ng Center for Strategic and International Studies at US-Philippines Society at the Capitol Hilton na lalong bumango si Pangulong Noynoy 'PNoy' Aquino para itaguyod ang mga reporma at pagbabago matapos makakuha ng mataas na approval at trust ratings na 78%.
Pinalakas naman kasi ng administrasyong Aquino ang kampanya nito sa matalinong paggugol ng pampublikong pondo, pagmintina ng malakas na macro-economic, tumataas na klima ng pamumuhunan dahil sa malaking tiwala ng mga negosyante sa pamahalaan at pagbawas sa gastusin upang magtayo ng negosyo para tanghalin ang Pilipinas bilang susunod na "tiger economy" ng Asya sa susunod na mga taon at ika-16 na pinakamalaking ekonomiya sa buong mundo sa pagpasok ng 2050.
Kitang-kita naman ang pag-ahon ng bansa base sa malaking positibong pagbabago sa kalagayan ng Pilipinas sa larangan ng pamamahala at kakayahang sumulong base sa nakuhang ranking sa World Economic Forum at credit rating agencies.
Ipinakita lamang dito ni PNoy na susi sa pagsulong ng magandang ekonomiya ang malinis na pamamahala. Dapat patuloy nating suportahan ang matuwid na daan ng administrasyong Aquino na umaani ngayon ng tagumpay at benepisyo para sa mga Pilipino.

Laging tandaan: "Bata mo ko at Ako ang Spy n'yo". (mgakurimaw.blogspot.com)


Wednesday, October 17, 2012

Pagkakataon!



Pagkakataon!
REY MARFIL


Isang makasaysayang tagpo ang naganap sa Malacañang nitong Lunes nang lagdaan sa harapan nina Pangulong Noynoy 'PNoy' Aquino at Chairman Murad Ebrahim Moro Islamic Liberation Front (MILF) ang framework agreement na inaasahang magbibigay ng ganap na kapayapaan sa Mindanao.
Maraming kapatid nating Muslim ang naging emosyunal nang lagdaan ang kasunduan na magiging simula sa pagbalangkas ng mga sistema at istruktura sa pagbuo ng Bangsamoro Entity na papalit sa Autonomous Region in Muslim Mindanao (ARMM).
Hindi naman talaga natin maaalis sa ating mga kapatid na Muslim na maging emosyunal at mapaluha lalo na dun sa mga nakatira sa lugar sa Mindanao na laging nagiging sentro ng bakbakan at naiipit sa palitan ng putok ng mga sundalo at MILF fighter.
Idagdag pa natin ang naulilang mga pamilya ng mga mandirigmang MILF at sundalo ng gobyerno na nagbuwis ng kanilang buhay dahil ipinaglaban nila ang kanilang prinsipyo. Kung noon pa sana ito nagawa ng mga nakaraang lider, sana'y maraming buhay at ari-arian ang nailigtas.
Kaya naman ang pagsisikap na ito ni PNoy na hanapan ng kapayapaan ang Mindanao ay umani ng papuri mula sa marami nating kababayan - Muslim man o Kristiyano, maging sa international community.
***
Napag-usapan ang suporta, maging si Malaysian Prime Minister Najib Razak na kasamang sumaksi sa paglagda sa kasunduan, ito'y nagpahayag ng pagbati sa pamahalaan at MILF.
Kung tutuusin, makikinabang din ang Malaysia sa kapayapaan sa Mindanao dahil marami rin naman sa mga kababayan na tumatakas sa giyera ng mga sundalo at MILF, ito'y nagpuntahan sa Malaysia gaya sa Sabah.
Batid naman nina PNoy at Murad na ang pinirma­hang framework agreement ay panimula pa lamang sa sabay na paglalakbay ng pamahalaan at MILF tungo sa hinahangad nilang kapayapaan sa Mindanao.
minado sila na kailangan pa rin ang lubos na pagkakaisa at kooperasyon sa magiging laman ng sistema at istruktura sa pagbuo ng Bangsamoro entity.
Isa na rito ay ang pagpapanatili sa mga miyembro ng MILF sa loob ng kasunduan at hindi maulit ang nangyari noon sa pakikipagnegosasyon ng pamahalaan sa Moro National Liberation Front (MNLF). 
Matapos maisara ang kasunduan sa MNLF na naging daan ng pagkakatatag ng ARMM, marami sa miyembro ng MNLF na hindi sang-ayon sa kasunduan ang tumiwalag at sumama sa MILF.
Aminin man o hindi, masasabing hindi lubos ang na­ging tagumpay sa pakikipagkasundo sa MNLF dahil sa kabila ng pagkakabuo ng ARMM, ito'y nanatiling armadong pakikibaka ng maraming Muslim laban sa pamahalaan sa pangunguna nga ng MILF.
At ngayon nakaapak sa unang baytang ng kapayapaan ang pamahalaan, kasama ang MILF, umaasa ang ating mga kababayan na hindi magiging sagabal dito ang MNLF kahit pa baguhin ang ARMM at palitan ng Bangsamoro entity.
Kung tunay na kapayapaan at pagsusulong sa karapatan ng mga kapatid nating Muslim sa Mindanao ang hangad ng mga armadong grupo, walang dahilan para hindi nila samahan si PNoy sa paglalakbay tungo sa hinahangad na katahimikan sa rehiyon.

Laging tandaan: "Bata mo ko at Ako ang Spy n'yo". (mgakurimaw.blogspot.com)

Monday, October 15, 2012

Sin tax!



Sin tax!
REY MARFIL


Simple lang naman ang layunin ng administrasyon sa isinusulong nitong programa na taasan ng buwis ang sin products lumaki ang buwis na makukuha sa sigarilyo at alak, at mabawasan ang mga tumatangkilik sa bisyong ito na pinagmumulan ng iba’t ibang sakit.
Kung masusunod ang hinahangad na bersiyon ng pamahalaan para sa dagdag na buwis, tinatayang P60 bil­yon ang dagdag na kikitain ng gobyerno. Dagdag na kita na mapupunta sa pondong ginagamit sa pagpapagamot ng mga nagkakasakit na Pilipino, kasama na ang mga nagkasakit dahil sa labis na paninigarilyo at pag-inom ng alak.
Ngunit ang layunin na ito ng pamahalaan ay nalubak ng dalawang ulit habang tinatalakay sa dalawang kapulungan ng Kongreso ang Senado at Kamara de Representantes.
Sa bersiyon na ipinasa ng Kamara, ang inaasahang kita ng pamahalaan na P60 bilyon ay nabawasan sa P30 bilyon. Subalit mas maliit ang bersiyon na ipinasa sa committee on ways and means ng Senado na umabot lang sa P20 bilyon.
Mula kasi sa komite, pagdedebatihan na ang panukalang batas sa plenaryo kung saan maaari pang mabago ito at maitaas ang numero sa kokolektahing buwis.
Maliban kasi sa madadagdagan ang pondo na ilalaan sa kalusugan, intensiyon ng pamahalaan na mapataas talaga ang presyo ng sigarilyo at alak para mailayo na sa bisyo ang mga tao lalo na ang mga kabataan.
Kung magiging mahal na ang presyo ng sigarilyo at alak, tiyak na mababawasan ang kumukonsumo nito. Mababawasan din ang mga taong nagkakasakit lalo na ang mga mahihirap na walang pambayad sa ospital na kailangang tulungan ng gobyerno sa kanilang pampaospital.
Asahan din na may kapalit ang magandang layunin na ito ng pamahalaan, walang iba kundi ang posibleng paghina ng negosyo ng tabako at alak na tatama sa malalaking kumpanya na matagal nang kumita sa mga taong nalulong sa kanilang produktong nagdudulot ng masamang epekto sa kalusugan.
***
Napag-usapan ang aksyon ng gobyerno, ang malinis na intensiyon ni PNoy ang nasa likod ng paniniyak ng Department of Social Welfare and Development (DSWD) na kanilang ginagawa ang lahat ng mga paraan upang hindi magamit ng mga politiko ang ipinapatupad na conditional cash transfer (CCT) program.
Inihayag ni DSWD-Cordillera regional director Leonardo Reynoso na isinasa-pinal nila ang memorandum para ipaalala sa lahat ng mga benepisyunaryo na maaari silang dumalo sa mga pagtitipon bukod sa ipinatawag ng departamento bilang aktibong mga botante at hindi benepisyunaryo ng CCT.
Kinakatigan ko ang kahalagahan na hindi dapat dumalo ang mga benepisyunaryo sa mga politikal na pagtitipon suot ang CCT t-shirts. Alam naman natin na madaling abusuhin ang CCT ng ilang ganid na mga politiko para sa kanilang pansariling interes.
Umaabot sa 3.1 milyon ang benepisyunaryo ng CCT sa buong bansa at 54,000 pamilya ang nakikinabang sa tinatawag na bridge program sa mga malalayong mga rehiyon.
Dapat maunawaan ng lahat, partikular ang mga politiko, na sineserbisyuhan ng DSWD ang lahat ng walang anomang pulitikal na konsiderasyon. Kaya naman masigasig ang mga opisyal ni PNoy sa pagtiyak na hindi ito magagamit sa pulitika, kahit ng kanyang mga kakampi sa darating na halalan.

Laging tandaan: “Bata mo ‘ko at Ako ang Spy n’yo.” (mgakurimaw.blogspot.com)

Friday, October 12, 2012

‘Wag matakot!




‘Wag matakot! 
Rey Marfil


Matuwid at malinis na pamamahala ni Pangulong Noynoy ‘PNoy’ Aquino ang nasa likod ng pagtiyak nitong hindi maaapektuhan ng darating na kampanya at halalan ang serbisyo ng gobyerno na nananatiling pangunahing prayoridad ng kanyang liderato.

Hindi naman ito nakakapagtaka kay Pangulong Aquino na patuloy ang pagsusumikap na maitaas ang kalaga­yan ng publiko, may halalan man o wala.

Kabilang sa mga pangunahing nakamit ng administras­yong Aquino ang panunumbalik ng tiwala ng publiko sa gobyerno at maging ang kumpiyansa ng mga negos­yante na maglagak ng kapital.

Inaasahan din nating makakatulong ang paggugol ng salapi ng publiko sa darating na Kapaskuhan at hala­lan para malampasan ang target na paglago ng ekonomiya ng bansa.

Mula Enero hanggang Hunyo ng taon, lumago ang ekonomiya ng bansa ng 6.1% dahil sa mataas na tamang paggugol ng pamahalaan at maayos na takbo ng pamumuhunan ng sektor ng negosyo at serbisyo.

***

Napag-usapan ang matinong pamamahala, tama ang paniniyak ni Justice Sec. Leila de Lima na protektado at hindi gigipitin ang mga karapatan ng publiko sa ilalim ng Kons­titusyon sa ipinapatupad na Republic Act 10175 o Cybercrime Prevention Act. Ibig sabihin, walang dapat ikatakot sa pamamahala ni PNoy lalo pa’t kabaliktaran sa nakaraang administrasyon.

Siguradong gagamitin ng Department of Justice (DOJ) sa tama ang anumang kapangyarihan at awtoridad na ipinagkakatiwala ng umiiral na mga batas na umaayon sa pamantayan ng karapatang-pantao.

Dapat matuto ang publiko sa pamosong pahayag ni “Uncle Ben” na “with great power comes great responsibility” sa kuwento ng Spiderman sa pagharap sa probis­yon ng libelo ng Cybercrime law.

Si Uncle Ben ang Benjamin ‘Ben’ Parker sa mga kuwento ng Spiderman na tiyuhin at humaliling ama ni Peter Parke­r, ang alter ego o gumanap sa papel ni Spiderman.

Dapat tingnan ang probisyon sa libelo kontra sa ordinar­yong usapan sa Facebook at Twitter sa ilalim ng batas na pagpapakita lamang ng responsibilidad ng bawat isa sa kanilang pagpapahayag at hindi paninikil sa karapatan ng publiko na gumamit ng social media.

Hindi ko nakikitang mali ang pagkakasama ng probis­yon sa libelo sa batas dahil lahat naman tayo ay responsable at may pananagutan laban sa anumang pahayag, lalung-lalo na kung mapanira ito sa mga tao.

Kung anuman ang mensaheng ating ilalagay sa Facebook at Twitter, sinisiguro nating hindi ito makakasira sa reputasyon ng sinuman, lalung-lalo na kung wala naman tayong ebidensiya.

Kapuri-puri rin naman ang panukala ng administrasyong Aquino na magkaroon ng dayalogo ang lahat ng sektor na apektado ng batas kasama ang DOJ para maresolba ang ilang mga agam-agam sa proseso ng pagbuo ng Implemen­ting Rules and Regulations (IRR) ng Cybercrime.

Ipinasa ng Kongreso ang Cybercrime Prevention Act upang sugpuin ang mga kawalanghiyaan at kalaswaan sa Internet kung saan ipinasok ang probisyon sa libelo laban sa mga mapanirang posting sa Facebook at Twitter na baha­gi ng responsibilidad ng bawat Filipino.

Dapat magsama-sama ang lahat para labanan ang tinatawag na online vandalism at bullying dahil ito ang mapanira sa maraming mga tao. Laging tandaan: “Bata mo ko at Ako ang Spy n’yo”.

(mgakurimaw.blogspot.com)

Wednesday, October 10, 2012

Diretso sa kapayapaan!




Diretso sa kapayapaan!
REY MARFIL



Isang magandang balita ang inihatid ni Pangulong Noynoy ‘PNoy’ Aquino tungkol sa nabuong “Framework of Agreement” ng pamahalaan at rebeldeng Moro Islamic Liberation Front (MILF) na maaaring maging daan tungo sa kapayapaan sa Mindanao.
Ang balangkas ng kasunduan ay panimula para sa pagbuo ng Bangsamoro Region na papalit sa kasalukuyang Autonomous Region in Muslim Mindanao (ARMM). At kung magtutuluy-tuloy ang paghimay sa usaping ito, maaaring ganap na maisakatuparan ang kasunduan bago matapos ang termino ni PNoy sa 2016.
Hindi biro ang pinsala na idinudulot ng bakbakan ng pamahalaan at MILF sa buhay ng mga tao at ari-arian. Sa halos apat na dekadang labanan, tinatayang 150,000 buhay na ang nasawi mula sa magkabilang panig.
Bukod sa mga nasawing buhay, libu-libong pamilya rin ang naaapektuhan ng bakbakan ng mga sundalo at rebelde dahil napipilitan silang lumikas upang hindi madamay.
Idagdag pa riyan ang gastusin na inilalaan ng gobyerno sa pagbili ng mga sandata, bala at iba pang gastusin para tustusan ang pangangailangan ng mga sundalo para tugisin ang mga rebelde mga rebelde na nakikipaglaban para sa kanilang prinsipyo.
Isipin na lamang natin kung magkano ang bilyun-bilyong pondo na naitapon ng mga nagdaang gobyerno sa pakikipaglaban sa mga debeldeng MILF pondong nagamit sana sa pagpapatayo ng maraming paaralan, tulay, irigasyon at iba pang proyekto na makakapagpahusay sa kabuhayan ng mga tao at hindi perwisyo.
Ngayon pa lang, mayroon nang ilan ang nagpaha­yag ng agam-agam sa bubuuing bagong political entity sa Mindanao mga pangamba na natural lang naman pero huwag naman sanang mauwi sa pagharang sa inaasahan na kapayapaan.
***
Napag-usapan ang mga agam-agam sa peace talks, bigyan sana natin ng pagkakataon na makita ang magiging resulta ng isinasagawang negosasyon na maging ang liderato ng MILF ay nagpahayag ng buong pag-asa.
Kapuri-puri rin ang dedikasyon ni PNoy na tuparin ang kanyang pangako na hanapan ng lunas ang matagal nang digmaan sa Mindanao. Isama na rin natin sa papu­ri ang mga taong namahala sa negosasyon sa MILF sa pangunguna nina Presidential Adviser on the Peace Process Teresita Quintos-Deles at government lead negotiators na Marvic Leonen.
Hindi katulad ng kontrobersiyal na pakikipagnegosasyon na isinagawa ng gobyerno ni dating Pangulong Gloria Macapagal-Arroyo sa MILF na binatikos na kulang sa negosasyon, ang kasalukuyang negosasyon na isinagawa ng pamahalaang Aquino ay nakalantad at maaaring mabasa sa website ng Malacañang (http://www.gov.ph).
Matatandaan na ang nilutang kasunduan ng administrasyong Arroyo ay ibinasura ng Korte Suprema na ginamit na katwiran ng ilang miyembro ng MILF para magwala at maghasik ng labanan sa ilang lugar sa Mindanao na nagresulta sa pagkamatay ng maraming tao.
Kaya naman dapat suportahan ang bagong pag-asa ng kapayapaan sa Mindanao na isinusulong ni Aquino na makabubuti hindi lang sa mga Muslim kundi pati na rin sa mga Kristiyano sa rehiyon.

Laging tandaan: “Bata mo ko at Ako ang Spy n’yo”. (mgakurimaw.blogspot.com)

Monday, October 8, 2012

Walang personalan!




Walang personalan!
REY MARFIL


Tama ang paghamon ni Pangulong Noynoy 'PNoy' Aquino sa mga Pilipino na manatili sa paninindigang makamit ang mas mataas na antas ng demokrasya upang hindi na maulit ang pasakit na dulot ng batas militar.
Sa kanyang talumpati sa paglulunsad ng auto­biography ni Senate President Juan Ponce Enrile na "Juan Ponce Enrile: A Memoir" na isinagawa sa The Peninsula sa Makati City, sinabi ng Punong Ehekutibo na bibigyan ng libro ng kapangyarihan ang dara­ting na mga henerasyon na maiwasan ang mga pagkakamali ng nakalipas.
Pinasalamatan ni PNoy ang 88-anyos na si Enrile na dating Defense Minister sa panahon ng diktadurya sa pagbabahagi ng kanyang kaalaman, karanasan, ideya at pananaw na siguradong makakatulong sa pagpapayaman ng isipan ng mga Pilipino.
Nasaksihan natin ang umiging demokrasya sa bansa na nagresulta sa pagbabago at nagsisilbi ngayon sa interes ng mga tao.
Maganda rin ang direktang pag-amin ni PNoy na maraming bagay na magiging magkasalungat sila ni Enrile, ngunit ipinagpapalagay naman niyang maaari rin silang magtrabahong dalawa para sa interes at kagalingan ng bansa.
Bagama't nabiktima ang kanyang pamilya ng Batas Militar na nagresulta sa pamamaslang sa kanyang amang si dating Sen. Benigno 'Ninoy' Aquino Jr., ipinakita ni PNoy sa pagdalo sa paglulunsad ng libro ni Enrile ang isa sa pinakamataas na porma ng isang matured at kahanga-hangang lider ng bansa na patunay rin ng buhay na buhay na demokrasya.
***
Napag-usapan ang good news, pinatunayan lamang ng pinakabagong survey ng Social Weather Stations (SWS) na nagsasabing komonti na lamang ang bilang ng mga pamilyang Pilipino na ikinokonsidera ang kanilang mga sarili bilang mahirap na talagang tumutugon sa pangangailangan ng publiko ang mga programa ng pamahalaan.
Base sa resulta ng Third Quarter 2012 SWS Survey, lumabas na 47% na lamang ng mga tinanong ang ikinokonsidera ang kanilang pamilya na mahirap.
Kinakatawan ng 47% ang tinatayang 9.5 milyong pamilya o mas mababa ng apat na porsiyento kumpara sa naitalang 51% noong nakalipas na survey nitong Mayo 2012.
Pinakahuling bumaba sa 50% ang self-rated poverty noong nakalipas na Disyembre kung saan uma­bot na lamang sa 45%.
Malinaw na tumutugon at epektibo ang mga programa ng pamahalaang Aquino sa paghahanap ng solusyon sa kahirapan sa bansa.
Asahan na natin na magtutuluy-tuloy ang magandang resulta sa ipatutupad pang makatao at ma­tinong programa ng administrasyong Aquino na pakikinabangan ng mga Pilipino sa hinaharap.

Laging tandaan: "Bata n'yo ko at Ako ang Spy n'yo". (mgakurimaw.blogspot.com)

Friday, October 5, 2012

'Wag masamain!




'Wag masamain!
REY MARFIL



Sa halip na ikasama ng loob, dapat tingnan sa positibong aspeto ni dating Pangulong Gloria Macapagal-Arroyo at iba pang kapwa akusado niya ang plunder case na kinakaharap nila dahil sa umano'y paglustay sa pondo ng Philippine Charity Sweepstakes Office (PCSO).
Matapos pagtibayin ng Office of the Ombudsman ang nauna nilang desisyon na kasuhan ng plunder sina Mrs. Arroyo at ilan nitong dating opisyal, asahan ang gagawing paglilitis sa kanila ng Sandiganbayan.
Ika ni Mang Gusting: hindi biro ang P366 milyon na pondo mula sa intelligence fund ng PCSO mula 2008 hanggang 2010 na umano'y ginamit sa "personal gain" ng mga akusado. At dahil walang piyansa sa mga kinakasuhan ng plunder kung mabigat ang ebidensiya, posibleng maibalik sa "kulungan" o hospital arrest ang da­ting pangulo.
Sa ngayon, pansamantalang nakalabas ng kanyang hospital arrest sa Veteran's Memorial Medical Center si Arroyo dahil pinayagan siya ng mababang korte na makapagpiyansa sa kasong electoral sabotage.
Ang iba pang kinakaharap na kaso tulad ng plunder na ito ang iniisip ng ilang tagamasid na kaya nagpupursige ang mga kaalyado ni Mrs. Arroyo na makapagpagamot ito sa ibang bansa.
Hinala pa ni Mang Gusting, baka gamiting dahilan ni Mrs. Arroyo ang pagpapagamot sa ibang bansa para matakasan ang kanyang mga kaso. At sa pangyayaring ito sa desisyon ng Ombudsman, hindi maaalis at asahan na aalma naman ang kampo ni Arroyo sa kasong ito ng plunder. 
***
Napag-usapan ang kaso, hindi rin inaalis ng mga kurimaw ang senaryong akusahan nila ang administrasyong Aquino ng panggigipit o kaya nama'y paghihiganti, ka­tulad ng favorite line ng mga inarkilang "media barker", sampu ng "tropapits" .
Pero sa halip na masamain ang desisyon ng Ombudsman, dapat isipin ng kampo ni Mrs. Arroyo na ito ang pagkakataon na malinis ang kanilang pangalan, at patunayan na walang katotohanan ang ibinibintang sa kanila.
Nauna na kasing hiniling ng kampo ni Mrs. Arroyo na ibasura ang reklamo tungkol sa paggamit ng PCSO fund dahil wala raw itong basehan, as in wala raw magpapatunay na pinakinabangan nila ang naturang milyun-milyong pondo.
Kung totoo at naniniwala pa rin sila sa depensa na walang kasalanan si Mrs. Arroyo at ilan pang inaakusahang nagkamal ng pondo ito ang pagkakataon para linisin nila ang pangalan sa tamang lugar -- ang Sandiganbayan.
Ang pagkakalaya ni Mrs. Arroyo sa kasong electora­l sabotage ay patunay na hindi iniimpluwensiyahan ni Pa­ngulong Noynoy 'PNoy' Aquino ang korte pagdating sa paggulong ng hustisya kaya't malaking kasinungalingan ang mga naunang ibinibintang.
Kung walang kasalanan, dapat harapin ng grupo ni Mrs. Arroyo ang kaso at tanggapin ng magkabilang kampo, anumang magiging desisyon ng korte, makalaboso man o maabsuwelto.

Laging tandaan: "Bata mo 'ko at Ako ang Spy n'yo". (mgakurimaw.blogspot.com)

Wednesday, October 3, 2012

Sobra pa!



Sobra pa!
REY MARFIL


Hindi nakakagulat kung makakuha ng pasadong marka ang administrasyong Aquino sa paghahanda sa mga sakuna mula sa pananaw ng mga taong tinanong sa pina­kabagong survey ng Pulse Asia.
Lumabas sa resulta ng survey na isinagawa mul­a Agosto 31 hanggang Setyembre 7 na nakakuha ang pamahalaan ng average na gradong 80. Ibinase ang grado sa sukatang 0 hanggang 100 kung saan 75 ang pasadong marka.
Nakakuha ng median grade na 85 o very good ang mga paghahandang isinagawa ng administrasyon at 80 naman sa mabilis at epektibong pagtugon sa sitwasyon.
Isinagawa ang survey matapos ang malawakang pagbaha sa Metro Manila at kanugnog na mga lalawigan dulot ng hanging habagat sa kaagahan ng Agosto.
Kabilang din sa pangunahing mga isyu noong panahon na iyun ang kamatayan ni Interior Sec. Jesse Robredo, 7.9 na lakas ng lindol sa Eastern Samar, at napabalitang pagtakas ni dating Palawan Gov. Joel Reyes.
Siguradong itutuluy-tuloy ng pamahalaan ang lalong pinalakas na mga programa ang pagpapababa sa banta sa buhay ng publiko na dulot ng kalamidad.
Inaasahan natin ang mas magandang resulta sa hinaharap sa ilalim ng matuwid na pamamahala ni Pangulong Noynoy 'PNoy' Aquino alang-alang sa kaligtasan ng mas nakakaraming mga Pilipino.
***
Walang itinatago ang Pilipinas at ginagawa nito ang konkretong mga hakbang sa paghahanap ng mga solus­yon kaugnay sa problema ng paglabag sa karapatang-pantao.
Tama ang paniniyak ni Justice Secretary Leila de Lima sa US-based human rights groups na inimbitahang dumalo sa isang dayalogo sa embahada ng Pilipinas sa Washington na hindi nagpapabaya ang Pilipinas.
Kabilang sa mga dumalo ang kinatawan ng Human Rights Watch, Amnesty International, Committee to Protect Journalists, Ecumenical Advisory Network, International Justice Mission at Filipino Migrant Heritage Commission.
Walang basehan ang paratang na hindi pinapatawan ng parusa ng administrasyong Aquino ang anumang polisiya ng paggamit ng karahasan, panggigipit at banta para labagin ang iba't ibang kalayaan na tinatamasa ng mga tao.
Hindi rin tamang isipin na hindi bumuti ang sitwasyon ng paggalang sa karapatang-pantao sa Pilipinas o nabigo ang pamahalaang Aquino na tuparin ang pangakong itigil ang kultura ng karahasan sa bansa.
Malinaw naman na kitang-kita ang pagsusumikap ng pamahalaan na isulong ang prosekusyon ng mga taong inakusahan at responsable sa tinatawag na extrajudicial killings.
Sa katunayan, itinatag pa nga ang tanggapan ng human rights affairs sa Armed Forces of the Philippines (AFP) at Philippine National Police (PNP) upang bigyang edukasyon ang uniformed personnel sa kahalagahan na obserbahan at igalang ang karapatang-pantao. Pinagbubuti rin ng Department of Justice (DOJ) ang Witness Protection Program ng pamahalaan.
Tulungan natin ang pamahalaan na maisulong ang mas mataas na conviction rate sa kaso ng mga lumalabag sa karapatang-pantao dahil lagi naman mayroong espasyo para mapabuti ito.

Laging tandaan: "Bata n'yo ko at Ako ang Spy n'yo". (mgakurimaw.blogspot.com)

Monday, October 1, 2012

Kauna-unahan!



Kauna-unahan!
REY MARFIL




May katwiran si Pangulong Noynoy "PNoy" Aquino na matuwa at purihin si Public Works Secretary Rogelio Singson sa nakaraang inauguration o pagpapasinaya sa bagong gawang underpass sa Araneta-Quezon Avenue na tiyak na magpapaluwag sa daloy ng trapiko sa lugar.
Matapos nga ang mahigit isang taon na pagsasakripisyo ng mga motorista na dumadaan sa panulukan ng Araneta Ave. at Quezon Avenue, ngayo'y mararanasan na nila ang ginhawa sa pagtawid sa panulukan na ito dahil magagamit na ang underpass na may habang 400 metro.
Pero hindi lang sa pagkakatapos ng underpass dapat matuwa ang buong mamamayan, at hindi lang ang mga motorista na makikinabang dito. Kasi naman, isiniwalat ni PNoy na dahil mas maagang natapos ang proyekto at redesign nito, mahigit P200 milyon ang natipid ng gobyerno.
Sa orihinal na kwentada, inaasahan na matatapos ang proyekto sa loob ng 18 buwan na may kabuuang pondo na P694.15 milyon. Pero, natapos ito sa loob lamang ng 15 buwan at ang gastos ay umabot lamang sa P430 milyon ito'y malayo sa sistemang nakagisnan ng publiko at lalong milya-milya ang pagkakaiba sa nakaraang 9-taon.
Kaya tatlong (3) buwan ang nabawas sa pagdurusa ng mga motorista, malaking katipiran sa nagagastos na gasolina o diesel kapag nababad sa matagal na trapik sa lugar. Makikita sa hitsura ng mga motoristang na-interview ang sobrang kagalakan dahil sa guminhawa ang paglalakbay ng mga ito.
Tamang-tama ito ngayong panahon ng kapaskuhan dahil tiyak na mas marami ang dadaan dito para mamili sa mga mall sa Quezon City o kaya nama'y sa Divisoria sa Maynila.
***
Napag-usapan ang proyekto, kung tutuusin, hindi ito ang unang pagkakataon na nagawang mapabilis at makatipid ang pamahalaan sa mga proyekto. Sa nakaraang S­ONA ni PNoy, pinuri rin niya ang Energy Department dahil sa ma­laking katipiran na nagawa rin sa proyektong barangay electrification program.
Ang ganitong mga magandang balita ay pagpapakita ng malaking kaibahan sa nagdaang administrasyon na ina­akusahan ng katiwalian dahil sa mga umano'y overpricing sa mga proyekto.
Ang mahirap pa nito, baka nga overpriced na ang proyekto ay hindi pa natapos o kaya naman ay substandard. Tulad na lang ng Diosdado Macapagal Blvd. na ginawa noong 2002.
Dahil umabot sa P1.1 bilyon ang ginastos sa 5.1 kilometrong kalsada, tinagurian na ito ngayon na pinakamahal na kalsada, hindi lang marahil sa Pilipinas, baka ma­ging sa buong mundo.
Bukod pa diyan, pinapaimbestigahan din ni Sen. Serge Osmeña ang President Bridge Program ni dating Pangulong Gloria Macapagal-Arroyo dahil din sa alegasyon ng katiwalian.
Mga katiwalian katulad ng umano'y overpricing o kaya naman ay sadyang pagsasayang lang ng pera ng bayan dahil sa pagtatayo ng mga tulay na hindi na pala talaga kailangan.
Ang Araneta-Quezon Avenue underpass na nagawa sa ilalim ng administrasyon ni PNoy ay patunay ng pagiging seryoso at tapat ng kasalukuyang administrasyon na magamit sa tama ang pondo ng bayan.
At dahil pera ito ng bayan, nais matiyak ni PNoy na makakakuha ng pinakamagandang presyo ang mamamayan sa isang matinong proyekto na makakamura ang gobyerno.
Kung mas marami ka namang matitipid, mas marami ang maiipong pondo na puwede pang gamitin sa ibang makabuluhang proyekto.

Laging tandaan: "Bata n'yo ko at Ako ang Spy n'yo." (mgakurimaw.blogspot.com)