Wednesday, August 25, 2010

Agosto 25 2010 Abante Tonite

‘Di natulog si PNoy!
Rey Marfil


Napakasimple ng aral at mensaheng iniwan sa nangya­ring hostage-taking sa Quirino Grandstand, hindi nakapag­hintay si dating Senior Inspector Rolando Mendoza sa pagbabagong ipi­nangako ni Pangulong Benigno Simeon ‘PNoy’ Aquino III, aba’y hindi lang lumihis ng daan, bagkus, maling bus ang sinakyan patungo sa pagbabagong inaasam.


Sa halip bumiyahe papuntang Batasan kung saan naroon ang Office of the Ombudsman, isang tourist bus na patu­ngong Ocean Park ang sinakyan.

Ang masakit, parang bulang nawala ang lahat ng pinaghirapan (PNP) ni Mendoza sa isang nakakahiyang pangyayari sa Quirino Grandstand at ngayo’y kinamumuhian ng buong mundo dahil pumatay ng 8 Hong Kong nationals at idinamay ang imahe ng bansa.


Maraming “kung at sana” ang kinalimutan ni Mendoza sa panahon ng kapusukan kaya’t naganap ang madugong pagwawakas ng kanyang buhay.

Kung nagawang umasa ni Mendoza ng pagbabago sa nakaraang eleksyon, sampu ng kapamilyang nagwawala sa national television, sana’y inisip ang maikling panahon ng pamamalagi sa Palasyo ni PNoy.


Hindi sapat ang 55-araw ni PNoy upang malinis ang lahat ng duming iniwan ng nagdaang administrasyon, lalo pa’t ngayon pa lamang nagkakahugis ang mga bakas nito.

Hindi madali ang trabaho ni PNoy -- ito’y hindi si Superman at lalong hindi Diyos na kayang resolbahin sa isang iglap ang problema ng 95 milyong Pinoy.


Habang nagwawala sa national television, harapang ‘sini­singil’ ng isa sa kapamilya ni Mendoza ang pangakong pagbabago ni PNoy sa nakaraang eleksyon, kaya’t malaking katanu­ngan kung nagawang ilapit sa kinauukulan ang problema bago gumawa ng marahas na aksyon ngayong bago ang administrasyon.


Ang report: ‘Namumulaklak’ sa medalya ang uniform ni Mendoza, kaya’t hindi lubos maisip ng mga kurimaw kung bakit idinaan sa dahas ang hangaring makabalik sa serbisyo, lalo pa’t napaka-transparent ni PNoy at bukas ang pintuan ng Malacañang sa bawat reklamo.

Kung matalino at matinong pulis si Mendoza, katulad ng papuri at pagkilala ng mga kaibigan, bakit hindi naabot ng kaisipan ang katotohanang appointee ni Mrs. Gloria Arroyo si Ombudsman Merceditas Guttierez at hindi type ni PNoy ang liderato nito?
***


Napag-uusapan si PNoy, halos hindi natulog buong magdamag upang bantayan ang bawat pangyayari sa Qui­rino Grandstand.

Sa pag-uumpisa ng hostage-taking, naka-monitor si PNoy bago pinag-oath-taking ang mga appointed officials, kasama ang inyong lingkod, ganap ala-una ng hapon (Lunes).


Pagkatapos ng oath-taking ceremony, balik sa Guest House si PNoy upang i-monitor ang bawat kaganapan sa Quirino Grandstand, kaya’t maling akusahang walang ak­syon lalo pa’t police matters ang pakikipagnegosasyon at hindi rin akmang makialam ang isang Pangulo sa hostage-taking dahil palalain lamang ang sitwasyon, maging ang ima­he sa international community.


Pagkatapos ng press conference sa Malacañang (alas-12:30 ng hatinggabi), nag-ocular inspection si PNoy sa pinangyarihan ng hostage drama (1:30 a.m.), kasama sina Presidential Communication Sec. Sonny Coloma, Usec. Chris Tio, Asec. Jun Delantar at ang inyong lingkod. Naroon sa Qurino Grandstand sina DILG Sec. Jesse Robredo at Usec. Rico Puno at iba pang police officials.


Nadatnan ni PNoy ang mga taga-Scene of the Crime Ope­ratives (SOCO) na nag-iimbestiga at nakauwi lamang ng Bahay Pangarap, dakong alas-dos ng madaling-araw.

Kaya’t maling sabihing ‘not on top’ ang Pangulo sa hostage-taking dahil walang tulog sa magdamag ito. Laging tandaan: “Bata niyo ko at Ako ang Spy niyo”.


(mgakurimaw.blogspot.com).

Agosto 23 2010 Abante Tonite

Pinagpahinga ang mga kawatan!
Rey Marfil


Hindi kailangang UP graduate para maintindihan ang babala ni Pangulong Benigno Simeon ‘PNoy’ Aquino III laban sa mga car smugglers, ito’y walang puwang sa kanyang gobyerno.

Hindi ba’t merong negosyanteng nasampolan, ilang oras makaraang magtalumpati si PNoy sa harap ng mga car manufacturer sa World Trade Cen­ter noong Agosto 19? Mantakin niyo, sandamakmak ang mamahaling sasakyan ng negosyante, hindi man lamang kinilabutan sa sarili tuwing tinatakasan ang pagbaba­yad ng buwis.


Sa “All Leaders Summit”, maging sa 10th Bayer Young Environment Envoys Awards at 3rd Philippine International Motor Show (PIMS) ng Chamber of Automotive Manufacturers of the Philippines (CAMPI), malinaw ang mensahe ni PNoy, merong “kalalagyan” ang lahat ng mga tiwali at lihis ang landas.

Mismong si PNoy, napansin ang pagsabay ng ibon sa kanyang paglalakad -- nanga­ngahulugang ito’y kumbinsido sa malinis na pamamahala kaya’t dapat nang magpahinga ang mga kawatan.


Sa nakaraang administrasyon, nagingmalaking “smuggling industry” sa iba’t ibang daungan ang ‘second hand car’, maging ang pagko-convert sa surplus vehicles bilang left hand drive, aba’y isinasabay ang mga bagong modelo upang makaiwas sa malaking buwis.

Kung magpapatuloy ang ganitong kalakaran, nanganganib mawalan ng trabaho ang 74,700 Pinoy na nasa vehicle assemblers industry.


Sa datos ng Department of Labor and Employment (DOLE), tinatayang P100 bilyon ang automotive industry sa Pilipinas at malaking tulong sa ekonomiya ng bansa -- ito’y nakakapag-ambag ng P20 bilyon sa buwis at P325 milyong withholding tax kada taon.

Sa unang 6 months, nakapagtala ng 37.1% pag-angat ang automotive industry, malinaw ang kumpiyansa kay PNoy ng mga negosyante.
***


Napag-uusapan ang All Leaders Summit at 10th Bayer Young Environment Envoys Awards, mabigat ang dekla­rasyon ni PNoy, makakatikim ng kaparusahan ang sumisira sa kalikasan at nagdudumi sa ilog.

Take note: Isang mahabang tanawin ni PNoy pagkagising sa umaga ang Pasig River at nagsisilbing malaking swimming pool sa Bahay Pangarap bago tumawid ng Guest House para mag-office.


Ang babala ni PNoy, hindi lamang papatawan ng mabigat na kaparusahan, bagkus, sasalang sa 15 days community service ang sinumang mahuhuling nagtatapon ng basura sa Pasig River at sumisira sa kapaligiran.

Ibig sabihin, mag-ingat ang mga nakakurbata sa Makati area at nagmamay-ari ng mga naglalakihang kumpanyang sumasalaula sa environment -- ito’y maglilinis ng imburnal at kubeta kapag naaktuhang nagtatapon ng balat ng kendi at upos ng sigarilyo sa kalsada.


Hindi lingid sa kaalaman ng publiko kung gaano kaimportante sa mga taga-Metro Manila ang 25-kilomet­rong Pasig River mula Laguna de Bay hanggang Look ng Maynila -- ito ang pinakamabilis at pangunahing ruta ng transportasyon.

Ang nakakalungkot, nasa ‘critical water body’ ang Pasig River, dahil tone-toneladang basura ang itinatapon kada araw mula sa kabahayan at industriyang nakatayo sa gilid nito.


Sa loob ng anim na taon, puntiryang mapagtagumpa­yan ang paglilinis sa Pasig River kaya’t malaking hamon ang kinakaharap, hindi lamang ni PNoy, bagkus, ng humigit-kumulang 100 milyong Pinoy.

Anyway, kung napa­talsik ang diktaduryang Marcos via People Power Revolution, hindi panaginip ang makapag-picnic sa Pasig River kung magkakapit-bisig ang bawat Pinoy, katulad sa panalo ni PNoy ng nakaraang eleksyon. Laging tandaan: Bata niyo ko at Ako ang Spy niyo.


(mgakurimaw.blogspot.com)

Friday, August 20, 2010

Agosto 20 2010 Abante Tonite

Ang mahiwagang bunot!
Rey Marfil


Kabaliktaran sa nakaraang administrasyon, kung me­ron pang ‘extra sinturon’, ito’y gagamitin ni Pangulong Benigno Simeon ‘PNoy’ Aquino III upang higpitan ang paggasta sa natitirang pondo, maging ang inihahandang proposed budget sa 2011 at 2010, lalo pa’t nababaon sa pagkakautang ng gobyerno, kasabay sa paglobo ng populasyon.


Isang teknolohiyang itinutulak ngayon ni PNoy ang ‘coconet tech’ -- ito’y programa ng Department of Public Works and Highways (DPWH), sa pakikipagtulungan ng Department of Agriculture (DA) at Department of Environment and Natural Resources (DENR), aba’y makakatipid ng P2.5 bilyon si Sec. Rogelio Singon para pigilan ang soil erosion o pagkaanod ng lupa.


Mismong si PNoy, inanunsyo sa 40th anniversary ng Presidential Management Staff (PMS) at ibinida sa Malacañang Press Corps (MPC) ang geotextile via coco­net technology -- ito’y gumagamit ng cocofiber o coconet upang mabawasan ang pagbaha at pagkaanod ng lupa.

Sa matagal na panahon, walang silbi ang mga bunot ng niyog (coconut husk), maliban sa pagpapakintab ng sahig, iyon pala’y susi para makatipid ang DPWH.


Dahil sa bunot, tinatayang 2/3 sa kabuuang annual budget ng DPWH na nakalaan sa slope protection o panga­ngalaga sa pagdalisdis ng mga bundok at paguho ng lupa ang matitipid ng gobyerno, katumbas ang P2.5 bilyon mula sa P3 bilyong inilaan kada taon.

Kung hindi nagkakamali sa computation ng mga kurimaw, nangangahulugang P500 milyon na lamang ang popondohan ng Kongreso.
***


Napag-uusapan ang bunot, hindi maaaring ismolin ng mga kritiko ang kaalaman ni PNoy sa teknolohiyang ito lalo pa’t dumadaan sa Subic-Clark-Tarlac Expressway (SCTEX) at mismong Pangulo ang nakasaksi sa paggamit ng bunot bilang slopes lining -- ito’y matagumpay at hanggang ngayo’y hindi natitibag ang kalye.


Hindi lamang napakasimpleng teknolohiya ang coconet, bagkus, napakamurang gamitin kesa magsemento o kongkreto.

Take note: P2,300.00 kada square foot ang halaga ng konkretong slopes, ito’y baryang maituturing sa P180.00 kada square foot kung bunot ang panapal sa slope, as in ‘coconet tech’.

Ibig sabihin, nakatipid na ang gobyerno, kumita pa ang mga magku-kopra sa naipong bunot.


Sa katulad ng inyong lingkod na lumaki sa isang pinamakahirap na probinsiya (Romblon), abot sa ating kaala­man kung gaano kapaki-pakinabang ang bunot tuwing bumabaha -- ito’y kadalasan ipinantatapal sa gilid ng mga sapa at pinakasimpleng pamamaraang naiisip ng ating mga kababayan bilang proteksyon sa kanilang bahay.


Bago pa man iprinisinta ng DPWH ang coconet technology, alam ng nakakaraming Pinoy kung gaano kaepek­tibong sumipsip ng tubig ang bunot.

Pansinin ang mga nagagandahang orchids sa bintana ng mga kabahayan sa probinsiya, hindi ba’t bunot ang pinagtataniman?

At bunot din ang madalas gamiting flower pot o kaya’y pinagtata­niman ng gulay sa mga likod bahay kapag limitado ang bakuran.

Kung hindi niyo pa rin maintindihan ang kaga­lingan ng bunot, subukang niyong kantahin ang “Da Coconut Nut” -- ang ipinanalo ng “Smokey Mountain” sa international song festival.

Sabi nga ni Maestro R­yan Ca­yabyab sa kanyang piyesa “There are so many uses of the coconut tree, You can build a big house for the family, All you need is to find a coconut man. If he catch the tree, he gets the fruit free”. Laging tandaan: Bata niyo ko at Ako ang Spy niyo.

(mgakurimaw.blogspot.com)

Wednesday, August 18, 2010

Agosto 18 2010 Abante Tonite

Bumayo ang ‘matuwid kong anino’
Rey Marfil


(Part 2)

Narito ang ikalawang bahagi ng pasabog ni “Matuwid Kong Anino” tungkol sa malawakang katiwalian at iba pang ‘karaketan’, as in illegal activities sa National Food Authority (NFA) ng nakaraang administrasyon:

Ngayon, mabalik tayo sa bidding, saan ka makakakita ng alas-12:00 ng madaling-araw ang pila, samantalang maliwanag sa guidelines na alas-otso ng umaga ang umpisa.

Kaya ang nangyari, umiiyak at umuuwing luhaan na lang ang natalong bidder, sapagkat ang mga taong tinutukoy ko sa itaas (Ms. AT at Mr. SJ) ay minamanipula ang mga binabayaran nilang NFA officers.


Bakit nga ba ganu’n na lang ang proteksyon na kanilang ginagawa?

Iyan ang tanong ng ating mga kurimaw?

Ang siste, may rebate kasi na pagpapartihan ng mga ganid sa pera na P1.00 at 50 sentimos kasi per kilo ang ibabalik sa kanila, ayon sa guidelines.


Nagbayad nga ng service fee na P2.00 (para pamalit sa ‘di pagbabayad ng taripa sa Bureau of Customs), tapos ibabalik din sa kanila.

Sobrang ganid at wise ano po?

Malaking buwis at pera ng bayan ang nawawala talaga kapag nagpatuloy iyan.


Tapos, nu’ng wala nang nagreklamo dahil ang iba ay napangakuan na bibigyan sila ng alokasyon -- hayun, tuloy ang ‘happy-happy’.

Ganyan ang sindikato kung guma­law. Kaya mag-ingat si NFA administrator Lito Banayo dahil baka mapunta lang sa kangkungan ang ginagawa niyang imbestigasyon.


Magkakutsaba kasi ang mga traders, farmers cooperatives at mga tinamaang opisyal ng kanyang ahensiya.

Oo nga pala, pagkatapos nilang makuha ang alokasyon, ipinagbibili nila ngayon iyong napanalunan nilang alokasyon na may patong.

At P250.00 kada bag naman ngayon. Aba naman, kagagaling po ano?


Laway lang ang puhunan. Kaya kung susumahin mo iyong kuwenta, mahigit P200 milyon hanggang P400 mil­yon ang kanilang kita.

Kaya’t ipatawag lahat ang mga sumali sa bidding na iyon para sila ay gisahin sa imbes­tigasyon.


Tingnan mo Ka Rey, magsisipagtago ang mga iyan at bahag ang buntot sa nerbiyos ang kanilang nararamdaman ngayon. Sigurado ‘yan.

Magkakaalaman talaga kapag nagkataon, nang sa gayon, malilinis natin ng unti-unti ang bayan natin.


Marami na akong nasabi sa ngayon, umpisa pa lang iyan.

Kung meron kang tanong sa mga bagay na sinabi ko, itanong mo na lang at sasagutin ko.

Marami pa akong ibibigay na impormasyon sa iyo na malaking tulong sa pag-iimbestiga ng mga katiwalian sa NFA. Sa susunod Ka Rey.


“Tandaan, Ako ang Spy mo sa isang matuwid na landas”.

Mananatiling tapat sa hangaring maging maayos ang bayan natin.

Batiin mo sana ako sa alyas na “Matuwid Kong Anino”. Pagpalain tayo ng Poong Maykapal.


Email sender: Matuwid Kong Anino
Spy’s Note: Ipinarating ni administrator Banayo sa inyong lingkod ang pag-aksyon sa sumbong ni Matuwid Kong Anino at makakaasa ang publiko ng resulta tungo sa matuwid na landas na ipinangako ni Pangulong Benigno Simeon ‘PNoy’ Aquino III. Laging tandaan: Bata niyo ko at Ako ang Spy niyo.


(mgakurimaw.blogspot.com)

Agosto 16 2010 Abante Tonite

Bumayo ang ‘matuwid kong anino’
Rey Marfil


(Part 1)

Hindi lang ‘naliligo sa bigas’ si National Food Authority (NFA) administrator Angelito “Lito” Banayo, bagkus, ‘lumalangoy’ sa dami ng eskandalong iniimbestigahan ang ahensya nito.

Isa sa reklamong natanggap ng inyong lingkod, ito’y nasa lamesa ngayon ni Banayo.

Narito ang kabuuang liham ng isang nagpakilalang “Matuwid Kong Anino” at nangyari ang lahat ng nakaraang administrasyon:


Magandang araw sa iyo, Sir Rey Marfil,
Matagal na akong naghahanap ng mapagsasabihan ng aking kaunting nalalaman sa operasyon ng mga magbibigas sa bansang ito

. ‘Di ko ko alam at ‘di rin ako nakakasigurado na ikaw nga ang taong iyon. Ika nga eh, “50-50” ang chance na isinusugal ko sa pagsusulat ko sa iyo.


Baka kasi katulad ka din ng iba na pagkakakitaan din ang impormasyon na ibibigay ko -- mga TRI-MEDIA na puro pansariling interes lang ang talagang pakay o kaya naman ay may kapamilya ka na masasagasaan kaya nag-iingat lang din ako.

Sindikatong nasyunal sa bigas kasi ang kakalabanin niyo eh.


Gayunpaman, magbabakasakali pa rin ako sa’yo. Ako ang Spy, ika nga. Alam ko na malapit ka naman kay PNoy (Pa­ngulong Benigno Simeon ‘Noynoy’ Aquino III) at sa mga senador na ang talagang layunin ay pagbabago kaya magbibigay ako ng ideya sa iyo kung paano gagawin ang imbestigasyon ninyo.


Napanood ko nga pala iyong mga nagpapakunyaring mga farmer leaders daw.

Kung susuriin mo, parang totoo ‘di ba? Pero huwag kayong padadaya, ipa-background check sila.

Sila ang mga gumagamit sa mga farmers natin para ma­ging importer ng bigas -- iyong dalawa nga eh andu’n sa NFA council pa.


Bakit ‘di ninyo ipagtanong kung sino sila?

Saan sila nanggaling?

May kaso ba sila dati?

Talaga bang farmers sila?

At bakit sila nag-i-import?

Bakit nga ba nag-i-import ang farmers natin?

‘Di ba, dapat sila ay nagtatanim para ‘di na tayo mag-import pa at magsusubsidiya ng bilyu-bilyon.

Balikan ang nakaraan, makikita ninyo kung paano nagamit at nalansi ang mga kawawang farmers na mga ito na pinapagamit ang kanilang pangalan, kapalit ng kaunting halaga.


Pero ang traders ay kikita ng milyun-milyon at makakaiwas pa sa pagbabayad ng buwis sa gobyerno, kakutsaba ng mga nangangasiwa sa importasyon.

Bakit ‘di ninyo ipagtanong sa Cebu? May media pa na naka-video daw nu’n eh?


Eto pa ang masakit na katotohanan Ka Rey, alam mo na ba, ngayong taong lang nagkaroon ng importasyon na naman para sa mga farmers?

Siguro naman, nabalitaan mo iyon?

Ano ba sa palagay mo ang totoong pangyayari sa likod nu’n?

Marahil, para sa iyo, balita lang iyon, pero ang totoo nu’n, may malaking anomalya (milyun-milyon) ang nangyayari du’n.


Una, sino ang mga nanalo sa bidding na ginawa ng NFA (na naman) du’n sa Cebu at Metro Manila?

Sino nga ba si “Ms. AT” na balita ko ay nanalo daw ng nakaraang elek­syon (local post).

Nanang ko po! Kawawa na naman ang mga cons­tituents nitong ganid na ito ng Cebu at isang “Mr. SJ” ng Maynila?

Ano nga ba ang koneksyon nila sa dating opis­yal Department of Agriculture (DA) at Malacañang, sa isang dating NFA officials may letrang “J”?


Bakit sila ganu’n kalakas at magkano ang tongpats niya sa mga NFA regional directors, assistant directors at mga pasimuno sa bidding?

Bakit ‘di ninyo kuhanin ang dokumento na magpapatunay kung kailan at ilan ang sumali?

Kaya makikita ninyo at maiimbestiga sila.

Iyong mga natalo du’n, sila mismo ang magpapatunay na kumita ang mga empleyado du’n.

Malakas ang loob nila noong April dahil alam nila na ‘di sila puwedeng tibagin at kuwestyunin.

Dahil ang nakaupo pa nu’n sa Palasyo ay ang mga ganid na katulad nila.


Abangan ang Part 2 sa Miyerkules. Laging tandaan: Bata niyo ko at Ako ang Spy niyo.


(mgakurimaw.blogspot.com)

Agosto 13 2010 Abante Tonite

May rason si PNoy!
Rey Marfil


Walang atrasan ang barangay at Sanguniang Kabataan (SK) elections ngayong Oktubre at balik sa Agosto 21 (Sabado) ang “Ninoy Aquino Day”, alinsunod sa direktiba ni Pangulong Benigno Simeon ‘PNoy’ Aquino III.

Kaya’t may pasok sa Agosto 23 (Lunes) at masuwerte ang “Saturday Group” -- ito’y special holiday, as in non-working day.


Hindi na kailangan pang pag-isipan kung bakit pina­boran ni PNoy ang barangay at SK election ngayong Oktub­re, aba’y subukang kumuha ng barangay clea­rance, karamihan dito’y kinapitan ng lumot sa tagal ng panunungkulan at hindi makapirma sa sobrang tanda o kaya’y anak ang nagpapatakbo ng komunidad dahil hindi na makabangon sa higaan ang lehitimong kapitan.


Higit sa lahat, paano magkakaroon ng katuparan ang ‘matuwid na daan’ ni PNoy kung araw-araw bad trip ang buong komunidad sa nakaupong barangay chairman dahil saksakan ng arogante, iresponsable at corrupt, ala­ngang lumipat sa ibang barangay at hindi naman paso ang lupang kinatitirikan ng kanilang bahay, maliban kung nangungupahan?


Maging sa usapin ng Sanguniang Kabataan, ito’y isang napakalaking kalokohan, aba’y maagang kinu-corrupt ang isipan ng mga kabataan kabaliktaran sa hangaring maturuan at linangin sa pamamalakad ng pamahalaan.

Suriin ang mga nakaupong SK chairman o kaya’y SK kagawad, hindi ba’t anak at pamangkin nina mayor, gobernador at congressman?

Kapag hindi pa nahiya sa kanilang balat, pati apo sa tuhod gustong gawing ‘muse’ ng barangay?


Ang pinakamalupit sa lahat, naturingang SK chairman o SK kagawad ang posisyong inuokupahan, karamihan dito’y lagpasan sa edad ng kabataan dahil pala­ging napu-postpone ang halalan.

Ika nga ni Director Mar Rodri­guez, ilan dito’y malapit ng magka-apo subalit kinakatawan pa rin ang mga kabataan sa kanilang barangay dahil palaging inirarason ng nakaraang administras­yon ang malaking gastusin ng pamahalaan gayong multi-bilyong piso ang ninanakaw.
***


Napag-uusapan ang “Ninoy Aquino Day”, dapat maintindihan ng publiko kung ano ang mas malaking epekto sa ekonomiya kapag inililipat ng ibang araw ang holiday o sobra-sobra ang non-working days.

Ngayong kinakapos ng pondo ang gobyerno at mara­ming ‘iniwang bakas’ si Mrs. Gloria Arroyo, kaila­ngan ang sakripisyo ng bawat Pilipino -- ito’y hindi kakayaning mag-isa ni PNoy.

Aanhin ang isang araw na bakasyon kung magiging kapalit nito’y karagdagang pagkain sa mga nagugutom?


Multi-bilyon ang nawawala sa negosyo kapag naililipat ang holiday sa working days, ito’y malaking kawalan sa gobyerno dahil maaantala ang transaksyon lalo pa’t Lunes ang Agosto 23, katulad ng naisabatas ng Kongreso na awtomatikong ililipat sa pinakamalapit na araw (weekdays) kapag pumatak ng weekend ang special ho­liday.

Isa pang dapat isipin ng publiko, napaka-importante kay PNoy ang August 21 -- ito ang petsa na pinaslang ang amang si Ninoy at ito rin ang simbolo sa pagtayong ama ng pamilya nito.

Kaya nga hindi nakakapag-asawa hanggang ngayon.
Sa naging desisyon ng Palasyo, asahang mag-aalburoto si Senador Joker Arroyo na ‘mastermind’ sa paglipat ng mga special holiday lalo pa’t ‘mortal enemy’ si PNoy sa committee hearing at session hall noong 14th Congress, mapa-Malolos Constitution hanggang paglikha ng ‘special district’ ni Cong. Dato Arroyo na pinalagan ng Pa­ngulo (PNoy) bilang chairman ng Senate committee on local government. Laging tandaan: ‘Bata niyo ko at Ako ang Spy niyo.’


(mgakurimaw.blogspot.com)

Wednesday, August 11, 2010

Agosto 11 2010 Abante Tonite

Tinamaan ng daga!
Rey Marfil


Kahit pa magpapako sa krus si Pangulong Benigno Simeon ‘PNoy’ Aquino III, hindi maisasalba ang Pilipinas sa maruming kalakaran, mapapulitika at burukrasya kung walang suporta at pagsasakripisyo ng bawat isa -- ito’y nakapaloob sa State of the Nation Address (SONA) at hinihingi ang pakikiisa ng mamamayan sa pagresolba ng problema at samahan sa isang matuwid na landas.


Napakasimple ang mensahe ng “Simpleng Pangulo”, hindi puwedeng puro reklamo ang gawin ni Juan dela Cruz sa isyung nababasa sa peryodiko at nasasaksihan sa bawat kanto, bagkus, makibahagi sa paghahanap ng solusyon kung nais makitang umaasenso ang kapitbahay at buong komunidad nito.

Iyon nga lang, tila walang tinamaan sa SONA ni PNoy, aba’y nagkalat pa rin ang mga tulisan at nagpalit lamang ng costume!


Ang nakakalungkot, samu’t-saring reklamo ang ipinupukol kay PNoy at sandamakmak ang suhestyon ng mga nagpapakilalang ‘righteous’, animo’y walang bahid ng katiwalian ang mga kamay gayong hanggang dulo ng mga kuko nito’y nakamarka ang ninakaw sa gobyerno, as in nagpasasa sa kapangyarihan at kabilang sa mga naglustay ng pondo ng nakaraang administrasyon.


Ika nga ni PNoy, paanong makakakuha ng trabaho ang mga taong hindi nabigyan ng pagkakataong mag-aral?

Paano magiging consumer kung walang trabaho? At paano magkakaroon ng bank account o makakapag-impok kung walang sinusuweldo?

Ibig sabihin, kailangang tulungan at dagdagan ang kakayahan ng kapwa para maging mabunga at maging isang mabuting Pilipino.
***


Bago malihis ang kaisipan ng publiko kung ano ang nilalaman ng Executive Order No. 4, napakasimple lamang ang explanation, ipinag-utos ni PNoy ang pagbabago sa pangalan ng Office of the Press Secretary (OPS) bilang Presidential Communications Operations Office (PCOO) at nilikha ang Presidential Communication Development and Strategic Planning Office (PCDSPO) bilang katuwang nito.

Ibig sabihin, iisang opisina at iisang pondo ang gagamitin ng nakaupong pinuno.


Hindi bago ang pagkakaroon ng dalawang pinuno na kapareho ang ranggo sa iisang ahensya o departamento, malinaw ang sistema sa Amerika -- ito’y merong 11-man director, sa ilalim ng pangangasiwa ng White House Communication Director (dating Assistant to the President for Communications):

Special Consultant to the President for Media Affairs; Deputy Director of Communications; Director of Speech Writing; Director for New Media; Director of Media Affairs; Director of Broadcast Media; Director of Specialty Media; Director of Hispanic Media; Director of Citizen Participation at Director of American Media.


Bagama’t napakaliit ng Pilipinas kumpara sa Amerika, hindi nagkakalayo ang sitwasyon ng dalawang bansa, aba’y matalisod ka lamang, ibang lengguwahe ang maririnig sa kabilang kalsada.

Kaya’t binago ni PNoy ang makalumang sistema dahil naging malaking ‘junta’ ng iisang tao ang government broadcast facilities -- ito’y ‘binaboy’ at ginawang ‘gatasan’ ng isang “Malaking Daga”.


Ang pinakamasakit sa lahat, nasira ang imahe ng OPS at nangibabaw ang isang maliit na ahensiyang pinangangasiwaan ng isang “Mala­king Daga” dahil ginamit ang posisyon upang gawing junta ang kapangyarihang ipinagkaloob ng Malacañang.

Laging tandaan: Bata niyo ko at Ako ang Spy niyo.

(mgakurimaw.blogspot.com)

Monday, August 9, 2010

Agosto 9, 2010 Abante Tonite

Sinasalo lahat ni PNoy!
Rey Marfil


Sa 15-pahinang State of the Nation Address (SONA) ni Pangulong Benigno Simeon ‘PNoy’ Aquino III, mas nasentro ang headlines ng mga peryodiko, mapa-broadsheets at tabloid sa ‘dagat ng bigas’ ng National Food Authority (NFA) o sobra-sobrang importasyon at iilan lamang ang nakapansin sa power rate hike ngayong Agosto, malinaw ang babala ng progresibong grupo sa P14/kwh increase.


Ang magandang balita, ito’y kaagad binara ni presi­dential spokesman Edwin Lacierda at binigyang-diing bababa ang power rate sa susunod na buwan, alinsunod sa kanilang pag-uusap ni Energy (DOE) Sec. Rene Almendras.

Anumang oras matapos ang rehabilitasyon ng San Jose Sub-station sa Bulacan -- ito ang naghahatid ng power supply sa Metro Manila at inaasahang mababawa­san ang singil sa konsumo ng kuryente.


Malinaw sa SONA ni PNoy ang problemang iniwan ni Mrs. Gloria Arroyo sa National Power Corporation (Napocor).

Kung babalikan ang page 5 ng SONA ni PNoy, nakadetalye kung paano puwersahang ipinabenta ng palugi ng administrasyon Arroyo ang kuryente sa Napocor, simula taong 2001 hanggang 2004 upang hindi tumaas ang presyo at kasing-linaw ng gin, bulag ang katotohanang konektado sa 2004 national elections.


Ang sabi ni PNoy: Sumagad ang pagkakabaon sa utang ng Napocor noong 2004 at napilitan ang national government na saluhin ang P200 bilyong utang nito.

Lingid sa kaalaman ng publiko, hindi nakatipid sa kuryente ang gob­yerno dahil binabayaran ni Juan dela Cruz ang inaakalang natipid.

Sa simpleng pag-analisa ng “Simpleng Pangulo” -- meron ng gastos sa kuryente, binabayaran pa ng bawat Pinoy ang pagkakautang ng gobyerno”.


Kung naging matino ang pag-utang ng gobyerno at hindi nagamit sa maling pulitika o ibinatay sa pangangaila­ngan ng nasasakupan, katulad ng pahayag ni PNoy, maaa­ring nadagdagan ang kasiguruhan sa power supply at hindi kinakabahan sa blackout tuwing sasapit ang tag-araw.
***


Maliban sa Napocor, ganito rin ang nakita ni PNoy sa Metro Railway Transit (MRT), hindi ba’t harapang ‘binili’ ng nakaraang administrasyon ang ‘pagmamahal’ ng commuters at pilit pinananatiling mababa ang pamasahe?

Sa pagpasok ng Aquino administration, namimiligrong makasuhan kapag hindi naipatupad ang karampatang fare increase.


Sa simpleng pananalita ng ‘Simpleng Pangulo’ -- hindi magampanpan ang garantiyang ibinigay sa operator para mabawi ang kanilang puhunan at nagawa pang utusan ang Land Bank of the Philippines (LBP) at Development Bank of the Philippines (DBP) na bilhin ang MRT.

Ibig sabihin, ipinagpalit sa naluluging operasyon ang salapi ni Juan dela Cruz.


Ngayong nakaumang ang pagtaas ng pasahe kada MRT at LRT station, ito’y isisisi kay PNoy gayong sa mahabang panahon, simula ng maupo si Mrs. Arroyo noong 2001 via EDSA II, iniwasang ipatupad ang fare hike dahil unpopular ang isyu, sa takot sumadsad ang popularidad sa ‘double zero’, lalo pa’t merong isyung nandaya noong 2004 elections.


Kung susuriin ang sitwasyon, napapanahong ipatupad ang fare hike, aba’y subukang mag-jeep mula Baclaran patungong Monumento, halos pumapalo sa P40.00 ang pasahe at hindi pa naka-air-con samantalang P15.00 lamang sa MRT at LRT na hindi pa pinagpawisan ang pasahero.

Kaya’t dapat maintindihan ng publiko na merong negosyante ang namuhunan at umiiyak sa maling patakaran ng nakaraang administrasyon.

Kung ganito ang magi­ging kalarakan, sino pang magnenegosyo? At huwag ding magreklamo kung nababaon sa kababayad ng utang ang gobyerno. Laging tandaan: Bata niyo ko at Ako ang Spy niyo.


(mgakurimaw.blogspot.com)

Friday, August 6, 2010

Agosto 06, 2010 Abante Tonite

May tama ka!
Rey Marfil


Walang pinag-iba sa lahar ng Pampanga ang ‘midnight appointments’, ito’y malaking ‘quarry’ sa huling dalawang buwan ni Mrs. Arroyo sa Palasyo at hindi kayang bilangin ng isang Grade 1 pupil sa dami ng mga ipinuwesto.

Sa pinakahuling inventory ni presidential legal counsel Ed de Mesa, may kabuuang 977-katao ang tatamaan ng Exe­cutive Order No. 2.


Ngayong nailabas ang EO No. 2, pinakamaginoong gawin ng mga kampon ni Mrs. Arroyo ang magbalot ng gamit at mag-voluntary exit kesa magmukhang kapit-tuko sa puwesto.

Mas nakakahiyang panoorin kung magpaparesponde sa Korte Suprema para harangin ang pagkakasibak lalo pa’t napakalinaw kung kanino linyado ang kanilang hanay.


Hindi kailangang law graduate (LLB) para maintindihan ang nilalaman ng EO No. 2, malinaw ang kautusan ni Pangulong Benigno Simeon ‘PNoy’ Aquino III, lahat ng GMA Boys na magkakabisa ang panunungkulan, simula Marso 11 pataas, kahit pa itinalaga bago naipatupad ang ban, ito’y dapat lumayas sa kanilang kinalalagyan.

Kaya’t asahang babaha ng luha sa mga departamentong pinamumugaran ng midnight appointees, maging ang ilan pang pinaboran ni Mrs. Arroyo kapag nabasa ang isa pang kautusan ni PNoy -- ang Executive Order No. 3.


Sa mga nagtatanong kung sino sa mga ‘GMA Boys’ ang tinamaan ng EO No. 2, ilan dito’y naunang nag-resign.

Kaya’t magandang ehemplo ang ipinakita ni ex-Press Secretary Jess Dureza, ito’y nag-voluntary exit bilang hepe ng Mindanao Development Authority (MDA). Sa mga ‘kapalmuks’, as in makakapal ang pagmumukhang tauhan ni Mrs. Arroyo, dapat humiram ng konting delicadeza at hiya kay Manong Jess.
***

Napag-uusapan ang hiya, sa mismong attached agencies ng Office of the Press Secretary (OPS), nagkalat ang mga taong walang delicadeza.

Mantakin niyo, meron pang humihirit ng suweldo sa nakaraang katapusan ng buwan (July 30), gayong kahit anino sa loob ng siyam na taon, hindi man lamang naaninag ng mga kasamahan sa opisina.


Hindi natin babanggitin ang mga pangalan, subalit nakakasukang isiping nagpapakita lamang tuwing araw ng sahuran, subalit sumasahod ng P35 libo hanggang P40 libo kada buwan bilang consultant.

Ang nakakatawa, umaasa pa ng milagro sa bagong administrasyon at gustong magpa-reappoint gayong nagpasasa sa kapangyarihan ang mga ito.


Ang isang pinakamalalang nadiskubre ng Spy, ang polisiya sa mga government station, mapa-radyo at tele­bisyon, animo’y sinalo ang lahat ng grasyang isinaboy ng Panginoon.

Katulad ng basketball game, aba’y sila-sila rin ang nagkikita sa finals at nagpapartihan sa kinikita ng gobyerno mula sa commercials at ipinambabayad ng mga block timer gayong pasuwelduhan ang mga ito.


Sa bagong administrasyon, hindi uubra kay Presidential Communication Office for Operations (PCOO) Secretary Sonny Coloma ang nakagisnang palusot ng mga itinatalagang ‘big boss’ sa government station.

Kaya’t simulan nang sanayin ng mga empleyado kung paano mamuhay at kumita ng patas sa loob ng anim na taon dahil malinaw ang mensahe ni P-Noy sa inagurasyon “Taong bayan ang Boss”, hindi ang mga ‘big boss’ sa network.


Anyway, patok ang ‘first pay check’ ni P-Noy sa Face­book, aba’y libu-libo ang sumaludo dahil transparent ang Pangulo sa kanyang suweldo (P63,002.17).

Sa loob ng 30-minuto, pumalo sa 2 libo ang nagbigay ng magandang comment at nag-tag ng “likes this” noong Miyerkules ng gabi.

Ang suhestyon ng Malacañang Press Corps (MPC): Pakasalan si Councilor Shalani Soledad upang hindi ta­maan ng 35% cut sa buwis. Laging tandaan: “Bata niyo ko at Ako ang Spy niyo.”


(mgakurimaw.blogspot.com).

Wednesday, August 4, 2010

Agosto 04, 2010 Abante Tonite

Nasaan ang tapang?
Rey Marfil


Sa hanay ng mga naupong presidente, simula kay Emilio Aguinaldo, mapa-Commonwealth hanggang magsarili ang mga Pilipino, walang kasing-tapang si Pampanga Congw. Gloria Macapagal-Arroyo kahit pa ihambing kay dating Pangulong Ferdinand Marcos, aba’y hindi man lamang tumayo ang balahibo sa makailang-beses na pagpapraktis ng rebel group at nagawa pang ipakulong ang tropang Magdalo at napaamong parang tuta ang ilan dito.


Makailang-beses tinangkang patalsikin si Mrs. Arroyo ng iba’t ibang uri ng disgruntled group, mapami­litar man, na hindi kaya nitong bahugan ng promosyon hanggang sa kaliit-liitang hanay ng oposisyon at militant sector, subalit hindi natinag at ginawa pang extension ang North Harbor, animo’y na-convert sa malaking pier ang Palasyo sa dami ng container van na ipinangharang, huwag lamang ma-evict sa poder ito.


Alam niyo na ngayon kung bakit naging kinatawan ng mga guwardiya si Ang Galing Pinoy partylist Rep. Mikey Arroyo, ito’y merong pinagmanahan sa kanyang ina kung galing at husay sa pagbabantay ang kompetisyon.

In fairness kay Mikey, ito’y may karapatang rumesbak sa ibang sectoral group, partikular ang mga nagmamalinis at nagpapakilalang lehitimong organisasyon gayong ilan dito’y binili din lamang ang posisyon sa Kongreso.


Kung si ex-Secretary Angelo Reyes umaastang sugo ng mga tsuper at operator, wala ring pinag-iba si Mikey, maging ng ilan pang sectoral group, mapa-cooperative hanggang barangay association.

Tanging question lamang, nasaan ang delicadeza ng pamilya Arroyo lalo pa’t nagkumpulan sa Kongreso ang buong angkan?

Kung naka­balik pa si ex-Partylist Rep. Marilou Arroyo, kumpleto ang ‘1st 5 defensive team’ sa Lower House.
***
Napag-uusapan ang tapang ni Mrs. Arroyo, hindi pa rin nagbabago ng estilo ang “Mahal na Pangulo” ni Little Mike Defensor, aba’y kung sinu-sino ang pinapasalag sa lahat ng banat, as in puro pa rin takbo gayong napakatapang gumawa ng kabulastugan sa loob ng siyam na taon, maliban kung bulag at bingi si Albay Cong. Edcel Lagman kaya’t kaliwa’t-kanan ang depensa sa kanyang Ma’am?


Ngayong nakabalik sa Pilipinas at naiwasan ni Mrs. Arroyo ang posibleng pagdugo ng tainga sa mga pasabog at paniningil sa kanyang kasalanan sa SONA, napapanahong humugot ng ‘fighting spirit’ kay Sarangani Cong. Manny Pacquiao, ito’y tumayo sa floor at nagsa­lita.

Ang tanong lamang: Kaya bang salagin ni Mrs. Arroyo ang suntok ng mga taga-mayorya lalo pa’t nagtalunan sa ibang bakuran ang mga dating katropa?


Kung sadyang matapang at walang takot si Mrs. Arroyo sa lahat ng mga eskandalong kinasangkutan o malinis ang kanyang budhi at walang bahid ng katiwa­lian ang mga kamay, sampu ng mga galamay, katulad ng ipi­nakitang imahe sa sambayanang Pilipino sa loob ng 9-taon, bakit allergic sa Executive Order No. 1 na inilabas ng Malacañang?


Ika nga ni Assistant Secretary (Asec.) Zaldy dela Yola, hindi kailangang katakutan ni Mrs. Arroyo ang Truth Commission kung naging totoo sa sarili at lalong hindi dapat ‘dagain sa dibdib’ kung busilak ang kalooban.

Hindi ba’t puro “paglulubid ng buhangin” ang resbak ni Atty. Jess Santos sa mga nagdadawit kay First Gentleman Mike Arroyo sa mga katiwalian, kaya’t hindi dapat matakot kung nagsimulang ipunin ni Pa­ngulong Noynoy Aquino ang mga buhanging iniwan. Laging tandaan: “Bata niyo ko at Ako ang Spy niyo”.


(mgakurimaw.blogspot.com)

Monday, August 2, 2010

Agosto 2 2010 Abante Tonite

Maraming ulupong sa kanto!
Rey Marfil


Simula kampanya hanggang ngayon, hindi madali ang laban ni Pangulong Benigno Simeon ‘PNoy’ Aquino III lalo pa’t naglipana pa rin sa iba’t ibang departamento at sangay ng gobyerno ang mga masasamang ele­mento -- ito’y malinaw sa naging mensahe ni PNoy sa 1st death anniversary ng inang si Pangulong Corazon ‘Tita Cory’ Aquino.


Ang paalala ni PNoy “hindi madali ang kanyang trabaho sapagkat may ilan na ipinaglalaban pa rin ang nakagisnang mali”.

Ibig sabihin, hindi nagtatapos sa ‘pagpatay’ sa mga wangwang at naghahari-harian sa daan ang problema ng lipunan, bagkus, ang malawakang katiwaliang nakasanayan sa mahabang panahon na naging malaking institusyon sa gobyerno.


Sa pagtahak ng ‘matuwid na landas’, asahang mas ma­tinding seguridad ang ipagkakaloob ni Presidential Security Group (PSG) chief Col. Chito Dizon kay PNoy.

Kalokohan kung hindi gagawa ng marahas na pagkilos ang mga taong sagad hanggang buto ang kaitiman ng budhi dahil naisara ang gripo ng pinagkakakitaan.

Kaya’t kailangang mag-ingat si PNoy sa bawat kanto, aba’y mahirap makasalubong ng nagkukunyaring lasing.


Ika ni Pareng Ryan Pacpaco, sa bawat aksyon tungo sa isang matuwid na landas at tunay na pagbabago, hindi lamang ulupong ang nakabuntot kay PNoy na handang umatake at manuklaw, anumang oras na malingat ng puwesto, bagkus, ang mga asong kalyeng (askal) naulol dahil walang makain.

Take note: Santo-sawa sa bahog ang mga nawala sa poder ng nakaraang administrasyon at ngayo’y nangangayayat, as in labas ang mga buto sa gutom kaya’t siguradong maghahanap ng damay ang mga ito.
***


Napag-uusapan ang 1st death anniversary ni Tita Cory sa La Salle Greenhills, muling ipinakita ni PNoy ang pagiging mapagbigay sa media kahit nagdudumaling umalis para dumalaw sa puntod ng mga magulang sa Manila Memorial Park at kahit on the spot, hindi rin takot sumagot sa isyung panlipunan.

Lingid sa kaalaman ng publiko, walang naka-iskedyul na press conference si PNoy pagkatapos ng misa subalit pinaunlakan ang pakiusap ng Sunday group-Malacañang Press Corps (MPC) bago mag-exit sa area.

At katulad ng nakaugalian, nagkaroon ng ‘extra’ ang napagkasunduang ‘5-question’ dahil ayaw paawat ni Tita Vanz.


Kung hindi naghigpit ang organizer, posibleng umapaw ang pinagdausan ng misa sa dami ng gustong makinig sa talumpati at homiliya, animo’y take 2 sa dami ng mga nakiramay at dumalaw sa burol ng mga labi ni Mrs. Aquino bago dinala sa Manila Cathedral.

Kaya’t konting pang-unawa sa mga supporters ni PNoy kung nauwi sa ‘No ID, No Entry’ ang policy sa La Salle compound dahil masikip ang lugar at ito’y hindi event ng Malacañang.
Ang biruan ng ilang medi

a habang hinihintay ang pagdating ni PNoy sa La Salle, dapat kinuha ng organizer ang serbisyo ng tropa ni Ang Galing Pinoy partylist Rep. Mikey Arroyo sa pagma-marshal dahil nagpapakilalang kinatawan ng mga guwardiya kahit hindi pa naranasang mag-duty kahit 30-minutes sa entrance gate ng Batasan o kaya’y sa sariling opisina. Laging tandaan: “Bata niyo ko at Ako ang Spy niyo”.


(mgakurimaw.blogspot.com).